พระไตรปิฎกเล่มที่ ๓๖ ภาษาบาลี อักษรไทย
พระอภิธรรมปิฎกเล่มที่ ๓ อภิ. ธาตุกถา เจว ปุคฺคลปญฺญตฺติ จ

                                 อภิธมฺมปิฏเก ธาตุกถา
                                             -------
                     นโม ตสฺส ภควโต อรหโต สมฺมาสมฺพุทฺธสฺส ฯ
                                            มาติกา
     [๑]   สงฺคโห   อสงฺคโห   สงฺคหิเตน   อสงฺคหิตํ   อสงฺคหิเตน
สงฺคหิตํ    สงฺคหิเตน    สงฺคหิตํ   อสงฺคหิเตน   อสงฺคหิตํ   สมฺปโยโค
วิปฺปโยโค     สมฺปยุตฺเตน     วิปฺปยุตฺตํ     วิปฺปยุตฺเตน     สมฺปยุตฺตํ
สมฺปยุตฺเตน     สมฺปยุตฺตํ     วิปฺปยุตฺเตน     วิปฺปยุตฺตํ     สงฺคหิเตน
สมฺปยุตฺตํ    วิปฺปยุตฺตํ   สมฺปยุตฺเตน   สงฺคหิตํ   อสงฺคหิตํ   อสงฺคหิเตน
สมฺปยุตฺตํ วิปฺปยุตฺตํ วิปฺปยุตฺเตน สงฺคหิตํ อสงฺคหิตํ ฯ
     {๑.๑}  ปญฺจกฺขนฺธา  ทฺวาทสายตนานิ  อฏฺฐารส  ธาตุโย  จตฺตาริ
สจฺจานิ    พาวีสตินฺทฺริยานิ    ปฏิจฺจสมุปฺปาโท   จตฺตาโร   สติปฏฺฐานา
จตฺตาโร    สมฺมปฺปธานา    จตฺตาโร   อิทฺธิปาทา   จตฺตาริ   ฌานานิ
จตสฺโส     อปฺปมญฺญาโย     ปญฺจินฺทฺริยานิ    ปญฺจ    พลานิ    สตฺต
โพชฺฌงฺคา    อริโย    อฏฺฐงฺคิโก   มคฺโค   ผสฺโส   เวทนา   สญฺญา
เจตนา   จิตฺตํ  อธิโมกฺโข  มนสิกาโร  ฯ  ตีหิ  สงฺคโห  ตีหิ  อสงฺคโห
จตูหิ   สมฺปโยโค  จตูหิ  วิปฺปโยโค  ฯ  สภาโค  วิสภาโค  ฯ  สพฺพาปิ
ธมฺมสงฺคณิ ธาตุกถาย มาติกาติ ฯ
                                           มาติกา ฯ
                                สงฺคหาสงฺคหปทนิทฺเทโส
     [๒]   รูปกฺขนฺโธ   กตีหิ   ขนฺเธหิ   กตีหายตเนหิ   กตีหิ  ธาตูหิ
สงฺคหิโต  ฯ  รูปกฺขนฺโธ  เอเกน  ขนฺเธน  เอกาทสหายตเนหิ เอกาทสหิ
ธาตูหิ  สงฺคหิโต  ฯ  กตีหิ  อสงฺคหิโต  ฯ  จตูหิ ขนฺเธหิ เอเกนายตเนน
สตฺตหิ ธาตูหิ อสงฺคหิโต ฯ
     [๓]   เวทนากฺขนฺโธ   กตีหิ  ขนฺเธหิ  กตีหายตเนหิ  กตีหิ  ธาตูหิ
สงฺคหิโต  ฯ  เวทนากฺขนฺโธ  เอเกน  ขนฺเธน  เอเกนายตเนน  เอกาย
ธาตุยา  สงฺคหิโต  ฯ  กตีหิ อสงฺคหิโต ฯ จตูหิ ขนฺเธหิ เอกาทสหายตเนหิ
สตฺตรสหิ ธาตูหิ อสงฺคหิโต ฯ
     [๔]   สญฺญากฺขนฺโธ   กตีหิ   ขนฺเธหิ  กตีหายตเนหิ  กตีหิ  ธาตูหิ
สงฺคหิโต   ฯ  สญฺญากฺขนฺโธ  เอเกน  ขนฺเธน  เอเกนายตเนน  เอกาย
ธาตุยา  สงฺคหิโต  ฯ  กตีหิ อสงฺคหิโต ฯ จตูหิ ขนฺเธหิ เอกาทสหายตเนหิ
สตฺตรสหิ ธาตูหิ อสงฺคหิโต ฯ
     [๕]   สงฺขารกฺขนฺโธ   กตีหิ  ขนฺเธหิ  กตีหายตเนหิ  กตีหิ  ธาตูหิ
สงฺคหิโต  ฯ  สงฺขารกฺขนฺโธ  เอเกน  ขนฺเธน  เอเกนายตเนน  เอกาย
ธาตุยา  สงฺคหิโต  ฯ  กตีหิ อสงฺคหิโต ฯ จตูหิ ขนฺเธหิ เอกาทสหายตเนหิ
สตฺตรสหิ ธาตูหิ อสงฺคหิโต ฯ
     [๖]   วิญฺญาณกฺขนฺโธ   กตีหิ  ขนฺเธหิ  กตีหายตเนหิ  กตีหิ  ธาตูหิ
สงฺคหิโต   ฯ  วิญฺญาณกฺขนฺโธ  เอเกน  ขนฺเธน  เอเกนายตเนน  สตฺตหิ
ธาตูหิ  สงฺคหิโต  ฯ  กตีหิ  อสงฺคหิโต ฯ จตูหิ ขนฺเธหิ เอกาทสหายตเนหิ
เอกาทสหิ ธาตูหิ อสงฺคหิโต ฯ
     [๗]   รูปกฺขนฺโธ  จ  เวทนากฺขนฺโธ  จ  กตีหิ ขนฺเธหิ กตีหายตเนหิ
กตีหิ   ธาตูหิ   สงฺคหิตา   ฯ  รูปกฺขนฺโธ  จ  เวทนากฺขนฺโธ  จ  ทฺวีหิ
ขนฺเธหิ   เอกาทสหายตเนหิ   เอกาทสหิ   ธาตูหิ   สงฺคหิตา  ฯ  กตีหิ
อสงฺคหิตา ฯ ตีหิ ขนฺเธหิ เอเกนายตเนน สตฺตหิ ธาตูหิ อสงฺคหิตา ฯ
     [๘]   รูปกฺขนฺโธ  จ สญฺญากฺขนฺโธ จ ทฺวีหิ ขนฺเธหิ เอกาทสหายตเนหิ
เอกาทสหิ     ธาตูหิ     สงฺคหิตา    ฯ    กตีหิ    อสงฺคหิตา    ฯ
ตีหิ ขนฺเธหิ เอเกนายตเนน สตฺตหิ ธาตูหิ อสงฺคหิตา ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๖ หน้าที่ ๑-๓.
https://84000.org/tipitaka/read/pali_item.php?book=36.1&item=1&items=8
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=36.1&item=1&items=8&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=36.1&item=1&items=8
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=36.1&item=1&items=8
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=36.1&i=1
             สารบัญพระไตรปิฎกเล่มที่ ๓๖
https://84000.org/tipitaka/read/?index_36
https://84000.org/tipitaka/english/?index_36