พระไตรปิฎกเล่มที่ ๓๗ ภาษาบาลี อักษรไทย
พระอภิธรรมปิฎกเล่มที่ ๔ อภิ. กถาวตฺถุ

     [๑๗๗๐]   น   วตฺตพฺพํ   จกฺขุนา  รูปํ  ปสฺสติ  ฯเปฯ  กาเยน
โผฏฺฐพฺพํ   ผุสตีติ   ฯ  อามนฺตา  ฯ  นนุ  วุตฺตํ  ภควตา  อิธ  ภิกฺขเว
ภิกฺขุ    จกฺขุนา   รูปํ   ปสฺสติ   ฯเปฯ   กาเยน   โผฏฺฐพฺพํ   ผุสตีติ
อตฺเถว   สุตฺตนฺโตติ   ฯ  อามนฺตา  ฯ  เตน  หิ  จกฺขุนา  รูปํ  ปสฺสติ
ฯเปฯ กาเยน โผฏฺฐพฺพํ ผุสตีติ ฯ
                                จกฺขุนา รูปํ ปสฺสตีติกถา ฯ
                                   อฏฺฐารสโม วคฺโค ฯ
                                       ตสฺส อุทฺทานํ
                        พุทฺโธ ภควา มนุสฺสโลเก อฏฺฐาสิ พุทฺเธน
                        ภควตา ธมฺโม เทสิโต นตฺถิ พุทฺธสฺส ภควโต
                        กรุณา พุทฺธสฺส ภควโต อุจฺจารปสฺสาโว
                        อติวิย อญฺเญ คนฺธชาเต อธิคฺคณฺหาติ
                        เอเกน อริยมคฺเคน จตฺตาริ สามญฺญผลานิ
                        สจฺฉิกโรติ ฌานา ฌานํ สงฺกมติ อตฺถิ
                        ฌานนฺตริกา สมาปนฺโน สทฺทํ สุณาติ
                        จกฺขุนา รูปํ ปสฺสติ กาเยน โผฏฺฐพฺพํ ผุสตีติ ฯ
                                          ----------
                                        กิเลสชหนกถา
     [๑๗๗๑]   อตีเต  กิเลเส  ชหตีติ  ฯ อามนฺตา ฯ นิรุทฺธํ นิโรเธติ
วิคตํ   วิคเมติ   ขีณํ   เขเปติ   อตฺถงฺคตํ   อตฺถงฺคเมติ   อพฺภตฺถงฺคตํ
อพฺภตฺถงฺคเมตีติ  ฯ  น  เหวํ  วตฺตพฺเพ  ฯเปฯ  อตีเต กิเลเส ชหตีติ ฯ
อามนฺตา  ฯ  นนุ  อตีตํ  นิรุทฺธนฺติ  ฯ  อามนฺตา  ฯ  หญฺจิ  อตีตํ นิรุทฺธํ
โน  วต  เร  วตฺตพฺเพ  อตีเต กิเลเส ชหตีติ ฯ อตีเต กิเลเส ชหตีติ ฯ
อามนฺตา   ฯ   นนุ  อตีตํ  นตฺถีติ  ฯ  อามนฺตา  ฯ  หญฺจิ  อตีตํ  นตฺถิ
โน วต เร วตฺตพฺเพ อตีเต กิเลเส ชหตีติ ฯ
     [๑๗๗๒]   อนาคเต   กิเลเส  ชหตีติ  ฯ  อามนฺตา  ฯ  อชาตํ
อชเนติ    อสญฺชาตํ    อสญฺชเนติ   อนิพฺพตฺตํ   อนิพฺพตฺเตติ   อปาตุภูตํ
อปาตุภาเวตีติ   ฯ   น   เหวํ   วตฺตพฺเพ   ฯเปฯ  อนาคเต  กิเลเส
ชหตีติ   ฯ   อามนฺตา   ฯ   นนุ  อนาคตํ  อชาตนฺติ  ฯ  อามนฺตา  ฯ
หญฺจิ   อนาคตํ   อชาตํ   โน   วต  เร  วตฺตพฺเพ  อนาคเต  กิเลเส
ชหตีติ   ฯ   อนาคเต  กิเลเส  ชหตีติ  ฯ  อามนฺตา  ฯ  นนุ  อนาคตํ
นตฺถีติ  ฯ  อามนฺตา  ฯ  หญฺจิ  อนาคตํ  นตฺถิ  โน  วต  เร  วตฺตพฺเพ
อนาคเต กิเลเส ชหตีติ ฯ
     [๑๗๗๓]   ปจฺจุปฺปนฺเน   กิเลเส  ชหตีติ  ฯ  อามนฺตา  ฯ  รตฺโต
ราคํ   ชหติ  ทุฏฺโฐ  โทสํ  ชหติ  มูฬฺโห  โมหํ  ชหติ  กิลิฏฺโฐ  กิเลเส
ชหตีติ   ฯ   น  เหวํ  วตฺตพฺเพ  ฯเปฯ  ราเคน  ราคํ  ชหติ  โทเสน
โทสํ  ชหติ  โมเหน  โมหํ  ชหติ  กิเลเสหิ  กิเลเส  ชหตีติ  ฯ น เหวํ
วตฺตพฺเพ   ฯเปฯ   ราโค   จิตฺตสมฺปยุตฺโต  มคฺโค  จิตฺตสมฺปยุตฺโตติ  ฯ
อามนฺตา   ฯ   ทฺวินฺนํ   ผสฺสานํ   ฯเปฯ   ทฺวินฺนํ   จิตฺตานํ  สโมธานํ
โหตีติ  ฯ  น  เหวํ  วตฺตพฺเพ  ฯเปฯ  ราโค  อกุสโล มคฺโค กุสโลติ ฯ
อามนฺตา   ฯ   กุสลากุสลา   สาวชฺชานวชฺชา   หีนปฺปณีตา   กณฺหสุกฺก-
สปฺปฏิภาคา   ธมฺมา   สมฺมุขีภาวํ  อาคจฺฉนฺตีติ  ฯ  น  เหวํ  วตฺตพฺเพ
ฯเปฯ    กุสลากุสลา    ฯเปฯ    สปฺปฏิภาคา    ธมฺมา    สมฺมุขีภาวํ
อาคจฺฉนฺตีติ   ฯ   อามนฺตา   ฯ   นนุ   วุตฺตํ   ภควตา   จตฺตารีมานิ
ภิกฺขเว   สุวิทูรวิทูรานิ  ฯ  กตมานิ  จตฺตาริ  ฯ  นภญฺจ  ภิกฺขเว  ปฐวี
จ  อิทํ  ปฐมํ  สุวิทูรวิทูรํ  ฯเปฯ  ตสฺมา  สตํ  ธมฺโม  อสพฺภิ  อารกาติ
อตฺเถว  สุตฺตนฺโตติ  ฯ  อามนฺตา  ฯ  เตน  หิ  น  วตฺตพฺพํ กุสลากุสลา
ฯเปฯ สมฺมุขีภาวํ อาคจฺฉนฺตีติ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๗ หน้าที่ ๖๐๘-๖๑๐.
https://84000.org/tipitaka/read/pali_item.php?book=37&item=1770&items=4
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=37&item=1770&items=4&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=37&item=1770&items=4
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=37&item=1770&items=4
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=37&i=1770
             สารบัญพระไตรปิฎกเล่มที่ ๓๗
https://84000.org/tipitaka/read/?index_37
https://84000.org/tipitaka/english/?index_37