paliTIPITAKA Volume 24 - Sutta Pitaka 16

[68] Ekaṃ samayaṃ bhagavā naḷakapāne viharati palāsavane tena kho pana samayena bhagavā tadahuposathe bhikkhusaṅghaparivuto nisinno hoti athakho bhagavā bahudeva rattiṃ bhikkhū dhammiyā kathāya sandassetvā

--------------------------------------------------------------------------------------------- page135.

Samādapetvā samuttejetvā sampahaṃsetvā tuṇhībhūtaṃ tuṇhībhūtaṃ bhikkhusaṅghaṃ anuviloketvā āyasmantaṃ sārīputtaṃ āmantesi vigatathīnamiddho kho sārīputta bhikkhusaṅgho paṭibhātu taṃ sārīputta bhikkhūnaṃ dhammī kathā piṭṭhi me āgilāyati tamahaṃ āyamissāmīti . Evaṃ bhanteti kho āyasmā sārīputto bhagavato paccassosi. {68.1} Athakho bhagavā catuguṇaṃ saṅghāṭiṃ paññāpetvā dakkhiṇena passena sīhaseyyaṃ kappesi pāde pādaṃ accādhāya ^1- sato sampajāno uṭṭhānasaññaṃ manasikaritvā . tatra kho āyasmā sārīputto bhikkhū āmantesi āvuso bhikkhavoti . āvusoti kho te bhikkhū āyasmato sārīputtassa paccassosuṃ . āyasmā sārīputto etadavoca yassakassaci āvuso saddhā natthi kusalesu dhammesu hiri natthi ... Ottappaṃ natthi ... Viriyaṃ natthi ... Paññā natthi ... Sotāvadhānaṃ natthi ... Dhammadhāraṇā natthi ... atthūpaparikkhā natthi ... dhammānudhammapaṭipatti natthi ... Appamādo natthi kusalesu dhammesu tassa yā ratti vā divaso vā āgacchati hāniyeva pāṭikaṅkhā kusalesu dhammesu no vuḍḍhi seyyathāpi āvuso kāḷapakkhe candassa yā ratti vā divaso vā āgacchati hāyateva vaṇṇena hāyati maṇḍalena hāyati ābhāya hāyati ārohapariṇāhena evameva kho āvuso yassakassaci saddhā natthi kusalesu dhammesu hiri natthi ... ottappaṃ natthi ... viriyaṃ natthi ... paññā natthi ... Sotāvadhānaṃ natthi ... dhammadhāraṇā natthi ... Atthūpaparikkhā natthi ... @Footnote: ¹ Po. accodhāya.

--------------------------------------------------------------------------------------------- page136.

Dhammānudhammapaṭipatti natthi ... appamādo natthi kusalesu dhammesu tassa yā ratti vā divaso vā āgacchati hāniyeva pāṭikaṅkhā kusalesu dhammesu no vuḍḍhi. {68.2} Yassakassaci āvuso saddhā atthi kusalesu dhammesu hiri atthi ... Ottappaṃ atthi ... Viriyaṃ atthi ... Paññā atthi ... Sotāvadhānaṃ atthi ... Dhammadhāraṇā atthi ... Atthūpaparikkhā atthi ... Dhammānudhammapaṭipatti atthi ... appamādo atthi kusalesu dhammesu tassa yā ratti vā divaso vā āgacchati vuḍḍhiyeva pāṭikaṅkhā kusalesu dhammesu no pārihāni seyyathāpi āvuso juṇhapakkhe candassa yā ratti vā divaso vā āgacchati vaḍḍhateva vaṇṇena vaḍḍhati maṇḍalena vaḍḍhati ābhāya vaḍḍhati ārohapariṇāhena evameva kho āvuso yassakassaci saddhā atthi kusalesu dhammesu hiri atthi ... Ottappaṃ atthi ... Viriyaṃ atthi ... Paññā atthi ... sotāvadhānaṃ atthi ... Dhammadhāraṇā atthi ... Atthūpaparikkhā atthi ... dhammānudhammapaṭipatti atthi ... appamādo atthi kusalesu dhammesu tassa yā ratti vā divaso vā āgacchati vuḍḍhiyeva pāṭikaṅkhā kusalesu dhammesu no pārihānīti. {68.3} Athakho bhagavā paccuṭṭhāya āyasmantaṃ sārīputtaṃ āmantesi sādhu sādhu sārīputta yassakassaci sārīputta saddhā natthi kusalesu dhammesu hiri natthi ... ottappaṃ natthi ... viriyaṃ natthi ... paññā natthi ... sotāvadhānaṃ natthi ... dhammadhāraṇā natthi ... atthūpaparikkhā natthi ... dhammānudhammapaṭipatti natthi ...

--------------------------------------------------------------------------------------------- page137.

Appamādo natthi kusalesu dhammesu tassa yā ratti vā divaso vā āgacchati hāniyeva pāṭikaṅkhā kusalesu dhammesu no vuḍḍhi seyyathāpi sārīputta kāḷapakkhe candassa yā ratti vā divaso vā āgacchati hāyateva vaṇṇena hāyati maṇḍalena hāyati ābhāya hāyati ārohapariṇāhena evameva kho sārīputta yassakassaci saddhā natthi kusalesu dhammesu .pe. appamādo natthi kusalesu dhammesu tassa yā ratti vā divaso vā āgacchati hāniyeva pāṭikaṅkhā kusalesu dhammesu no vuḍḍhi. {68.4} Yassakassaci sārīputta saddhā atthi kusalesu dhammesu hiri atthi ... Ottappaṃ atthi ... Viriyaṃ atthi ... Sotāvadhānaṃ atthi ... Dhammadhāraṇā atthi ... atthūpaparikkhā atthi ... dhammānudhammapaṭipatti atthi ... appamādo atthi kusalesu dhammesu tassa yā ratti vā divaso vā āgacchati vuḍḍhiyeva pāṭikaṅkhā kusalesu dhammesu no pārihāni seyyathāpi sārīputta juṇhapakkhe candassa yā ratti vā divaso vā āgacchati vaḍḍhateva vaṇṇena vaḍḍhati maṇḍalena vaḍḍhati ābhāya vaḍḍhati ārohapariṇāhena evameva kho sārīputta yassakassaci saddhā atthi kusalesu dhammesu .pe. appamādo atthi kusalesu dhammesu tassa yā ratti vā divaso vā āgacchati vuḍḍhiyeva pāṭikaṅkhā kusalesu dhammesu no pārihānīti.

The Pali Tipitaka in Roman Character Volume 24 page 134-137. http://84000.org/tipitaka/read/roman_item_s.php?book=24&item=68&items=1&pagebreak=1 Classified by [Item Number] :- http://84000.org/tipitaka/read/roman_item_s.php?book=24&item=68&items=1&pagebreak=1&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=24&item=68&items=1&pagebreak=1 Compare with The Royal Version of Thai Tipitaka :- http://84000.org/tipitaka/read/byitem_s.php?book=24&item=68&items=1&pagebreak=1 Study Atthakatha :- http://84000.org/tipitaka/attha/attha.php?b=24&i=68 Contents of The Tipitaka Volume 24 http://84000.org/tipitaka/read/?index_24