พระไตรปิฎกเล่มที่ ๒ ภาษาบาลี อักษรไทย
พระวินัยปิฎกเล่มที่ ๒ วินย. มหาวิภงฺโค (๒)

                             จตุตฺถสิกฺขาปทํ
     [๗๕๑]   เตน  สมเยน  พุทฺโธ  ภควา  สกฺเกสุ วิหรติ กปิลวตฺถุสฺมึ
นิโคฺรธาราเม  ฯ  เตน  โข  ปน  สมเยน  อญฺญตเรน ทนฺตกาเรน ภิกฺขู
ปวาริตา  โหนฺติ  เยสํ  อยฺยานํ  สูจิฆเรน  อตฺโถ  อหํ  สูจิฆเรนาติ  ฯ
เตน  โข  ปน  สมเยน  ภิกฺขู  พหู  สูจิฆเร วิญฺญาเปนฺติ ฯ เยสํ ขุทฺทกา
สูจิฆรา  เต  มหนฺเต  สูจิฆเร  วิญฺญาเปนฺติ  ฯ  เยสํ  มหนฺตา  สูจิฆรา
เต   ขุทฺทเก  สูจิฆเร  วิญฺญาเปนฺติ  ฯ  อถโข  ทนฺตกาโร  ภิกฺขูนํ  พหู
สูจิฆเร   กโรนฺโต  น  สกฺโกติ  อญฺญํ  วิกฺกายิกํ  ภณฺฑํ  กาตุํ  อตฺตนาปิ
น   ยาเปติ   ฯ  ปุตฺตทาราปิสฺส  กิลมนฺติ  ๑-  ฯ  มนุสฺสา  อุชฺฌายนฺติ
ขียนฺติ   วิปาเจนฺติ   กถํ   หิ   นาม   สมณา   สกฺยปุตฺติยา  น  มตฺตํ
ชานิตฺวา   พหู   สูจิฆเร   วิญฺญาเปสฺสนฺติ   อยํ   อิเมสํ  พหู  สูจิฆเร
กโรนฺโต   น   สกฺโกติ   อญฺญํ   วิกฺกายิกํ   ภณฺฑํ  กาตุํ  อตฺตนาปิ  น
ยาเปติ   ปุตฺตทาราปิสฺส   กิลมนฺตีติ   ฯ   อสฺโสสุํ   โข   ภิกฺขู  เตสํ
มนุสฺสานํ    อุชฺฌายนฺตานํ    ขียนฺตานํ   วิปาเจนฺตานํ   ฯ   เย   เต
ภิกฺขู    อปฺปิจฺฉา    ฯเปฯ    เต    อุชฺฌายนฺติ   ขียนฺติ   วิปาเจนฺติ
กถํ    หิ    นาม    ภิกฺขู    น    มตฺตํ   ชานิตฺวา   พหู   สูจิฆเร
วิญฺญาเปสฺสนฺตีติ    ฯเปฯ    สจฺจํ   กิร   ภิกฺขเว   ภิกฺขู   น   มตฺตํ
ชานิตฺวา   พหู   สูจิฆเร   วิญฺญาเปถาติ  ฯ  สจฺจํ  ภควาติ  ฯ  วิครหิ
พุทฺโธ    ภควา    กถํ   หิ   นาม   เต   ภิกฺขเว   โมฆปุริสา   น
@เชิงอรรถ: ๑ ม. ยุ. ปุตฺตทาโรปิสฺส กิลมติ ฯ เอวมุปริปิ ฯ
มตฺตํ    ชานิตฺวา    พหู    สูจิฆเร   วิญฺญาเปสฺสนฺติ   เนตํ   ภิกฺขเว
อปฺปสนฺนานํ   วา   ปสาทาย   ปสนฺนานํ   วา   ภิยฺโยภาวาย   ฯเปฯ
เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
     {๗๕๑.๑}   โย  ปน  ภิกฺขุ  อฏฺฐิมยํ  วา ทนฺตมยํ วา วิสาณมยํ วา
สูจิฆรํ การาเปยฺย เภทนกํ ปาจิตฺติยนฺติ ฯ
     [๗๕๒]   โย  ปนาติ  โย  ยาทิโส  ฯเปฯ ภิกฺขูติ ฯเปฯ อยํ อิมสฺมึ
อตฺเถ   อธิปฺเปโต   ภิกฺขูติ  ฯ  อฏฺฐิ  นาม  ยงฺกิญฺจิ  อฏฺฐิ  ฯ  ทนฺโต
นาม   หตฺถิทนฺโต   วุจฺจติ   ฯ   วิสาณํ   นาม   ยงฺกิญฺจิ   วิสาณํ  ฯ
การาเปยฺยาติ  กโรติ  วา  การาเปติ  วา  ปโยเค  ทุกฺกฏํ  ปฏิลาเภน
ภินฺทิตฺวา ปาจิตฺติยํ เทเสตพฺพํ ฯ
     [๗๕๓]   อตฺตนา   วิปฺปกตํ   อตฺตนา   ปริโยสาเปติ   อาปตฺติ
ปาจิตฺติยสฺส   ฯ   อตฺตนา   วิปฺปกตํ   ปเรหิ   ปริโยสาเปติ   อาปตฺติ
ปาจิตฺติยสฺส   ฯ   ปเรหิ   วิปฺปกตํ   อตฺตนา   ปริโยสาเปติ   อาปตฺติ
ปาจิตฺติยสฺส    ฯ   ปเรหิ   วิปฺปกตํ   ปเรหิ   ปริโยสาเปติ   อาปตฺติ
ปาจิตฺติยสฺส   ฯ   อญฺญสฺสตฺถาย   กโรติ  วา  การาเปติ  วา  อาปตฺติ
ทุกฺกฏสฺส ฯ อญฺเญน กตํ ปฏิลภิตฺวา ปริภุญฺชติ อาปตฺติ ทุกฺกฏสฺส ฯ
     [๗๕๔]   อนาปตฺติ  คณฺฑิกาย  ๑-  อรณิเก  วีเถ  ๒-  อญฺชนิยา
อญฺชนีสลากาย วาสีชเฏ อุทกปุญฺฉนิยา อุมฺมตฺตกสฺส อาทิกมฺมิกสฺสาติ ฯ
