PaliRoman Vol.18

Moggallānasaṃyuttaṃ [515] Ekaṃ samayaṃ āyasmā mahāmoggallāno sāvatthiyaṃ viharati jetavane anāthapiṇḍikassa ārāme . tatra kho āyasmā mahāmoggallāno bhikkhū āmantesi āvuso bhikkhaveti ^1- . Āvusoti kho te bhikkhū āyasmato mahāmoggallānassa paccassosuṃ. {515.1} Āyasmā mahāmoggallāno te bhikkhū ^2- etadavoca idha mayhaṃ āvuso rahogatassa paṭisallīnassa evaṃ cetaso parivitakko udapādi paṭhamajjhānaṃ paṭhamajjhānanti vuccati katamaṃ nu kho paṭhamajjhānanti . tassa mayhaṃ āvuso etadahosi idha bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamajjhānaṃ upasampajja viharati idaṃ vuccati paṭhamajjhānanti . So khvāhaṃ āvuso vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamajjhānaṃ upasampajja viharāmi . tassa mayhaṃ āvuso iminā vihārena viharato kāmasahagatā saññāmanasikārā samudācaranti. {515.2} Atha kho maṃ āvuso bhagavā iddhiyā upasaṅkamitvā etadavoca moggallāna moggallāna mā brāhmaṇa paṭhamajjhānaṃ pamādo paṭhamajjhāne cittaṃ saṇṭhapehi paṭhamajjhāne cittaṃ ekodiṃ ^3- karohi paṭhamajjhāne cittaṃ samādahāti . so khvāhaṃ āvuso aparena samayena vivicceva kāmehi vivicca akusalehi @Footnote: ¹ Yu. bhikkhavoti . ² Ma. Yu. te bhikkhūti pāṭhadvayaṃ na dissati. ³ Yu. ekodi. @evamuparipi. Dhammehi savitakkaṃ savicāraṃ vivekajaṃ pītisukhaṃ paṭhamajjhānaṃ upasampajja vihāsiṃ . yaṃ hi taṃ āvuso sammā vadamāno vadeyya satthārānuggahito sāvako mahābhiññataṃ pattoti . mamaṃ taṃ sammā vadamāno vadeyya satthārānuggahito sāvako mahābhiññataṃ pattoti. [516] Dutiyajjhānaṃ dutiyajjhānanti vuccati katamaṃ nu kho dutiyajjhānanti . tassa mayhaṃ āvuso etadahosi idha bhikkhu vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyajjhānaṃ upasampajja viharati idaṃ vuccati dutiyajjhānanti . so khvāhaṃ āvuso vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyajjhānaṃ upasampajja viharāmi . tassa mayhaṃ āvuso iminā vihārena viharato vitakkasahagatā saññāmanasikārā samudācaranti. {516.1} Atha kho maṃ āvuso bhagavā iddhiyā upasaṅkamitvā etadavoca moggallāna moggallāna mā brāhmaṇa dutiyajjhānaṃ pamādo dutiyajjhāne cittaṃ saṇṭhapehi dutiyajjhāne cittaṃ ekodiṃ karohi dutiyajjhāne cittaṃ samādahāti . so khvāhaṃ āvuso aparena samayena vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyajjhānaṃ upasampajja vihāsiṃ . yaṃ hi taṃ āvuso sammā vadamāno vadeyya satthārānuggahito sāvako mahābhiññataṃ pattoti . mamaṃ Taṃ sammā vadamāno vadeyya satthārānuggahito sāvako mahābhiññataṃ pattoti. [517] Tatiyajjhānaṃ tatiyajjhānanti vuccati katamaṃ nu kho tatiyajjhānanti . tassa mayhaṃ āvuso etadahosi idha bhikkhu pītiyā ca virāgā upekkhako ca viharati sato ca sampajāno sukhañca kāyena paṭisaṃvedeti yantaṃ ariyā ācikkhanti upekkhako satimā sukhavihārīti tatiyajjhānaṃ upasampajja viharati idaṃ vuccati tatiyajjhānanti . so khvāhaṃ āvuso pītiyā ca virāgā upekkhako ca viharāmi sato ca sampajāno sukhañca kāyena paṭisaṃvedemi yantaṃ ariyā ācikkhanti upekkhako satimā sukhavihārīti tatiyajjhānaṃ upasampajja viharāmi . tassa mayhaṃ āvuso iminā vihārena viharato pītisahagatā saññāmanasikārā samudācaranti. {517.1} Atha kho maṃ āvuso bhagavā iddhiyā upasaṅkamitvā etadavoca moggallāna moggallāna mā brāhmaṇa tatiyajjhānaṃ pamādo tatiyajjhāne