Suttanipāte catuttho aṭṭhakavaggo 1-
paṭhamaṃ kāmasuttaṃ
[408] |408.1194| 1 Kāmaṃ kāmayamānassa tassa ce taṃ samijjhati
addhā pītimano hoti laddhā macco yadicchati.
|408.1195| Tassa ce kāmayānassa 2- chandajātassa jantuno
te kāmā parihāyanti sallaviddhova ruppati.
|408.1196| Yo kāme parivajjeti sappasseva padā siro
somaṃ 3- visattikaṃ loke sato samativattati.
|408.1197| Khettaṃ vatthuṃ hiraññañca 4- gavāssaṃ 5- dāsaporisaṃ
thiyo bandhū puthū 6- kāme yo naro anugijjhati 7-
|408.1198| abalā naṃ 8- balīyanti maddante naṃ parissayā
tato naṃ dukkhamanveti nāvaṃ bhinnamivodakaṃ.
|408.1199| Tasmā jantu sadā sato kāmāni parivajjaye
te pahāya tare oghaṃ nāvaṃ sitvāva 9- pāragūti.
Kāmasuttaṃ paṭhamaṃ.
------------
@Footnote: 1 aṭṭhakavaggikotipi. 2 kāmayamānassātipi. 3 so imaṃ. 4 Ma. Yu. hiraññaṃ vā.
@5 Ma. gavassaṃ. 6 Ma. Yu. putha . 7 Po. abhisajjati. 8 Yu. abalāva naṃ.
@9 Yu. siñcitvā.
Suttanipāte catutthassa aṭṭhakavaggassa dutiyaṃ guhaṭṭhakasuttaṃ
[409] |409.1200| 2 Satto guhāyaṃ bahunābhichanno
tiṭṭhaṃ naro mohanasmiṃ pagāḷho
dūre vivekā hi tathāvidho so
kāmā hi loke na hi suppahāyā.
|409.1201| Icchānidānā bhavasātabandhā 1-
te duppamuñcā na hi aññamokkhā
pacchā pure vāpi apekkhamānā
imeva kāme purimeva jappaṃ.
|409.1202| Kāmesu giddhā pasutā pamūḷhā
avadāniyā te visame niviṭṭhā
dukkhūpanītā paridevayanti
kiṃsū bhavissāma ito cutāse.
|409.1203| Tasmā hi sikkhetha idheva jantu
yaṃ kiñci jaññā visamanti loke
na tassa hetu visamaṃ careyya
appañhi taṃ jīvitamāhu dhīrā.
|409.1204| Passāmi loke pariphandamānaṃ
pajaṃ imaṃ taṇhagataṃ bhavesu
@Footnote: 1 Po. Ma. Yu. baddhā . 2 Ma. appañhidaṃ.
Hīnā narā maccumukhe lapanti
avītataṇhāse bhavābhavesu.
|409.1205| Mamāyite passatha phandamāne
maccheva appodake khīṇasote
etampi disvā amamo careyya
bhavesu āsattimakubbamāno.
|409.1206| Ubhosu antesu vineyya chandaṃ
phassaṃ pariññāya anānugiddho
yadattagarahī tadakubbamāno
na limpatī diṭṭhasutesu dhīro.
|409.1207| Saññaṃ pariññā 1- vitareyya oghaṃ
pariggahesu muni nopalitto
abbūḷhasallo caramappamatto
nāsiṃsati 2- lokamimaṃ parañcāti.
Guhaṭṭhakasuttaṃ dutiyaṃ.
-----------
@Footnote: 1 Po. pariññāya tareyya . 2 Ma. nāsīsati.
Suttanipāte catutthassa aṭṭhakavaggassa tatiyaṃ duṭṭhaṭṭhakasuttaṃ
[410] |410.1208| 3 Vadanti ve duṭṭhamanāpi eke
athopi ve saccamanā vadanti
vādañca jātaṃ muni no upeti
tasmā munī natthi khilo kuhiñci.
|410.1209| Sakañhi diṭṭhiṃ kathamaccayeyya
chandānunīto ruciyā niviṭṭho
sayaṃ samattāni pakubbamāno 1-
yathā hi jāneyya tathā vadeyya.
|410.1210| Yo attano sīlavatāni jantu
anānupuṭṭho ca 2- paresa pāvā
anariyadhammaṃ kusalā tamāhu
yo ātumānaṃ sayameva pāvā.
|410.1211| Santo ca bhikkhu abhinibbutatto
itihanti sīlesu akatthamāno
tamariyadhammaṃ kusalā vadanti
yassussadā natthi kuhiñci loke.
|410.1212| Pakappitā saṅkhatā yassa dhammā
purakkhatā santi 3- avīvadātā
@Footnote: 1 Po. pakrubbamāno. 2 Ma. va paresa pāva . 3 Po. santimavīvadātā.
Yadattani passati ānisaṃsaṃ
taṃ nissito kuppapaṭicca santiṃ.
|410.1213| Diṭṭhīnivesā na hi svātivattā
dhammesu niccheyya samuggahītaṃ
tasmā naro tesu nivesanesu
nirassatī ādiyaticca dhammaṃ.
|410.1214| Dhonassa hi natthi kuhiñci loke
pakappitā diṭṭhi bhavābhavesu
māyañca mānañca pahāya dhono
sa kena gaccheyya anūpayo so.
|410.1215| Upayo hi dhammesu upeti vādaṃ
anūpayaṃ kena kathaṃ vadeyya
attaṃ 1- nirattaṃ na hi tassa atthi
adhosi so diṭṭhimidheva sabbanti 2-.
Duṭṭhaṭṭhakasuttaṃ tatiyaṃ.
----------
Suttanipāte catutthassa aṭṭhakavaggassa catutthaṃ suddhaṭṭhakasuttaṃ
[411] |411.1216| 4 Passāmi suddhaṃ paramaṃ arogaṃ
diṭṭhena saṃsuddhi narassa hoti
@Footnote: 1 Ma. attā nirattā. 2 Yu. sabbāti. Po. sabbañcāti.
