PaliRoman Vol.32

Dutiyaṃ puṇṇakattherāpadānaṃ (402) [404] |404.29| Pabbhārakūṭaṃ nissāya sayambhū aparājito ābādhiko ca ^1- so buddho vasati pabbatantare. |404.30| Mama assamasāmantā panādo āsi tāvade buddhe nibbāyamānamhi āloko ^2- āsi tāvade. |404.31| Yāvatā vanasaṇḍasmiṃ acchakokataracchayo bālā ^3- ca kesarī sabbe abhikujjiṃsu ^4- tāvade. |404.32| Uppādaṃ ^5- tamahaṃ disvā pabbhāraṃ agamāsahaṃ tatthaddasāsiṃ sambuddhaṃ nibbutaṃ aparājitaṃ. |404.33| Suphullaṃ sālarājaṃva sataraṃsīva uggataṃ vītaccitaṃva aṅgāraṃ nibbutaṃ aparājitaṃ. |404.34| Tiṇaṃ kaṭṭhañca pūretvā citakaṃ tatthakāsahaṃ citakaṃ sukataṃ katvā sarīraṃ jhāpayiṃ ahaṃ. |404.35| Sarīraṃ jhāpayitvāna gandhatoyaṃ samokiriṃ antalikkhe ṭhito yakkho nāmaṃ aggahi tāvade. @Footnote: ¹ Yu. ... va yo .... ² Ma. āloko udapajjatha. ³ Ma. Yu. vāḷā. @⁴ Ma. Yu. abhigajjiṃsu. ⁵ Ma. uppātaṃ. |404.36| Taṃ ^1- pūritaṃ tayā kiccaṃ sayambhussa mahesino puṇṇako nāma nāmena yadā ^2- hosi tuvaṃ mune. |404.37| Tamhā kāyā cavitvāna devalokaṃ agañchahaṃ tattha dibbamayo gandho antalikkhā ^3- pavassati. |404.38| Tatrāpi nāmadheyyaṃ me puṇṇakoti ahu tadā devabhūto manusso vā saṅkappaṃ pūrayāmahaṃ. |404.39| Idaṃ pacchimakaṃ mayhaṃ carimo vattatī ^4- bhavo idhāpi puṇṇako nāma nāmadheyyaṃ pakāsati ^5-. |404.40| Tosayitvāna sambuddhaṃ gotamaṃ sakyapuṅgavaṃ sabbāsave pariññāya viharāmi anāsavo. |404.41| Ekanavute ito kappe yaṃ kammamakariṃ tadā duggatiṃ nābhijānāmi tanukiccassidaṃ phalaṃ. |404.42| Kilesā jhāpitā mayhaṃ bhavā sabbe samūhatā nāgova bandhanaṃ chetvā viharāmi anāsavo. |404.43| Svāgataṃ vata me āsi mama buddhassa santike tisso vijjā anuppattā kataṃ buddhassa sāsanaṃ. |404.44| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā puṇṇako thero imā gāthāyo abhāsitthāti. Puṇṇakattherassa apadānaṃ samattaṃ. @Footnote: ¹ Ma. yaṃ.. ² Ma. Yu. sadā hohi. ³ Yu. antalikkhe. ⁴ Ma. Yu. vattate. @⁵ Yu. paññāyati.

The Pali Tipitaka in Roman Character Volume 32 page 536-537. https://84000.org/tipitaka/read/roman_read.php?B=32&A=10578 Compare with The Pali Tipitaka in Thai Character :- https://84000.org/tipitaka/read/pali_read.php?B=32&A=10578 Compare with The Royal Version of Thai Tipitaka :- https://84000.org/tipitaka/read/byitem.php?book=32&item=404&items=1 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=32&siri=404 Study Atthakatha :- https://84000.org/tipitaka/attha/attha.php?b=32&i=404 The Pali Atthakatha in Thai :- https://84000.org/tipitaka/atthapali/read_th.php?B=50&A=5411 The Pali Atthakatha in Roman :- https://84000.org/tipitaka/atthapali/read_rm.php?B=50&A=5411 Contents of The Tipitaka Volume 32 https://84000.org/tipitaka/read/?index_32 https://84000.org/tipitaka/english/?index_32