พระไตรปิฎกเล่มที่ ๑๒ ภาษาบาลี อักษรไทย
พระสุตตันตปิฎกเล่มที่ ๔ สุตฺต. ม. มูลปณฺณาสกํ

                                มหาสาโรปมสุตฺตํ
     [๓๔๗]   เอวมฺเม   สุตํ   เอกํ  สมยํ  ภควา  ราชคเห  วิหรติ
คิชฺฌกูเฏ   ปพฺพเต   ฯ   อจิรปกฺกนฺเต   เทวทตฺเต  ตตฺร  โข  ภควา
เทวทตฺตํ   อารพฺภ  ภิกฺขู  อามนฺเตสิ  อิธ  ภิกฺขเว  เอกจฺโจ  กุลปุตฺโต
สทฺธา   อคารสฺมา   อนคาริยํ   ปพฺพชิโต   โหติ  โอติณฺโณมฺหิ  ชาติยา
ชราย   มรเณน   โสกปริเทวทุกฺขโทมนสฺสุปายาเสหิ   ๑-   ทุกฺโขติณฺโณ
ทุกฺขปเรโต   อปฺเปวนาม   อิมสฺส   เกวลสฺส  ทุกฺขกฺขนฺธสฺส  อนฺตกิริยา
ปญฺญาเยถาติ   ฯ   โส   เอวํ   ปพฺพชิโต   สมาโน  ลาภสกฺการสิโลกํ
อภินิพฺพตฺเตติ    ฯ    โส    เตน    ลาภสกฺการสิโลเกน    อตฺตมโน
โหติ     ปริปุณฺณสงฺกปฺโป    ฯ    โส    เตน    ลาภสกฺการสิโลเกน
อตฺตานุกฺกํเสติ   ปรํ   วมฺเภติ   อหมสฺมิ   ลาภี  สกฺการสิโลกวา  อิเม
ปนญฺเญ    ภิกฺขู    อปฺปญฺญาตา    อปฺเปสกฺขาติ    ฯ    โส    เตน
ลาภสกฺการสิโลเกน    มชฺชติ    ปมชฺชติ   ปมาทํ   อาปชฺชติ   ปมตฺโต
สมาโน ทุกฺขํ วิหรติ ฯ
     {๓๔๗.๑}   เสยฺยถาปิ   ภิกฺขเว   ปุริโส  สารตฺถิโก  สารคเวสี
สารปริเยสนํ    จรมาโน    มหโต    รุกฺขสฺส    ติฏฺฐโต    สารวโต
อติกฺกมฺเมว    สารํ    อติกฺกมฺม   เผคฺคุํ   อติกฺกมฺม   ตจํ   อติกฺกมฺม
ปปฺปฏิกํ  สาขาปลาสํ  เฉตฺวา  อาทาย  ปกฺกเมยฺย  สารนฺติ มญฺญมาโน ฯ
ตเมนํ   จกฺขุมา  ปุริโส  ทิสฺวา  เอวํ  วเทยฺย  น  วตายํ  ภวํ  ปุริโส
@เชิงอรรถ: ๑ กตฺถจิ โปตฺถเก ชรามรเณน โสเกหิ ... อุปายาเสหีติปิ ทิสฺสนฺติ ฯ
อญฺญาสิ   สารํ   น   อญฺญาสิ   เผคฺคุํ   น  อญฺญาสิ  ตจํ  น  อญฺญาสิ
ปปฺปฏิกํ   น   อญฺญาสิ   สาขาปลาสํ   ตถาหยํ  ภวํ  ปุริโส  สารตฺถิโก
สารคเวสี    สารปริเยสนํ    จรมาโน    มหโต    รุกฺขสฺส   ติฏฺฐโต
สารวโต    อติกฺกมฺเมว    สารํ   อติกฺกมฺม   เผคฺคุํ   อติกฺกมฺม   ตจํ
อติกฺกมฺม    ปปฺปฏิกํ    สาขาปลาสํ    เฉตฺวา    อาทาย    ปกฺกนฺโต
สารนฺติ     มญฺญมาโน    ยญฺจสฺส    สาเรน    สารกรณียํ    ตญฺจสฺส
อตฺถํ   นานุภวิสฺสตีติ   เอวเมว   โข   ภิกฺขเว   อิเธกจฺโจ  กุลปุตฺโต
สทฺธา   อคารสฺมา   อนคาริยํ   ปพฺพชิโต   โหติ  โอติณฺโณมฺหิ  ชาติยา
ชราย     มรเณน     โสกปริเทวทุกฺขโทมนสฺสุปายาเสหิ    ทุกฺโขติณฺโณ
ทุกฺขปเรโต   อปฺเปวนาม   อิมสฺส   เกวลสฺส  ทุกฺขกฺขนฺธสฺส  อนฺตกิริยา
ปญฺญาเยถาติ ฯ
     {๓๔๗.๒}   โส   เอวํ   ปพฺพชิโต   สมาโน   ลาภสกฺการสิโลกํ
อภินิพฺพตฺเตติ   ฯ   โส   เตน   ลาภสกฺการสิโลเกน   อตฺตมโน  โหติ