Evābhijānaṃ 1- paramanti ñatvā
suddhānupassīpi pacceti ñāṇaṃ.
|411.1217| Diṭṭhena ce suddhi narassa hoti
ñāṇena vā so pajahāti dukkhaṃ
aññena so sujjhati sopadhīko
diṭṭhī hi naṃ pāva tathā vadānaṃ.
|411.1218| Na brāhmaṇo aññato suddhimāha
diṭṭhe sute sīlavate mute vā
puññe ca pāpe ca anūpalitto
attañjaho na idha 2- pakubbamāno.
|411.1219| Purimaṃ pahāya aparaṃ sitāse
ejānugā te na taranti saṅgaṃ
te uggahāyanti nirassajanti
kapīva sākhaṃ pamukhaṃ 3- gahāya.
|411.1220| Sayaṃ samādāya vatāni jantu
uccāvacaṃ gacchati saññatatto
vidvā ca vedehi samecca dhammaṃ
na uccāvacaṃ gacchati bhūripañño.
|411.1221| Sa sabbadhammesu visenibhūto
yaṃ kiñci diṭṭhaṃ va sutaṃ mutaṃ vā
@Footnote: 1 Yu. etābhijānaṃ. 2 Ma. Yu. nayidha . 3 Po. pamuccuggahāya. Ma. pamuñcaṃ
@gāhāyaṃ. Yu. pamuñcaṃ.
Tameva dassiṃ vivaṭaṃ carantaṃ
kenīdha lokasmiṃ vikappayeyya.
|411.1222| Na kappayanti na purekkharonti
accantasuddhīti na te vadanti
ādānaganthaṃ gadhitaṃ visajja
āsaṃ na kubbanti kuhiñci loke.
|411.1223| Sīmātigo brāhmaṇo tassa natthi
ñatvā va disvā va samuggahītaṃ
na rāgarāgī na virāgaratto
tassīdha natthī paramuggahītanti.
Suddhaṭṭhakasuttaṃ catutthaṃ.
--------------
Suttanipāte catutthassa aṭṭhakavaggassa
pañcamaṃ paramaṭṭhakasuttaṃ
[412] |412.1224| Paramanti diṭṭhīsu paribbasāno
yaduttariṃ kurute jantu loke
hīnāti aññe tato sabbamāha
tasmā vivādāni avītivatto.
|412.1225| Yadattanī passati ānisaṃsaṃ
Diṭṭhe sute sīlabbate 1- mute vā
tadeva so tattha samuggahāya
nihīnato passati sabbamaññaṃ.
|412.1226| Taṃ vāpi ganthaṃ kusalā vadanti
yaṃ nissito passati hīnamaññaṃ
tasmā hi diṭṭhaṃ va sutaṃ mutaṃ vā
sīlabbataṃ bhikkhu na nissayeyya.
|412.1227| Diṭṭhimpi lokasmiṃ na kappayeyya
ñāṇena vā sīlavatena vāpi
samoti attānamanūpaneyya
hīno na maññetha visesi vāpi 2-.
|412.1228| Attaṃ pahāya anupādiyāno
ñāṇepi so nissayaṃ no karoti
sa ve viyattesu na vaggasārī
diṭṭhimpi so na pacceti kiñci.
|412.1229| Yassūbhayante paṇidhīdha natthi
bhavābhavāya idha vā huraṃ vā
nivesanā yassa 3- na santi keci
dhammesu niccheyya samuggahītaṃ
|412.1230| tassīdha diṭṭhe va sute mute vā
@Footnote: 1 Ma. Yu. sīlavate. 2 Po. cāpi . 3 Ma. Yu. tassa.
Pakappitā natthi anūpi saññā
taṃ brāhmaṇaṃ diṭṭhimanādiyānaṃ
kenīdha lokasmiṃ vikappayeyya.
|412.1231| Na kappayanti na purekkharonti
dhammāpi tesaṃ na paṭicchitāse
na brāhmaṇo sīlavatena neyyo
pāraṃ gato na pacceti tādīti.
Paramaṭṭhakasuttaṃ pañcamaṃ.
---------------
Suttanipāte catutthassa aṭṭhakavaggassa chaṭṭhaṃ jarāsuttaṃ
[413] |413.1232| 6 Appaṃ vata jīvitaṃ idaṃ oraṃ vassasatāpi miyyati
sacepi 1- aticca jīvati atha kho so jarasāpi miyyati.
|413.1233| Socanti janā mamāyite na hi santi niccā pariggahā
vinābhāvasantamevidaṃ iti disvā nāgāramāvase.
|413.1234| Maraṇenapi taṃ pahiyyati yaṃ puriso mamayidanti maññati
etampi 2- viditvā paṇḍito na mamattāya nametha māmako.
|413.1235| Supinena yathāpi saṅgataṃ paṭibuddho puriso na passati
evampi piyāyitaṃ janaṃ petaṃ kālakataṃ na passati.
@Footnote: 1 Po. Ma. Yu. yo cepi . 2 evampītipi.
|413.1236| Diṭṭhāpi sutāpi te janā yesaṃ nāmamidaṃ pavuccati
nāmamevāvasissati akkheyyaṃ petassa jantuno.
|413.1237| Sokaparidevamaccharaṃ na jahanti giddhā mamāyite
tasmā munayo pariggahaṃ hitvā acariṃsu khemadassino.
|413.1238| Paṭilīnacarassa bhikkhuno bhajamānassa vivittamāsanaṃ
sāmaggiyamāhu tassa taṃ yo attānaṃ bhavane na dassaye.
|413.1239| Sabbattha munī anissito na piyaṃ kubbati nopi appiyaṃ
tasmiṃ paridevamaccharaṃ paṇṇe vāri yathā na limpati.
|413.1240| Udakabindu yathāpi pokkhare padume vāri yathā na limpati
evaṃ munīno palimpati yadidaṃ diṭṭhaṃ sutaṃ mutesu vā.
|413.1241| Dhono na hi tena maññati yadidaṃ diṭṭhaṃ sutaṃ mutesu vā
nāññena visuddhimicchati na hi so rajjati no virajjatīti.
Jarāsuttaṃ chaṭṭhamaṃ.
-----------
Suttanipāte catutthassa aṭṭhakavaggassa
sattamaṃ tissametteyyasuttaṃ
[414] |414.1242| 7 Methunamanuyuttassa (iccāyasmā tissametteyyo) 1-
vighātaṃ brūhi mārisa
sutvāna tava sāsanaṃ viveke sikkhissāmase.
|414.1243| Methunamanuyuttassa (metteyyāti bhagavā)
@Footnote: 1 Ma. Yu. tisso metteyyo.
