PaliRoman Vol.6

[482] Idha pana bhikkhave bhikkhu mānattāraho vibbhamati . Vibbhantakassa bhikkhave mānattādānaṃ na rūhati . so ce puna upasampajjati tassa tadeva purimaṃ parivāsadānaṃ . yo parivāso dinno sudinno . yo parivuttho suparivattho . tassa bhikkhuno mānattaṃ dātabbaṃ. [483] Idha pana bhikkhave bhikkhu mānattāraho sāmaṇero hoti .pe. ummattako hoti .pe. khittacitto hoti .pe. Vedanaṭṭo hoti .pe. āpattiyā adassane ukkhipiyati .pe. Āpattiyā appaṭikamme ukkhipiyati .pe. pāpikāya diṭṭhiyā Appaṭinissagge ukkhipiyati . ukkhittakassa bhikkhave mānattadānaṃ na rūhati . so ce puna osāriyati tassa tadeva purimaṃ parivāsadānaṃ. Yo parivāso dinno sudinno . yo parivuttho suparivuttho . tassa bhikkhuno mānattaṃ dātabbaṃ. [484] Idha pana bhikkhave bhikkhu mānattaṃ caranto vibbhamati . Vibbhantakassa bhikkhave mānattacariyā na rūhati . so ce puna upasampajjati tassa tadeva purimaṃ parivāsadānaṃ . yo parivāso dinno sudinno . yo parivuttho suparivuttho . yaṃ mānattaṃ dinnaṃ sudinnaṃ. Yaṃ mānattaṃ ciṇṇaṃ suciṇṇaṃ. Avasesaṃ caritabbaṃ. [485] Idha pana bhikkhave bhikkhu mānattaṃ caranto sāmaṇero hoti .pe. ummattako hoti .pe. khittacitto hoti .pe. Vedanaṭṭo hoti .pe. āpattiyā adassane ukkhipiyati .pe. Āpattiyā appaṭikamme ukkhipiyati .pe. pāpikāya diṭṭhiyā appaṭinissagge ukkhipiyati . ukkhittakassa bhikkhave mānattacariyā na rūhati . so ce puna osāriyati tassa tadeva purimaṃ parivāsadānaṃ. Yo parivāso dinno sudinno . yo parivuttho suparivuttho . yaṃ mānattaṃ dinnaṃ sudinnaṃ . yaṃ mānattaṃ ciṇṇaṃ suciṇṇaṃ. Avasesaṃ caritabbaṃ.

The Pali Tipitaka in Roman Character Volume 6 page 252-253. https://84000.org/tipitaka/read/roman_read.php?B=6&A=5143 Compare with The Pali Tipitaka in Thai Character :- https://84000.org/tipitaka/read/pali_read.php?B=6&A=5143 Compare with The Royal Version of Thai Tipitaka :- https://84000.org/tipitaka/read/byitem.php?book=6&item=482&items=4 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=6&siri=37 Contents of The Tipitaka Volume 6 https://84000.org/tipitaka/read/?index_6 https://84000.org/tipitaka/english/?index_6