                         จตุตฺถสิกฺขาปทํ นิฏฺฐิตํ ฯ
                                  ----------
@เชิงอรรถ: ๑ ม. คณฺฐิกาย ฯ  ๒ ม. วิเธ ฯ สี. วิเฐ ฯ
                             ปญฺจมสิกฺขาปทํ
     [๗๕๕]   เตน  สมเยน  พุทฺโธ  ภควา  สาวตฺถิยํ  วิหรติ เชตวเน
อนาถปิณฺฑิกสฺส   อาราเม   ฯ   เตน   โข   ปน   สมเยน  อายสฺมา
อุปนนฺโท    สกฺยปุตฺโต   อุจฺเจ   มญฺเจ   สยติ   ฯ   อถโข   ภควา
สมฺพหุเลหิ   ภิกฺขูหิ   สทฺธึ   เสนาสนจาริกํ   อาหิณฺฑนฺโต  เยนายสฺมโต
อุปนนฺทสฺส    สกฺยปุตฺตสฺส   วิหาโร   เตนุปสงฺกมิ   ฯ   อทฺทสา   โข
อายสฺมา    อุปนนฺโท   สกฺยปุตฺโต   ภควนฺตํ   ทูรโต   ว   อาคจฺฉนฺตํ
ทิสฺวาน   ภควนฺตํ   เอตทโวจ   อาคจฺฉตุ   เม   ภนฺเต  ภควา  สยนํ
ปสฺสตูติ   ฯ   อถโข  ภควา  ตโต  ว  ปฏินิวตฺติตฺวา  ภิกฺขู  อามนฺเตสิ
อาสยโต  ภิกฺขเว  โมฆปุริโส  เวทิตพฺโพติ  ฯ  อถโข  ภควา อายสฺมนฺตํ
อุปนนฺทํ   สกฺยปุตฺตํ   อเนกปริยาเยน   วิครหิตฺวา   ทุพฺภรตาย   ฯเปฯ
เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
     {๗๕๕.๑}   นวํ  ปน  ภิกฺขุนา  มญฺจํ  วา  ปีฐํ  วา  การยมาเนน
อฏฺฐงฺคุลปาทกํ     กาเรตพฺพํ     สุคตงฺคุเลน    อญฺญตฺร    เหฏฺฐิมาย
อฏนิยา ตํ อติกฺกามยโต เฉทนกํ ปาจิตฺติยนฺติ ฯ
     [๗๕๖]   นวํ   นาม   กรณํ  อุปาทาย  วุจฺจติ  ฯ  มญฺโจ  นาม
จตฺตาโร  มญฺจา  มสารโก พุนฺทิกาพทฺโธ กุฬิรปาทโก ๑- อาหจฺจปาทโก ฯ
ปีฐํ   นาม   จตฺตาริ   ปีฐานิ   มสารกํ   พุนฺทิกาพทฺธํ  กุฬิรปาทกํ  ๑-
อาหจฺจปาทกํ  ฯ  การยมาเนนาติ  กโรนฺโต  วา  การาเปนฺโต  วา  ฯ
@เชิงอรรถ: ๑ ม. กุฬีร... ฯ เอวมุปริปิ ฯ
อฏฺฐงฺคุลปาทกํ   กาเรตพฺพํ   สุคตงฺคุเลน  อญฺญตฺร  เหฏฺฐิมาย  อฏนิยาติ
ฐเปตฺวา  เหฏฺฐิมํ  อฏนิยํ  ๑-  ฯ ตํ อติกฺกาเมตฺวา กโรติ วา การาเปติ
วา ปโยเค ทุกฺกฏํ ปฏิลาเภน ฉินฺทิตฺวา ปาจิตฺติยํ เทเสตพฺพํ ฯ
     [๗๕๗]   อตฺตนา   วิปฺปกตํ   อตฺตนา   ปริโยสาเปติ   อาปตฺติ
ปาจิตฺติยสฺส   ฯ   อตฺตนา   วิปฺปกตํ   ปเรหิ   ปริโยสาเปติ   อาปตฺติ
ปาจิตฺติยสฺส   ฯ   ปเรหิ   วิปฺปกตํ   อตฺตนา   ปริโยสาเปติ   อาปตฺติ
ปาจิตฺติยสฺส    ฯ   ปเรหิ   วิปฺปกตํ   ปเรหิ   ปริโยสาเปติ   อาปตฺติ
ปาจิตฺติยสฺส   ฯ   อญฺญสฺสตฺถาย   กโรติ  วา  การาเปติ  วา  อาปตฺติ
ทุกฺกฏสฺส    ฯ    อญฺเญน    กตํ    ปฏิลภิตฺวา    ปริภุญฺชติ   อาปตฺติ
ทุกฺกฏสฺส ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๒ หน้าที่ ๔๙๘-๕๐๑.
https://84000.org/tipitaka/read/pali_item.php?book=2&item=751&items=7
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=2&item=751&items=7&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=2&item=751&items=7
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=2&item=751&items=7
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=2&i=751
             สารบัญพระไตรปิฎกเล่มที่ ๒
https://84000.org/tipitaka/read/?index_2
https://84000.org/tipitaka/english/?index_2