พระไตรปิฎกเล่มที่ ๓๗ ภาษาบาลี อักษรไทย
พระอภิธรรมปิฎกเล่มที่ ๔ อภิ. กถาวตฺถุ

                              นตฺถิ อรหโต อกาลมจฺจูติกถา
     [๑๖๙๕]   นตฺถิ   อรหโต   อกาลมจฺจูติ  ฯ  อามนฺตา  ฯ  นตฺถิ
อรหนฺตฆาตโกติ  ฯ  น  เหวํ  วตฺตพฺเพ  ฯเปฯ  อตฺถิ อรหนฺตฆาตโกติ ฯ
อามนฺตา   ฯ   อตฺถิ   อรหโต   อกาลมจฺจูติ   ฯ  น  เหวํ  วตฺตพฺเพ
ฯเปฯ   นตฺถิ   อรหโต   อกาลมจฺจูติ   ฯ  อามนฺตา  ฯ  โย  อรหนฺตํ
ชีวิตา   โวโรเปติ   โส  สติ  ชีวิเต  ชีวิตาวเสเส  ชีวิตา  โวโรเปติ
อสติ  ชีวิเต  ชีวิตาวเสเส  ชีวิตา โวโรเปตีติ ฯ สติ ชีวิเต ชีวิตาวเสเส
ชีวิตา  โวโรเปตีติ  ฯ  หญฺจิ  สติ  ชีวิเต ชีวิตาวเสเส ชีวิเต โวโรเปติ
โน   วต  เร  วตฺตพฺเพ  นตฺถิ  อรหโต  อกาลมจฺจูติ  ฯ  อสติ  ชีวิเต
ชีวิตาวเสเส   ชีวิตา   โวโรเปตีติ   ฯ  นตฺถิ  อรหนฺตฆาตโกติ  ฯ  น
เหวํ วตฺตพฺเพ ฯเปฯ
     [๑๖๙๖]   นตฺถิ  อรหโต  อกาลมจฺจูติ  ฯ  อามนฺตา  ฯ  อรหโต
กาเย   วิสํ   น  กเมยฺย  สตฺถํ  น  กเมยฺย  อคฺคิ  น  กเมยฺยาติ  ฯ
น   เหวํ   วตฺตพฺเพ  ฯเปฯ  นนุ  อรหโต  กาเย  วิสํ  กเมยฺย  สตฺถํ
กเมยฺย   อคฺคิ   กเมยฺยาติ   ฯ   อามนฺตา  ฯ  หญฺจิ  อรหโต  กาเย
วิสํ   กเมยฺย   สตฺถํ  กเมยฺย  อคฺคิ  กเมยฺย  โน  วต  เร  วตฺตพฺเพ
นตฺถิ อรหโต อกาลมจฺจูติ ฯ
     [๑๖๙๗]   อรหโต   กาเย  วิสํ  น  กเมยฺย  สตฺถํ  น  กเมยฺย
อคฺคิ   น   กเมยฺยาติ   ฯ   อามนฺตา   ฯ  นตฺถิ  อรหนฺตฆาตโกติ  ฯ
น เหวํ วตฺตพฺเพ ฯเปฯ
     [๑๖๙๘]   อตฺถิ  อรหโต  อกาลมจฺจูติ  ฯ  อามนฺตา  ฯ  นนุ วุตฺตํ
ภควตา   นาหํ   ภิกฺขเว   สญฺเจตนิกานํ   กมฺมานํ   กตานํ   อุปจิตานํ
อปฺปฏิสํเวทิตฺวา    พฺยนฺตีภาวํ   วทามิ   ตญฺจ   โข   ทิฏฺเฐว   ธมฺเม
อุปปชฺเช  วา  อปเร  วา  ปริยาเยติ  อตฺเถว สุตฺตนฺโตติ ฯ อามนฺตา ฯ
เตน หิ นตฺถิ อรหโต อกาลมจฺจูติ ฯ
                             นตฺถิ อรหโต อกาลมจฺจูติกถา ฯ
                                      ------------------
                                   สพฺพมิทํ กมฺมโตติกถา
     [๑๖๙๙]   สพฺพมิทํ  กมฺมโตติ  ฯ  อามนฺตา  ฯ กมฺมมฺปิ กมฺมโตติ ฯ
น  เหวํ  วตฺตพฺเพ  ฯเปฯ  สพฺพมิทํ  กมฺมโตติ  ฯ  อามนฺตา  ฯ สพฺพมิทํ
ปุพฺเพกตเหตูติ   ฯ   น  เหวํ  วตฺตพฺเพ  ฯเปฯ  สพฺพมิทํ  กมฺมโตติ  ฯ
อามนฺตา   ฯ   สพฺพมิทํ  กมฺมวิปากโตติ  ฯ  น  เหวํ  วตฺตพฺเพ  ฯเปฯ
