บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |||
ATTHAKATHA Book 11 : PALI ROMAN Saṃ.A. (sārattha.1) Page 140.
Pārupitvā ettha gantvā hatthaṃ otārethā"ti. Maṇicoro cintesi "rājabhaṇḍaṃ vissajjetuṃ vā vaḷañjetuṃ vā na sakkā"ti. So gehaṃ gantvā maṇiṃ upakacchake ṭhapetvā sāṭakaṃ pārupitvā āgamma udakacāṭiyaṃ pakkhipitvā pakkāmi. Mahājane paṭikkante rājamanussā cāṭiyaṃ hatthaṃ otāretvā maṇiṃ disvā āharitvā rañño adaṃsu. "ānandattherena kira dassitanayena maṇi diṭṭho"ti mahājano kolāhalaṃ akāsi. Te bhikkhū taṃ sukatakāraṇaṃ 1- tathāgatassa ārocentā imaṃ pavattiṃ ārocesuṃ. Satthā "anacchariyaṃ bhikkhave, yaṃ ānando manussānaṃ hatthāruḷhamaṇiṃ āharāpeyya, yattha pubbe paṇḍitā attano ñāṇe ṭhatvā ahetukapaṭisandhiyaṃ nibbattānaṃ tiracchānagatānampi hatthāruḷhaṃ bhaṇḍaṃ āharāpetvā rañño adaṃsū"ti vatvā:- "ukkaṭṭhe sūramicchanti mantīsu 2- akutūhalaṃ piyañca annapānamhi atthe jāte ca paṇḍitan"ti 3- mahāsārajātakaṃ kathesi. Na taṃ daḷhanti taṃ bandhanaṃ thiranti na kathenti. Yadāyasanti yaṃ ayasā kataṃ. Sārattarattāti suṭṭhu rattarattā, sārattena vā rattā, 4- sāraṃ idanti maññanāya 5- rattāti attho. Apekkhāti ālayo nikanti. Āhūti kathenti. Ohārinanti 6- catūsu apāyesu ākaḍḍhanakaṃ. Sithilanti na āyasādibandhanaṃ viya iriyāpathaṃ nivāretvā ṭhitaṃ. Tena hi bandhanena baddhā paradesampi parasamuddampi 7- gacchantiyeva. Duppamuñcanti aññatra lokuttarañāṇena muñcituṃ asakkuṇeyyanti. Dasamaṃ. paṭhamo vaggo. ----------- @Footnote: 1 cha.Ma., i. kāraṇaṃ 2 ka. mantesu 3 khu. jā. ekaka. 27/92/30 mahāsārajātaka @4 cha.Ma. rattā sārattarattā 5 Sī.,i. maññamānā 6 ka. ohārinti @7 cha.Ma. ayaṃ pāṭho na dissatiThe Pali Atthakatha in Roman Character Volume 11 Page 140. http://84000.org/tipitaka/read/attha_page.php?book=11&page=140&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=11&A=3652&pagebreak=1 http://84000.org/tipitaka/atthapali/rm_line.php?B=11&A=3652&pagebreak=1#p140
บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถา อักษรโรมัน. หากพบข้อผิดพลาด กรุณาแจ้งได้ที่ [email protected]