[833] Padaññatra asammatā tathā atthaṅgatena ca
tiracchānavijjā dve vuttā anokāse 1- ca pucchanā
satta sikkhāpadā ete vācā na kāyacittato
vācācittena jāyanti na tu kāyena jāyare
dvisamuṭṭhānikā sabbe padasodhammasādisā.
Padasodhammasamuṭṭhānaṃ niṭṭhitaṃ.
[834] Addhānanāvaṃ paṇītaṃ mātugāmena saṅghare
dhaññaṃ nimantitā ceva aṭṭha ca pāṭidesanī 2-
sikkhā paṇṇarasā 3- ete kāyā na vācā na manā
kāyavācāya 4- jāyanti na te cittena jāyare
kāyacittena jāyanti na te jāyanti vācato
kāyavācāya 4- cittena samuṭṭhānā catubbidhā
@Footnote: 1 Ma. anokāso. 2 Po. Yu. pāṭidesani. 3 Ma. paṇṇarasa. 4 Ma. kāyavācāhi.
Paññattā buddhañāṇena addhānena samā nayā 1-.
Addhānasamuṭṭhānaṃ niṭṭhitaṃ.
[835] Theyyasatthaṃ upassuti sūpaviññāpanena ca
ratti channañca okāsaṃ ete byūhena sattamā
kāyacittena jāyanti na te jāyanti vācato
tīhi dvārehi jāyanti dvisamuṭṭhānikā ime
theyyasatthasamuṭṭhānā desitādiccabandhunā.
Theyyasatthasamuṭṭhānaṃ niṭṭhitaṃ.
[836] Chattapāṇissa saddhammaṃ na desenti tathāgatā
tatheva 2- daṇḍapāṇissa satthaāvudhapāṇinaṃ
pādukupāhanā yānaṃ seyyā pallatthikāya ca
veṭhitoguṇṭhito ceva ekādasamanūnakā
vācācittena jāyanti na te jāyanti kāyato
sabbe ekasamuṭṭhānā samakā dhammadesanā 3-.
Dhammadesanasamuṭṭhānaṃ niṭṭhitaṃ.
[837] Bhūtaṃ kāyena jāyati na vācāya na cittato
vācato ca samuṭṭhāti na kāyā na ca cittato
kāyavācāya jāyati na ca 4- jāyati cittato
@Footnote: 1 Ma. Yu. sahāsamā. 2 Ma. Yu. evameva. 3 Ma. Yu. sammatādhammadesane.
@4 Ma. Yu. tu.
Bhūtārocanakannāma 1- tīhi ṭhānehi jāyati.
Bhūtārocanasamuṭṭhānaṃ niṭṭhitaṃ.
[838] Corī vācāya cittena na taṃ 2- jāyati kāyato
jāyati tīhi dvārehi corīvuṭṭhāpanaṃ idaṃ
akataṃ dvisamuṭṭhānaṃ dhammarājena ṭhapitaṃ 3-.
Corīvuṭṭhāpanasamuṭṭhānaṃ niṭṭhitaṃ
[839] Ananuññātaṃ vācāya na kāyā na ca cittato
jāyati kāyavācāya na taṃ jāyati cittato
jāyati vācācittena na taṃ jāyati kāyato
jāyati tīhi ṭhānehi 4- akataṃ catuṭṭhānikaṃ.
Ananuññātasamuṭṭhānaṃ niṭṭhitaṃ.
The Pali Tipitaka in Roman Character Volume 8 page 229-231.
https://84000.org/tipitaka/read/roman_item.php?book=8&item=833&items=7
Classified by [Item Number] :-
http://84000.org/tipitaka/read/roman_item.php?book=8&item=833&items=7&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=8&item=833&items=7
Compare with The Royal Version of Thai Tipitaka :-
https://84000.org/tipitaka/read/byitem.php?book=8&item=833&items=7
Study Atthakatha :-
https://84000.org/tipitaka/attha/attha.php?b=8&i=833
Contents of The Tipitaka Volume 8
https://84000.org/tipitaka/read/?index_8
https://84000.org/tipitaka/english/?index_8
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
