พระไตรปิฎกเล่มที่ ๓๗ ภาษาบาลี อักษรไทย
พระอภิธรรมปิฎกเล่มที่ ๔ อภิ. กถาวตฺถุ

                                       อิโตทินฺนกถา
     [๑๑๕๓]   อิโต  ทินฺเนน  ตตฺถ  ยาเปนฺตีติ  ฯ  อามนฺตา  ฯ อิโต
จีวรํ   เทนฺติ   ตํ   จีวรํ   ตตฺถ  ปริภุญฺชนฺตีติ  ฯ  น  เหวํ  วตฺตพฺเพ
ฯเปฯ    อิโต   ปิณฺฑปาตํ   เทนฺติ   อิโต   เสนาสนํ   เทนฺติ   อิโต
คิลานปจฺจยเภสชฺชปริกฺขารํ    เทนฺติ    อิโต   ขาทนียํ   เทนฺติ   อิโต
โภชนียํ  เทนฺติ  อิโต  ปานียํ  เทนฺติ  ตํ  ปานียํ  ตตฺถ  ปริภุญฺชนฺตีติ  ฯ
น เหวํ วตฺตพฺเพ ฯเปฯ
     [๑๑๕๔]   อิโต  ทินฺเนน  ตตฺถ  ยาเปนฺตีติ  ฯ  อามนฺตา ฯ อญฺโญ
อญฺญสฺส    การโก    ปรกตํ    สุขทุกฺขํ    อญฺโญ    กโรติ    อญฺโญ
ปฏิสํเวเทตีติ ฯ น เหวํ วตฺตพฺเพ ฯเปฯ
     [๑๑๕๕]   น  วตฺตพฺพํ  อิโต ทินฺเนน ตตฺถ ยาเปนฺตีติ ฯ อามนฺตา ฯ
นนุ  เปตา  อตฺตโน  อตฺถาย  ทานํ  เทนฺตํ  อนุโมทนฺติ  จิตฺตํ ปสาเทนฺติ
ปีตึ   อุปฺปาเทนฺติ   โสมนสฺสํ   ปฏิลภนฺตีติ   ฯ   อามนฺตา   ฯ   หญฺจิ
เปตา   อตฺตโน   อตฺถาย   ทานํ  เทนฺตํ  อนุโมทนฺติ  จิตฺตํ  ปสาเทนฺติ
ปีตึ   อุปฺปาเทนฺติ   โสมนสฺสํ   ปฏิลภนฺติ   เตน   วต   เร  วตฺตพฺเพ
อิโต ทินฺเนน ตตฺถ ยาเปนฺตีติ ฯ
     [๑๑๕๖]   น  วตฺตพฺพํ  อิโต ทินฺเนน ตตฺถ ยาเปนฺตีติ ฯ อามนฺตา ฯ
นนุ วุตฺตํ ภควตา
                     อุณฺณเต อุทกํ วุฏฺฐํ        ยถา นินฺนํ ปวตฺตติ
                     เอวเมว อิโต ทินฺนํ          เปตานํ อุปกปฺปติ
                     ยถา วาริวหา ปูรา          ปริปูเรนฺติ สาครํ
                     เอวเมว อิโต ทินฺนํ          เปตานํ อุปกปฺปติ
                     น หิ ตตฺถ กสี อตฺถิ         โครกฺเขตฺถ น วิชฺชติ
                     วณิชฺชา ตาทิสี นตฺถิ       หิรญฺเญน กยากยํ
                     อิโต ทินฺเนน ยาเปนฺติ     เปตา กาลกตา ตหินฺติ ๑-
อตฺเถว   สุตฺตนฺโตติ   ฯ  อามนฺตา  ฯ  เตน  หิ  อิโต  ทินฺเนน  ตตฺถ
ยาเปนฺตีติ ฯ
@เชิงอรรถ: ๑ ขุ. ขุ. ๘ ฯ
     [๑๑๕๗]   น  วตฺตพฺพํ  อิโต ทินฺเนน ตตฺถ ยาเปนฺตีติ ฯ อามนฺตา ฯ
นนุ    วุตฺตํ    ภควตา    ปญฺจิมานิ   ภิกฺขเว   ฐานานิ   สมฺปสฺสนฺตา
