บาลีอรรถกถาเล่มที่ ๔๖

หน้าที่ ๒๗.

[๒๘] อิทานิ นํ ภควา "อทฺธา หิ ภควา ปหาสิ ทุกฺขนฺ"ติ เอวํ เตน พฺราหฺมเณน วิทิโตปิ อตฺตานํ อนูปเนตฺวาว ปหีนทุกฺเขน ปุคฺคเลน โอวทนฺโต "ยํ พฺราหฺมณนฺ"ติ คาถมาห. ตสฺสตฺโถ:- ยนฺตํ อภิชานนฺโต "อยํ พาหิตปาปตฺตา พฺราหฺมโณ, เวเทหิ คตตฺตา เวทคู, กิญฺจนาภาวา ^๑- อกิญฺจโน, กาเมสุ จ ภเวสุ จ อสตฺตตฺตา กามภเว อสตฺโต"ติ ชญฺญา ชาเนยฺยาสิ. อทฺธา หิ โส โอฆมิมํ อตาริ, ติณฺโณ จ ปารํ อขิโล อกงฺโข. นิทฺเทเส ราคกิญฺจนนฺติ ราคปลิโพธํ. โทสกิญฺจนนฺติอาทีสุปิ ^๒- เอเสว นโย. กาโมฆํ ติณฺโณ อนาคามิมคฺเคน. ภโวฆํ ติณฺโณ อรหตฺตมคฺเคน. ทิฏฺโฐฆํ ติณฺโณ โสตาปตฺติมคฺเคน. อวิชฺโชฆํ ติณฺโณ อรหตฺตมคฺเคน. สพฺพํ ^๓- สํสารปถํ ติณฺโณ กุสลากุสลกมฺมสฺส เฉเทนาติ. ^๔- อุตฺติณฺโณ ปฐมมคฺเคน. นิตฺติณฺโณ ทุติยมคเคน. อติกฺกนฺโต ตติยมคฺเคน. สมติกฺกนฺโต จตุตฺถมคฺเคน. วีติวตฺโต ผเลน. [๒๙] กิญฺจ ภิยฺโย:- วิทฺวา จ โยติ คาถา. ตตฺถ อิธาติ อิมสฺมึ สาสเน, อตฺตภาเว วา. วิสฺสชฺชาติ โวสฺสชฺชิตฺวา. นิทฺเทเส สชฺชนฺติ มุญฺจนํ. วิสฺสชฺชนฺติ โวสฺสชฺชนํ. เสสํ สพฺพตฺถ ปากฏเมว. เอวํ ภควา อิทมฺปิ สุตฺตํ อรหตฺตนิกูเฏเนว เทเสสิ. เทสนาปริโยสาเน จ วุตฺตสทิโส เอว ธมฺมาภิสมโย อโหสีติ. สทฺธมฺมปฺปชฺโชติกาย จูฬนิทฺเทสฏฺฐกถาย เมตฺตคูมาณวสุตฺตนิทฺเทสวณฺณนา นิฏฺฐิตา. จตุตฺถํ. ------------ @เชิงอรรถ: ^๑ ก. กิญฺจนาตีตตฺตา ^๒ ฉ.ม....อาทิปิ ^๓ ฉ.ม. อยํ ปาโฐ น ทิสฺสติ @^๔ ฉ.ม. กุสลากุสลกมฺมปฺปเภเทนาติ

อรรถกถาภาษาบาลีอักษรไทย เล่มที่ ๔๖ หน้า ๒๗. http://84000.org/tipitaka/pitaka_item/read_th.php?B=46&A=656&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=46&A=656&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=30&i=146 เนื้อความพระไตรปิฎกฉบับหลวง :- http://84000.org/tipitaka/read/r.php?B=30&A=1276 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=30&A=1389 The Pali Tipitaka in Roman Character :- http://84000.org/tipitaka/read/roman_read.php?B=30&A=1389 สารบัญพระไตรปิฎกเล่มที่ ๓๐ http://84000.org/tipitaka/read/?index_30