Mussate vāpi sāsanaṃ
micchā ca paṭipajjati etaṃ tasmiṃ anāriyaṃ.
|414.1244| Eko pubbe caritvāna methunaṃ yo nisevati
yānaṃ bhantaṃva taṃ loke hīnamāhu puthujjanaṃ.
|414.1245| Yaso kittī ca yā pubbe hāyate vāpi tassa sā
etampi disvā sikkhetha methunaṃ vippahātave.
|414.1246| Saṅkappehi pareto so 1- kapaṇo viya jhāyati
sutvā paresaṃ nigghosaṃ maṅku hoti tathāvidho.
|414.1247| Atha satthāni kurute paravādehi codito
esa khvassa mahāgedho mosavajjaṃ pagāhati.
|414.1248| Paṇḍitoti samaññāto ekacariyaṃ adhiṭṭhito
athāpi methune yutto mandova parikissati.
|414.1249| Etamādīnavaṃ ñatvā muni pubbāpare idha
ekacariyaṃ daḷhaṃ kayirā na nisevetha methunaṃ.
|414.1250| Vivekaññeva sikkhetha etadariyānamuttamaṃ
tena seṭṭho na maññetha sa ve nibbānasantike.
|414.1251| Rittassa munino carato kāmesu anapekkhino
oghatiṇṇassa pihayanti kāmesu gadhitā pajāti.
Tissametteyyasuttaṃ sattamaṃ.
@Footnote: 1 Yu. yo.
Suttanipāte catutthassa aṭṭhakavaggassa aṭṭhamaṃ pasūrasuttaṃ
[415] |415.1252| 8 Idheva suddhī iti vādayanti
nāññesu dhammesu visuddhimāhu
yaṃ nissitā tattha subhaṃ vadānā
paccekasaccesu puthū niviṭṭhā.
|415.1253| Te vādakāmā parisaṃ vigayha
bālaṃ dahantī mithu aññamaññaṃ
vadanti te aññasitā kathojjaṃ
pasaṃsakāmā kusalā vadānā.
|415.1254| Yutto kathāyaṃ parisāya majjhe
pasaṃsamicchaṃ vinighāti hoti
apāhatasmiṃ pana maṅku hoti
nindāya so kuppati randhamesī.
|415.1255| Yamassa vādaṃ parihīnamāhu
apāhataṃ pañhavimaṃsakāse
paridevati socati hīnavādo
upaccagā manti anutthunāti.
|415.1256| Ete vivādā samaṇesu jātā
etesu ugghāti nigghāti hoti
Etampi disvā virame kathojjaṃ
na haññadatthatthi pasaṃsalābhā.
|415.1257| Pasaṃsito vā pana tattha hoti
akkhāya vādaṃ parisāya majjhe
so hassatī uṇṇamaticca 1- tena
pappuyya taṃ attha yathā mano ahu 2-.
|415.1258| Yā uṇṇatī sāssa vighātabhūmi
mānātimānaṃ vadate paneso
etampi disvā virame kathojjaṃ 3-
na tena suddhiṃ kusalā vadanti.
|415.1259| Sūro yathā rājakhādāya puṭṭho
abhigajjameti paṭisūramicchaṃ
yeneva so tena palehi sūra 4-
pubbeva natthī yadidaṃ yudhāya.
|415.1260| Ye diṭṭhimuggayha vivādayanti
idameva saccanti ca vādayanti 5-
te tvaṃ vadassu na hi tedha atthi
vādamhi jāte paṭisenikattā.
|415.1261| Visenikatvā pana ye caranti
diṭṭhīhi diṭṭhiṃ avirujjhamānā
@Footnote: 1 Ma. uṇṇamatī ca. 2 Po. manohu. 3 Po. Ma. Yu. etaṃ pi disvā na vivādayetha.
@4 Po. sūraṃ. 5 Po. saccanti pavādayanti.
Tesu tvaṃ kiṃ labhetho pasūra
yesīdha natthī paramuggahītaṃ.
|415.1262| Atha tvaṃ pavitakkamāgamā
manasā diṭṭhigatāni cintayanto
dhonena yugaṃ samāgamā
na hi tvaṃ sakkhasi sampayātaveti.
Pasūrasuttaṃ aṭṭhamaṃ.
------------
Suttanipāte catutthassa aṭṭhakavaggassa navamaṃ māgandiyasuttaṃ
[416] |416.1263| 9 Disvāna taṇhaṃ aratiñca rāgaṃ 1-
nāhosi chando api methunasmiṃ
kimevidaṃ muttakarīsapuṇṇaṃ
pādāpi naṃ samphusituṃ na icche.
|416.1264| Etādisañce ratanaṃ na icchasi
nāriṃ narindehi bahūhi patthitaṃ
diṭṭhīgataṃ sīlavataṃ nu jīvitaṃ
bhavūpapattiñca vadesi kīdisaṃ.
|416.1265| Idaṃ vadāmīti na tassa hoti (māgandiyāti bhagavā)
dhammesu niccheyya samuggahītaṃ
@Footnote: 1 Ma. Yu. rāgañca.
Passañca diṭṭhīsu anuggahāya
ajjhattasantiṃ pacinaṃ addasaṃ.
|416.1266| Vinicchayā yāni pakappitāni (iti māgandiyo)
te ve munī brūsi anuggahāya
ajjhattasantīti yametamatthaṃ
kathaṃ nu dhīrehi paveditantaṃ.
|416.1267| Na diṭṭhiyā na sutiyā na ñāṇena (māgandiyāti bhagavā)
sīlabbatenāpi na suddhimāha
adiṭṭhiyā assutiyā añāṇā
asīlatā abbatā nopi tena
ete ca nisajja anuggahāya
santo anissāya bhavaṃ na jappe.
|416.1268| No ce kira diṭṭhiyā na sutiyā na ñāṇena (iti māgandiyo)
sīlabbatenāpi na suddhimāha
adiṭṭhiyā assutiyā añāṇā
asīlatā abbatā nopi tena
maññāmahaṃ momuhameva dhammaṃ
diṭṭhiyā ca eke paccenti suddhiṃ.
|416.1269| Diṭṭhiñca 1- nissāya anupucchamāno (māgandiyāti bhagavā)
samuggahītesu samohamāgā
@Footnote: 1 Ma. diṭṭhañca.
