บาลี ข้อ 304-306 พระไตรปิฎกเล่มที่ 25

     [๓๐๔]   |๓๐๔.๕๑๔| ปราภวนฺตํ ปุริสํ  มยํ ปุจฺฉาม โคตมํ ^๑-
                          ภควนฺตํ ปุฏฺฐุมาคมฺม  กึ ปราภวโต มุขํ ฯ
     |๓๐๔.๕๑๕|   สุวิชาโน ภวํ โหติ        ทุวิชาโน ^*- ปราภโว
                         ธมฺมกาโม ภวํ โหติ     ธมฺมเทสฺสี ปราภโว
     |๓๐๔.๕๑๖|   อิติ เหตํ วิชานาม       ปฐโม โส ปราภโว ฯ
                         ทุติยํ ภควา พฺรูหิ        กึ ปราภวโต มุขํ ฯ
     |๓๐๔.๕๑๗|   อสนฺตสฺส ปิยา โหนฺติ  สนฺเต น กุรุเต ปิยํ
                         อสตํ ธมฺมํ โรเจติ         ตํ ปราภวโต มุขํ
     |๓๐๔.๕๑๘|   อิติ เหตํ วิชานาม        ทุติโย โส ปราภโว ฯ
                         ตติยํ ภควา พฺรูหิ        กึ ปราภวโต มุขํ ฯ
     |๓๐๔.๕๑๙|   นิทฺทาสีลี สภาสีลี       อนุฏฺฐาตา จ โย นโร
                         อลโส โกธปญฺญาโณ    ตํ ปราภวโต มุขํ
@เชิงอรรถ: ^๑ โป. ม. โคตม ฯ
@^* ในฉบับฉัฏฐสังคีติ และฉบับ PTS เป็น สุวิชาโน
     |๓๐๔.๕๒๐|   อิติ เหตํ วิชานาม       ตติโย โส ปราภโว ฯ
                         จตุตฺถํ ภควา พฺรูหิ      กึ ปราภวโต มุขํ ฯ
     |๓๐๔.๕๒๑|   โย มาตรํ วา ^๑- ปิตรํ วา  ชิณฺณกํ คตโยพฺพนํ
                         ปหุสนฺโต น ภรติ        ตํ ปราภวโต มุขํ
     |๓๐๔.๕๒๒|   อิติ เหตํ วิชานาม        จตุตฺโถ โส ปราภโว ฯ
                         ปญฺจมํ ภควา พฺรูหิ     กึ ปราภวโต มุขํ ฯ
     |๓๐๔.๕๒๓|   โย พฺราหฺมณํ วา ^๒- สมณํ   วา อญฺญํ วาปิ วนิพฺพกํ
                         มุสาวาเทน วญฺเจติ     ตํ ปราภวโต มุขํ
     |๓๐๔.๕๒๔|   อิติ เหตํ วิชานาม        ปญฺจโม โส ปราภโว ฯ
                         ฉฏฺฐมํ ภควา พฺรูหิ      กึ ปราภวโต มุขํ ฯ
     |๓๐๔.๕๒๕|   ปหุตวิตฺโต ^๓- ปุริโส   สหิรญฺโญ สโภชโน
                         เอโก ภุญฺชติ สาทูนิ    ตํ ปราภวโต มุขํ
     |๓๐๔.๕๒๖|   อิติ เหตํ วิชานาม       ฉฏฺฐโม โส ปราภโว ฯ
                         สตฺตมํ ภควา พฺรูหิ      กึ ปราภวโต มุขํ ฯ
     |๓๐๔.๕๒๗|   ชาติถทฺโธ ธนถทฺโธ    โคตฺตถทฺโธ จ โย นโร
                         สญฺญาตึ อติมญฺเญติ  ตํ ปราภวโต มุขํ
