PaliRoman Vol.5

[166] Tena kho pana samayena annatarassa bhikkhuno kucchivikarabadho hoti . so sake muttakarise palipanno seti . Athakho bhagava ayasmata anandena pacchasamanena senasanacarikam ahindanto yena tassa bhikkhuno viharo tenupasankami . Addasa kho bhagava tam bhikkhum sake muttakarise palipannam sayamanam disvana yena so bhikkhu tenupasankami upasankamitva tam bhikkhum etadavoca kinte bhikkhu abadhoti . kucchivikaro me bhagavati . Atthi pana te bhikkhu upatthakoti . natthi bhagavati . kissa tam bhikkhu na upatthentiti ^1- . aham kho bhante bhikkhunam akarako tena mam bhikkhu na upatthentiti . athakho bhagava ayasmantam anandam amantesi gacchananda udakam ahara imam bhikkhum nahapessamati . Evam bhanteti kho ayasma anando bhagavato patissunitva udakam ahari . bhagava udakam asinci ayasma anando paridhovi bhagava sisato aggahesi ayasma anando padato uccaretva mancake nipatesum. {166.1} Athakho bhagava etasmim nidane etasmim pakarane bhikkhusangham sannipatapetva bhikkhu patipucchi atthi bhikkhave amukasmim vihare bhikkhu gilanoti . atthi bhagavati . kintassa bhikkhave bhikkhuno abadhoti . tassa bhante ayasmato kucchivikarabadhoti . atthi pana bhikkhave tassa bhikkhuno upatthakoti. Natthi bhagavati . kissa tam bhikkhu na upatthentiti . eso bhante bhikkhu bhikkhunam akarako tena tam bhikkhu na upatthentiti . natthi vo ^2- bhikkhave mata natthi pita ye vo ^3- upatthaheyyum tumhe ce bhikkhave annamannam na upatthahissatha atha kocarahi upatthahissati yo bhikkhave mam upatthaheyya so gilanam upatthaheyya . sace upajjhayo hoti upajjhayena yavajivam upatthatabbo vutthanassa ^4- agametabbam . sace acariyo hoti acariyena yavajivam upatthatabbo vutthanassa agametabbam . sace saddhivihariko @Footnote: ¹ Ma. upatthahantiti. 2-3 Yu. te. ⁴ Po. vutthapanassa. Ma. vutthanamassa. Hoti saddhiviharikena yavajivam upatthatabbo vutthanassa agametabbam . Sace antevasiko hoti antevasikena yavajivam upatthatabbo vutthanassa agametabbam . sace samanupajjhayako hoti samanupajjhayakena yavajivam upatthatabbo vutthanassa agametabbam . Sace samanacariyako hoti samanacariyakena yavajivam upatthatabbo vutthanassa agametabbam . sace na hoti upajjhayo va acariyo va saddhivihariko va antevasiko va samanupajjhayako va samanacariyako va sanghena upatthatabbo . no ce upatthaheyya apatti dukkatassa. {166.2} Pancahi bhikkhave angehi samannagato gilano dupatthako ^1- hoti asappayakari hoti sappaye mattam na janati bhesajjam na patisevita hoti atthakamassa gilanupatthakassa yathabhutam abadham navikatta hoti abhikkamantam va abhikkamatiti patikkamantam va patikkamatiti thitam va thitoti uppannanam saririkanam vedananam dukkhanam tibbanam kharanam katukanam asatanam amanapanam panaharanam anadhivasakajatiko hoti imehi kho bhikkhave pancahangehi samannagato gilano dupatthako ^1- hoti. {166.3} Pancahi bhikkhave angehi samannagato gilano supatthako hoti sappayakari hoti sappaye mattam janati bhesajjam patisevita hoti atthakamassa gilanupatthakassa yathabhutam abadham avikatta hoti abhikkamantam va abhikkamatiti patikkamantam va patikkamatiti @Footnote: ¹ Ma. dupatatho. Thitam va thitoti uppannanam saririkanam vedananam dukkhanam tibbanam kharanam katukanam asatanam amanapanam panaharanam adhivasakajatiko hoti imehi kho bhikkhave pancahangehi samannagato gilano supatthako hoti. {166.4} Pancahi bhikkhave angehi samannagato gilanupatthako nalam gilanam upatthatum na patibalo hoti bhesajjam samvidhatum sappayasappayam na janati asappayam upanameti sappayam apanameti amisantaro gilanam upattheti no mettacitto jegucchi hoti uccaram va passavam va khelam va vantam va nihatum na patibalo hoti gilanam kalena kalam dhammiya kathaya sandassetum samadapetum samuttejetum sampahamsetum imehi kho bhikkhave pancahangehi samannagato gilanupatthako nalam gilanam upatthatum. {166.5} Pancahi bhikkhave angehi samannagato gilanupatthako alam gilanam upatthatum patibalo hoti bhesajjam samvidhatum sappayasappayam janati asappayam apanameti sappayam upanameti mettacitto gilanam upattheti no amisantaro ajegucchi hoti uccaram va passavam va khelam va vantam va nihatum patibalo hoti gilanam kalena kalam dhammiya kathaya sandassetum samadapetum samuttejetum sampahamsetum imehi