|
|
| บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |
|
| |
|
|
TIPITAKA Volume 35 : PALI ROMAN Sutta Pitaka Vol 27 : Abhi. Vibhaṅgo
[1012] Tattha katamāni aṭṭha kilesavatthūni lobho doso moho māno diṭṭhi vicikicchā thīnaṃ uddhaccaṃ imāni aṭṭha kilesavatthūni. [1013] Tattha katamāni aṭṭha kusītavatthūni . idha bhikkhunā kammaṃ kattabbaṃ hoti tassa evaṃ hoti kammaṃ kho me kattabbaṃ bhavissati kammaṃ kho pana me karontassa kāyo kilamissati handāhaṃ nipajjāmīti so nipajjati na viriyaṃ ārabhati appattassa pattiyā anadhigatassa adhigamāya asacchikatassa sacchikiriyāya idaṃ paṭhamaṃ kusītavatthuṃ . Puna ca paraṃ bhikkhunā kammaṃ kataṃ hoti tassa evaṃ hoti ahaṃ kho kammaṃ akāsiṃ kammaṃ kho pana me karontassa kāyo kilanto handāhaṃ nipajjāmīti so nipajjati na viriyaṃ ārabhati appattassa pattiyā anadhigatassa adhigamāya asacchikatassa sacchikiriyāya idaṃ dutiyaṃ kusītavatthuṃ. {1013.1} Puna ca paraṃ bhikkhunā maggo gantabbo hoti tassa evaṃ hoti maggo kho me gantabbo bhavissati maggaṃ kho pana me gacchantassa kāyo kilamissati handāhaṃ nipajjāmīti so nipajjati na viriyaṃ ārabhati appattassa pattiyā anadhigatassa adhigamāya asacchikatassa sacchikiriyāya idaṃ tatiyaṃ kusītavatthuṃ . puna ca paraṃ--------------------------------------------------------------------------------------------- page522.
Bhikkhunā maggo gato hoti tassa evaṃ hoti ahaṃ kho maggaṃ agamāsiṃ maggaṃ kho pana me gacchantassa kāyo kilanto handāhaṃ nipajjāmīti so nipajjati na viriyaṃ ārabhati appattassa pattiyā anadhigatassa adhigamāya asacchikatassa sacchikiriyāya idaṃ catutthaṃ kusītavatthuṃ. {1013.2} Puna ca paraṃ bhikkhu gāmaṃ vā nigamaṃ vā piṇḍāya caranto na labhati lūkhassa vā paṇītassa vā bhojanassa yāvadatthaṃ pāripūriṃ tassa evaṃ hoti ahaṃ kho gāmaṃ vā nigamaṃ vā piṇḍāya caranto nālatthaṃ lūkhassa vā paṇītassa vā bhojanassa yāvadatthaṃ pāripūriṃ tassa me kāyo kilanto akammañño handāhaṃ nipajjāmīti so nipajjati na viriyaṃ ārabhati appattassa pattiyā anadhigatassa adhigamāya asacchikatassa sacchikiriyāya idaṃ pañcamaṃ kusītavatthuṃ. {1013.3} Puna ca paraṃ bhikkhu gāmaṃ vā nigamaṃ vā piṇḍāya caranto labhati lūkhassa vā paṇītassa vā bhojanassa yāvadatthaṃ pāripūriṃ tassa evaṃ hoti ahaṃ kho gāmaṃ vā nigamaṃ vā piṇḍāya caranto alatthaṃ lūkhassa vā paṇītassa vā bhojanassa yāvadatthaṃ pāripūriṃ tassa me kāyo garuko akammañño māsācitaṃ maññe handāhaṃ nipajjāmīti so nipajjati na viriyaṃ ārabhati appattassa pattiyā anadhigatassa adhigamāya asacchikatassa sacchikiriyāya idaṃ chaṭṭhaṃ kusītavatthuṃ. {1013.4} Puna ca paraṃ bhikkhuno uppanno hoti appamattako ābādho tassa evaṃ hoti uppanno kho me ayaṃ appamattako ābādho atthi kappo--------------------------------------------------------------------------------------------- page523.