     |๓๐๔.๕๒๘|   อิติ เหตํ วิชานาม       สตฺตโม โส ปราภโว ฯ
                         อฏฺฐมํ ภควา พฺรูหิ      กึ ปราภวโต มุขํ ฯ
     |๓๐๔.๕๒๙|   อิตฺถีธุตฺโต สุราธุตฺโต   อกฺขธุตฺโต จ โย นโร
                         ลทฺธํ ลทฺธํ วินาเสติ     ตํ ปราภวโต มุขํ
@เชิงอรรถ: ^๑-๒ ม. วาสทฺโท นตฺถิ ฯ  ^๓ ม. ยุ. ปหูตวิตฺโต ฯ
     |๓๐๔.๕๓๐|   อิติ เหตํ วิชานาม       อฏฺฐโม โส ปราภโว ฯ
                         นวมํ ภควา พฺรูหิ        กึ ปราภวโต มุขํ ฯ
     |๓๐๔.๕๓๑|   เสหิ ทาเรหิ อสนฺตุฏฺโฐ  เวสิยาสุ ปทุสฺสติ ^๑-
                         ทุสฺสติ ^๒- ปรทาเรสุ    ตํ ปราภวโต มุขํ
     |๓๐๔.๕๓๒|   อิติ เหตํ วิชานาม       นวโม โส ปราภโว ฯ
                         ทสมํ ภควา พฺรูหิ        กึ ปราภวโต มุขํ ฯ
     |๓๐๔.๕๓๓|   อตีตโยพฺพโน โปโส    อาเนติ ติมฺพรุตฺถนึ
                         ตสฺสา อิสฺสา น สุปติ   ตํ ปราภวโต มุขํ
     |๓๐๔.๕๓๔|   อิติ เหตํ วิชานาม       ทสโม โส ปราภโว ฯ
                         เอกาทสมํ ภควา พฺรูหิ   กึ ปราภวโต มุขํ ฯ
     |๓๐๔.๕๓๕|   อิตฺถึ ^๓- โสณฺฑึ วิกิรณึ ปุริสํ วาปิ ตาทิสํ
                         อิสฺสริยสฺมึ ฐเปติ ^๔-   ตํ ปราภวโต มุขํ
     |๓๐๔.๕๓๖|   อิติ เหตํ วิชานาม       เอกาทสโม ปราภโว ฯ
                         ทฺวาทสมํ ภควา พฺรูหิ  กึ ปราภวโต มุขํ ฯ
     |๓๐๔.๕๓๗|   อปฺปโภโค มหาตโณฺห  ขตฺติเย ชายเต กุเล
                         โส ^๕- จ รชฺชํ ปตฺถยติ  ตํ ปราภวโต มุขํ ฯ
     |๓๐๔.๕๓๘|   เอเต ปราภเว โลเก     ปณฺฑิโต สมเวกฺขิย
                         อริยทสฺสนสมฺปนฺโน      ส โลกํ ภชเต สิวนฺติ ฯ
                                     ปราภวสุตฺตํ ฉฏฺฐํ ฯ
                                               ---------
@เชิงอรรถ: ^๑ ยุ. ปทิสฺสติ  ฯ ^๒ ยุ. ทิสฺสติ ฯ  ^๓ ยุ. อิตฺถิโสณฺฑึ ฯ  ^๔ ยุ. ฐาเปติ ฯ
@^๕ ยุ. โสธ ฯ
             สุตฺตนิปาเต อุรควคฺคสฺส สตฺตมํ วสลสุตฺตํ
     [๓๐๕]   ๗  เอวมฺเม  สุตํ  ฯ  เอกํ  สมยํ ภควา สาวตฺถิยํ วิหรติ
เชตวเน   อนาถปิณฺฑิกสฺส   อาราเม  ฯ  อถ  โข  ภควา  ปุพฺพณฺหสมยํ
นิวาเสตฺวา     ปตฺตจีวรมาทาย    สาวตฺถึ    ปิณฺฑาย    ปาวิสิ    ฯ