ปริปุณฺณสงฺกปฺโป   ฯ   โส   เตน   ลาภสกฺการสิโลเกน  อตฺตานุกฺกํเสติ
ปรํ   วมฺเภติ   อหมสฺมิ   ลาภี   สกฺการสิโลกวา  อิเม  ปนญฺเญ  ภิกฺขู
อปฺปญฺญาตา   อปฺเปสกฺขาติ   ฯ  โส  เตน  ลาภสกฺการสิโลเกน  มชฺชติ
ปมชฺชติ  ปมาทํ  อาปชฺชติ  ปมตฺโต  สมาโน  ทุกฺขํ  วิหรติ  ฯ อยํ วุจฺจติ
ภิกฺขเว   ภิกฺขุ  สาขาปลาสํ  อคฺคเหสิ  พฺรหฺมจริยสฺส  เตน  จ  โวสานํ
อาปาทิ ฯ
     [๓๔๘]   อิธ  ปน  ภิกฺขเว  เอกจฺโจ  กุลปุตฺโต  สทฺธา อคารสฺมา
อนคาริยํ   ปพฺพชิโต   โหติ   โอติณฺโณมฺหิ   ชาติยา   ชราย   มรเณน
โสกปริเทวทุกฺขโทมนสฺสุปายาเสหิ        ทุกฺโขติณฺโณ       ทุกฺขปเรโต
อปฺเปวนาม      อิมสฺส     เกวลสฺส     ทุกฺขกฺขนฺธสฺส     อนฺตกิริยา
ปญฺญาเยถาติ   ฯ   โส   เอวํ   ปพฺพชิโต   สมาโน  ลาภสกฺการสิโลกํ
อภินิพฺพตฺเตติ    ฯ   โส   เตน   ลาภสกฺการสิโลเกน   น   อตฺตมโน
โหติ   น   ปริปุณฺณสงฺกปฺโป   ฯ   โส   เตน  ลาภสกฺการสิโลเกน  น
อตฺตานุกฺกํเสติ   น   ปรํ   วมฺเภติ  ฯ  โส  เตน  ลาภสกฺการสิโลเกน
น    มชฺชติ   นปฺปมชฺชติ   นปฺปมาทํ   อาปชฺชติ   อปฺปมตฺโต   สมาโน
สีลสมฺปทํ   อาราเธติ   ฯ   โส   ตาย   สีลสมฺปทาย  อตฺตมโน  โหติ
ปริปุณฺณสงฺกปฺโป   ฯ   โส   ตาย   สีลสมฺปทาย   อตฺตานุกฺกํเสติ   ปรํ
วมฺเภติ    อหมสฺมิ    สีลวา    กลฺยาณธมฺโม   อิเม   ปนญฺเญ   ภิกฺขู
ทุสฺสีลา   ปาปธมฺมาติ   ฯ   โส   ตาย   สีลสมฺปทาย  มชฺชติ  ปมชฺชติ
ปมาทํ อาปชฺชติ ปมตฺโต สมาโน ทุกฺขํ วิหรติ ฯ
     {๓๔๘.๑}   เสยฺยถาปิ   ภิกฺขเว   ปุริโส  สารตฺถิโก  สารคเวสี
สารปริเยสนํ  จรมาโน  มหโต  รุกฺขสฺส  ติฏฺฐโต  สารวโต  อติกฺกมฺเมว
สารํ  อติกฺกมฺม  เผคฺคุํ  อติกฺกมฺม  ตจํ ปปฺปฏิกํ เฉตฺวา อาทาย ปกฺกเมยฺย
สารนฺติ  มญฺญมาโน  ฯ  ตเมนํ  จกฺขุมา  ปุริโส  ทิสฺวา  เอวํ วเทยฺย น
วตายํ   ภวํ   ปุริโส   อญฺญาสิ  สารํ  น  อญฺญาสิ  เผคฺคุํ  น  อญฺญาสิ
ตจํ    น    อญฺญาสิ   ปปฺปฏิกํ   น   อญฺญาสิ   สาขาปลาสํ   ตถาหยํ
ภวํ   ปุริโส   สารตฺถิโก   สารคเวสี   สารปริเยสนํ  จรมาโน  มหโต
รุกฺขสฺส   ติฏฺฐโต   สารวโต   อติกฺกมฺเมว   สารํ   อติกฺกมฺม   เผคฺคุํ
อติกฺกมฺม    ตจํ    ปปฺปฏิกํ    เฉตฺวา   อาทาย   ปกฺกนฺโต   สารนฺติ
มญฺญมาโน     ยญฺจสฺส     สาเรน     สารกรณียํ    ตญฺจสฺส    อตฺถํ
นานุภวิสฺสตีติ   เอวเมว   โข   ภิกฺขเว   อิเธกจฺโจ  กุลปุตฺโต  สทฺธา
อคารสฺมา    อนคาริยํ    ปพฺพชิโต    โหติ    โอติณฺโณมฺหิ    ชาติยา
ชราย     มรเณน     โสกปริเทวทุกฺขโทมนสฺสุปายาเสหิ    ทุกฺโขติณฺโณ