cittaṃ saṇṭhapehi tatiyajjhāne cittaṃ ekodiṃ karohi tatiyajjhāne cittaṃ samādahāti . so khvāhaṃ āvuso aparena samayena pītiyā ca virāgā upekkhako ca viharāmi ^1- sato ca sampajāno sukhañca kāyena paṭisaṃvedemi ^2- yantaṃ ariyā ācikkhanti upekkhako satimā sukhavihārīti tatiyajjhānaṃ upasampajja vihāsiṃ . yaṃ hi taṃ āvuso sammā vadamāno vadeyya .pe. Mahābhiññataṃ pattoti. @Footnote: ¹ Yu. vihāsiṃ. ² Yu. paṭisaṃvedesiṃ. [518] Catutthajjhānaṃ catutthajjhānanti vuccati katamaṃ nu kho catutthajjhānanti . tassa mayhaṃ āvuso etadahosi idha bhikkhu sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthajjhānaṃ upasampajja viharati idaṃ vuccati catutthajjhānanti . so khvāhaṃ āvuso sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthajjhānaṃ upasampajja viharāmi . tassa mayhaṃ āvuso iminā vihārena viharato sukhasahagatā saññāmanasikārā samudācaranti. {518.1} Atha kho maṃ āvuso bhagavā iddhiyā upasaṅkamitvā etadavoca moggallāna moggallāna mā brāhmaṇa catutthajjhānaṃ pamādo catutthajjhāne cittaṃ saṇṭhapehi catutthajjhāne cittaṃ ekodiṃ karohi catutthajjhāne cittaṃ samādahāti . so khvāhaṃ āvuso aparena samayena sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthajjhānaṃ upasampajja vihāsiṃ . yaṃ hi taṃ āvuso sammā vadamāno vadeyya .pe. Mahābhiññataṃ pattoti. [519] Ākāsānañcāyatanaṃ ākāsānañcāyatananti vuccati katamaṃ nu kho ākāsānañcāyatananti . tassa mayhaṃ āvuso etadahosi idha bhikkhu sabbaso rūpasaññānaṃ samatikkamā paṭighasaññānaṃ atthaṅgamā Nānattasaññānaṃ amanasikārā ananto ākāsoti ākāsānañcāyatanaṃ upasampajja viharati idaṃ vuccati ākāsānañcāyatananti . so khvāhaṃ āvuso sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ananto ākāsoti ākāsānañcāyatanaṃ upasampajja viharāmi . tassa mayhaṃ āvuso iminā vihārena viharato rūpasahagatā saññāmanasikārā samudācaranti. {519.1} Atha kho maṃ āvuso bhagavā iddhiyā upasaṅkamitvā etadavoca moggallāna moggallāna mā brāhmaṇa ākāsānañcāyatanaṃ pamādo ākāsānañcāyatane cittaṃ saṇṭhapehi ākāsānañcāyatane cittaṃ ekodiṃ karohi ākāsānañcāyatane cittaṃ samādahāti . So khvāhaṃ āvuso aparena samayena sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ananto ākāsoti ākāsānañcāyatanaṃ upasampajja vihāsiṃ . yaṃ hi taṃ āvuso sammā vadamāno vadeyya .pe. Mahābhiññataṃ pattoti. [520] Viññāṇañcāyatanaṃ viññāṇañcāyatananti vuccati katamaṃ nu kho viññāṇañcāyatananti . tassa mayhaṃ āvuso etadahosi idha bhikkhu sabbaso ākāsānañcāyatanaṃ samatikkamma anantaṃ viññāṇanti viññāṇañcāyatanaṃ upasampajja viharati idaṃ vuccati viññāṇañcāyatananti . So khvāhaṃ āvuso sabbaso ākāsānañcāyatanaṃ samatikkamma anantaṃ viññāṇanti viññāṇañcāyatanaṃ upasampajja Viharāmi . tassa mayhaṃ āvuso iminā vihārena viharato ākāsānañcāyatanasahagatā saññāmanasikārā samudācaranti. {520.1} Atha kho maṃ āvuso bhagavā iddhiyā upasaṅkamitvā etadavoca moggallāna moggallāna mā brāhmaṇa viññāṇañcāyatanaṃ pamādo viññāṇañcāyatane cittaṃ saṇṭhapehi viññāṇañcāyatane cittaṃ ekodiṃ karohi viññāṇañcāyatane cittaṃ samādahāti . So khvāhaṃ āvuso aparena samayena sabbaso ākāsānañcāyatanaṃ samatikkamma anantaṃ viññāṇanti viññāṇañcāyatanaṃ upasampajja vihāsiṃ . yaṃ hi taṃ āvuso sammā vadamāno vadeyya .pe. Mahābhiññataṃ pattoti. [521] Ākiñcaññāyatanaṃ ākiñcaññāyatananti vuccati katamaṃ nu kho ākiñcaññāyatananti . tassa mayhaṃ āvuso etadahosi idha bhikkhu sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja viharati idaṃ vuccati ākiñcaññāyatananti . So khvāhaṃ āvuso sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja viharāmi . tassa mayhaṃ āvuso iminā vihārena viharato viññāṇañcāyatanasahagatā saññāmanasikārā samudācaranti. {521.1} Atha kho maṃ āvuso bhagavā iddhiyā upasaṅkamitvā etadavoca moggallāna moggallāna mā brāhmaṇa ākiñcaññāyatanaṃ pamādo ākiñcaññāyatane cittaṃ saṇṭhapehi ākiñcaññāyatane cittaṃ ekodiṃ karohi Ākiñcaññāyatane cittaṃ samādahāti . so khvāhaṃ āvuso aparena samayena sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja vihāsiṃ . yaṃ hi taṃ āvuso sammā vadamāno vadeyya .pe. Mahābhiññataṃ pattoti. [522] Nevasaññānāsaññāyatanaṃ nevasaññānāsaññāyatananti vuccati katamaṃ nu kho nevasaññānāsaññāyatananti . tassa mayhaṃ āvuso etadahosi idha bhikkhu sabbaso ākiñcaññāyatanaṃ samatikkamma nevasaññānāsaññāyatanaṃ upasampajja viharati idaṃ vuccati nevasaññānāsaññāyatananti . so khvāhaṃ āvuso sabbaso ākiñcaññāyatanaṃ samatikkamma nevasaññānāsaññāyatanaṃ upasampajja viharāmi . tassa mayhaṃ āvuso iminā vihārena viharato ākiñcaññāyatanasahagatā saññāmanasikārā samudācaranti. {522.1} Atha kho maṃ āvuso bhagavā iddhiyā upasaṅkamitvā etadavoca moggallāna moggallāna mā brāhmaṇa nevasaññānāsaññāyatanaṃ pamādo nevasaññānāsaññāyatane cittaṃ saṇṭhapehi nevasaññānāsaññāyatane cittaṃ ekodiṃ karohi nevasaññānāsaññāyatane cittaṃ samādahāti . so khvāhaṃ āvuso aparena samayena sabbaso ākiñcaññāyatanaṃ samatikkamma nevasaññānāsaññāyatanaṃ upasampajja vihāsiṃ . yaṃ hi taṃ āvuso sammā vadamāno vadeyya .pe. Mahābhiññataṃ pattoti. [523] Animitto cetosamādhi animitto cetosamādhīti vuccati katamo nu kho animitto cetosamādhīti . tassa mayhaṃ āvuso etadahosi idha bhikkhu sabbanimittānaṃ amanasikārā animittaṃ cetosamādhiṃ upasampajja viharati ayaṃ vuccati animitto cetosamādhīti . So khvāhaṃ āvuso sabbanimittānaṃ amanasikārā animittaṃ cetosamādhiṃ upasampajja viharāmi . tassa mayhaṃ āvuso iminā vihārena viharato nimittānusāriviññāṇaṃ hoti. {523.1} Atha kho maṃ āvuso bhagavā iddhiyā upasaṅkamitvā etadavoca moggallāna moggallāna mā brāhmaṇa animittaṃ cetosamādhiṃ pamādo animitte cetosamādhismiṃ cittaṃ saṇṭhapehi animitte cetosamādhismiṃ cittaṃ ekodiṃ karohi animitte cetosamādhismiṃ cittaṃ samādahāti . so khvāhaṃ āvuso aparena samayena sabbanimittānaṃ amanasikārā animittaṃ cetosamādhiṃ upasampajja vihāsiṃ . Yaṃ hi taṃ āvuso sammā vadamāno vadeyya satthārānuggahito sāvako mahābhiññataṃ pattoti . mamaṃ taṃ sammā vadamāno vadeyya satthārānuggahito sāvako mahābhiññataṃ pattoti. [524] Atha kho āyasmā mahāmoggallāno seyyathāpi nāma balavā puriso sammiñjitaṃ vā bāhaṃ pasāreyya pasāritaṃ vā bāhaṃ sammiñjeyya evameva jetavane antarahito devesu tāvatiṃsesu pāturahosi . atha kho sakko devānamindo pañcahi devatāsatehi Saddhiṃ yenāyasmā mahāmoggallāno tenupasaṅkami upasaṅkamitvā āyasmantaṃ mahāmoggallānaṃ abhivādetvā ekamantaṃ aṭṭhāsi . Ekamantaṃ ṭhitaṃ kho sakkaṃ devānamindaṃ āyasmā mahāmoggallāno etadavoca sādhu kho devānaminda buddhasaraṇagamanaṃ hoti. Buddhasaraṇagamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti . sādhu kho devānaminda dhammasaraṇagamanaṃ hoti . dhammasaraṇagamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti. {524.1} Sādhu kho devānaminda saṅghasaraṇagamanaṃ hoti . Saṅghasaraṇagamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantīti . sādhu kho mārisa moggallāna buddhasaraṇagamanaṃ hoti . buddhasaraṇagamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti . sādhu kho mārisa moggallāna dhammasaraṇagamanaṃ hoti . dhammasaraṇagamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti . sādhu kho mārisa moggallāna saṅghasaraṇagamanaṃ .pe. Sugatiṃ saggaṃ lokaṃ upapajjantīti. [525] Atha kho sakko devānamindo chahi devatāsatehi saddhiṃ .pe. Atha kho sakko devānamindo sattahi devatāsatehi saddhiṃ .pe. Atha kho sakko devāmindo aṭṭhahi devatāsatehi saddhiṃ .pe. [526] Atha kho sakko devānamindo asītiyā devatāsahassehi saddhiṃ yenāyasmā mahāmoggallāno tenupasaṅkami upasaṅkamitvā āyasmantaṃ mahāmoggallānaṃ abhivādetvā ekamantaṃ aṭṭhāsi . Ekamantaṃ ṭhitaṃ kho sakkaṃ devānamindaṃ āyasmā mahāmoggallāno etadavoca sādhu kho devānaminda buddhasaraṇagamanaṃ hoti. Buddhasaraṇagamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti . sādhu kho devānaminda dhammasaraṇagamanaṃ hoti . dhammasaraṇagamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti . sādhu kho devānaminda saṅghasaraṇagamanaṃ hoti . Saṅghasaraṇagamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantīti. {526.1} Sādhu kho mārisa moggallāna buddhasaraṇagamanaṃ hoti . buddhasaraṇagamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti . Sādhu kho mārisa moggallāna dhammasaraṇagamanaṃ hoti .pe. sādhu kho mārisa moggallāna saṅghasaraṇagamanaṃ hoti . saṅghasaraṇagamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantīti. [527] Atha kho sakko devānamindo pañcahi devatāsatehi saddhiṃ yenāyasmā mahāmoggallāno tenupasaṅkami upasaṅkamitvā āyasmantaṃ mahāmoggallānaṃ abhivādetvā ekamantaṃ aṭṭhāsi . Ekamantaṃ ṭhitaṃ kho sakkaṃ devānamindaṃ āyasmā mahāmoggallāno etadavoca sādhu kho devānaminda buddhe aveccappasādena samannāgamanaṃ hoti itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavāti . buddhe aveccappasādena samannāgamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti. {527.1} Sādhu kho devānaminda dhamme aveccappasādena samannāgamanaṃ hoti svākkhāto bhagavatā dhammo sandiṭṭhiko akāliko ehipassiko opanayiko paccattaṃ veditabbo viññūhīti . dhamme aveccappasādena samannāgamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti. {527.2} Sādhu kho devānaminda saṅghe aveccappasādena samannāgamanaṃ hoti supaṭipanno bhagavato sāvakasaṅgho ujupaṭipanno bhagavato sāvakasaṅgho ñāyapaṭipanno bhagavato sāvakasaṅgho sāmīcipaṭipanno bhagavato sāvakasaṅgho yadidaṃ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṃ Puññakkhettaṃ lokassāti . saṅghe aveccappasādena samannāgamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti. {527.3} Sādhu kho devānaminda ariyakantehi sīlehi samannāgamanaṃ hoti akhaṇḍehi acchiddehi asabalehi akammāsehi bhujissehi viññūpasatthehi aparāmaṭṭhehi samādhisaṃvattanikehi . Ariyakantehi sīlehi samannāgamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantīti. {527.4} Sādhu