อรรถกถาเล่มที่ ๓๙ ภาษาบาลีอักษรไทย
 ชา.อ.๕ ฉกฺก-ทสกนิปาต

หน้าที่ ๑๑๕.
                        มณิชาตกํ
     จิรสฺสํ วต ปสฺสามีติ อิทํ สตฺถา เชตวเน วิหรนฺโต โลลภิกฺขุํ
อารพฺภ กเถสิ ฯ ปจฺจุปฺปนฺนวตฺถุํ เหฏฺฐา วุตฺตนยเมว ฯ อตีตํ อาหริ
     อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต
ปาราวโต หุตฺวา พาราณสีเสฏฺฐิสฺส มหานเส นิลียปจฺฉิยํ วสติ ฯ
กาโกปิ เตน สทฺธึ วิสฺสาสํ กตฺวา ตตฺเถว วสีติ สพฺพํ วิตฺถาเรตพฺพํ ฯ
ภตฺตการโก กากสฺส ปตฺตานิ ลุญฺจิตฺวา ปิฏฺเฐน ตํ มกฺขิตฺวา
เอกํ ขารขณฺฑํ วิชฺฌิตฺวา กณฺเฐ มาลํ ปิลนฺธิตฺวา ปจฺฉิยํ ปกฺขิปิ ฯ
โพธิสตฺโต อรญฺญโต อาคนฺตฺวา ตํ ทิสฺวา ปริหาสํ กโรนฺโต
ปฐมํ คาถมาห
        จริสฺสํ วต ปสฺสามิ       สหายํ มณิธารินํ
        สุกตาย มสฺสุกุตฺติยา      โสภเต วต เม สขาติ ฯ
     ตตฺถ มสฺสุกุตฺติยาติ อิมาย มสฺสุกิริยาย ฯ
     ตํ สุตฺวา กาโก ทุติยํ คาถมาห
        ปรูฬฺหกจฺฉนขโลโม       อหํ กมฺเม สุพฺยาวโฏ
        จิรสฺสํ นหาปิตํ ลทฺธา     โลมํ อนฺตมหารยีติ ฯ
     ตตฺถ กมฺเม สุพฺยาวโฏติ อหํ สมฺม ราชกมฺเม สุพฺยาวโฏ
โอกาสํ อลภนฺโต ปรูฬฺหกจฺฉนขโลโม อโหสินฺติ วทติ ฯ อหารยีติ
อชฺช อหาเรสิ ฯ
---------------------------------------------------------------------------------------------
หน้าที่ ๑๑๖.
       ตโต โพธิสตฺโต ตติยํ คาถมาห
        ยํ นุ โลมํ อหาเรสิ      ทุลฺลภํ ลทฺธกปฺปกํ
        อถ กิญฺจิ หิ เต สมฺม     กณฺเฐ กึนิกิลายตีติ ฯ
     ตสฺสตฺโถ ยถา ทุลฺลภํ กปฺปกํ ลภิตฺวา โลมํ อหาราเปสิ
อิมํ ปิหยสิ มสฺสุกุตฺติการิตํ การยิสฺสามิ ตํ อหาราปย อถ
กิญฺจิ หิ เต วายส อิทํ กณฺเฐ กึนิกิลายตีติ ฯ
     ตโต กาโก เทฺว คาถา อภาสิ
        มนุสฺสสุขุมาลานํ         มณิ กณฺเฐสุ ลมฺพติ
        เตสาหํ อนุสิกฺขามิ       มา ตฺวํ มญฺเญ ทวา กตํ ฯ
        สเจปิมํ ปิหยสิ          มสฺสุกุตฺตึ สุการิตํ
        การยิสฺสามิ เต สมฺม     มณึ จาปิ ททามิ เตติ ฯ
     ตตฺถ มณีติ เอวรูปานํ มนุสฺสานํ เอกํ มณิรตนํ กณฺเฐสุ
ลมฺพติ ฯ เตสาหนฺติ เตสํ อหํ ฯ มา ตฺวํ มญฺเญติ ตฺวํ ปน เอตํ
มยา ทวา กตนฺติ มา มญฺญิ ฯ ปิหยสีติ สเจ อิทํ มม สุกตํ
มสฺสุกุตฺติกํ อิจฺฉสิ ฯ
      ตํ สุตฺวา โพธิสตฺโต ฉฏฺฐํ คาถมาห
        ตฺวญฺเญว มณินา ฉนฺโน    สุกตาย จ มสฺสุยา
        อามนฺต โข ตํ คจฺฉามิ    ปิยํ เม ตว ทสฺสนนฺติ ฯ
     ตตฺถ มณินาติ มณิโน ฯ อยเมว วา ปาโฐ ฯ อิทํ วุตฺตํ
โหติ สมฺม วายส ตฺวญฺเญว อิมสฺส มณิโน อนุจฺฉวิโก อิมิสฺสา
จ สุกตาย มสฺสุยา มม ปน ตว ทสฺสนเมว ปิยํ ตสฺมา ตํ
---------------------------------------------------------------------------------------------
หน้าที่ ๑๑๗.