Nipajjituṃ handāhaṃ nipajjāmīti so nipajjati na viriyaṃ ārabhati appattassa pattiyā anadhigatassa adhigamāya asacchitassa sacchikiriyāya idaṃ sattamaṃ kusītavatthuṃ. {1013.5} Puna ca paraṃ bhikkhu gilānā vuṭṭhito hoti aciravuṭṭhito gelaññā tassa evaṃ hoti ahaṃ kho gilānā vuṭṭhito aciravuṭṭhito gelaññā tassa me kāyo dubbalo akammañño handāhaṃ nipajjāmīti so nipajjati na viriyaṃ ārabhati appattassa pattiyā anadhigatassa adhigamāya asacchikatassa sacchikiriyāya idaṃ aṭṭhamaṃ kusītavatthuṃ. Imāni aṭṭha kusītavatthūni. [1014] Tattha katamesu aṭṭhasu lokadhammesu cittassa paṭighāto lābhe sārāgo alābhe paṭivirodho yase sārāgo ayase paṭivirodho pasaṃsāya sārāgo nindāya paṭivirodho sukhe sārāgo dukkhe paṭivirodho imesu aṭṭhasu lokadhammesu cittassa paṭighāto. [1015] Tattha katame aṭṭha anariyavohārā adiṭṭhe diṭṭhavāditā asute sutavāditā amute mutavāditā aviññāte viññātavāditā diṭṭhe adiṭṭhavāditā sute asutavāditā mute amutavāditā viññāte aviññātavāditā ime aṭṭha anariyavohārā. [1016] Tattha katame aṭṭha micchattā micchādiṭṭhi micchāsaṅkappo micchāvācā micchākammanto micchāājīvo micchāvāyāmo micchāsati micchāsamādhi ime aṭṭha micchattā.--------------------------------------------------------------------------------------------- page524.
[1017] Tattha katame aṭṭha purisadosā idha bhikkhū bhikkhuṃ āpattiyā codenti so bhikkhu bhikkhūhi āpattiyā codiyamāno na sarāmi na sarāmīti asatiyā nibbeṭheti ayaṃ paṭhamo purisadoso. {1017.1} Puna ca paraṃ bhikkhū bhikkhuṃ āpattiyā codenti so bhikkhu bhikkhūhi āpattiyā codiyamāno codakaṃyeva paṭippharati kinnu kho tuyhaṃ bālassa abyattassa bhaṇitena tvaṃpi nāma maṃ bhaṇitabbaṃ maññasīti ayaṃ dutiyo purisadoso. {1017.2} Puna ca paraṃ bhikkhū bhikkhuṃ āpattiyā codenti so bhikkhu bhikkhūhi āpattiyā codiyamāno codakasseva paccāropeti tvaṃpi khosi itthannāmaṃ āpattiṃ āpanno tvaṃ tāva paṭhamaṃ paṭikarohīti ayaṃ tatiyo purisadoso. {1017.3} Puna ca paraṃ bhikkhū bhikkhuṃ āpattiyā codenti so bhikkhu bhikkhūhi āpattiyā codiyamāno aññenaññaṃ paṭicarati bahiddhā kathaṃ apanāmeti kopañca dosañca appaccayañca pātukaroti ayaṃ catuttho purisadoso. {1017.4} Puna ca paraṃ bhikkhū bhikkhuṃ āpattiyā codenti so bhikkhu bhikkhūhi āpattiyā codiyamāno saṅghamajjhe bāhāvikkhepakaṃ bhaṇati ayaṃ pañcamo purisadoso. {1017.5} Puna ca paraṃ bhikkhū bhikkhuṃ āpattiyā codenti so bhikkhu bhikkhūhi āpattiyā codiyamāno tuṇhībhūto saṅghaṃ viheseti ayaṃ chaṭṭho purisadoso. {1017.6} Puna ca paraṃ bhikkhū bhikkhuṃ āpattiyā codenti so bhikkhu bhikkhūhi āpattiyā codiyamāno anādayitvā saṅghaṃ anādayitvā codakaṃ sāpattikova yena kāmaṃ pakkamati ayaṃ--------------------------------------------------------------------------------------------- page525.
