PaliRoman Vol.33

Chaṭṭhaṃ mūgaphakkhacariyaṃ [26] |26.48| Punāparaṃ yadā homi kāsirājassa atrajo mūgaphakkhoti ^1- nāmena temiyoti vadanti maṃ. |26.49| Soḷasitthīsahassānaṃ na vijjati pumo tadā ahorattānamaccayena nibbatto ahamekako. |26.50| Kicchā laddhaṃ piyaṃ puttaṃ abhijātaṃ jutindharaṃ setacchattaṃ dhārayitvāna sayane posesi maṃ pitā. |26.51| Niddāyamāno sayanavare pabujjhitvānahaṃ tadā addasaṃ paṇḍaraṃ chattaṃ yenāhaṃ nirayaṃ gato. |26.52| Saha diṭṭhissa ^2- me chattaṃ tāso uppajji bheravo vinicchayaṃ samāpanno kadāhaṃ imaṃ muñcissaṃ. |26.53| Pubbasālohitā mayhaṃ devatā atthakāminī sā maṃ disvāna dukkhitaṃ tiṃsu ṭhānesu yojayi. |26.54| Mā paṇḍiccayaṃ vibhāvaya bālamato bhava sabbapāṇinaṃ sabbo tañjano ocināyatu evaṃ tava attho bhavissati. |26.55| Evaṃ vuttāyahaṃ tassā idaṃ vacanamabraviṃ karomi te taṃ vacanaṃ yaṃ maṃ bhaṇasi devate. |26.56| Atthakāmāsi me amma hitakāmāsi devate tassāhaṃ vacanaṃ sutvā sāgareva thalaṃ labhiṃ. @Footnote: ¹ Ma. Yu. mūgapakkhoti. ² Ma. diṭṭhassa. |26.57| Haṭṭho saṃviggamānaso tayo aṅge adhiṭṭhahiṃ mūgo ahosiṃ badhiro phakkho ^1- gativivajjito. |26.58| Ete aṅge adhiṭṭhāya vassāni soḷasaṃ vasiṃ tato me hatthe pāde ca jivhaṃ sotañca maddiya |26.59| anūnataṃ me passitvā kāḷakaṇṇīti nindisuṃ. Tato jānapadā sabbe senāpatipurohitā |26.60| sabbe ekamanā hutvā chaḍḍanaṃ anumodisuṃ. Sohaṃ tesaṃ matiṃ sutvā haṭṭho saṃviggamānaso |26.61| yassatthāya tapo ciṇṇo so me attho samijjhatha. Nhāpetvā anulimpetvā veṭhetvā rājaveṭhanaṃ |26.62| abhisiñcitvā chattena kāresuṃ puraṃ padakkhiṇaṃ. Sattāhaṃ dhārayitvāna uggate ravimaṇḍale |26.63| rathena maṃ nīharitvā sārathi vanamupāgami. Ekokāse rathaṃ katvā sajjassaṃ hatthamuñcito ^2- |26.64| sārathi khaṇatī kāsuṃ nikkhātuṃ paṭhaviyā mamaṃ. Adhiṭṭhitamadhiṭṭhānaṃ tajjento vividhakāraṇā |26.65| na bhindiṃva tamadhiṭṭhānaṃ bodhiyāyeva kāraṇā. Mātā pitā na me dessā attā me na ca dessiyo |26.66| sabbaññutaṃ piyaṃ mayhaṃ tasmā va tamadhiṭṭhahiṃ. @Footnote: ¹ Ma. Yu. pakkho. ² Yu. hatthamuñcitaṃ. Ete aṅge adhiṭṭhāya vassāni soḷasaṃ vasiṃ adhiṭṭhānena ^[1]- samo natthi esā me adhiṭṭhānapāramīti mūgaphakkhacariyaṃ chaṭṭhaṃ.

The Pali Tipitaka in Roman Character Volume 33 page 585-587. https://84000.org/tipitaka/read/roman_read.php?B=33&A=12036 Compare with The Pali Tipitaka in Thai Character :- https://84000.org/tipitaka/read/pali_read.php?B=33&A=12036 Compare with The Royal Version of Thai Tipitaka :- https://84000.org/tipitaka/read/byitem.php?book=33.3&item=26&items=1 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=33&siri=245 Study Atthakatha :- https://84000.org/tipitaka/attha/attha.php?b=33&i=234 The Pali Atthakatha in Thai :- https://84000.org/tipitaka/atthapali/read_th.php?B=52&A=5541 The Pali Atthakatha in Roman :- https://84000.org/tipitaka/atthapali/read_rm.php?B=52&A=5541 Contents of The Tipitaka Volume 33 https://84000.org/tipitaka/read/?index_33 https://84000.org/tipitaka/english/?index_33