Pahīnabhāvaṃ vibhāvento:-
[81] "yaṃ mayā pakataṃ pāpaṃ pubbe aññāsu jātisu
idheva taṃ vedanīyaṃ vatthu aññaṃ na vijjatī"ti
gāthaṃ abhāsi.
Tattha pāpanti akusalaṃ kammaṃ. Taṃ hi lāmakaṭṭhena pāpanti vuccati. Pubbeti
puRā. Aññāsu jātisūti ito aññāsu jātīsu, aññesu attabhāvesu. Ayaṃ hettha
attho:- yadipi mayā imasmiṃ attabhāve na tādisaṃ pāpaṃ kataṃ atthi, idāni
pana tassa sambhavoyeva natthi. Yaṃ pana ito aññāsu jātīsu kataṃ atthi, idheva
taṃ vedanīyaṃ, taṃ hi idheva imasmiṃyeva attabhāve vedayitabbaṃ anubhavitabbaṃ phalaṃ,
kasmā? vatthu aññaṃ na vijjatīti tassa kammassa vipaccanokāso añño
khandhappabandho natthi, ime pana khandhā sabbaso upādānānaṃ pahīnattā anupādāno
viya jātavedo carimakacittanirodhena appaṭisandhikā nirujjhantīti aññaṃ byākāsi.
Samitiguttattheragāthāvaṇṇanā niṭṭhitā.
-------------
219. 2. Kassapattheragāthāvaṇṇanā
yena yena subhikkhānīti āyasmato kassapattherassa gāthā. Kā uppatti?
ayaṃ kira padumuttarassa bhagavato kāle brāhmaṇakule nibbattitvā tīsu vedesu
aññesu ca brāhmaṇasippesu nipphattiṃ gato, so ekadivasaṃ bhagavantaṃ disvā
pasannamānaso sumanapupphehi pūjaṃ akāsi. Karonto ca satthu samantato upari ca
pupphamuṭṭhiyo khipi. Buddhānubhāvena pupphāni pupphāsanākārena sattāhaṃ aṭṭhaṃsu.
The Pali Atthakatha in Roman Character Volume 32 Page 275.
http://84000.org/tipitaka/read/attha_page.php?book=32&page=275&pages=1&edition=roman
ศึกษาพระสูตร (เนื้อความ) นี้แยกตามสารบัญ :-
http://84000.org/tipitaka/pitaka_item/read_rm.php?B=32&A=6127&pagebreak=1
http://84000.org/tipitaka/atthapali/rm_line.php?B=32&A=6127&pagebreak=1#p275