ทุกฺขปเรโต   อปฺเปวนาม   อิมสฺส   เกวลสฺส  ทุกฺขกฺขนฺธสฺส  อนฺตกิริยา
ปญฺญาเยถาติ   ฯ   โส   เอวํ   ปพฺพชิโต   สมาโน  ลาภสกฺการสิโลกํ
อภินิพฺพตฺเตติ ฯ
     {๓๔๘.๒}   โส  เตน  ลาภสกฺการสิโลเกน  น  อตฺตมโน  โหติ น
ปริปุณฺณสงฺกปฺโป   ฯ  โส  เตน  ลาภสกฺการสิโลเกน  น  อตฺตานุกฺกํเสติ
น  ปรํ  วมฺเภติ  ฯ  โส  เตน  ลาภสกฺการสิโลเกน น มชฺชติ นปฺปมชฺชติ
นปฺปมาทํ   อาปชฺชติ  อปฺปมตฺโต  สมาโน  สีลสมฺปทํ  อาราเธติ  ฯ  โส
ตาย   สีลสมฺปทาย   อตฺตมโน   โหติ   ปริปุณฺณสงฺกปฺโป  ฯ  โส  ตาย
สีลสมฺปทาย  อตฺตานุกฺกํเสติ  ปรํ  วมฺเภติ  อหมสฺมิ  สีลวา  กลฺยาณธมฺโม
อิเม   ปนญฺเญ  ภิกฺขู  ทุสฺสีลา  ปาปธมฺมาติ  ฯ  โส  ตาย  สีลสมฺปทาย
มชฺชติ   ปมชฺชติ   ปมาทํ  อาปชฺชติ  ปมตฺโต  สมาโน  ทุกฺขํ  วิหรติ  ฯ
อยํ   วุจฺจติ  ภิกฺขเว  ภิกฺขุ  ปปฺปฏิกํ  อคฺคเหสิ  พฺรหฺมจริยสฺส  เตน  จ
โวสานํ อาปาทิ ฯ
     [๓๔๙]   อิธ  ปน  ภิกฺขเว  เอกจฺโจ  กุลปุตฺโต  สทฺธา อคารสฺมา
อนคาริยํ   ปพฺพชิโต   โหติ   โอติณฺโณมฺหิ   ชาติยา   ชราย   มรเณน
โสกปริเทวทุกฺขโทมนสฺสุปายาเสหิ        ทุกฺโขติณฺโณ       ทุกฺขปเรโต
อปฺเปวนาม      อิมสฺส     เกวลสฺส     ทุกฺขกฺขนฺธสฺส     อนฺตกิริยา
ปญฺญาเยถาติ   ฯ   โส   เอวํ   ปพฺพชิโต   สมาโน  ลาภสกฺการสิโลกํ
อภินิพฺพตฺเตติ    ฯ   โส   เตน   ลาภสกฺการสิโลเกน   น   อตฺตมโน
โหติ   น   ปริปุณฺณสงฺกปฺโป   ฯ   โส   เตน  ลาภสกฺการสิโลเกน  น
อตฺตานุกฺกํเสติ   น   ปรํ   วมฺเภติ  ฯ  โส  เตน  ลาภสกฺการสิโลเกน
น    มชฺชติ   นปฺปมชฺชติ   นปฺปมาทํ   อาปชฺชติ   อปฺปมตฺโต   สมาโน
สีลสมฺปทํ   อาราเธติ   ฯ   โส   ตาย   สีลสมฺปทาย  อตฺตมโน  โหติ
โน   จ   โข   ปริปุณฺณสงฺกปฺโป   ฯ   โส   ตาย   สีลสมฺปทาย   น
อตฺตานุกฺกํเสติ น ปรํ วมฺเภติ ฯ
     {๓๔๙.๑}   โส   ตาย   สีลสมฺปทาย   น   มชฺชติ   นปฺปมชฺชติ
นปฺปมาทํ   อาปชฺชติ   อปฺปมตฺโต   สมาโน  สมาธิสมฺปทํ  อาราเธติ  ฯ
โส    ตาย   สมาธิสมฺปทาย   อตฺตมโน   โหติ   ปริปุณฺณสงฺกปฺโป   ฯ
โส   ตาย   สมาธิสมฺปทาย   อตฺตานุกฺกํเสติ   ปรํ   วมฺเภติ   อหมสฺมิ
สมาหิโต     เอกคฺคจิตฺโต     อิเม    ปนญฺเญ    ภิกฺขู    อสมาหิตา
วิพฺภนฺตจิตฺตาติ    ฯ    โส   ตาย   สมาธิสมฺปทาย   มชฺชติ   ปมชฺชติ
ปมาทํ   อาปชฺชติ   ปมตฺโต   สมาโน   ทุกฺขํ   วิหรติ   ฯ  เสยฺยถาปิ
ภิกฺขเว   ปุริโส  สารตฺถิโก  สารคเวสี  สารปริเยสนํ  จรมาโน  มหโต
รุกฺขสฺส   ติฏฺฐโต   สารวโต   อติกฺกมฺเมว   สารํ   อติกฺกมฺม   เผคฺคุํ