Ito ca nāddakkhi aṇumpi saññaṃ
tasmā tuvaṃ momuhato dahāsi
|416.1270| samo visesī uda vā nihīno
yo maññatī so vivadetha tena
tīsu vidhāsu avikampamāno
samo visesīti na tassa hoti.
|416.1271| Saccanti so brāhmaṇo kiṃ vadeyya
musāti vā so vivadetha kena
yasmiṃ samaṃ visamaṃ vāpi 1- natthi
sa kena vādaṃ paṭisaṃyujeyya.
|416.1272| Okampahāya aniketasārī
gāme akubbaṃ muni santhavāni
kāmehi ritto apurekkharāno
kathaṃ na viggayha janena kayirā.
|416.1273| Yehi vivitto vicareyya loke
na tāni uggayha vadeyya nāgo
elambujaṃ 2- kaṇṭakavārijaṃ 3- yathā
jalena paṅkena ca nūpalittaṃ 4-
evaṃ munī santivādo agiddho
kāme ca loke ca anūpalitto.
@Footnote: 1 Yu. cāpi. 2 Ma. jalambujaṃ. 3 Ma. Yu. kaṇṭakaṃ vārijaṃ. 4 Po. anūpalittaṃ.
|416.1274| Na vedagū diṭṭhiyā na mutiyā 1-
sa mānameti na hi tammayo so
na kammunā nopi sutena neyyo
anūpanīto sa 2- nivesanesu.
|416.1275| Saññāvirattassa na santi ganthā
paññāvimuttassa na santi mohā
saññañca diṭṭhiñca ye aggahesuṃ
te ghaṭṭamānā 3- vicaranti loketi.
Māgandiyasuttaṃ navamaṃ.
------------
Suttanipāte catutthassa aṭṭhakavaggassa dasamaṃ purābhedasuttaṃ
[417] |417.1276| 10 Kathaṃdassī kathaṃsīlo upasantoti vuccati
tamme gotama pabrūhi pucchito uttamaṃ naraṃ.
|417.1277| Vītataṇho purā bhedā (ti bhagavā) pubbamantamanissito
vemajjhe nupasaṅkheyyo tassa natthi purekkhataṃ.
|417.1278| Akkodhano asantāsī avikatthī akukkucco 4-
mantābhāṇī anuddhato sa ve vācāyato muni.
|417.1279| Nirāsattī anāgate atītaṃ nānusocati
vivekadassī phassesu diṭṭhīsu ca na niyyati
|417.1280| paṭilīno akuhako apihālu amaccharī
@Footnote: 1 diṭṭhiyāyako na .... 2 Po. Yu. so . 3 Ma. Yu. ghaṭṭayantā.
@4 Ma. Yu. akkukuco
Appagabbho ajeguccho pesuṇeyye ca no yuto
|417.1281| sātiyesu anassāvī atimāne ca no yuto
saṇho ca paṭibhāṇavā na saddho na virajjati
|417.1282| lābhakamyā na sikkhati alābhe ca na kuppati
aviruddho ca taṇhāya rasesu 1- nānugijjhati
|417.1283| upekkhako sadā sato na loke maññate samaṃ
na visesī na nīceyyo tassa no santi ussadā.
|417.1284| Yassa nissayatā 2- natthi ñatvā dhammaṃ anissito
bhavāya vibhavāya vā taṇhā yassa na vijjati
|417.1285| taṃ brūmi upasantoti kāmesu anapekkhinaṃ
ganthā tassa na vijjanti atāri 3- so visattikaṃ.
|417.1286| Na tassa puttā pasavo khettaṃ vatthuñca vijjati
attaṃ vāpi nirattaṃ vā 4- na tasmiṃ upalabbhati.
|417.1287| Yena naṃ vajjuṃ puthujjanā atho samaṇabrāhmaṇā
taṃ tassa apurakkhataṃ tasmā vādesu nejati 5-.
|417.1288| Vītagedho amaccharī na ussesu vadate muni
na samesu na omesu kappaṃ neti akappiyo.
|417.1289| Yassa loke sakaṃ natthi asatā ca na socati
dhammesu ca na gacchati sa ve santoti vuccatīti.
Purābhedasuttaṃ dasamaṃ
@Footnote: 1 Yu. rase ca. 2 Ma. nissayanā. 3 Po. Ma. atarī. 4 Ma. attā vāpi nirattā.
@5 Po. niñjati.
Suttanipāte catutthassa aṭṭhakavaggassa
ekādasamaṃ kalahavivādasuttaṃ
[418] |418.1290| 11 Kuto pahūtā kalahā vivādā
paridevasokā sahamaccharā ca
mānātimānā sahapesuṇā ca
kuto pahūtā te tadiṅgha brūhi.
|418.1291| Piyappahūtā kalahā vivādā
paridevasokā sahamaccharā ca
mānātimānā sahapesuṇā ca
maccherayuttā kalahā vivādā
vivādajātesu ca pesuṇāni.
|418.1292| Piyā su lokasmiṃ kutonidānā
ye vāpi 1- lobhā vicaranti loke
āsā ca niṭṭhā ca kutonidānā
ye samparāyāya narassa honti.
|418.1293| Chandānidānāni piyāni loke
ye vāpi lobhā vicaranti loke
āsā ca niṭṭhā ca itonidānā
ye samparāyāya narassa honti.
@Footnote: 1 Po. Ma. sabbattha vāresu cāpi.
|418.1294| Chando nu lokasmiṃ kutonidāno
vinicchayā vāpi kuto pahūtā
kodho mosavajjañca kathaṅkathā ca
ye vāpi dhammā samaṇena vuttā.
|418.1295| Sātaṃ asātanti yamāhu loke
tamūpanissāya pahoti chando
rūpesu disvā vibhavaṃ bhavañca
vinicchayaṃ kurute 1- jantu loke.
|418.1296| Kodho mosavajjañca kathaṅkathā ca
etepi dhammā dvayameva sante
kathaṅkathī ñāṇapathāya sikkhe
ñatvā pavuttā samaṇena dhammā.
|418.1297| Sātaṃ asātañca kutonidānā
kismiṃ asante na bhavanti hete
vibhavaṃ bhavañcāpi yametamatthaṃ
etamme pabrūhi yatonidānaṃ.
|418.1298| Phassanidānaṃ sātaṃ asātaṃ
phasse asante na bhavanti hete
vibhavaṃ bhavañcāpi yametamatthaṃ
etante pabrūmi itonidānaṃ.
