|
| บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
|
พระไตรปิฎกเล่มที่ ๓๒ ภาษาบาลี อักษรไทย พระสุตตันตปิฎกเล่มที่ ๒๔ สุตฺต. ขุ. อปทานํ (๑)
|
|
จตุตฺถํ เอกปุปฺผิยตฺเถราปทานํ (๒๘๔) [๒๘๖] |๒๘๖.๑๖| ทกฺขิณมฺหิ ทุวารมฺหิ ปิสาโจ อาสหนฺตทา อทฺทสํ วิรชํ พุทฺธํ ปีตรํสีว ภาณุมํ ฯ |๒๘๖.๑๗| วิปสฺสิสฺส นรคฺคสฺส สพฺพโลกหิเตสิโน เอกปุปฺผํ มยา ทินฺนํ ทิปทินฺทสฺส ตาทิโน ฯ |๒๘๖.๑๘| เอกนวุเต อิโต กปฺเป ยํ ปุปฺผมททึ ตทา ทุคฺคตึ นาภิชานามิ พุทฺธปูชายิทํ ผลํ ฯ @เชิงอรรถ: ๑ ม. ปจฺจุคฺคมเน อิทํ ผลํ ฯ ๒ สตฺตตึเส ฯ ๓ ม. ยุ. สปริวาโรติ ฯ--------------------------------------------------------------------------------------------- หน้าที่ ๓๖๖.
|๒๘๖.๑๙| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา เอกปุปฺผิโย เถโร อิมา คาถาโย อภาสิตฺถาติ ฯ เอกปุปฺผิยตฺเถรสฺส อปทานํ สมตฺตํ ฯ ปญฺจมํ มฆวปุปฺผิยตฺเถราปทานํ (๒๘๕) [๒๘๗] |๒๘๗.๒๐| นมฺมทานทิยา ตีเร สยมฺภู อปราชิโต สมาธึ โส สมาปนฺโน วิปฺปสนฺโน อนาวิโล ฯ |๒๘๗.๒๑| ทิสฺวา ปสนฺโน สุมโน สมฺพุทฺธํ อปราชิตํ ตาหํ มฆวปุปฺเผน สยมฺภุํ ปูชยึ ตทา ฯ |๒๘๗.๒๒| เอกนวุเต อิโต กปฺเป ยํ ปุปฺผมภิปูชยึ ทุคฺคตึ นาภิชานามิ พุทฺธปูชายิทํ ผลํ ฯ |๒๘๗.๒๓| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา มฆวปุปฺผิโย เถโร อิมา คาถาโย อภาสิตฺถาติ ฯ มฆวปุปฺผิยตฺเถรสฺส อปทานํ สมตฺตํ ฯ--------------------------------------------------------------------------------------------- หน้าที่ ๓๖๗.
ฉฏฺฐํ อุปฏฺฐายิกตฺเถราปทานํ (๒๘๖) [๒๘๘] |๒๘๘.๒๔| รถิยํ ปฏิปชฺชนฺตํ อาหุตีนํ ปฏิคฺคหํ ทิปทินฺทํ มหานาคํ โลกเชฏฺฐํ นราสภํ ฯ |๒๘๘.๒๕| ปกฺโกสาปิยตสฺสาหํ สพฺพโลกหิเตสิโน อุปฏฺฐาโก มยา ทินฺโน สิทฺธตฺถสฺส มเหสิโน ฯ |๒๘๘.๒๖| ปฏิคฺคเหตฺวาน สมฺพุทฺโธ นิยฺยาเตสิ ๑- มหามุนิ อุฏฺฐาย อาสนา ตมฺหา ปกฺกามิ ปาจินามุโข ฯ |๒๘๘.๒๗| จตุนวุเต อิโต กปฺเป อุปฏฺฐากมทํ ตทา ทุคฺคตึ นาภิชานามิ อุปฏฺฐานสฺสิทํ ผลํ ฯ |๒๘๘.๒๘| สตฺตปญฺญาสิโต กปฺเป พลเสนสนามโก สตฺตรตนสมฺปนฺโน จกฺกวตฺติ มหพฺพโล ฯ |๒๘๘.๒๙| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา อุปฏฺฐายิโก เถโร อิมา คาถาโย อภาสิตฺถาติ ฯ อุปฏฺฐายิกตฺเถรสฺส อปทานํ สมตฺตํ ฯ สตฺตมํ อปทานิยตฺเถราปทานํ (๒๘๗) [๒๘๙] |๒๘๙.๓๐| อปทานํ สุคตานํ กิตฺตยึหํ ๒- มเหสินํ ปาเท จ สิรสา วนฺทึ ปสนฺโน เสหิ ปาณิหิ ฯ @เชิงอรรถ: ๑ ม. นิยฺยาเทสิ ฯ ๒ โป. ยุ. กิตฺตยิสฺสํ ฯ--------------------------------------------------------------------------------------------- หน้าที่ ๓๖๘.