kho bhikkhave pancahangehi samannagato gilanupatthako alam gilanam upatthatunti. [167] Tena kho pana samayena dve bhikkhu kosalesu janapadesu addhanamaggapatipanna honti . te annataram avasam upagacchimsu . Tattha annataro bhikkhu gilano hoti . athakho tesam bhikkhunam etadahosi bhagavata kho avuso gilanupatthanam vannitam handa mayam avuso imam bhikkhum upatthemati . te tam upatthahimsu . so tehi upatthiyamano kalamakasi . athakho te bhikkhu tassa bhikkhuno pattacivaramadaya savatthim gantva bhagavato etamattham arocesum . bhikkhussa bhikkhave kalakate sangho sami pattacivare apica gilanupatthaka bahupakara . Anujanami bhikkhave sanghena ticivaranca pattanca gilanupatthakanam datum . evanca pana bhikkhave databbam . tena gilanupatthakena bhikkhuna sangham upasankamitva evamassa vacaniyo itthannamo bhante bhikkhu kalakato idam tassa ticivaranca patto cati . Byattena bhikkhuna patibalena sangho napetabbo {167.1} sunatu me bhante sangho itthannamo bhikkhu kalakato idam tassa ticivaranca patto ca . yadi sanghassa pattakallam sangho imam ticivaranca pattanca gilanupatthakanam dadeyya. Esa natti. {167.2} Sunatu me bhante sangho itthannamo bhikkhu kalakato idam tassa ticivaranca patto ca . sangho imam ticivaranca pattanca gilanupatthakanam deti . yassayasmato khamati imassa ticivarassa ca pattassa ca gilanupatthakanam danam so tunhassa yassa nakkhamati so bhaseyya . dinnam idam sanghena ticivaranca patto ca gilanupatthakanam . khamati sanghassa tasma tunhi . evametam Dharayamiti. {167.3} Tena kho pana samayena annataro samanero kalakato hoti . bhagavato etamattham arocesum . samanerassa bhikkhave kalakate sangho sami pattacivare apica gilanupatthaka bahupakara . anujanami bhikkhave sanghena civaranca pattanca gilanupatthakanam datum. {167.4} Evanca pana bhikkhave databbam. Tena gilanupatthakena bhikkhuna sangham upasankamitva evamassa vacaniyo itthannamo bhante samanero kalakato idam tassa civaranca patto cati . byattena bhikkhuna patibalena sangho napetabbo {167.5} sunatu me bhante sangho itthannamo samanero kalakato idam tassa civaranca patto ca . Yadi sanghassa pattakallam sangho imam civaranca pattanca gilanupatthakanam dadeyya. Esa natti. {167.6} Sunatu me bhante sangho itthannamo samanero kalakato idam tassa civaranca patto ca . sangho imam civaranca pattanca gilanupatthakanam deti . yassayasmato khamati imassa civarassa ca pattassa ca gilanupatthakanam danam so tunhassa yassa nakkhamati so bhaseyya . dinnam idam sanghena civaranca patto ca gilanupatthakanam . khamati sanghassa tasma tunhi . evametam dharayamiti. {167.7} Tena kho pana samayena annataro bhikkhu ca samanero ca gilanam upatthahimsu . so tehi upatthahiyamano kalamakasi . Athakho tassa gilanupatthakassa bhikkhuno etadahosi katham nu kho Gilanupatthakassa samanerassa civarapativiso databboti . bhagavato etamattham arocesum . anujanami bhikkhave gilanupatthakassa samanerassa samakam pativisam datunti. {167.8} Tena kho pana samayena annataro bhikkhu bahubhando bahuparikkharo kalakato hoti . bhagavato etamattham arocesum . Bhikkhussa bhikkhave kalakate sangho sami pattacivare apica gilanupatthaka bahupakara . anujanami bhikkhave sanghena ticivaranca pattanca gilanupatthakanam datum yam tattha lahubhandam lahuparikkharam tam sammukhibhutena sanghena bhajetum yam tattha garubhandam garuparikkharam tam agatanagatassa catuddisassa sanghassa avissajjikam avebhangikanti.

The Pali Tipitaka in Roman Character Volume 5 page 226-232. https://84000.org/tipitaka/read/roman_read.php?B=5&A=4695&modeTY=2 Compare with The Pali Tipitaka in Thai Character :- https://84000.org/tipitaka/read/pali_read.php?B=5&A=4695&modeTY=2 Compare with The Royal Version of Thai Tipitaka :- https://84000.org/tipitaka/read/byitem.php?book=5&item=166&items=2 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=5&siri=45 Study Atthakatha :- https://84000.org/tipitaka/attha/attha.php?b=5&i=166 The Pali Atthakatha in Thai :- https://84000.org/tipitaka/atthapali/read_th.php?B=3&A=5014 The Pali Atthakatha in Roman :- https://84000.org/tipitaka/atthapali/read_rm.php?B=3&A=5014 Contents of The Tipitaka Volume 5 https://84000.org/tipitaka/read/?index_5 https://84000.org/tipitaka/english/?index_5