@Footnote: 1 Ma. kubbati.
|418.1299| Phasso nu lokasmiṃ kutonidāno
pariggahā vāpi kuto pahūtā
kasmiṃ asante na mamattamatthi
kasmiṃ vibhūte na phusanti phassā.
|418.1300| Nāmañca rūpañca paṭicca phasso
icchānidānāni pariggahāni
icchāya 1- asantyā na mamattamatthi
rūpe vibhūte na phusanti phassā.
|418.1301| Kathaṃsametassa vibhoti rūpaṃ
sukhaṃ dukkhaṃ vāpi kathaṃ vibhoti
etamme pabrūhi yathā vibhoti
taṃ jāniyāma iti 2- me mano ahu.
|418.1302| Na saññasaññī na visaññasaññī
nopi asaññī na vibhūtasaññī
evaṃsametassa vibhoti rūpaṃ
saññānidānā hi papañcasaṅkhā.
|418.1303| Yantaṃ apucchimha akittayi no
aññantaṃ pucchāma tadiṅgha brūhi
ettāvataggaṃ no 3- vadanti heke
yakkhassa suddhiṃ idha paṇḍitāse
@Footnote: 1 Yu. icchā na santyā. 2 Ma. jāniyāmāti. 3 Ma. nu.
Udāhu aññampi vadanti etto.
|418.1304| Ettāvataggampi vadanti heke
yakkhassa suddhiṃ idha paṇḍitāse
tesaṃ puneke samayaṃ vadanti
anupādisese kusalā vadānā.
|418.1305| Ete ca ñatvā upanissitāti
ñatvā munī nissaye so vimaṃsī
ñatvā vimutto na vivādameti
bhavābhavāya na sameti dhīroti.
Kalahavivādasuttaṃ ekādasamaṃ.
----------
Suttanipāte catutthassa aṭṭhakavaggassa dvādasamaṃ cūḷaviyūhasuttaṃ
[419] |419.1306| 12 Sakaṃ sakaṃ diṭṭhiparibbasānā
viggayha nānā kusalā vadanti
yo evaṃ jānāti sa vedi dhammaṃ
idaṃ paṭikkosamakevalī so.
|419.1307| Evampi viggayha vivādayanti
bālo paro akusaloti cāhu
sacco nu vādo katamo imesaṃ
Sabbeva hīme kusalā vadānā.
|419.1308| Parassa ce dhammamanānujānaṃ
bālo mago 1- hoti nihīnapañño
sabbeva bālā sunihīnapaññā
sabbevime diṭṭhiparibbasānā.
|419.1309| Sandiṭṭhiyā ve pana vīvadātā 2-
saṃsuddhapaññā kusalā matīmā
na tesaṃ koci nihīnapañño 3-
diṭṭhīhi tesampi tathā samattā.
|419.1310| Na vāhametaṃ tathivanti 4- brūmi
yamāhu bālo 5- mithu aññamaññaṃ
sakaṃ sakaṃ diṭṭhimakaṃsu saccaṃ
tasmā hi bāloti paraṃ dahanti.
|419.1311| Yamāhu saccaṃ tathivanti eke
tamāhu aññepi 6- tucchaṃ musāti
evampi viggayha vivādayanti 7-
kasmā na ekaṃ samaṇā vadanti.
|419.1312| Ekaṃ hi saccaṃ na dutīyamatthi
yasmiṃ pajāno vivade pajānaṃ
nānā te saccāni sayaṃ thunanti
@Footnote: 1 Ma. bālomako. 2 Po. ceva na cevadātā. Ma. ceva na vīvadātā.
@3 Ma. Yu. parihīnapañño. 4 Ma. Yu. tathiyanti. 5 Ma. Yu. bālā.
@6 Ma. Yu. aññe ca. 7 Yu. vivādiyanti.
Tasmā na ekaṃ samaṇā vadanti.
|419.1313| Kasmā nu saccāni vadanti nānā.
Pavādiyāse kusalā vadānā
saccāni sutāni bahūni nānā
udāhu te takkamanussaranti.
|419.1314| Na heva saccāni bahūni nānā
aññatra saññāya niccāni loke
takkañca diṭṭhīsu pakappayitvā
saccaṃ musāti dvayadhammamāhu.
|419.1315| Diṭṭhe sute sīlabbate mute vā
ete ca nissāya vimānadassī
vinicchaye ṭhatvā pahassamāno
bālo paro akusaloti cāha.
|419.1316| Yeneva bāloti paraṃ dahāti
tenātumānaṃ kusaloti cāha
sayamattanā so kusalo vadāno
aññaṃ vimāneti tadeva pāvā.
|419.1317| Atisāradiṭṭhiyā so samatto
mānena matto paripuṇṇamānī
sayameva sāmaṃ manasābhisitto
Diṭṭhīhi sā tassa tathā samattā.
|419.1318| Parassa ce hi vacasā nihīno
tumo sahā hoti nihīnapañño
atha ce sayaṃ vedagū hoti dhīro
na koci bālo samaṇesu atthi.
|419.1319| Aññaṃ ito yābhivadanti dhammaṃ
aparaddhā suddhimakevalī te 1-
evampi titthyā puthuso vadanti
sandiṭṭhirāgena hi tyābhirattā 2-.
|419.1320| Idheva suddhiṃ iti vādayanti
nāññesu dhammesu visuddhimāhu
evampi titthyā puthuso niviṭṭhā
|419.1321| sakāyane tattha daḷhaṃ vadānā.
Sakāyane vāpi daḷhaṃ vadāno
kamettha bāloti paraṃ daheyya
sayameva so medhagaṃ āvaheyya
paraṃ vadaṃ bālamasuddhidhammaṃ.
|419.1322| Vinicchaye ṭhatvā sayaṃ pamāya
uddhaṃ so lokasmiṃ vivādameti
hitvāna sabbāni vinicchayāni
@Footnote: 1 Yu. suddhimakevalī no. 2 Po. sandiṭṭhirāgena titthyābhirattā. Yu. tebhirattā.
Na medhagaṃ kurute jantu loketi.
Cūḷaviyūhasuttaṃ dvādasamaṃ.