|๒๘๙.๓๑| เทฺวนวุเต อิโต กปฺเป อปทานํ ปกิตฺตยึ ทุคฺคตึ นาภิชานามิ กิตฺตนาย อิทํ ผลํ ฯ |๒๘๙.๓๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา อปทานิโย เถโร อิมา คาถาโย อภาสิตฺถาติ ฯ อปทานิยตฺเถรสฺส อปทานํ สมตฺตํ ฯ อฏฺฐมํ สตฺตาหปพฺพชิตตฺเถราปทานํ (๒๘๘) [๒๙๐] |๒๙๐.๓๓| วิปสฺสิสฺส ภควโต สงฺโฆ สกฺกตมานิโต พฺยสนํ เม อนุปฺปตฺตํ ญาติเภโท ปุเร อหุ ฯ |๒๙๐.๓๔| ปพฺพชฺชํ อุปคนฺตฺวาน พฺยสนุปสมายหํ สตฺตาหาภิรโต ตตฺถ สตฺถุสาสนกมฺยตา ฯ |๒๙๐.๓๕| เอกนวุเต อิโต กปฺเป ยมหํ ปพฺพชึ ตทา ทุคฺคตึ นาภิชานามิ ปพฺพชฺชาย อิทํ ผลํ ฯ |๒๙๐.๓๖| สตฺตสฏฺฐิมฺหิโต กปฺเป สตฺต อาสุํ มหีปตี สุเนกฺขมฺมาติ ญายนฺติ จกฺกวตฺตี มหพฺพลา ฯ |๒๙๐.๓๗| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ--------------------------------------------------------------------------------------------- หน้าที่ ๓๖๙.
อิตฺถํ สุทํ อายสฺมา สตฺตาหปพฺพชิโต เถโร อิมา คาถาโย อภาสิตฺถาติ ฯ สตฺตาหปพฺพชิตตฺเถรสฺส อปทานํ สมตฺตํ ฯ นวมํ พุทฺธุปฏฺฐายิกตฺเถราปทานํ (๒๘๙) [๒๙๑] |๒๙๑.๓๘| เวธมฺภินีติ ๑- เม นามํ ปิตุ สนฺตํ มมํ ตทา มม หตฺถํ คเหตฺวาน อุปานยิ มหามุนึ ฯ |๒๙๑.๓๙| อิเม มํ อุทฺทิสิยนฺติ พุทฺธา โลกคฺคนายกา เตหํ อุปฏฺฐิ ๒- สกฺกจฺจํ ปสนฺโน เสหิ ปาณิหิ ฯ |๒๙๑.๔๐| เอกตฺตึเส อิโต กปฺเป พุทฺเธ ปริจรึ ๓- ตทา ทุคฺคตึ นาภิชานามิ อุปฏฺฐานสฺสิทํ ผลํ ฯ |๒๙๑.๔๑| เตวีสมฺหิ อิโต กปฺเป จตุโร อาสุ ขตฺติยา สมณุปฏฺฐกา นาม จกฺกวตฺตี มหพฺพลา ฯ |๒๙๑.๔๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา พุทฺธุปฏฺฐายิโก เถโร อิมา คาถาโย อภาสิตฺถาติ ฯ พุทฺธุปฏฺฐายิกตฺเถรสฺส อปทานํ สมตฺตํ ฯ @เชิงอรรถ: ๑ ม. เวฏมฺภินีติ --- ฯ ยุ. เวฏมฺพรีติ เม นาม ฯ ๒ โป. ม. อุปฏฺฐึ ฯ @ยุ. อุปฏฺฐหึ ฯ ๓ ม. อุปฏฺฐหึ ฯ--------------------------------------------------------------------------------------------- หน้าที่ ๓๗๐.