เตน   โข   ปน   สมเยน   อคฺคิกภารทฺวาชสฺส  พฺราหฺมณสฺส  นิเวสเน
อคฺคิ   ปชฺชลิโต   โหติ   อาหุตี   ^๑-  ปคฺคหิตา  ฯ  อถ  โข  ภควา
สาวตฺถิยํ    สปทานํ    ปิณฺฑาย   จรมาโน   เยน   อคฺคิกภารทฺวาชสฺส
พฺราหฺมณสฺส   นิเวสนํ   เตนุปสงฺกมิ  ฯ  อทฺทสา  โข  อคฺคิกภารทฺวาโช
พฺราหฺมโณ    ภควนฺตํ    ทูรโต    ว   อาคจฺฉนฺตํ   ทิสฺวาน   ภควนฺตํ
เอตทโวจ   อเตฺรว   ^๒-   มุณฺฑก  อเตฺรว  ^๒-  สมณก  อเตฺรว  ^๒-
วสลก ติฏฺฐาหีติ ฯ
     {๓๐๕.๑}   เอวํ   วุตฺเต   ภควา   อคฺคิกภารทฺวาชํ  พฺราหฺมณํ
เอตทโวจ   ชานาสิ   ปน   ตฺวํ  พฺราหฺมณ  วสลํ  วา  วสลกรเณ  วา
ธมฺเมติ  ฯ  น  ขฺวาหํ  โภ  โคตม  ชานามิ  วสลํ  วา  วสลกรเณ วา
ธมฺเม  สาธุ  เม  ภวํ  โคตโม  ตถา  ธมฺมํ  เทเสตุ  ยถาหํ  ชาเนยฺยํ
วสลํ  วา  วสลกรเณ  วา  ธมฺเมติ  ฯ  เตน  หิ  พฺราหฺมณ  สุณาหิ ^๓-
สาธุกํ   มนสิกโรหิ  ภาสิสฺสามีติ  ฯ  เอวํ  โภติ  โข  อคฺคิกภารทฺวาโช
พฺราหฺมโณ ภควโต ปจฺจสฺโสสิ ฯ ภควา เอตทโวจ
     [๓๐๖]   |๓๐๖.๕๓๙| โกธโน อุปนาหี จ         ปาปมกฺขี จ โย นโร
@เชิงอรรถ: ^๑ โป. ม. อาหุติ ฯ ^๒ ม. ยุ. ตเตรว ฯ  ^๓ โป. สุโณหิ ฯ
                         วิปนฺนทิฏฺฐิ มายาวี         ตํ ชญฺญา วสโล อิติ ฯ ๑
     |๓๐๖.๕๔๐|   เอกชํ วา ทฺวิชํ ^๑- วาปิ    โยธ ปาณํ วิหึสติ
                         ยสฺส ปาเณ ทยา นตฺถิ     ตํ ชญฺญา วสโล อิติ ฯ ๒
     |๓๐๖.๕๔๑|   โย หนฺติ อุปรุนฺเธติ ^๒-     คามานิ นิคมานิ จ
                         นิคฺคาหโก สมญฺญาโต    ตํ ชญฺญา วสโล อิติ ฯ ๓
     |๓๐๖.๕๔๒|   คาเม วา ยทิ วารญฺเญ    ยํ ปเรสํ มมายิตํ
                         เถยฺยา อทินฺนํ อาเนติ ^๓- ตํ ชญฺญา วสโล อิติ ฯ ๔
     |๓๐๖.๕๔๓|   โย หเว อิณมาทาย         ภุญฺชมาโน ปลายติ
                         น หิ เต อิณมตฺถีติ           ตํ ชญฺญา วสโล อิติ ฯ ๕
     |๓๐๖.๕๔๔|   โย เว กิญฺจิกฺขกมฺยตา     ปนฺถสฺมึ วชตํ ชนํ
                         หนฺตา กิญฺจิกฺขมาเทติ     ตํ ชญฺญา วสโล อิติ ฯ ๖
     |๓๐๖.๕๔๕|   โย อตฺตเหตุ ปรเหตุ        ธนเหตุ จ โย นโร
                         สกฺขิปุฏฺโฐ มุสา พฺรูติ       ตํ ชญฺญา วสโล อิติ ฯ ๗
     |๓๐๖.๕๔๖|   โย ญาตีนํ สขีนํ วา         ทาเรสุ ปฏิทิสฺสติ