-----------
Suttanipāte catutthassa aṭṭhakavaggassa terasamaṃ mahāviyūhasuttaṃ
[420] |420.1323| 13 Ye kecime diṭṭhiparibbasānā
idameva saccanti vivādayanti
sabbeva te nindamanvānayanti
atho pasaṃsampi labhanti tattha.
|420.1324| Appañhi etaṃ na alaṃ samāya
duve vivādassa phalāni brūmi
etampi disvāna vivādayetha
khemābhipassaṃ avivādabhūmiṃ.
|420.1325| Yā kācimā sammatiyo puthujjā
sabbā va etā na upeti vidvā
anūpayo so upayaṃ kimeyya
diṭṭhe sute khantimakubbamāno.
|420.1326| Sīluttamā saññamenāhu suddhiṃ
vattaṃ samādāya upaṭṭhitāse
idheva sikkhema athassa suddhiṃ
Bhavūpanītā kusalā vadānā.
|420.1327| Sace cuto sīlavatāto hoti
pavedhatī kamma virādhayitvā
pajappatī 1- patthayatī ca suddhiṃ
satthā va hīno pavasaṃ gharamhā.
|420.1328| Sīlabbataṃ vāpi pahāya sabbaṃ
dhammañca sāvajjanavajjametaṃ
suddhī asuddhīti apatthayāno
virato care santimanuggahāya.
|420.1329| Tamūpanissāya jigucchitaṃ vā
atha vāpi diṭṭhaṃ va sutaṃ mutaṃ vā
uddhaṃsarā suddhimanutthunanti
avītataṇhāse bhavābhavesu.
|420.1330| Patthayamānassa hi jappitāni
pavedhitaṃ vāpi pakappitesu
cutūpapāto idha yassa natthi
sa kena vedheyya kuhiñci jappe 2-.
|420.1331| Yamāhu dhammaṃ paramanti eke
tameva hīnanti panāhu aññe
sacco nu vādo katamo imesaṃ
@Footnote: 1 Po. pajampati. 2 Po. kuhiṃ pajappe.
Sabbeva hīme kusalā vadānā.
|420.1332| Sakañhi dhammaṃ paripuṇṇamāhu
aññassa dhammaṃ pana hīnamāhu
evampi viggayha vivādayanti
sakaṃ sakaṃ sammatimāhu 1- saccaṃ.
|420.1333| Parassa ce vambhayitena hīno
na koci dhammesu visesi assa
puthūhi aññassa vadanti dhammaṃ
nihīnato samhi daḷhaṃ vadānā.
|420.1334| Sadhammapūjā ca panā tatheva
yathā pasaṃsanti sakāyanāni
sabbe pavādā 2- tathivā bhaveyyuṃ
suddhīhi nesaṃ paccattameva.
|420.1335| Na brāhmaṇassa paraneyyamatthi
dhammesu niccheyya samuggahītaṃ
tasmā vivādāni upātivatto
na hi seṭṭhato passati dhammamaññaṃ.
|420.1336| Jānāmi passāmi tatheva etaṃ
diṭṭhiyā eke paccenti suddhiṃ
addakkhi ce kiñhi tumassa tena
@Footnote: 1 Po. Yu. sammutimāhu. 2 Po. sabbeva vādā.
Atisitvā aññena vadanti suddhiṃ.
|420.1337| Passaṃ naro dakkhati 1- nāmarūpaṃ
disvāna vāññassati tāni ceva
kāmaṃ bāhuṃ passatu appakaṃ vā
na hi tena suddhiṃ kusalā vadanti.
|420.1338| Nivissavādī na hi subbināyo
pakappitaṃ diṭṭhi purekkharāno
yannissito tattha subhaṃvadāno
suddhiṃvado 2- tattha tathaddasā so.
|420.1339| Na brāhmaṇo kappamupeti saṅkhaṃ
na diṭṭhisārī napi ñāṇabandhu
ñatvā ca so sammatiyo puthujjā
upekkhati uggahaṇantimaññe.
|420.1340| Visajja ganthāni munīdha loke
vivādajātesu na vaggasārī
santo asantesu upekkhako so
anuggaho uggahaṇantimaññe.
|420.1341| Pubbāsave hitvā nave akubbaṃ
na chandagū nāpi nivissavādo
sa vippamutto diṭṭhigatehi dhīro
@Footnote: 1 Yu. dakkhiti. 2 Po. suddhivado.
Na limpatī loke anattagarahī.
|420.1342| Sa sabbadhammesu visenibhūto
yaṃ kiñci diṭṭhaṃ va 1- sutaṃ mutaṃ vā
sampannabhāro muni vippamutto
na kappiyo nūparato na patthiyoti bhagavāti.
Mahāviyūhasuttaṃ terasamaṃ
------------
suttanipāte catutthassa aṭṭhakavaggassa cuddasamaṃ tuvaṭakasuttaṃ
[421] |421.1343| 14 Pucchāmi taṃ ādiccabandhuṃ
vivekaṃ santipadañca mahesiṃ
kathaṃ disvā nibbāti bhikkhu
anupādiyāno lokasmiṃ kiñci.
|421.1344| Mūlaṃ papañcasaṅkhāyā (ti bhagavā)
mantā asmīti sabbamuparuddhe
yā kāci taṇhā ajjhattaṃ
tāsaṃ vinayā sadā sato sikkhe.
|421.1345| Yaṃ kiñci dhammaṃ abhijaññā 2-
ajjhattaṃ atha vāpi bahiddhā
na tena thāmaṃ kubbetha 3-
@Footnote: 1 Po. ca. 2 Po. dhammamabhijaññā. 3 Po. kurubbetha.
Na hi sā nibbuti sataṃ vuttā
|421.1346| seyyo na tena maññeyya
nīceyyo atha vāpi sarikkho
puṭṭho anekarūpehi
nātumānaṃ vikappayaṃ tiṭṭhe.
|421.1347| Ajjhattameva upasame
na aññato 1- bhikkhu santimeseyya
ajjhattaṃ upasantassa
natthi attā kuto nirattaṃ vā 2-.
|421.1348| Majjhe yathā samuddassa
ūmi no jāyati ṭhito hoti
evaṃ ṭhito anejassa
ussadaṃ bhikkhu na kareyya kuhiñci.
|421.1349| Akittayi vivaṭacakkhu
sakkhidhammaṃ parissayavinayaṃ
paṭipadañca vadehi bhaddante
pāṭimokkhaṃ atha vāpi samādhiṃ.
|421.1350| Cakkhūhi neva lolassa
gāmakathāya āvaraye sotaṃ
rase ca nānugijjheyya
@Footnote: 1 Yu. nāññato. 2 Po. va.