ตจํ   เฉตฺวา   อาทาย   ปกฺกเมยฺย   สารนฺติ   มญฺญมาโน  ฯ  ตเมนํ
จกฺขุมา  ปุริโส  ทิสฺวา  เอวํ  วเทยฺย  น  วตายํ  ภวํ  ปุริโส  อญฺญาสิ
สารํ   น   อญฺญาสิ   เผคฺคุํ   น   อญฺญาสิ  ตจํ  น  อญฺญาสิ  ปปฺปฏิกํ
น   อญฺญาสิ   สาขาปลาสํ  ตถาหยํ  ภวํ  ปุริโส  สารตฺถิโก  สารคเวสี
สารปริเยสนํ  จรมาโน  มหโต  รุกฺขสฺส  ติฏฺฐโต  สารวโต  อติกฺกมฺเมว
สารํ   อติกฺกมฺม   เผคฺคุํ   ตจํ   เฉตฺวา   อาทาย  ปกฺกนฺโต  สารนฺติ
มญฺญมาโน   ยญฺจสฺส   สาเรน  สารกรณียํ  ตญฺจสฺส  อตฺถํ  นานุภวิสฺสตีติ
เอวเมว     โข     ภิกฺขเว     อิเธกจฺโจ     กุลปุตฺโต     สทฺธา
อคารสฺมา    อนคาริยํ    ปพฺพชิโต    โหติ    โอติณฺโณมฺหิ    ชาติยา
ชราย     มรเณน     โสกปริเทวทุกฺขโทมนสฺสุปายาเสหิ    ทุกฺโขติณฺโณ
ทุกฺขปเรโต   อปฺเปวนาม   อิมสฺส   เกวลสฺส  ทุกฺขกฺขนฺธสฺส  อนฺตกิริยา
ปญฺญาเยถาติ ฯ
     {๓๔๙.๒}   โส   เอวํ   ปพฺพชิโต   สมาโน   ลาภสกฺการสิโลกํ
อภินิพฺพตฺเตติ    ฯ   โส   เตน   ลาภสกฺการสิโลเกน   น   อตฺตมโน
โหติ   น   ปริปุณฺณสงฺกปฺโป   ฯ   โส   เตน  ลาภสกฺการสิโลเกน  น
อตฺตานุกฺกํเสติ   น   ปรํ   วมฺเภติ  ฯ  โส  เตน  ลาภสกฺการสิโลเกน
น    มชฺชติ   นปฺปมชฺชติ   นปฺปมาทํ   อาปชฺชติ   อปฺปมตฺโต   สมาโน
สีลสมฺปทํ   อาราเธติ   ฯ   โส   ตาย   สีลสมฺปทาย  อตฺตมโน  โหติ
โน   จ   โข   ปริปุณฺณสงฺกปฺโป   ฯ   โส   ตาย   สีลสมฺปทาย   น
อตฺตานุกฺกํเสติ  น  ปรํ  วมฺเภติ  ฯ  โส  ตาย  สีลสมฺปทาย  น  มชฺชติ
นปฺปมชฺชติ    นปฺปมาทํ   อาปชฺชติ   อปฺปมตฺโต   สมาโน   สมาธิสมฺปทํ
อาราเธติ  ฯ  โส  ตาย สมาธิสมฺปทาย อตฺตมโน โหติ ปริปุณฺณสงฺกปฺโป ฯ
โส     ตาย     สมาธิสมฺปทาย     อตฺตานุกฺกํเสติ    ปรํ    วมฺเภติ
อหมสฺมิ   สมาหิโต   เอกคฺคจิตฺโต   อิเม   ปนญฺเญ   ภิกฺขู  อสมาหิตา
วิพฺภนฺตจิตฺตาติ   ฯ   โส  ตาย  สมาธิสมฺปทาย  มชฺชติ  ปมชฺชติ  ปมาทํ
อาปชฺชติ   ปมตฺโต   สมาโน   ทุกฺขํ   วิหรติ  ฯ  อยํ  วุจฺจติ  ภิกฺขเว
ภิกฺขุ ตจํ อคฺคเหสิ พฺรหฺมจริยสฺส เตน จ โวสานํ อาปาทิ ฯ
     [๓๕๐]   อิธ  ปน  ภิกฺขเว  เอกจฺโจ  กุลปุตฺโต  สทฺธา  อคารสฺมา
อนคาริยํ   ปพฺพชิโต   โหติ   โอติณฺโณมฺหิ   ชาติยา   ชราย   มรเณน
โสกปริเทวทุกฺขโทมนสฺสุปายาเสหิ        ทุกฺโขติณฺโณ       ทุกฺขปเรโต
อปฺเปวนาม      อิมสฺส     เกวลสฺส     ทุกฺขกฺขนฺธสฺส     อนฺตกิริยา
ปญฺญาเยถาติ   ฯ   โส   เอวํ   ปพฺพชิโต   สมาโน  ลาภสกฺการสิโลกํ
อภินิพฺพตฺเตติ    ฯ   โส   เตน   ลาภสกฺการสิโลเกน   น   อตฺตมโน
โหติ    น    ปริปุณฺณสงฺกปฺโป   ฯ   โส   เตน   ลาภสกฺการสิโลเกน
น อตฺตานุกฺกํเสติ น ปรํ วมฺเภติ ฯ
     {๓๕๐.๑}   โส  เตน  ลาภสกฺการสิโลเกน  น  มชฺชติ  นปฺปมชฺชติ
นปฺปมาทํ   อาปชฺชติ   อปฺปมตฺโต   สมาโน   สีลสมฺปทํ   อาราเธติ  ฯ
โส  ตาย  สีลสมฺปทาย  อตฺตมโน  โหติ  โน  จ  โข ปริปุณฺณสงฺกปฺโป ฯ
โส  ตาย  สีลสมฺปทาย  น  อตฺตานุกฺกํเสติ  น  ปรํ  วมฺเภติ ฯ โส ตาย
สีลสมฺปทาย   น   มชฺชติ   นปฺปมชฺชติ   นปฺปมาทํ  อาปชฺชติ  อปฺปมตฺโต
สมาโน  สมาธิสมฺปทํ  อาราเธติ  ฯ  โส  ตาย  สมาธิสมฺปทาย อตฺตมโน
โหติ   โน  จ  โข  ปริปุณฺณสงฺกปฺโป  ฯ  โส  ตาย  สมาธิสมฺปทาย  น
อตฺตานุกฺกํเสติ  น  ปรํ  วมฺเภติ  ฯ  โส  ตาย  สมาธิสมฺปทาย น มชฺชติ
นปฺปมชฺชติ    นปฺปมาทํ    อาปชฺชติ   อปฺปมตฺโต   สมาโน   ญาณทสฺสนํ
อาราเธติ  ฯ  โส  เตน  ญาณทสฺสเนน อตฺตมโน โหติ ปริปุณฺณสงฺกปฺโป ฯ
โส   เตน   ญาณทสฺสเนน  อตฺตานุกฺกํเสติ  ปรํ  วมฺเภติ  อหมสฺมิ  ชานํ
ปสฺสํ  วิหรามิ  อิเม  ปนญฺเญ  ภิกฺขู  อชานํ  อปสฺสํ วิหรนฺตีติ ฯ โส เตน
ญาณทสฺสเนน   มชฺชติ   ปมชฺชติ   ปมาทํ   อาปชฺชติ   ปมตฺโต  สมาโน
ทุกฺขํ วิหรติ ฯ
     {๓๕๐.๒}   เสยฺยถาปิ   ภิกฺขเว   ปุริโส  สารตฺถิโก  สารคเวสี
สารปริเยสนํ    จรมาโน    มหโต    รุกฺขสฺส    ติฏฺฐโต    สารวโต
อติกฺกมฺเมว   สารํ   เผคฺคุํ   เฉตฺวา   อาทาย   ปกฺกเมยฺย   สารนฺติ
มญฺญมาโน  ฯ  ตเมนํ  จกฺขุมา  ปุริโส  ทิสฺวา  เอวํ  วเทยฺย  น วตายํ
ภวํ   ปุริโส   อญฺญาสิ   สารํ   น   อญฺญาสิ  เผคฺคุํ  น  อญฺญาสิ  ตจํ
น    อญฺญาสิ    ปปฺปฏิกํ   น   อญฺญาสิ   สาขาปลาสํ   ตถาหยํ   ภวํ
ปุริโส    สารตฺถิโก    สารคเวสี    สารปริเยสนํ   จรมาโน   มหโต
รุกฺขสฺส  ติฏฺฐโต  สารวโต  อติกฺกมฺเมว  สารํ  เผคฺคุํ  เฉตฺวา  อาทาย
ปกฺกนฺโต    สารนฺติ    มญฺญมาโน    ยญฺจสฺส    สาเรน    สารกรณียํ
ตญฺจสฺส   อตฺถํ   นานุภวิสฺสตีติ   เอวเมว   โข   ภิกฺขเว   อิเธกจฺโจ
กุลปุตฺโต   สทฺธา   อคารสฺมา   อนคาริยํ  ปพฺพชิโต  โหติ  โอติณฺโณมฺหิ
ชาติยา      ชราย      มรเณน     โสกปริเทวทุกฺขโทมนสฺสุปายาเสหิ
ทุกฺโขติณฺโณ      ทุกฺขปเรโต     อปฺเปวนาม     อิมสฺส     เกวลสฺส
ทุกฺขกฺขนฺธสฺส   อนฺตกิริยา   ปญฺญาเยถาติ   ฯ   โส   เอวํ   ปพฺพชิโต
สมาโน     ลาภสกฺการสิโลกํ     อภินิพฺพตฺเตติ     ฯ    โส    เตน
ลาภสกฺการสิโลเกน   น   อตฺตมโน   โหติ   น   ปริปุณฺณสงฺกปฺโป   ฯ
โส  เตน  ลาภสกฺการสิโลเกน  น  อตฺตานุกฺกํเสติ  น  ปรํ  วมฺเภติ  ฯ
โส   เตน   ลาภสกฺการสิโลเกน   น   มชฺชติ   นปฺปมชฺชติ   นปฺปมาทํ