                         สหสา ^๔- สมฺปิเยน วา    ตํ ชญฺญา วสโล อิติ ฯ ๘
     |๓๐๖.๕๔๗|   โย มาตรํ วา ปิตรํ วา       ชิณฺณกํ คตโยพฺพนํ
                         ปหุสนฺโต น ภรติ            ตํ ชญฺญา วสโล อิติ ฯ ๙
     |๓๐๖.๕๔๘|   โย มาตรํ วา ปิตรํ วา       ภาตรํ ภคินึ สสุํ ^๕-
                         หนฺติ โรเสติ วาจาย         ตํ ชญฺญา วสโล อิติ ฯ ๑๐
     |๓๐๖.๕๔๙|   โย อตฺถํ ปุจฺฉิโต สนฺโต    อนตฺถมนุสาสติ
@เชิงอรรถ: ^๑ ยุ. ทิชํ ฯ ^๒ ม. ยุ. ปริรุนฺธติ ฯ โป. อุปรุนฺธติ ฯ ^๓ ม. อทินฺนมาเนติ ฯ
@ยุ. อทินฺนํ อาทิยติ ฯ ^๔ ม. สาหสา ฯ  ^๕ โป. สขึ ฯ
                         ปฏิจฺฉนฺเนน มนฺเตติ       ตํ ชญฺญา วสโล อิติ ฯ ๑๑
     |๓๐๖.๕๕๐|   โย กตฺวา ปาปกํ กมฺมํ     มา มํ ชญฺญาติ อิจฺฉติ
                         โย ปฏิจฺฉนฺนกมฺมนฺโต    ตํ ชญฺญา วสโล อิติ ฯ ๑๒
     |๓๐๖.๕๕๑|   โย เว ปรกุลํ คนฺตฺวา        ภุตฺวา ^๑- จ สุจิโภชนํ
                         อาคตํ นปฺปฏิปูเชติ         ตํ ชญฺญา วสโล อิติ ฯ ๑๓
     |๓๐๖.๕๕๒|   โย พฺราหฺมณํ วา สมณํ วา   อญฺญํ วาปิ วนิพฺพกํ
                         มุสาวาเทน วญฺเจติ         ตํ ชญฺญา วสโล อิติ ฯ ๑๔
     |๓๐๖.๕๕๓|   โย พฺราหฺมณํ วา สมณํ วา   ภตฺตกาเล อุปฏฺฐิเต
                         โรเสติ วาจา น จ เทติ      ตํ ชญฺญา วสโล อิติ ฯ ๑๕
     |๓๐๖.๕๕๔|   อสตํ โยธ ปพฺรูติ            โมเหน ปลิคุณฺฐิโต
                         กิญฺจิกฺขํ นิชิคึสาโน         ตํ ชญฺญา วสโล อิติ ฯ ๑๖
     |๓๐๖.๕๕๕|   โย จตฺตานํ สมุกฺกํเส       ปเร ^๒- จ อวชานติ
                         นิหีโน เสน มาเนน         ตํ ชญฺญา วสโล อิติ ฯ ๑๗
     |๓๐๖.๕๕๖|   โรสโก กทริโย จ             ปาปิจฺโฉ มจฺฉรี สโฐ
                         อหิริโก อโนตฺตปฺปี          ตํ ชญฺญา วสโล อิติ ฯ ๑๘
     |๓๐๖.๕๕๗|   โย พุทฺธํ ปริภาสติ          อถ วา ตสฺส สาวกํ
                         ปริพฺพาชกํ ^๓- คหฏฺฐํ วา  ตํ ชญฺญา วสโล อิติ ฯ ๑๙
     |๓๐๖.๕๕๘|   โย เว อนรหํ ^๔- สนฺโต    อรหํ ปฏิชานติ ^๕-
                         โจโร สพฺรหฺมเก โลเก      เอโส ^๖- โข วสลาธโม ฯ ๒๐
     |๓๐๖.๕๕๙|   เอเต โข วสลา วุตฺตา      มยา เย เต ปกาสิตา ฯ