ทสมํ ปุพฺพงฺคมนิยตฺเถราปทานํ (๒๙๐) [๒๙๒] |๒๙๒.๔๓| จุลฺลาสีติสหสฺสานิ ปพฺพชิมฺห อกิญฺจนา เตสํ ปุพฺพงฺคโม อาสึ อุตฺตมตฺถสฺส ปตฺติยา ฯ |๒๙๒.๔๔| สราคา สโมหา ๑- เจเต วิปฺปสนฺนมนาวิลํ ๒- อุปฏฺฐหึสุ สกฺกจฺจํ ปสนฺนา เสหิ ปาณิหิ ฯ |๒๙๒.๔๕| ขีณาสวา วนฺตโทสา กตกิจฺจา อนาสวา ผรึสุ เมตฺตจิตฺเตน สยมฺภู อปราชิตา ฯ |๒๙๒.๔๖| เตสํ อุปฏฺฐหิตฺวาน สมฺพุทฺธานํ ปฏิสฺสโต มรณญฺจ อนุปฺปตฺตา ๓- เทวตฺตญฺจ อคมฺหเส ฯ |๒๙๒.๔๗| จตุนวุเต อิโต กปฺเป ยํ สีลมนุปาลยึ ทุคฺคตึ นาภิชานามิ สญฺญมสฺส อิทํ ผลํ ฯ |๒๙๒.๔๘| ปฏิสมฺภิทา จตสฺโส วิโมกฺขาปิจ อฏฺฐิเม ฯ ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปุพฺพงฺคมนิโย เถโร อิมา คาถาโย อภาสิตฺถาติ ฯ ปุพฺพงฺคมนิยตฺเถรสฺส อปทานํ สมตฺตํ ฯ อุทฺทานํ ปณฺณํ ผลํ อุคฺคมิโย เอกปุปฺผี จ มาฆโว @เชิงอรรถ: ๑ ม. -- สภวา --- ฯ ยุ. --- สภวา โลเก ฯ ๒ ม. วิปฺปสนฺนมนาวิลา ฯ @๓ ม. ยุ. อนุปตฺโต ฯ--------------------------------------------------------------------------------------------- หน้าที่ ๓๗๑.
อุปฏฺฐาโกปทานญฺจ ปพฺพชฺชา จ อุปฏฺฐิตํ ฯ ปุพฺพงฺคโม จ คาถาโย อฏฺฐตาฬีส กิตฺติตา ฯ ปณฺณทายกวคฺโค เอกูนตึโส ฯ ------เนื้อความพระไตรปิฎกฉบับภาษาบาลีอักษรไทย เล่มที่ ๓๒ หน้าที่ ๓๖๕-๓๗๑. http://84000.org/tipitaka/pali/pali_item_s.php?book=32&item=286&items=7&pagebreak=1&modeTY=2 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pali/pali_item_s.php?book=32&item=286&items=7&pagebreak=1&modeTY=2&mode=bracket อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=32&item=286&items=7&pagebreak=1&modeTY=2 อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=32&item=286&items=7&pagebreak=1&modeTY=2 ศึกษาอรรถกถานี้ได้ที่ :- http://84000.org/tipitaka/attha/attha.php?b=32&i=286 The Pali Atthakatha in Thai :- http://84000.org/tipitaka/atthapali/read_th.php?B=50&A=5095 The Pali Atthakatha in Roman :- http://84000.org/tipitaka/atthapali/read_rm.php?B=50&A=5095 สารบัญพระไตรปิฎกเล่มที่ ๓๒ http://84000.org/tipitaka/read/?index_32
       |
|
บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]