Sattamo purisadoso. {1017.7} Puna ca paraṃ bhikkhū bhikkhuṃ āpattiyā codenti so bhikkhu bhikkhūhi āpattiyā codiyamāno evamāha kinnukho tumhe āyasmanto atibāḷhaṃ mayi byāvaṭā idānāhaṃ sikkhaṃ paccakkhāya hīnāyāvattissāmīti so sikkhaṃ paccakkhāya hīnāyāvattitvā evamāha idāni kho tumhe āyasmanto attamanā hothāti ayaṃ aṭṭhamo purisadoso ime aṭṭha purisadosā. [1018] Tattha katame aṭṭha asaññivādā rūpī attā hoti arogo parammaraṇāti asaññīti naṃ paññāpenti arūpī attā hoti arogo parammaraṇāti asaññīti naṃ paññāpenti rūpī ca arūpī ca attā hoti arogo parammaraṇāti asaññīti naṃ paññāpenti neva rūpī nārūpī attā hoti arogo parammaraṇāti asaññīti naṃ paññāpenti antavā attā hoti arogo parammaraṇāti asaññīti naṃ paññāpenti anantavā attā hoti arogo parammaraṇāti asaññīti naṃ paññāpenti antavā ca anantavā ca attā hoti arogo parammaraṇāti asaññīti naṃ paññāpenti nevantavā nānantavā attā hoti arogo parammaraṇāti asaññīti naṃ paññāpenti ime aṭṭha asaññivādā. [1019] Tattha katame aṭṭha nevasaññināsaññivādā rūpī attā hoti arogo parammaraṇāti nevasaññīnāsaññīti naṃ paññāpenti arūpī attā hoti arogo parammaraṇāti nevasaññīnāsaññīti--------------------------------------------------------------------------------------------- page526.
Naṃ paññāpenti rūpī ca arūpī ca attā hoti arogo parammaraṇāti nevasaññīnāsaññīti naṃ paññāpenti neva rūpī nārūpī attā hoti arogo parammaraṇāti nevasaññīnāsaññīti naṃ paññāpenti antavā attā hoti arogo parammaraṇāti nevasaññīnāsaññīti naṃ paññāpenti anantavā attā hoti arogo parammaraṇāti nevasaññīnāsaññīti naṃ paññāpenti antavā ca anantavā ca attā hoti arogo parammaraṇāti nevasaññīnāsaññīti naṃ paññāpenti nevantavā nānantavā attā hoti arogo parammaraṇāti nevasaññīnāsaññīti naṃ paññāpenti ime aṭṭha nevasaññināsaññivādā. Aṭṭhakaṃ.The Pali Tipitaka in Roman Character Volume 35 page 521-526. https://84000.org/tipitaka/read/roman_read.php?B=35&A=10519&pagebreak=1 Compare with The Pali Tipitaka in Thai Character :- https://84000.org/tipitaka/read/pali_read.php?B=35&A=10519&pagebreak=1 Compare with The Royal Version of Thai Tipitaka :- https://84000.org/tipitaka/read/byitem.php?book=35&item=1012&items=8 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=35&siri=73 Study Atthakatha :- https://84000.org/tipitaka/attha/attha.php?b=35&i=1012 The Pali Atthakatha in Thai :- https://84000.org/tipitaka/atthapali/read_th.php?B=54&A=13000 The Pali Atthakatha in Roman :- https://84000.org/tipitaka/atthapali/read_rm.php?B=54&A=13000 Contents of The Tipitaka Volume 35 https://84000.org/tipitaka/read/?index_35 https://84000.org/tipitaka/english/?index_35
      |
|
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]