Na ca mamāyetha kiñci lokasmiṃ.
|421.1351| Phassena yadā phuṭṭhassa
paridevaṃ bhikkhu na kareyya
kuhiñci bhavañca nābhijappeyya
bheravesu ca na sampavedheyya.
|421.1352| Annānamatho pānānaṃ
khādanīyānaṃ athopi vatthānaṃ
laddhā na sannidhiṃ kayirā
na ca parittase tāni alabhamāno.
|421.1353| Jhāyī na pādalolassa
virame kukkuccā nappamajjeyya
atha vā āsanesu sayanesu
appasaddesu bhikkhu vihareyya.
|421.1354| Niddaṃ bahulaṃ na kareyya
jāgariyaṃ bhajeyya ātāpī
tandiṃ māyaṃ hassaṃ khiḍḍaṃ
methunaṃ vippajahe savibhūsaṃ.
|421.1355| Āthabbaṇaṃ supinaṃ lakkhaṇaṃ
no vidahe athopi nakkhattaṃ
virutañca gabbhakaraṇaṃ
Tikicchaṃ māmako na seveyya.
|421.1356| Nindāya nappavedheyya
na uṇṇameyya pasaṃsito bhikkhu
lobhaṃ saha macchariyena
kodhaṃ pesuṇiyañca panudeyya.
|421.1357| Kayavikkaye na tiṭṭheyya
upavādaṃ bhikkhu na kareyya kuhiñci
gāme ca nābhisajjeyya
lābhakamyā janaṃ na lapayeyya.
|421.1358| Na ca katthitā siyā bhikkhu
na ca vācaṃ payuttaṃ bhāseyya
pāgabbhiyaṃ na sikkheyya
kathaṃ vigāhikaṃ na katheyya.
|421.1359| Mosavajje na niyyetha
sampajāno saṭhāni na kayirā
atha jīvitena paññāya
sīlabbatena nāññamatimaññe.
|421.1360| Sutvā rusito bahuṃ vācaṃ
samaṇānaṃ vā puthuvacanānaṃ
pharusena nappaṭivajjā
Na hi santo paṭisenikaronti.
|421.1361| Etañca dhammamaññāya
vicinaṃ bhikkhu sadā sato sikkhe
santīti nibbutiṃ ñatvā
sāsane gotamassa nappamajjeyya.
|421.1362| Abhibhū hi so anabhibhūto
sakkhidhammaṃ anītihamadassī
tasmā hi tassa bhagavato sāsane
appamatto sadā namassamanusikkheti bhagavāti.
Tuvaṭakasuttaṃ cuddasamaṃ.
-------------
Suttanipāte catutthassa aṭṭhakavaggassa
paṇṇarasamaṃ attadaṇḍasuttaṃ
[422] |422.1363| 15 Attadaṇḍā bhayaṃ jātaṃ janaṃ passatha medhagaṃ
saṃvegaṃ kittayissāmi yathā saṃvijitaṃ mayā.
|422.1364| Phandamānaṃ pajaṃ disvā macche appodake yathā
aññamaññehi byāruddhe disvā maṃ bhayamāsivi.
|422.1365| Samantamasāro loko disā sabbā sameritā
icchaṃ bhavanamattano nāddasāsiṃ anositaṃ
|422.1366| Osāne tveva byāruddhe disvā me aratī ahu
athettha sallamaddakkhiṃ duddasaṃ hadayanissitaṃ.
|422.1367| Yena sallena otiṇṇo disā sabbā vidhāvati
tameva sallaṃ abbuyha na dhāvati na sīdati.
|422.1368| Tattha sikkhānugīyanti ...............
(yāni loke gadhitāni) na tesu pasuto siyā
nibbijja sabbaso kāme sikkhe nibbānamattano.
|422.1369| Sacco siyā appagabbho amāyo rittapesuṇo
akkodhano lobhapāpakaṃ 1- vevicchaṃ vitare muni.
|422.1370| Niddaṃ tandiṃ sahe thīnaṃ pamādena na saṃvase
atimāne na tiṭṭheyya nibbānamanaso naro.
|422.1371| Mosavajjena niyyetha rūpe snehaṃ na kubbaye
mānañca parijāneyya sāhasā virato care.
|422.1372| Purāṇaṃ nābhinandeyya nave khantimakubbaye
hiyyamāne na soceyya ākāsaṃ na sito siyā.
|422.1373| Gedhaṃ brūmi mahoghoti ājavaṃ brūmi jappanaṃ
ārammaṇaṃ pakappanaṃ kāmapaṅko duraccayo.
|422.1374| Saccā avokkamma muni thale tiṭṭhati brāhmaṇo
sabbaso paṭinissajja sa ve santoti vuccati.
|422.1375| Sa ve vidvā 2- sa vedagū ñatvā dhammaṃ anissito
@Footnote: 1 Yu. lobhapāpaṃ. 2 Po. viddhā.
Sammā so loke iriyāno na pihetīdha kassaci.
|422.1376| Yodha kāme accuttari 1- saṅgaṃ loke duraccayaṃ
na so socati nājjheti chinnasoto abandhano.
|422.1377| Yaṃ pubbe taṃ visosehi pacchā te māhu kiñcanaṃ
majjhe ce no gahessasi upasanto carissasi.
|422.1378| Sabbaso nāmarūpasmiṃ yassa natthi mamāyitaṃ
asatā ca na socati sa ve loke na jiyyati.
|422.1379| Yassa natthi idaṃ meti paresaṃ cāpi 2- kiñcanaṃ
mamattaṃ so asaṃvindaṃ natthi meti na socati.
|422.1380| Anuṭṭhuri 3- ananugiddho anejo sabbadhi samo
tamānisaṃsaṃ pabrūmi pucchito avikappinaṃ.
|422.1381| Anejassa vijānato natthi kāci nisaṅkhati 4-
virato so viyārambhā khemaṃ passati sabbadhi.
|422.1382| Na samesu na omesu na ussesu vadate muni
santo so vītamaccharo nādeti na nirassatīti bhagavāti.
