PaliRoman Vol.8

[1035] Pārājikanti yaṃ vuttaṃ taṃ suṇohi yathākathaṃ. Cutoparaddho bhaṭṭho ca saddhammehi ^2- niraṅkato saṃvāsopi ca ^3- tahiṃ natthi tenetaṃ iti vuccati. [1036] Saṅghādisesoti yaṃ vuttaṃ taṃ suṇohi yathākathaṃ. Saṅgho va deti parivāsaṃ mūlāya paṭikassati mānattaṃ deti abbheti tenetaṃ iti vuccati. [1037] Aniyatoti yaṃ vuttaṃ taṃ suṇohi yathākathaṃ. Aniyato na niyato anekaṃsikataṃ padaṃ tiṇṇamaññataraṃ ṭhānaṃ aniyatoti pavuccati. [1038] Thullaccayanti yaṃ vuttaṃ taṃ suṇohi yathākathaṃ. @Footnote: ¹ Ma. ca . ² Po. Ma. saddhammā hi . ³ Po. Ma. casaddo natthi. Yu. pisaddo natthi.

--------------------------------------------------------------------------------------------- page369.

Ekassa mūle yo deseti yo ca taṃ paṭiggaṇhati accayo tena samo natthi tenetaṃ iti vuccati. [1039] Nissaggiyanti yaṃ vuttaṃ taṃ suṇohi yathākathaṃ. Saṅghamajjhe gaṇamajjhe ekakasseva ekato nissajjitvā yaṃ deseti ^1- tenetaṃ iti vuccati. [1040] Pācittiyanti yaṃ vuttaṃ taṃ suṇohi yathākathaṃ. Pāteti kusalaṃ dhammaṃ ariyamaggaṃ aparajjhati cittasammohanaṭṭhānaṃ tenetaṃ iti vuccati. [1041] Pāṭidesanīyanti yaṃ vuttaṃ taṃ suṇohi yathākathaṃ. Bhikkhu aññātako santo kicchā laddhāya bhojanaṃ sāmaṃ gahetvā bhuñjeyya gārayhanti pavuccati. Nimantanāsu bhuñjanto ^2- chandāya vosāsati tattha bhikkhunī anivāretvā tahiṃ bhuñje gārayhanti pavuccati. Saddhācittaṃ kulaṃ gantvā appabhogaṃ anāḷhiyaṃ ^3- agilāno tahiṃ bhuñje gārayhanti pavuccati. Yo ce araññe viharanto sāsaṅke sabhayānake aviditaṃ tahiṃ bhuñje gārayhanti pavuccati. Bhikkhunī aññātikā santā yaṃ paresaṃ mamāyitaṃ sappi telaṃ madhu phāṇitaṃ macchamaṃsaṃ athopi khīraṃ dadhiṃ @Footnote: ¹ Ma. Yu. nissajjitvāna deseti . ² Ma. bhuñjantā. Yu. bhuñjantaṃ. @³ Ma. anāḷilaṃ.

--------------------------------------------------------------------------------------------- page370.

Sayaṃ viññāpeyya bhikkhunī gārayhapattā sugatassa sāsane. [1042] Dukkaṭanti yaṃ vuttaṃ taṃ suṇohi yathākathaṃ. Aparaddhaṃ viraddhañca khalitaṃ yañca dukkaṭaṃ yaṃ manusso kare pāpaṃ āvi vā yadi vā raho dukkaṭanti pavedenti tenetaṃ iti vuccati. [1043] Dubbhāsitanti yaṃ vuttaṃ taṃ suṇohi yathākathaṃ. Dubbhāsitaṃ durābhaṭṭhaṃ saṅkiliṭṭhañca yaṃ padaṃ yañca viññū garahanti tenetaṃ iti vuccati. [1044] Sekhiyanti yaṃ vuttaṃ taṃ suṇohi yathākathaṃ. Sekhassa sikkhamānassa ujumaggānusārino ādi cetaṃ caraṇañca mukhaṃ saññamasaṃvaro sikkhā etādisā ^1- natthi tenetaṃ iti vuccati. Channamativassati vivaṭaṃ nātivassati tasmā channaṃ vivaretha evantaṃ nātivassati. Gati migānaṃ pavanaṃ ākāso pakkhinaṃ gati vibhavo gati dhammānaṃ nibbānaṃ arahato gatīti. Gāthāsaṅgaṇikaṃ niṭṭhitaṃ. Tassuddānaṃ [1045] Sattanagaresu paññattā ^2- vipatti caturopi ca @Footnote: ¹ Po. Ma. Yu. etādisī . ² Yu. paññattaṃ.

--------------------------------------------------------------------------------------------- page371.

Bhikkhūnaṃ bhikkhunīnañca sādhāraṇā asādhāraṇā sāsanaṃ anuggahāya gāthāsaṅgaṇikaṃ idanti. -----------

The Pali Tipitaka in Roman Character Volume 8 page 368-371. https://84000.org/tipitaka/read/roman_read.php?B=8&A=7489&pagebreak=1 Compare with The Pali Tipitaka in Thai Character :- https://84000.org/tipitaka/read/pali_read.php?B=8&A=7489&pagebreak=1 Compare with The Royal Version of Thai Tipitaka :- https://84000.org/tipitaka/read/byitem.php?book=8&item=1035&items=11 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=8&siri=91 Study Atthakatha :- https://84000.org/tipitaka/attha/attha.php?b=8&i=1035 Contents of The Tipitaka Volume 8 https://84000.org/tipitaka/read/?index_8 https://84000.org/tipitaka/english/?index_8