PaliRoman Vol.19

[1537] Kapilavatthunidānaṃ . tena kho pana samayena sarakāni sakko kālakato hoti . so bhagavatā byākato sotāpanno avinipātadhammo niyato sambodhiparāyanoti . tatra sudaṃ sambahulā sakkā saṅgamma samāgamma ujjhāyanti khīyanti vipācenti acchariyaṃ vata bho abbhutaṃ vata bho etthadāni ko na sotāpanno bhavissati yatra hi nāma sarakāni sakko kālakato bhagavatā byākato sotāpanno avinipātadhammo niyato sambodhiparāyanoti . sarakāni sakko sikkhāya aparipūrīkārī ahosīti. [1538] Atha kho mahānāmo sakko yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho mahānāmo sakko bhagavantaṃ etadavoca idha bhante sarakāni sakko kālakato so bhagavatā byākato sotāpanno avinipātadhammo niyato sambodhiparāyanoti . tatra sudaṃ bhante sambahulā sakkā saṅgamma samāgamma ujjhāyanti khīyanti vipācenti acchariyaṃ vata bho abbhutaṃ vata bho etthadāni ko na sotāpanno bhavissati yatra hi nāma sarakāni sakko kālakato so bhagavatā byākato sotāpanno avinipātadhammo niyato sambodhiparāyanoti . Sarakāni sakko sikkhāya aparipūrīkārī ahosīti. @Footnote: ¹ Ma. kimaṅgaṃ. ² Ma. saraṇāni. evamuparipi.

--------------------------------------------------------------------------------------------- page475.

[1539] Yo so mahānāma dīgharattaṃ upāsako buddhaṃ saraṇaṃ gato dhammaṃ saraṇaṃ gato saṅghaṃ saraṇaṃ gato so kathaṃ vinipātaṃ gaccheyya . yañhi taṃ mahānāma sammā vadamāno vadeyya dīgharattaṃ upāsako buddhaṃ saraṇaṃ gato dhammaṃ saraṇaṃ gato saṅghaṃ saraṇaṃ gatoti sarakāniṃ sakkaṃ sammā vadamāno vadeyya sarakāni mahānāma sakko dīgharattaṃ upāsako buddhaṃ saraṇaṃ gato dhammaṃ saraṇaṃ gato saṅghaṃ saraṇaṃ gato so kathaṃ vinipātaṃ gaccheyya. [1540] Idha mahānāma ekacco puggalo buddhe ekantagato hoti abhippasanno itipi so bhagavā .pe. satthā devamanussānaṃ buddho bhagavāti . dhamme saṅghe . hāsapañño javanapañño vimuttiyā ca samannāgato . so āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati . ayampi kho mahānāma puggalo parimutto nirayā parimutto tiracchānayoniyā parimutto pittivisayā parimutto apāyaduggativinipātā. [1541] Idha pana mahānāma ekacco puggalo buddhe ekantagato hoti abhippasanno itipi so bhagavā .pe. satthā devamanussānaṃ buddho bhagavāti . dhamme saṅghe . hāsapañño javanapañño na ca vimuttiyā samannāgato . so pañcannaṃ orambhāgiyānaṃ saññojanānaṃ parikkhayā antarāparinibbāyī hoti upahaccaparinibbāyī hoti asaṅkhāraparinibbāyī hoti sasaṅkhāraparinibbāyī hoti uddhaṃsoto

--------------------------------------------------------------------------------------------- page476.

Hoti akaniṭṭhagāmī . ayampi kho mahānāma puggalo parimutto nirayā parimutto tiracchānayoniyā parimutto pittivisayā parimutto apāyaduggativinipātā. [1542] Idha pana mahānāma ekacco puggalo buddhe ekantagato hoti abhippasanno itipi so bhagavā .pe. satthā devamanussānaṃ buddho bhagavāti . dhamme saṅghe . na hāsapañño na javanapañño na ca vimuttiyā samannāgato . so tiṇṇaṃ saññojanānaṃ parikkhayā rāgadosamohānaṃ tanuttā sakadāgāmī hoti sakideva imaṃ lokaṃ āgantvā dukkhassantaṃ karoti . ayampi kho mahānāma puggalo parimutto nirayā parimutto tiracchānayoniyā parimutto pittivisayā parimutto apāyaduggativinipātā. [1543] Idha pana mahānāma ekacco puggalo buddhe ekantagato hoti abhippasanno itipi so bhagavā .pe. satthā devamanussānaṃ buddho bhagavāti . dhamme saṅghe . na hāsapañño na javanapañño na ca vimuttiyā samannāgato . so tiṇṇaṃ saññojanānaṃ parikkhayā sotāpanno hoti avinipātadhammo niyato sambodhiparāyano . ayampi kho mahānāma puggalo parimutto nirayā parimutto tiracchānayoniyā parimutto pittivisayā parimutto apāyaduggativinipātā. [1544] Idha pana mahānāma ekacco puggalo na heva kho buddhe ekantagato hoti abhippasanno . na dhamme . na saṅghe.