อาปชฺชติ   อปฺปมตฺโต   สมาโน   สีลสมฺปทํ   อาราเธติ  ฯ  โส  ตาย
สีลสมฺปทาย   อตฺตมโน   โหติ   โน   จ   โข   ปริปุณฺณสงฺกปฺโป   ฯ
โส   ตาย   สีลสมฺปทาย  น  อตฺตานุกฺกํเสติ  น  ปรํ  วมฺเภติ  ฯ  โส
ตาย    สีลสมฺปทาย    น   มชฺชติ   นปฺปมชฺชติ   นปฺปมาทํ   อาปชฺชติ
อปฺปมตฺโต สมาโน สมาธิสมฺปทํ อาราเธติ ฯ
     {๓๕๐.๓}   โส  ตาย  สมาธิสมฺปทาย  อตฺตมโน  โหติ  โน จ โข
ปริปุณฺณสงฺกปฺโป   ฯ   โส   ตาย   สมาธิสมฺปทาย   น  อตฺตานุกฺกํเสติ
น   ปรํ  วมฺเภติ  ฯ  โส  ตาย  สมาธิสมฺปทาย  น  มชฺชติ  นปฺปมชฺชติ
นปฺปมาทํ   อาปชฺชติ   อปฺปมตฺโต   สมาโน   ญาณทสฺสนํ  อาราเธติ  ฯ
โส  เตน  ญาณทสฺสเนน  อตฺตมโน  โหติ  ปริปุณฺณสงฺกปฺโป  ฯ  โส เตน
ญาณทสฺสเนน   อตฺตานุกฺกํเสติ   ปรํ   วมฺเภติ   อหมสฺมิ   ชานํ   ปสฺสํ
วิหรามิ   อิเม   ปนญฺเญ   ภิกฺขู   อชานํ   อปสฺสํ   วิหรนฺตีติ  ฯ  โส
เตน    ญาณทสฺสเนน   มชฺชติ   ปมชฺชติ   ปมาทํ   อาปชฺชติ   ปมตฺโต
สมาโน  ทุกฺขํ  วิหรติ  ฯ  อยํ  วุจฺจติ  ภิกฺขเว  ภิกฺขุ  เผคฺคุํ  อคฺคเหสิ
พฺรหฺมจริยสฺส เตน จ โวสานํ อาปาทิ ฯ
     [๓๕๑]   อิธ  ปน  ภิกฺขเว  เอกจฺโจ  กุลปุตฺโต  สทฺธา อคารสฺมา
อนคาริยํ   ปพฺพชิโต   โหติ   โอติณฺโณมฺหิ   ชาติยา   ชราย   มรเณน
โสกปริเทวทุกฺขโทมนสฺสุปายาเสหิ        ทุกฺโขติณฺโณ       ทุกฺขปเรโต
อปฺเปวนาม     อิมสฺส     เกวลสฺส     ทุกฺขกฺขนฺธสฺส      อนฺตกิริยา
ปญฺญาเยถาติ   ฯ   โส   เอวํ   ปพฺพชิโต   สมาโน  ลาภสกฺการสิโลกํ
อภินิพฺพตฺเตติ   ฯ   โส  เตน  ลาภสกฺการสิโลเกน  น  อตฺตมโน  โหติ
น    ปริปุณฺณสงฺกปฺโป    ฯ    โส    เตน   ลาภสกฺการสิโลเกน   น
อตฺตานุกฺกํเสติ  น  ปรํ  วมฺเภติ  ฯ  โส  เตน  ลาภสกฺการสิโลเกน  น
มชฺชติ    นปฺปมชฺชติ    นปฺปมาทํ    อาปชฺชติ    อปฺปมตฺโต    สมาโน
สีลสมฺปทํ  อาราเธติ  ฯ  โส  ตาย สีลสมฺปทาย อตฺตมโน โหติ โน จ โข
ปริปุณฺณสงฺกปฺโป    ฯ   โส   ตาย   สีลสมฺปทาย   น   อตฺตานุกฺกํเสติ
น ปรํ วมฺเภติ ฯ
     {๓๕๑.๑}   โส   ตาย   สีลสมฺปทาย   น   มชฺชติ   นปฺปมชฺชติ
นปฺปมาทํ   อาปชฺชติ   อปฺปมตฺโต   สมาโน  สมาธิสมฺปทํ  อาราเธติ  ฯ
โส  ตาย  สมาธิสมฺปทาย  อตฺตมโน  โหติ  โน จ โข ปริปุณฺณสงฺกปฺโป ฯ
โส  ตาย  สมาธิสมฺปทาย  น  อตฺตานุกฺกํเสติ  น  ปรํ  วมฺเภติ  ฯ  โส
ตาย     สมาธิสมฺปทาย     น     มชฺชติ     นปฺปมชฺชติ    นปฺปมาทํ
อาปชฺชติ    อปฺปมตฺโต    สมาโน   ญาณทสฺสนํ   อาราเธติ   ฯ   โส
เตน   ญาณทสฺสเนน  อตฺตมโน  โหติ  โน  จ  โข  ปริปุณฺณสงฺกปฺโป  ฯ