Attadaṇḍasuttaṃ paṇṇarasamaṃ.
----------
@Footnote: 1 Po. accattari. Yu. accatari . 2 Yu. vāpi . 3 Po. anuṭṭhari. Yu.
@aniṭṭhuri . 4 Po. kācini saṅkhiti.
Suttanipāte catutthassa aṭṭhakavaggassa
soḷasamaṃ sārīputtasuttaṃ
[423] |423.1383| 16 Name diṭṭho ito pubbe (iccāyasmā sārīputto)
na suto uda kassaci
evaṃ vagguvado satthā tusitā gaṇimāgato.
|423.1384| Sadevakassa lokassa yathā dissati cakkhumā
sabbantamaṃ vinodetvā ekova ratimajjhagā.
|423.1385| Taṃ buddhaṃ asitaṃ tādiṃ akuhaṃ gaṇimāgataṃ
bahunnamidha baddhānaṃ atthī pañhena āgamaṃ
|423.1386| bhikkhuno vijigucchato bhajato rittamāsanaṃ
rukkhamūlaṃ susānaṃ vā pabbatānaṃ guhāsu vā
|423.1387| uccāvacesu sayanesu gīvanto tattha bheravā
yehi bhikkhu na vedheyya nigghose sayanāsane.
|423.1388| Katī parissayā loke gacchato agataṃ disaṃ
ye bhikkhu abhisambhave pantamhi sayanāsane.
|423.1389| Kyāssa byapathayo assu kyassassu idha gocarā
kāni sīlabbatānassa 1- pahitattassa bhikkhuno
|423.1390| kaṃ so sikkhaṃ samādāya ekodi nipako sato
kammāro rajatasseva niddhame malamattano.
@Footnote: 1 Po. Yu. sīlabbānāssu.
|423.1391| Vijigucchamānassa yadidaṃ phāsu (sārīputtāti bhagavā)
rittāsanaṃ sayanaṃ sevato ce
sambodhikāmassa yathānudhammaṃ
tante pavakkhāmi yathā pajānaṃ.
|423.1392| Pañcanna 1- dhīro bhayānaṃ na bhāye
bhikkhu sato sa pariyantacārī
ḍaṃsādhipātānaṃ siriṃsapānaṃ
manussaphassānaṃ catuppadānaṃ
|423.1393| paradhammikānampi na santaseyya
disvāpi tesaṃ bahubheravāni
athāparāni abhisambhaveyya
parissayāni kusalānuesī.
|423.1394| Ātaṅkaphassena khudāya phuṭṭho
sītaṃ accuṇhaṃ adhivāsayeyya
so tehi phuṭṭho bahudhā anoko
viriyaṃ parakkamma daḷhaṃ kareyya.
|423.1395| Theyyaṃ na kareyya na musā bhaṇeyya
mettāya phasse tasathāvarāni
yadāvilattaṃ manaso vijaññā
kaṇhassa pakkhoti vinodayeyya.
@Footnote: 1 Po. Yu. pañcannaṃ.
|423.1396| Kodhātimānassa vasaṃ na gacche
mūlampi tesaṃ palikhañña tiṭṭhe
athappiyaṃ vā pana appiyaṃ vā
addhā bhavanto abhisambhaveyya.
|423.1397| Paññaṃ purakkhatvā 1- kalyāṇapīti
vikkhambhaye tāni parissayāni
aratiṃ sahetha sayanamhi pante
caturo sahetha paridevadhamme
|423.1398| kiṃsū asissāmi kuvaṃ vā assissaṃ
dukkhaṃ vata settha 2- kuvajjasessaṃ
ete vitakke paridevaneyye
vinayetha sekkho aniketasārī.
|423.1399| Annañca laddhā vasanañca kāle
mattaṃ so jaññā idha tosanatthaṃ
so tesu gutto yatacāri gāme
rusitopi vācaṃ pharusaṃ na vajjā.
|423.1400| Okkhittacakkhu na ca pādalolo
jhānānuyutto bahujāgarassa
upekkhamārabbha samāhitatto
takkāsayaṃ kukkucciyūpachinde.
@Footnote: 1 Po. purakkhitvā. 2 Po. dukkhaṃ vasayetha.
|423.1401| Cudito vacībhi satimābhinande
sabrahmacārīsu khilaṃ pabhinde
vācaṃ pamuñce kusalaṃ nātivelaṃ
janavādadhammāya na cetayeyya.
|423.1402| Athāparaṃ pañca rajāni loke
yesaṃ satimā vinayāya sikkhe
rūpesu saddesu atho rasesu
gandhesu phassesu sahetha rāgaṃ.
|423.1403| Etesu dhammesu vineyya chandaṃ
bhikkhu satimā suvimuttacitto
kālena so sammādhammaṃ parivīmaṃsamāno
ekodibhūto vihane tamaṃ soti bhagavāti.
Sārīputtasuttaṃ soḷasamaṃ.
Aṭṭhakavaggo catuttho.
Tassuddānaṃ
kāmaguhañca duṭṭhā ca suddhañca paramaṃ jarā
metteyyo ca pasūro ca māgandī purabhedanaṃ
kalahaṃ dve ca byūhāni punareva tuvaṭṭakaṃ
attadaṇḍavaraṃ suttaṃ tena sārīputtena 1- soḷasa
iti etāni suttāni sabbānaṭṭhakavaggikāti.
@Footnote: 1 Yu. therapañhena soḷasa.
The Pali Tipitaka in Roman Character Volume 25 page 484-523.
http://84000.org/tipitaka/pitaka_item/roman_item_s.php?book=25&item=408&items=16
Classified by [Item Number] :-
http://84000.org/tipitaka/pitaka_item/roman_item_s.php?book=25&item=408&items=16&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=25&item=408&items=16
Compare with The Royal Version of Thai Tipitaka :-
http://84000.org/tipitaka/read/byitem_s.php?book=25&item=408&items=16
Study Atthakatha :-
http://84000.org/tipitaka/attha/attha.php?b=25&i=408
The Pali Atthakatha in Thai :-
http://84000.org/tipitaka/atthapali/read_th.php?B=29&A=7768
The Pali Atthakatha in Roman :-
http://84000.org/tipitaka/atthapali/read_rm.php?B=29&A=7768
Contents of The Tipitaka Volume 25
http://84000.org/tipitaka/read/?index_25
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