--------------------------------------------------------------------------------------------- page477.

Na hāsapañño na javanapañño na ca vimuttiyā samannāgato . Apicassa ime dhammā honti saddhindriyaṃ .pe. paññindriyaṃ . Tathāgatappaveditā cassa dhammā paññāya mattaso nijjhānaṃ khamanti . Ayampi kho mahānāma puggalo agantā nirayaṃ agantā tiracchānayoniṃ agantā pittivisayaṃ agantā apāyaduggativinipātaṃ. [1545] Idha pana mahānāma ekacco puggalo na heva kho buddhe ekantagato hoti abhippasanno . na dhamme . na saṅghe. Na hāsapañño na javanapañño na ca vimuttiyā samanannāgato . Apicassa ime dhammā honti saddhindriyaṃ .pe. paññindriyaṃ . Tathāgate cassa saddhāmattaṃ hoti pemamattaṃ . ayampi kho mahānāma puggalo agantā nirayaṃ agantā tiracchānayoniṃ agantā pittivisayaṃ agantā apāyaduggativipātaṃ. [1546] Seyyathāpi mahānāma dukkhettaṃ dubbhūmiṃ avihatakkhāṇukaṃ bījāni cassu khaṇḍāni pūtīni vātātapahatāni asārādāni asukhasayitāni ^1- devo pana ^2- sammā dhāraṃ anuppaveccheyya . api nu tāni bījāni vuḍḍhiṃ virūḷhiṃ vepullaṃ āpajjeyyunti . no hetaṃ bhante. Evameva kho mahānāma idha dhammo durākkhāto ^3- hoti duppavedito aniyyāniko anupasamasaṃvattaniko asammāsambuddhappavedito idamahaṃ dukkhettasmiṃ vadāmi . tasmiṃ ca dhamme sāvako viharati dhammānudhammapaṭipanno @Footnote: ¹ Sī. evaṃ. ² Sī. Ma. Yu. ca na sammā .... ³ Ma. durakkhāto. Yu. dvākkhāto.

--------------------------------------------------------------------------------------------- page478.

Sāmīcipaṭipanno anudhammacārī idamahaṃ dubbījasmiṃ vadāmi. [1547] Seyyathāpi mahānāma sukkhettaṃ subhūmiṃ suvihatakkhāṇukaṃ bījāni cassu akkhaṇḍāni apūtīni avātātapahatāni sārādāni sukhasayitāni devo cassa ^1- sammā dhāraṃ anuppaveccheyya . api nu tāni bījāni vuḍḍhiṃ virūḷhiṃ vepullaṃ āpajjeyyunti . evaṃ bhante . evameva kho mahānāma idha dhammo svākkhāto hoti suppavedito niyyāniko upasamasaṃvattaniko sammāsambuddhappavedito idamahaṃ sukkhettasmiṃ vadāmi . tasmiṃ ca dhamme sāvako viharati dhammānudhammapaṭipanno sāmīcipaṭipanno anudhammacārī idamahaṃ subījasmiṃ vadāmi . kimaṅga ^2- pana sarakāniṃ sakkaṃ sarakāni mahānāma sakko maraṇakāle sikkhāya paripūrīkārī ahosīti.

The Pali Tipitaka in Roman Character Volume 19 page 474-478. https://84000.org/tipitaka/read/roman_read.php?B=19&A=9236&pagebreak=1 Compare with The Pali Tipitaka in Thai Character :- https://84000.org/tipitaka/read/pali_read.php?B=19&A=9236&pagebreak=1 Compare with The Royal Version of Thai Tipitaka :- https://84000.org/tipitaka/read/byitem.php?book=19&item=1537&items=11 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=19&siri=343 Study Atthakatha :- https://84000.org/tipitaka/attha/attha.php?b=19&i=1537 The Pali Atthakatha in Thai :- https://84000.org/tipitaka/atthapali/read_th.php?B=13&A=8054 The Pali Atthakatha in Roman :- https://84000.org/tipitaka/atthapali/read_rm.php?B=13&A=8054 Contents of The Tipitaka Volume 19 https://84000.org/tipitaka/read/?index_19 https://84000.org/tipitaka/english/?index_19