PaliRoman Vol.22

[166] Tatra kho āyasmā sārīputto bhikkhū āmantesi .pe. Idhāvuso bhikkhu sīlasampanno samādhisampanno paññāsampanno saññāvedayitanirodhaṃ samāpajjeyyapi vuṭṭhaheyyapi ^1- atthetaṃ ṭhānaṃ no ce diṭṭheva dhamme aññaṃ ārādheyya atikkammeva kabaḷiṃ kārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyapi vuṭṭhaheyyapi atthetaṃ ṭhānanti . evaṃ vutte āyasmā udāyi āyasmantaṃ sārīputtaṃ etadavoca aṭṭhānaṃ kho etaṃ āvuso sārīputta anavakāso yaṃ so bhikkhu atikkammeva kabaḷiṃ kārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyapi vuṭṭhaheyyapi natthetaṃ ṭhānanti. {166.1} Dutiyampi kho .pe. tatiyampi kho āyasmā sārīputto bhikkhū āmantesi idhāvuso bhikkhu sīlasampanno samādhisampanno paññāsampanno saññāvedayitanirodhaṃ samāpajjeyyapi vuṭṭhaheyyapi atthetaṃ ṭhānaṃ no ce diṭṭheva dhamme aññaṃ ārādheyya atikkammeva kabaḷiṃ kārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyapi vuṭṭhaheyyapi atthetaṃ ṭhānanti. {166.2} Tatiyampi kho āyasmā udāyi āyasmantaṃ sārīputtaṃ etadavoca aṭṭhānaṃ kho etaṃ āvuso @Footnote: ¹ Po. Ma. samāpajjeyyāpi vuṭṭhaheyyāpi. ito paraṃ evaṃ ñātabbaṃ. Sārīputta anavakāso yaṃ so bhikkhu atikkammeva kabaḷiṃ kārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyapi vuṭṭhaheyyapi natthetaṃ ṭhānanti . athakho āyasmato sārīputtassa etadahosi yāvatatiyampi kho me āyasmā udāyi paṭikkosati na ca me koci bhikkhu anumodati yannūnāhaṃ yena bhagavā tenupasaṅkameyyanti. {166.3} Athakho āyasmā sārīputto yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi ekamantaṃ nisinno kho āyasmā sārīputto bhikkhū āmantesi idhāvuso bhikkhu sīlasampanno samādhisampanno paññāsampanno saññāvedayitanirodhaṃ samāpajjeyyapi vuṭṭhaheyyapi atthetaṃ ṭhānaṃ no ce diṭṭheva dhamme aññaṃ ārādheyya atikkammeva kabaḷiṃ kārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyapi vuṭṭhaheyyapi atthetaṃ ṭhānanti. {166.4} Evaṃ vutte āyasmā udāyi āyasmantaṃ sārīputtaṃ etadavoca aṭṭhānaṃ kho etaṃ āvuso sārīputta anavakāso yaṃ so bhikkhu atikkammeva kabaḷiṃ kārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyapi vuṭṭhaheyyapi natthetaṃ ṭhānanti . dutiyampi kho .pe. tatiyampi kho āyasmā sārīputto bhikkhū āmantesi idhāvuso bhikkhu sīlasampanno samādhisampanno paññāsampanno saññāvedayitanirodhaṃ samāpajjeyyapi vuṭṭhaheyyapi atthetaṃ Ṭhānaṃ no ce diṭṭheva dhamme aññaṃ ārādheyya atikkammeva kabaḷiṃ kārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyapi vuṭṭhaheyyapi atthetaṃ ṭhānanti. {166.5} Tatiyampi kho āyasmā udāyi āyasmantaṃ sārīputtaṃ etadavoca aṭṭhānaṃ kho etaṃ āvuso sārīputta anavakāso yaṃ so bhikkhu atikkammeva kabaḷiṃ kārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyapi vuṭṭhaheyyapi natthetaṃ ṭhānanti . athakho āyasmato sārīputtassa etadahosi bhagavatopi kho me sammukhā āyasmā udāyi yāvatiyakaṃ paṭikkosati na ca me koci bhikkhu anumodati yannūnāhaṃ tuṇhī assanti . athakho āyasmā sārīputto tuṇhī ahosi. {166.6} Athakho bhagavā āyasmantaṃ udāyiṃ āmantesi kaṃ pana tvaṃ udāyi manomayaṃ kāyaṃ paccesīti. Ye te bhante devā arūpino saññāmayāti kiṃ nu kho tuyhaṃ udāyi bālassa abyattassa bhaṇitena tvaṃpi nāma bhaṇitabbaṃ maññasīti . athakho bhagavā āyasmantaṃ ānandaṃ āmantesi atthi