kho mārisa moggallāna buddhe aveccappasādena samannāgamanaṃ hoti itipi so bhagavā .pe. satthā devamanussānaṃ buddho bhagavāti . Buddhe aveccappasādena samannāgamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti. {527.5} Sādhu kho mārisa moggallāna dhamme aveccapasādena samannāgamanaṃ hoti svākkhāto bhagavatā dhammo .pe. paccattaṃ veditabbo viññūhīti . dhamme aveccappasādena samannāgamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti. {527.6} Sādhu kho mārisa moggallāna saṅghe aveccappasādena samannāgamanaṃ hoti supaṭipanno bhagavato sāvakasaṅgho .pe. anuttaraṃ puññakkhettaṃ lokassāti . saṅghe aveccappasādena samannāgamanahetu kho mārisa moggallāna Evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti. {527.7} Sādhu kho mārisa moggallāna ariyakantehi sīlehi samannāgamanaṃ hoti akhaṇḍehi .pe. samādhisaṃvattanikehi . Ariyakantehi sīlehi samannāgamanahetu kho mārisa moggallāna evamidhecce sattā kāyassa bhedā paraṃ maraṇā sugatiṃ saggaṃ lokaṃ upapajjantīti. [528] Atha kho sakko devānamindo chahi devatāsatehi saddhiṃ .pe. atha kho sakko devānamindo sattahi devatāsatehi saddhiṃ .pe. atha kho sakko devānamindo aṭṭhahi devatāsatehi saddhiṃ .pe. [529] Atha kho sakko devānamindo asītiyā devatāsahassehi saddhiṃ yenāyasmā mahāmoggallāno tenupasaṅkami upasaṅkamitvā āyasmantaṃ mahāmoggallānaṃ abhivādetvā ekamantaṃ aṭṭhāsi . Ekamantaṃ ṭhitaṃ kho sakkaṃ devānamindaṃ āyasmā mahāmoggallāno etadavoca {529.1} sādhu kho devānaminda buddhe aveccappasādena samannāgamanaṃ hoti itipi so bhagavā .pe. satthā devamanussānaṃ buddho bhagavāti . buddhe aveccappasādena samannāgamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti. {529.2} Sādhu kho devānaminda dhamme aveccappasādena samannāgamanaṃ hoti svākkhāto bhagavatā dhammo .pe. Paccattaṃ veditabbo viññūhīti . dhamme aveccappasādena samannāgamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti. {529.3} Sādhu kho devānaminda saṅghe aveccappasādena samannāgamanaṃ hoti supaṭipanno bhagavato sāvakasaṅgho .pe. Anuttaraṃ puññakkhettaṃ lokassāti . saṅghe aveccappasādena samannāgamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti. {529.4} Sādhu kho devānaminda ariyakantehi sīlehi samannāgamanaṃ hoti akhaṇḍehi .pe. samādhisaṃvattanikehi . ariyakantehi sīlehi samannāgamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantīti. {529.5} Sādhu kho mārisa moggallāna buddhe aveccappasādena samannāgamanaṃ hoti itipi so bhagavā .pe. satthā devamanussānaṃ buddho bhagavāti . buddhe aveccappasādena samannāgamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti. {529.6} Sādhu kho mārisa moggallāna dhamme aveccappasādena samannāgamanaṃ hoti svākkhāto bhagavatā dhammo .pe. paccattaṃ veditabbo viññūhīti . dhamme aveccappasādena samannāgamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti . sādhu kho Mārisa moggallāna saṅghe aveccappasādena samannāgamanaṃ hoti supaṭipanno bhagavato sāvakasaṅgho .pe. anuttaraṃ puññakkhettaṃ lokassāti . saṅghe aveccappasādena samannāgamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti. {529.7} Sādhu kho mārisa moggallāna ariyakantehi sīlehi samannāgamanaṃ hoti akhaṇḍehi .pe. samādhisaṃvattanikehi . Ariyakantehi