มาตาปิตโร  ปุตฺตํ  อิจฺฉนฺติ  กุเล  ชายมานํ  ฯ  กตมานิ  ปญฺจ  ฯ ภโฏ
วา  โน  ภริสฺสติ  กิจฺจํ  วา  โน  กริสฺสติ  กุลวํโส  จิรํ ฐสฺสติ ทายชฺชํ
ปฏิปชฺชติ   ๑-  อถ  วา  ปน  เปตานํ  กาลกตานํ  ทกฺขิณํ  อนุปฺปทสฺสติ
อิมานิ    โข    ภิกฺขเว   ปญฺจ   ฐานานิ   สมฺปสฺสนฺตา   มาตาปิตโร
ปุตฺตํ อิจฺฉนฺติ กุเล ชายมานนฺติ
                  ปญฺจ ฐานานิ สมฺปสฺสํ     ปุตฺตํ อิจฺฉนฺติ ปณฺฑิตา
                  ภโฏ วา โน ภริสฺสติ         กิจฺจํ วา โน กริสฺสติ
                  กุลวํโส จิรํ ติฏฺเฐ              ทายชฺชํ ปฏิปชฺชติ ๒-
                  อถ วา ปน เปตานํ           ทกฺขิณํ อนุปฺปทสฺสติ
                  ฐานาเนตานิ สมฺปสฺสํ      ปุตฺตํ อิจฺฉนฺติ ปณฺฑิตา
                  ตสฺมา สนฺโต สปฺปุริสา     กตญฺญู กตเวทิโน
                  ภรนฺติ มาตาปิตโร           ปุพฺเพ กตมนุสฺสรํ
                  กโรนฺติ เตสํ กิจฺจานิ         ยถา ตํ ปุพฺพการินํ
                  โอวาทการี ภฏโปสี         กุลวํสํ อหาปยํ
                  สทฺโธ สีเลน สมฺปนฺโน     ปุตฺโต โหติ ปสํสิโยติ ๓-
อตฺเถว   สุตฺตนฺโตติ   ฯ  อามนฺตา  ฯ  เตน  หิ  อิโต  ทินฺเนน  ตตฺถ
ยาเปนฺตีติ ฯ
                                        อิโตทินฺนกถา ฯ
@เชิงอรรถ: ๑ ม. ทายชฺชํ เม ปฏิปชฺชิสฺสติ. ๒. ม. ปฏิปชฺชิสฺสติ. ๓ อํ. ปญฺจก. ๔๗ ฯ
                                     ปฐวีกมฺมวิปาโกติกถา
     [๑๑๕๘]   ปฐวี   กมฺมวิปาโกติ   ฯ   อามนฺตา  ฯ  สุขเวทนิยา
ทุกฺขเวทนิยา    อทุกฺขมสุขเวทนิยา    สุขาย    เวทนาย    สมฺปยุตฺตา
ทุกฺขาย   เวทนาย   สมฺปยุตฺตา   อทุกฺขมสุขาย   เวทนาย   สมฺปยุตฺตา
ผสฺเสน    สมฺปยุตฺตา    เวทนาย    สมฺปยุตฺตา   สญฺญาย   สมฺปยุตฺตา
เจตนาย    สมฺปยุตฺตา    จิตฺเตน    สมฺปยุตฺตา    สารมฺมณา    อตฺถิ
ตาย   อาวชฺชนา  อาโภโค  สมนฺนาหาโร  มนสิกาโร  เจตนา  ปตฺถนา
ปณิธีติ  ฯ  น  เหวํ  วตฺตพฺเพ  ฯเปฯ นนุ น สุขเวทนิยา น ทุกฺขเวทนิยา
น     อทุกฺขมสุขเวทนิยา     น     สุขาย    เวทนาย    สมฺปยุตฺตา
น  ทุกฺขาย  เวทนาย  สมฺปยุตฺตา  น  อทุกฺขมสุขาย  เวทนาย สมฺปยุตฺตา
น    ผสฺเสน   สมฺปยุตฺตา   น   เวทนาย   สมฺปยุตฺตา   น   สญฺญาย