nāma ānanda theraṃ bhikkhuṃ vihesiyamānaṃ ajjhupekkhissatha na hi nāma ānanda kāruññaṃpi bhavissati byattamhi ^[1]- bhikkhumhi vihesiyamānamhīti. {166.7} Athakho bhagavā bhikkhū āmantesi idha bhikkhave bhikkhu sīlasampanno samādhisampanno paññāsampanno saññāvedayitanirodhaṃ samāpajjeyyapi vuṭṭhaheyyapi atthetaṃ ṭhānaṃ no ce diṭṭheva dhamme aññaṃ @Footnote: ¹ Ma. Yu. theramhi. Ārādheyya atikkammeva kabaḷiṃ kārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyapi vuṭṭhaheyyapi atthetaṃ ṭhānanti . idamavoca bhagavā idaṃ vatvāna sugato uṭṭhāyāsanā vihāraṃ pāvisi. {166.8} Athakho āyasmā ānando acirapakkantassa bhagavato yenāyasmā upavāno tenupasaṅkami upasaṅkamitvā āyasmantaṃ upavānaṃ etadavoca idhāvuso upavāna aññe there ^1- bhikkhū vihesenti mayante ^2- na pucchāma anacchariyaṃ kho panetaṃ āvuso upavāna yaṃ bhagavā sāyaṇhasamayaṃ paṭisallānā vuṭṭhito etadeva ārabbha udāhareyya yathā āyasmantaññevettha upavānaṃ paṭibhāseyya idāneva amhākaṃ sārajjaṃ okkantanti . athakho bhagavā sāyaṇhasamayaṃ paṭisallānā vuṭṭhito yena upaṭṭhānasālā tenupasaṅkami upasaṅkamitvā paññatte āsane nisīdi nisajja kho bhagavā āyasmantaṃ upavānaṃ etadavoca {166.9} katīhi nu kho upavāna dhammehi samannāgato thero bhikkhu sabrahmacārīnaṃ piyo ca hoti manāpo ca garu ca bhāvanīyo cāti . pañcahi bhante dhammehi samannāgato thero bhikkhu sabrahmacārīnaṃ piyo ca hoti manāpo ca garu ca bhāvanīyo ca katamehi pañcahi idha bhante thero bhikkhu sīlavā hoti .pe. sikkhati sikkhāpadesu bahussuto hoti .pe. diṭṭhiyā suppaṭividdhā ^3- kalyāṇavāco hoti kalyāṇavākkaraṇo poriyā vācāya samannāgato @Footnote: ¹ Yu. theraṃ bhikkhuṃ . ² Ma. mayaṃ tena na muccāma . ³ Yu. suppaṭividdho. Vissaṭṭhāya anelagaḷāya ^1- atthassa viññāpaniyā catunnaṃ jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati imehi kho bhante pañcahi dhammehi samannāgato thero bhikkhu sabrahmacārīnaṃ piyo ca hoti manāpo ca garu ca bhāvanīyo cāti. {166.10} Sādhu sādhu upavāna imehi kho upavāna pañcahi dhammehi samannāgato thero bhikkhu sabrahmacārīnaṃ piyo ca hoti manāpo ca garu ca bhāvanīyo ca ime ce upavāna pañca dhammā therassa bhikkhuno na saṃvijjeyyuṃ kena naṃ sabrahmacārī sakkareyyuṃ garukareyyuṃ māneyyuṃ pūjeyyuṃ ^2- khaṇḍiccena pāliccena vallittacatāya ^3- yasmā ca kho upavāna ime pañca dhammā therassa bhikkhuno saṃvijjanti tasmā taṃ sabrahmacārī sakkaronti garukaronti mānenti pūjentīti.

The Pali Tipitaka in Roman Character Volume 22 page 214-218. https://84000.org/tipitaka/read/roman_read.php?B=22&A=4499 Compare with The Pali Tipitaka in Thai Character :- https://84000.org/tipitaka/read/pali_read.php?B=22&A=4499 Compare with The Royal Version of Thai Tipitaka :- https://84000.org/tipitaka/read/byitem.php?book=22&item=166&items=1 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=22&siri=166 Study Atthakatha :- https://84000.org/tipitaka/attha/attha.php?b=22&i=166 The Pali Atthakatha in Thai :- https://84000.org/tipitaka/atthapali/read_th.php?B=16&A=1421 The Pali Atthakatha in Roman :- https://84000.org/tipitaka/atthapali/read_rm.php?B=16&A=1421 Contents of The Tipitaka Volume 22 https://84000.org/tipitaka/read/?index_22 https://84000.org/tipitaka/english/?index_22