โส   เตน  ญาณทสฺสเนน  น  อตฺตานุกฺกํเสติ  น  ปรํ  วมฺเภติ  ฯ  โส
เตน    ญาณทสฺสเนน   น   มชฺชติ   นปฺปมชฺชติ   นปฺปมาทํ   อาปชฺชติ
อปฺปมตฺโต   สมาโน   สมยวิโมกฺขํ   อาราเธติ   ฯ  ฐานํ  โข  ปเนตํ
ภิกฺขเว วิชฺชติ ยํ โส ภิกฺขุ ตาย สมยวิมุตฺติยา ปริหาเยถาติ ฯ
     {๓๕๑.๒}   เสยฺยถาปิ   ภิกฺขเว   ปุริโส  สารตฺถิโก  สารคเวสี
สารปริเยสนํ  จรมาโน  มหโต  รุกฺขสฺส  ติฏฺฐโต  สารวโต สารํ เฉตฺวา
อาทาย   ปกฺกเมยฺย   สารนฺติ   ชานมาโน  ฯ  ตเมนํ  จกฺขุมา  ปุริโส
ทิสฺวา   เอวํ   วเทยฺย   อญฺญาสิ   วตายํ  ภวํ  ปุริโส  สารํ  อญฺญาสิ
เผคฺคุํ    อญฺญาสิ    ตจํ    อญฺญาสิ   ปปฺปฏิกํ   อญฺญาสิ   สาขาปลาสํ
ตถาหยํ   ภวํ   ปุริโส   สารตฺถิโก   สาคเวสี  สารปริเยสนํ  จรมาโน
มหโต   รุกฺขสฺส   ติฏฺฐโต   สารวโต   สารญฺเญว   เฉตฺวา   อาทาย
ปกฺกนฺโต    สารนฺติ    ชานมาโน    ยญฺจสฺส    สาเรน    สารถรณียํ
ตญฺจสฺส    อตฺถํ   อนุภวิสฺสตีติ   เอวเมว   โข   ภิกฺขเว   อิเธกจฺโจ
กุลปุตฺโต   สทฺธา   อคารสฺมา   อนคาริยํ  ปพฺพชิโต  โหติ  โอติณฺโณมฺหิ
ชาติยา      ชราย      มรเณน     โสกปริเทวทุกฺขโทมนสฺสุปายาเสหิ
ทุกฺโขติณฺโณ   ทุกฺขปเรโต   อปฺเปวนาม  อิมสฺส  เกวลสฺส  ทุกฺขกฺขนฺธสฺส
อนฺตกิริยา ปญฺญาเยถาติ ฯ
     {๓๕๑.๓}   โส   เอวํ   ปพฺพชิโต   สมาโน   ลาภสกฺการสิโลกํ
อภินิพฺพตฺเตติ    ฯ   โส   เตน   ลาภสกฺการสิโลเกน   น   อตฺตมโน
โหติ   น   ปริปุณฺณสงฺกปฺโป   ฯ   โส   เตน  ลาภสกฺการสิโลเกน  น
อตฺตานุกฺกํเสติ  น  ปรํ  วมฺเภติ  ฯ  โส  เตน  ลาภสกฺการสิโลเกน  น
มชฺชติ    นปฺปมชฺชติ    นปฺปมาทํ    อาปชฺชติ    อปฺปมตฺโต    สมาโน
สีลสมฺปทํ   อาราเธติ   ฯ   โส   ตาย   สีลสมฺปทาย  อตฺตมโน  โหติ
โน   จ   โข   ปริปุณฺณสงฺกปฺโป   ฯ   โส   ตาย   สีลสมฺปทาย   น
อตฺตานุกฺกํเสติ  น  ปรํ  วมฺเภติ  ฯ  โส  ตาย  สีลสมฺปทาย  น  มชฺชติ
นปฺปมชฺชติ    นปฺปมาทํ   อาปชฺชติ   อปฺปมตฺโต   สมาโน   สมาธิสมฺปทํ
อาราเธติ    ฯ    โส    ตาย    สมาธิสมฺปทาย    อตฺตมโน   โหติ
โน   จ   โข   ปริปุณฺณสงฺกปฺโป   ฯ   โส   ตาย  สมาธิสมฺปทาย  น
อตฺตานุกฺกํเสติ   น   ปรํ   วมฺเภติ   ฯ  โส  ตาย  สมาธิสมฺปทาย  น
มชฺชติ    นปฺปมชฺชติ    นปฺปมาทํ    อาปชฺชติ    อปฺปมตฺโต    สมาโน
ญาณทสฺสนํ    อาราเธติ    ฯ   โส   เตน   ญาณทสฺสเนน   อตฺตมโน
โหติ   โน   จ   โข   ปริปุณฺณสงฺกปฺโป   ฯ  โส  เตน  ญาณทสฺสเนน
น   อตฺตานุกฺกํเสติ   น  ปรํ  วมฺเภติ  ฯ  โส  เตน  ญาณทสฺสเนน  น
มชฺชติ    นปฺปมชฺชติ    นปฺปมาทํ    อาปชฺชติ    อปฺปมตฺโต    สมาโน