สมฺปยุตฺตา    น    เจตนาย    สมฺปยุตฺตา   น   จิตฺเตน   สมฺปยุตฺตา
อนารมฺมณา  นตฺถิ  ตาย  อาวชฺชนา  อาโภโค  สมนฺนาหาโร  มนสิกาโร
เจตนา   ปตฺถนา   ปณิธีติ   ฯ   อามนฺตา   ฯ  หญฺจิ  น  สุขเวทนิยา
น    ทุกฺขเวทนิยา    ฯเปฯ   อนารมฺมณา   นตฺถิ   ตาย   อาวชฺชนา
ฯเปฯ ปณิธิ โน วต เร วตฺตพฺเพ ปฐวี กมฺมวิปาโกติ ฯ
     [๑๑๕๙]   ผสฺโส  กมฺมวิปาโก  ผสฺโส  สุขเวทนิโย  ทุกฺขเวทนิโย
อทุกฺขมสุขเวทนิโย    สุขาย   เวทนาย   สมฺปยุตฺโต   ทุกฺขาย   ฯเปฯ
อทุกฺขมสุขาย   เวทนาย   สมฺปยุตฺโต   ผสฺเสน   สมฺปยุตฺโต   เวทนาย
สมฺปยุตฺโต    สญฺญาย    สมฺปยุตฺโต    เจตนาย   สมฺปยุตฺโต   จิตฺเตน
สมฺปยุตฺโต   สารมฺมณา   อตฺถิ   ตสฺส   อาวชฺชนา   ฯเปฯ  ปณิธีติ  ฯ
อามนฺตา   ฯ   ปฐวี   กมฺมวิปาโก   ปฐวี   สุขเวทนิยา  ทุกฺขเวทนิยา
อทุกฺขมสุขเวทนิยา   สุขาย   เวทนาย   สมฺปยุตฺตา   ทุกฺขาย  เวทนาย
สมฺปยุตฺตา   อทุกฺขมสุขาย   เวทนาย   สมฺปยุตฺตา   ผสฺเสน  สมฺปยุตฺตา
เวทนาย    สมฺปยุตฺตา    สญฺญาย   สมฺปยุตฺตา   เจตนาย   สมฺปยุตฺตา
จิตฺเตน   สมฺปยุตฺตา   สารมฺมณา   อตฺถิ   ตาย   อาวชฺชนา  อาโภโค
สมนฺนาหาโร   มนสิกาโร   เจตนา   ปตฺถนา   ปณิธีติ   ฯ   น  เหวํ
วตฺตพฺเพ ฯเปฯ
     [๑๑๖๐]   ปฐวี    กมฺมวิปาโก   ปฐวี   น   สุขเวทนิยา   น
ทุกฺขเวทนิยา   ฯเปฯ   อนารมฺมณา   นตฺถิ   ตาย   อาวชฺชนา  ฯเปฯ
ปณิธีติ   ฯ   อามนฺตา  ฯ  ผสฺโส  กมฺมวิปาโก  ผสฺโส  น  สุขเวทนิโย
น    ทุกฺขเวทนิโย    ฯเปฯ   อนารมฺมโณ   นตฺถิ   ตสฺส   อาวชฺชนา
ฯเปฯ ปณิธีติ ฯ น เหวํ วตฺตพฺเพ ฯเปฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๗ หน้าที่ ๓๗๖-๓๘๐.
https://84000.org/tipitaka/read/pali_item.php?book=37&item=1153&items=8
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=37&item=1153&items=8&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=37&item=1153&items=8
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=37&item=1153&items=8
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=37&i=1153
             สารบัญพระไตรปิฎกเล่มที่ ๓๗
https://84000.org/tipitaka/read/?index_37
https://84000.org/tipitaka/english/?index_37