sīlehi samannāgamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantīti. [530] Atha kho sakko devānamindo pañcahi devatāsatehi saddhiṃ yenāyasmā mahāmoggallāno tenupasaṅkami upasaṅkamitvā .pe. ekamantaṃ ṭhitaṃ kho sakkaṃ devānamindaṃ āyasmā mahāmoggallāno etadavoca sādhu kho devānaminda buddhasaraṇagamanaṃ hoti . Buddhasaraṇagamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā dibbena vaṇṇena dibbena sukhena dibbena yasena dibbena ādhipateyyena dibbehi rūpehi dibbehi saddehi dibbehi gandhehi dibbehi rasehi dibbehi phoṭṭhabbehi. {530.1} Sādhu kho devānaminda dhammasaraṇagamanaṃ hoti . Dhammasaraṇagamanahetu kho devānaminda evamidhekacce sattā Kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā dibbena vaṇṇena dibbena sukhena dibbena yasena dibbena ādhipateyyena dibbehi rūpehi dibbehi saddehi dibbehi gandheha dibbehi rasehi dibbehi phoṭṭhabbehi. {530.2} Sādhu kho devānaminda saṅghasaraṇagamanaṃ hoti . Saṅghasaraṇagamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā dibbena vaṇṇena dibbena sukhena dibbena yasena dibbena ādhipateyyena dibbehi rūpehi dibbehi saddehi dibbehi gandhehi dibbehi rasehi dibbehi phoṭṭhabbehīti. {530.3} Sādhu kho mārisa moggallāna buddhasaraṇagamanaṃ hoti . buddhasaraṇagamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā .pe. dibbehi phoṭṭhabbehi . sādhu kho mārisa moggallāna dhammasaraṇagamanaṃ hoti .pe. sādhu kho mārisa moggallāna saṅghasaraṇagamanaṃ hoti . saṅghasaraṇagamanahetu kho mārisa moggallāna evamidhekacce sattā kāyassa bhadā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā dibbena vaṇṇena dibbena sukhena Dibbena yasena dibbena ādhipateyyena dibbehi rūpehi dibbehi saddehi dibbehi gandhehi dibbehi rasehi dibbehi phoṭṭhabbehīti. [531] Atha kho sakko devānamindo chahi devatāsatehi saddhiṃ .pe. atha kho sakko devānamindo sattahi devatāsatehi saddhiṃ .pe. atha kho sakko devānamindo aṭṭhahi devatāsatehi saddhiṃ .pe. [532] Atha kho sakko devānamindo asītiyā devatāsahassehi saddhiṃ yenāyasmā mahāmoggallāno tenupasaṅkami upasaṅkamitvā āyasmantaṃ mahāmoggallānaṃ abhivādetvā ekamantaṃ aṭṭhāsi . Ekamantaṃ ṭhitaṃ kho sakkaṃ devānamindaṃ āyasmā mahāmoggallāno etadavoca {532.1} sādhu kho devānaminda buddhasaraṇagamanaṃ hoti . Buddhasaraṇagamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā dibbena .pe. dibbehi phoṭṭhabbehi. {532.2} Sādhu kho devānaminda dhammasaraṇagamanaṃ hoti .pe. Sādhu kho devānaminda saṅghasaraṇagamanaṃ hoti . saṅghasaraṇagamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā dibbena vaṇṇena dibbena sukhena dibbena yasena dibbena ādhipateyyena dibbehi rūpehi dibbehi Saddehi dibbehi gandhehi dibbehi rasehi dibbehi phoṭṭhabbehīti. {532.3} Sādhu kho mārisa moggallāna buddhasaraṇagamanaṃ hoti .pe. sādhu kho mārisa moggallāna dhammasaraṇagamanaṃ hoti .pe. Sādhu kho mārisa moggallāna saṅghasaraṇagamanaṃ hoti . Saṅghasaraṇagamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā dibbena vaṇṇena dibbena sukhena dibbena yasena dibbena ādhipateyyena dibbehi rūpehi dibbehi saddehi dibbehi gandhehi dibbehi rasehi dibbehi phoṭṭhabbehīti. [533] Atha kho sakko devānamindo pañcahi devatāsatehi saddhiṃ yenāyasmā mahāmoggallāno tenupasaṅkami