อามนฺตยิตฺวา คจฺฉามีติ ฯ
     เอวญฺจ ปน วตฺวา อุปฺปติตฺวา อญฺญตฺถ คโต ฯ กาโก
ปน ตตฺเถว ชีวิตกฺขยํ ปตฺโต ฯ
     สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ
สโมธาเนสิ สจฺจปริโยสาเน โลลภิกฺขุ อนาคามิผเล ปติฏฺฐหิ ฯ ตทา
กาโก โลลภิกฺขุ อโหสิ ปาราวโต ปน อหเมวาติ ฯ
                     มณิชาตกํ ทสมํ ฯ
                   ขุรปุตฺตวคฺโค ทุติโย ฯ
     อิติ ชาตกฏฺฐกถาย วีสติชาตกปฏิมณฺฑิตสฺส ฉกฺกนิปาตสฺสตฺถ-
วณฺณนา นาม สมตฺตา ฯ มณิหริตคิริคามิสฺส รญฺโญ อาจริยสฺส
สมฺปนฺนสีลสฺส ติปิฏกธรสฺส อตฺถธมฺเมสุ กุสลสฺส สาสนสฺส นาม
เถรสฺส สิสฺเสสุ เอกสมฺมเตน อุปสมฺปทา ทฺวิวสฺสิเกน สตฺตวสฺสิก-
กาลโต ปฏฺฐาย ปพฺพชฺชาย โอนมิตจิตฺเตน ปริโยทาตมานเสน อภย-
สงฺคหสฺส รญฺโญ อนุปุตฺเตน พุทฺธสาสเน อารทฺธวิริเยน อคฺคญาณ-
นามเกน อุปสมฺปนฺเนน ลิกฺขิตํ อิทํ ปกรณํ จตุสตฺตตาธิเก อฏฺฐสต-
สกฺกราเช มิคสิรมาเส สุกฺกปกฺเข สตฺตมีทิวเส วิกาเล ทสมปทวาเร
สมตฺตํ ฯ
                  ฉกฺกนิปาตชาตกํ นิฏฺฐิตํ ฯ
                    ---------------
---------------------------------------------------------------------------------------------
หน้าที่ ๑๑๘.
@เชิงอรรถ:
@*** หน้านี้ไม่มีข้อมูล ***

             อรรถกถาภาษาบาลีอักษรไทย เล่มที่ ๓๙ หน้า ๑๑๕-๑๑๘.
http://84000.org/tipitaka/atthapali/read_th.php?B=39&A=2281&modeTY=2&pagebreak=1
             The Pali Atthakatha in Roman :-
http://84000.org/tipitaka/atthapali/read_rm.php?B=39&A=2281&modeTY=2&pagebreak=1
             อ่านอรรถกถาแปลไทย :-
http://84000.org/tipitaka/attha/attha.php?b=27&i=963
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=27&A=4248
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=27&A=4254
             The Pali Tipitaka in Roman Character :-
http://84000.org/tipitaka/read/roman_read.php?B=27&A=4254
             สารบัญพระไตรปิฎกเล่มที่ ๒๗
http://84000.org/tipitaka/read/?index_27