PaliRoman Vol.7

[428] Tena kho pana samayena sambahulā bhikkhū araññe viharanti . te neva pānīyaṃ upaṭṭhāpenti na paribhojanīyaṃ upaṭṭhāpenti na aggiṃ upaṭṭhāpenti na araṇisahitaṃ upaṭṭhāpenti na nakkhattapadāni jānanti na disābhāgaṃ jānanti . corā tattha gantvā te bhikkhū etadavocuṃ atthi bhante pānīyanti . Natthāvusoti . atthi bhante paribhojanīyanti . natthāvusoti . Atthi bhante aggīti . natthāvusoti . atthi bhante araṇisahitanti . Natthāvusoti . kenajja bhante yuttanti . na kho mayaṃ āvuso jānāmāti . katamāyaṃ bhante disāti . na kho mayaṃ āvuso jānāmāti . athakho te corā nevimesaṃ pānīyaṃ atthi na paribhojanīyaṃ atthi na aggi atthi na araṇisahitaṃ atthi na nakkhattapadāni jānanti na disābhāgaṃ jānanti corā ime ^1- nayime bhikkhūti ākoṭetvā pakkamiṃsu . athakho te bhikkhū bhikkhūnaṃ etamatthaṃ ārocesuṃ . bhikkhū bhagavato etamatthaṃ ārocesuṃ . @Footnote: ¹ Yu. corāyime.

--------------------------------------------------------------------------------------------- page234.

Athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi tenahi bhikkhave āraññakānaṃ bhikkhūnaṃ vattaṃ paññāpessāmi yathā āraññakehi bhikkhūhi sammā vattitabbaṃ. [429] Āraññakena bhikkhave bhikkhunā kālasseva uṭṭhāya pattaṃ thavikāya pakkhipitvā aṃse ālaggetvā cīvaraṃ khandhe karitvā upāhanā ārohitvā dārubhaṇḍaṃ mattikābhaṇḍaṃ paṭisāmetvā dvāravātapānāni ^1- thaketvā senāsanā otaritabbaṃ idāni gāmaṃ pavisissāmīti upāhanā omuñcitvā nīcaṃ katvā pappoṭetvā thavikāya pakkhipitvā aṃse ālaggetvā timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo supaṭicchannena antaraghare gantabbaṃ susaṃvutena antaraghare gantabbaṃ .pe. na ukkuṭikāya antaraghare gantabbaṃ {429.1} nivesanaṃ pavisantena sallakkhetabbaṃ iminā pavisissāmi iminā nikkhamissāmīti nātisahasā pavisitabbaṃ nātisahasā nikkhamitabbaṃ nātidūre ṭhātabbaṃ nāccāsanne ṭhātabbaṃ nāticiraṃ ṭhātabbaṃ nātilahukaṃ nivattitabbaṃ ṭhitakena sallakkhetabbaṃ bhikkhaṃ dātukāmā vā adātukāmā vāti sace kammaṃ vā nikkhipati āsanā vā vuṭṭhāti kaṭacchuṃ vā parāmasati bhājanaṃ vā parāmasati ṭhapeti vā dātukāmiyāti ṭhātabbaṃ bhikkhāya dīyamānāya vāmena @Footnote: ¹ Ma. Yu. dvāravātapānaṃ.

--------------------------------------------------------------------------------------------- page235.

Hatthena saṅghāṭiṃ uccāretvā dakkhiṇena hatthena pattaṃ paṇāmetvā ubhohi hatthehi pattaṃ pariggahetvā bhikkhā paṭiggahetabbā na ca bhikkhādāyikāya mukhaṃ oloketabbaṃ sallakkhetabbaṃ sūpaṃ vā ^1- dātukāmā vā adātukāmā vāti sace kaṭacchuṃ vā parāmasati bhājanaṃ vā parāmasati ṭhapeti vā dātukāmiyāti ṭhātabbaṃ bhikkhāya dinnāya saṅghāṭiyā pattaṃ paṭicchādetvā sādhukaṃ ataramānena nivattitabbaṃ {429.2} supaṭicchannena antaraghare gantabbaṃ .pe. Na ukkuṭikāya antaraghare gantabbaṃ gāmato nikkhamitvā pattaṃ thavikāya pakkhipitvā aṃse ālaggetvā cīvaraṃ saṃharitvā sīse karitvā upāhanā ārohitvā gantabbaṃ āraññakena bhikkhave bhikkhunā pānīyaṃ upaṭṭhāpetabbaṃ paribhojanīyaṃ upaṭṭhāpetabbaṃ aggi upaṭṭhāpetabbo araṇisahitaṃ upaṭṭhāpetabbaṃ kattaradaṇḍo upaṭṭhāpetabbo nakkhattapadāni uggahetabbāni sakalāni vā ekadesāni vā disākusalena bhavitabbaṃ {429.3} idaṃ kho bhikkhave āraññakānaṃ bhikkhūnaṃ vattaṃ yathā āraññakehi bhikkhūhi sammā vattitabbanti.

The Pali Tipitaka in Roman Character Volume 7 page 233-235. https://84000.org/tipitaka/read/roman_read.php?B=7&A=4675&pagebreak=1 Compare with The Pali Tipitaka in Thai Character :- https://84000.org/tipitaka/read/pali_read.php?B=7&A=4675&pagebreak=1 Compare with The Royal Version of Thai Tipitaka :- https://84000.org/tipitaka/read/byitem.php?book=7&item=428&items=2 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=7&siri=64 Study Atthakatha :- https://84000.org/tipitaka/attha/attha.php?b=7&i=428 Contents of The Tipitaka Volume 7 https://84000.org/tipitaka/read/?index_7 https://84000.org/tipitaka/english/?index_7