สพฺพมิทํ    กมฺมวิปากโตติ    ฯ   อามนฺตา   ฯ   กมฺมวิปาเกน   ปาณํ
หเนยฺยาติ   ฯ   อามนฺตา  ฯ  ปาณาติปาโต  สผโลติ  ฯ  อามนฺตา  ฯ
กมฺมวิปาโก   สผโลติ   ฯ   น   เหวํ   วตฺตพฺเพ  ฯเปฯ  กมฺมวิปาโก
อผโลติ  ฯ  อามนฺตา  ฯ  ปาณาติปาโต  อผโลติ  ฯ  น  เหวํ วตฺตพฺเพ
ฯเปฯ   กมฺมวิปาเกน   อทินฺนํ  อาทิเยยฺย  ฯเปฯ  มุสา  ภเณยฺย  ปิสุณํ
ภเณยฺย   ผรุสํ   ภเณยฺย   สมฺผํ   ปลเปยฺย   สนฺธึ  ฉินฺเทยฺย  นิลฺโลปํ
หเรยฺย   เอกาคาริกํ   กเรยฺย  ปริปนฺเถ  ติฏฺเฐยฺย  ปรทารํ  คจฺเฉยฺย
คามฆาตกํ   กเรยฺย   นิคมฆาตกํ  กเรยฺย  กมฺมวิปาเกน  ทานํ  ทเทยฺย
จีวรํ   ทเทยฺย   ปิณฺฑปาตํ   ทเทยฺย   เสนาสนํ  ทเทยฺย  คิลานปจฺจย-
เภสชฺชปริกฺขารํ  ทเทยฺยาติ  ฯ  อามนฺตา ฯ คิลานปจฺจยเภสชฺชปริกฺขาโร
สผโลติ  ฯ  อามนฺตา  ฯ  กมฺมวิปาโก  สผโลติ  ฯ  น  เหวํ  วตฺตพฺเพ
ฯเปฯ  กมฺมวิปาโก  อผโลติ  ฯ  อามนฺตา ฯ คิลานปจฺจยเภสชฺชปริกฺขาโร
อผโลติ ฯ น เหวํ วตฺตพฺเพ ฯเปฯ
     [๑๗๐๐]   น  วตฺตพฺพํ  สพฺพมิทํ  กมฺมโตติ  ฯ  อามนฺตา  ฯ  นนุ
วุตฺตํ ภควตา
                   กมฺมุนา วตฺตตี โลโก     กมฺมุนา วตฺตตี ปชา
                   กมฺมนิพนฺธนา สตฺตา    รถสฺสาณีว ยายโต ๑-
                                กมฺเมน กิตฺตึ ลภเต ปสํสํ
                                กมฺเมน ชานิญฺจ วธญฺจ พนฺธํ
                                ตํ กมฺมํ นานากรณํ วิทิตฺวา
                                กสฺมา วเท นตฺถิ กมฺมนฺติ โลเกติ
อตฺเถว สุตฺตนฺโตติ ฯ อามนฺตา ฯ เตน หิ สพฺพมิทํ กมฺมโตติ ฯ
                                สพฺพมิทํ กมฺมโตติกถา ฯ
                                       ---------------

             เนื้อความพระไตรปิฎกฉบับภาษาบาลีอักษรไทย เล่มที่ ๓๗ หน้าที่ ๕๗๗-๕๗๙.
https://84000.org/tipitaka/read/pali_item.php?book=37&item=1695&items=6
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=37&item=1695&items=6&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=37&item=1695&items=6
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=37&item=1695&items=6
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=37&i=1695
             สารบัญพระไตรปิฎกเล่มที่ ๓๗
https://84000.org/tipitaka/read/?index_37
https://84000.org/tipitaka/english/?index_37