@เชิงอรรถ: ^๑ ม. ยุ. ภุตฺวาน สุจิโภชนํ ฯ ^๒ ม. ปเร จ มวชานาติ ฯ ยุ. ปรญฺจ มวชานาติ ฯ
@^๓ ม. ยุ. ปริพฺพาชํ ฯ  ^๔ ยุ. อนรหา ฯ ^๕ ม. ปฏิขานาติ ฯ ^๖ โป. เอโส โข
@วสโลธโม. ฯ ยุ เอส โข วสลาธโม ฯ
                         น ชจฺจา วสโล โหติ         น ชจฺจา โหติ พฺราหฺมโณ
                         กมฺมุนา วสโล โหติ         กมฺมุนา โหติ พฺราหฺมโณ ฯ
     |๓๐๖.๕๖๐|   ตทมินาปิ ชานาถ           ยถา เมทํ นิทสฺสนํ
                         จณฺฑาลปุตฺโต โสปาโก   มาตงฺโค อิติ วิสฺสุโต
     |๓๐๖.๕๖๑|   โส ยสปฺปรมปฺปตฺโต ^๑-   มาตงฺโค ยํ สุทุลฺลภํ
                         อาคญฺฉุํ ^๒- ตสฺสุปฏฺฐานํ ขตฺติยา พฺราหฺมณา พหู ฯ
     |๓๐๖.๕๖๒|   โส ^๓- เทวยานํ อภิรุยฺห   วิรชํ โส มหาปถํ
                         กามราคํ วิราเชตฺวา         พฺรหฺมโลกูปโค อหุ ฯ
                         น นํ ชาติ นิวาเรสิ            พฺรหฺมโลกูปปตฺติยา ฯ
     |๓๐๖.๕๖๓|   อชฺฌายิกกุเล ^๔- ชาตา   พฺราหฺมณา มนฺตพนฺธวา
                         เต จ ปาเปสุ กมฺเมสุ        อภิณฺหมุปทิสฺสเร
     |๓๐๖.๕๖๔|   ทิฏฺเฐว ธมฺเม คารยฺหา    สมฺปราเย จ ทุคฺคติ ฯ
                         น เน ชาติ นิวาเรติ          ทุคฺคจฺจา ^๕- ครหาย วา ฯ
     |๓๐๖.๕๖๕|   น ชจฺจา วสโล โหติ         น ชจฺจา โหติ พฺราหฺมโณ
                         กมฺมุนา วสโล โหติ         กมฺมุนา โหติ พฺราหฺมโณติ ฯ
เนื้อความพระไตรปิฎกฉบับภาษาบาลีอักษรไทย เล่มที่ ๒๕ หน้าที่ ๓๔๖-๓๕๒. https://84000.org/tipitaka/read/pali_item.php?book=25&item=304&items=3&mode=bracket อ่านโดยใช้เนื้อความเป็นเกณฑ์แบ่งข้อ :- https://84000.org/tipitaka/read/pali_item.php?book=25&item=304&items=3 อ่านเทียบพระไตรปิฎกฉบับภาษาบาลีอักษรโรมัน :- https://84000.org/tipitaka/read/roman_item.php?book=25&item=304&items=3&mode=bracket อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=25&item=304&items=3&mode=bracket ศึกษาอรรถกถานี้ได้ที่ :- https://84000.org/tipitaka/attha/attha.php?b=25&i=304 สารบัญพระไตรปิฎกเล่มที่ ๒๕ https://84000.org/tipitaka/read/?index_25 https://84000.org/tipitaka/english/?index_25