อสมยวิโมกฺขํ   อาราเธติ   ฯ   อฏฺฐานเมตํ   ภิกฺขเว   อนวกาโส  ยํ
โส ภิกฺขุ ตาย อสมยวิมุตฺติยา ปริหาเยถาติ ฯ
     [๓๕๒]   อิติ  โข  ภิกฺขเว  นยิทํ พฺรหฺมจริยํ ลาภสกฺการสิโลกานิสํสํ
น    สีลสมฺปทานิสํสํ    น    สมาธิสมฺปทานิสํสํ    น   ญาณทสฺสนานิสํสํ
ยา   จ  โข  อยํ  ภิกฺขเว  อกุปฺปา  เจโตวิมุตฺติ  เอตทตฺถมิทํ  ภิกฺขเว
พฺรหฺมจริยํ เอตํ สารํ เอตํ ปริโยสานนฺติ ฯ
     อิทมโวจ    ภควา   อตฺตมนา   เต   ภิกฺขู   ภควโต   ภาสิตํ
อภินนฺทุนฺติ ฯ
                      มหาสาโรปมสุตฺตํ นิฏฺฐิตํ นวมํ ฯ
                                 -------------
                               จูฬสาโรปมสุตฺตํ
     [๓๕๓]   เอวมฺเม   สุตํ   เอกํ  สมยํ  ภควา  สาวตฺถิยํ  วิหรติ
เชตวเน    อนาถปิณฺฑิกสฺส   อาราเม   ฯ   อถ   โข   ปิงฺคลโกจฺโฉ
พฺราหฺมโณ   เยน   ภควา   เตนุปสงฺกมิ   อุปสงฺกมิตฺวา  ภควตา  สทฺธึ
สมฺโมทิ   สมฺโมทนียํ   กถํ  สาราณียํ  วีติสาเรตฺวา  เอกมนฺตํ  นิสีทิ  ฯ
เอกมนฺตํ   นิสินฺโน   โข  ปิงฺคลโกจฺโฉ  พฺราหฺมโณ  ภควนฺตํ  เอตทโวจ
เยเม   โภ  โคตม  สมณพฺราหฺมณา  สงฺฆิโน  คณิโน  คณาจริยา  ญาตา
ยสสฺสิโน    ติตฺถกรา    สาธุสมฺมตา    พหุชนสฺส    เสยฺยถีทํ   ปูรโณ
กสฺสโป   มกฺขลิ   โคสาโล   อชิโต   เกสกมฺพโล   ปกุโธ  กจฺจายโน
สญฺชโย    เวลฏฺฐปุตฺโต   นิคนฺโถ   นาฏปุตฺโต   สพฺเพ   เต   สกาย
ปฏิญฺญาย    อพฺภญฺญึสุ    สพฺเพว    น   อพฺภญฺญึสุ   อุทาหุ   เอกจฺเจ
อพฺภญฺญึสุ   เอกจฺเจ   น   อพฺภญฺญึสูติ   ฯ   อลํ   พฺราหฺมณ  ติฏฺฐเตตํ
สพฺเพ   เต   สกาย   ปฏิญฺญาย   อพฺภญฺญึสุ   สพฺเพว   น   อพฺภญฺญึสุ
อุทาหุ   เอกจฺเจ   อพฺภญฺญึสุ   เอกจฺเจ   น   อพฺภญฺญึสูติ   ธมฺมํ  เต
พฺราหฺมณ   เทเสสฺสามิ   ตํ  สุณาหิ  สาธุกํ  มนสิกโรหิ  ภาสิสฺสามีติ  ฯ
เอวํ โภติ โข ปิงฺคลโกจฺโฉ พฺราหฺมโณ ภควโต ปจฺจสฺโสสิ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑๒ หน้าที่ ๓๖๒-๓๗๔.
https://84000.org/tipitaka/read/pali_item.php?book=12&item=347&items=7
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=12&item=347&items=7&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=12&item=347&items=7
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=12&item=347&items=7
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=12&i=347
             สารบัญพระไตรปิฎกเล่มที่ ๑๒
https://84000.org/tipitaka/read/?index_12
https://84000.org/tipitaka/english/?index_12