upasaṅkamitvā āyasmantaṃ mahāmoggallānaṃ abhivādetvā ekamantaṃ aṭṭhāsi . Ekamantaṃ ṭhitaṃ kho sakkaṃ devānamindaṃ āyasmā mahāmoggallāno etadavoca {533.1} sādhu kho devānaminda buddhe aveccappasādena samannāgamanaṃ hoti itipi so bhagavā .pe. satthā devamanussānaṃ buddho bhagavāti . buddhe aveccappasādena samannāgamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā .pe. dibbehi phoṭṭhabbehi . sādhu kho Devānaminda dhamme aveccappasādena samannāgamanaṃ hoti .pe. {533.2} Sādhu kho devānaminda saṅghe aveccappasādena samannāgamanaṃ hoti .pe. sādhu kho devānaminda ariyakantehi sīlehi samannāgamanaṃ hoti akhaṇḍehi .pe. samādhisaṃvattanikehi . ariyakantehi sīlehi samannāgamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā .pe. Dibbehi phoṭṭhabbehīti. {533.3} Sādhu kho mārisa moggallāna buddhe aveccappasādena samannāgamanaṃ hoti itipi so bhagavā .pe. satthā devamanussānaṃ buddho bhagavāti . buddhe aveccappasādena samannāgamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā .pe. Dibbehi phoṭṭhabbehi. {533.4} Sādhu kho mārisa ^1- moggallāna dhamme aveccappasādena samannāgamanaṃ hoti svākkhāto bhagavatā dhammo .pe. paccattaṃ veditabbo viññūhīti . dhamme aveccappasādena samannāgamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā .pe. Dibbehi phoṭṭhabbehi . sādhu kho mārisa moggallāna @Footnote: ¹ Ma. mārisāti natthi. Saṅghe aveccappasādena samannāgamanaṃ hoti supaṭipanno bhagavato sāvakasaṅgho .pe. anuttaraṃ puññakkhettaṃ lokassāti . Saṅghe aveccappasādena samannāgamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā .pe. Dibbehi phoṭṭhabbehi. {533.5} Sādhu kho mārisa moggallāna ariyakantehi sīlehi samannāgamanaṃ hoti akhaṇḍehi .pe. samādhisaṃvattanikehi . ariyakantehi sīlehi samannāgamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā .pe. dibbehi phoṭṭhabbehīti. [534] Atha kho sakko devānamindo chahi devatāsatehi saddhiṃ .pe. atha kho sakko devānamindo sattahi devatāsatehi saddhiṃ .pe. Atha kho sakko devānamindo aṭṭhahi devatāsatehi saddhiṃ .pe. [535] Atha kho sakko devānamindo asītiyā devatāsahassehi saddhiṃ yenāyasmā mahāmoggallāno tenupasaṅkami upasaṅkamitvā āyasmantaṃ mahāmoggallānaṃ abhivādetvā ekamantaṃ aṭṭhāsi . Ekamantaṃ ṭhitaṃ kho sakkaṃ devānamindaṃ āyasmā mahāmoggallāno Etadavoca {535.1} sādhu kho devānaminda buddhe aveccappasādena samannāgamanaṃ hoti itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavāti . buddhe aveccappasādena samannāgamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā dibbena vaṇṇena dibbena sukhena dibbena yasena dibbena ādhipateyyena dibbehi rūpehi dibbehi saddehi dibbehi gandhehi dibbehi rasehi dibbehi phoṭṭhabbehi. {535.2} Sādhu kho devānaminda dhamme aveccappasādena samannāgamanaṃ hoti svākkhāto bhagavatā dhammo sandiṭṭhiko akāliko ehipassiko opanayiko paccattaṃ veditabbo viññūhīti . dhamme aveccappasādena samannāgamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā .pe. Dibbehi phoṭṭhabbehi. {535.3} Sādhu kho devānaminda saṅghe aveccappasādena samannāgamanaṃ hoti supaṭipanno bhagavato sāvakasaṅgho ujupaṭipanno bhagavato sāvakasaṅgho ñāyapaṭipanno bhagavato sāvakasaṅgho sāmīcipaṭipanno bhagavato sāvakasaṅgho yadidaṃ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo Dakkhiṇeyyo añjalikaraṇīyo anuttaraṃ puññakkhettaṃ lokassāti . Saṅghe aveccappasādena samannāgamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā .pe. Dibbehi phoṭṭhabbehi. {535.4} Sādhu kho devānaminda ariyakantehi sīlehi samannāgamanaṃ hoti akhaṇḍehi acchiddehi asabalehi akammāsehi bhujissehi viññūpasatthehi aparāmaṭṭhehi samādhisaṃvattanikehi . ariyakantehi sīlehi samannāgamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā dibbena vaṇṇena dibbena sukhena dibbena yasena dibbena ādhipateyyena dibbehi rūpehi dibbehi saddehi dibbehi gandhehi dibbehi rasehi dibbehi phoṭṭhabbehīti. {535.5} Sādhu kho mārisa moggallāna buddhe aveccappasādena samannāgamanaṃ hoti itipi so bhagavā .pe. satthā devamanussānaṃ buddho bhagavāti . buddhe aveccappasādena samannāgamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā .pe. Dibbehi phoṭṭhabbehi. {535.6} Sādhu kho mārisa moggallāna dhamme aveccappasādena samannāgamanaṃ hoti Svākkhāto bhagavatā dhammo .pe. paccattaṃ veditabbo viññūhīti . dhamme aveccappasādena samannāgamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā .pe. dibbehi phoṭṭhabbehi. {535.7} Sādhu kho mārisa moggallāna saṅghe aveccappasādena samannāgamanaṃ hoti supaṭipanno bhagavato sāvakasaṅgho .pe. anuttaraṃ puññakkhettaṃ lokassāti . saṅghe aveccappasādena samannāgamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā .pe. Dibbehi phoṭṭhabbehi. {535.8} Sādhu kho mārisa moggallāna ariyakantehi sīlehi samannāgamanaṃ hoti akhaṇḍehi .pe. samādhisaṃvattanikehi . ariyakantehi sīlehi samannāgamanahetu kho mārisa moggallāna evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti te aññe deve dasahi ṭhānehi adhiggaṇhanti dibbena āyunā dibbena vaṇṇena dibbena sukhena dibbena yasena dibbena ādhipateyyena dibbehi rūpehi dibbehi saddehi dibbehi gandhehi dibbehi rasehi dibbehi phoṭṭhabbehīti. [536] Atha kho candano devaputto .pe. atha kho suyāmo Devaputto . atha kho santusito devaputto . atha kho sunimmito devaputto . atha kho vasavatti devaputto . (ime pañca peyyālā ^1- yathā sakko devānamindo tathā vitthāretabbāti). Moggallānasaṃyuttaṃ samattaṃ. Tassuddānaṃ savitakkāvitakkañca sukhena ca ^2- upekkhako ākāsañceva viññāṇaṃ ākiñcaññā nevasaññinā ^3- animitto ca sakko ca candanekādasena cāti. -------------- @Footnote: ¹ Ma. peyyālī . ² Yu. casaddo natthi . ³ Ma. ākiñcaṃ nevasaññinā @Yu. ākiñcanevasaññinā.

The Pali Tipitaka in Roman Character Volume 18 page 323-346. https://84000.org/tipitaka/read/roman_read.php?B=18&A=6548 Compare with The Pali Tipitaka in Thai Character :- https://84000.org/tipitaka/read/pali_read.php?B=18&A=6548 Compare with The Royal Version of Thai Tipitaka :- https://84000.org/tipitaka/read/byitem.php?book=18&item=515&items=22 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=18&siri=256 Study Atthakatha :- https://84000.org/tipitaka/attha/attha.php?b=18&i=515 The Pali Atthakatha in Thai :- https://84000.org/tipitaka/atthapali/read_th.php?B=13&A=3301 The Pali Atthakatha in Roman :- https://84000.org/tipitaka/atthapali/read_rm.php?B=13&A=3301 Contents of The Tipitaka Volume 18 https://84000.org/tipitaka/read/?index_18 https://84000.org/tipitaka/english/?index_18