บาลีพระไตรปิฎกเล่มที่ ๒๗ - พระสุตตันตปิฎกเล่มที่ ๑๙

หน้าที่ ๒๙๒.

๑๑ มฏฺฐกุณฺฑลิชาตกํ [๑๔๓๓] อลงฺกโต มฏฺฐกุณฺฑลี มาลธารี ^๑- หริจนฺทนุสฺสโท พาหา ปคฺคยฺห กนฺทสิ วนมชฺเฌ กึ ทุกฺขิโต ตุวํ ฯ [๑๔๓๔] โสวณฺณมโย ปภสฺสโร อุปฺปนฺโน รถปญฺชโร มม ตสฺส จกฺกยุคํ น วินฺทามิ เตน ทุกฺเขน ชหามิ ชีวิตํ ฯ [๑๔๓๕] โสวณฺณมยํ มณิมยํ โลหมยํ อถ รูปิยมยํ ^๒- ปาวท รถํ กริสฺสามิ เต จกฺกยุคํ ปฏิลาภยามิ ^๓- ตํ ฯ [๑๔๓๖] อถ ^๔- มาณโว ตสฺส ปาวทิ จนฺทิมสุริยา อุภยตฺถ ^๕- ภาตโร โสวณฺณมโย รโถ มม เตน จกฺกยุเคน โสภติ ฯ [๑๔๓๗] พาโล โข ตฺวํสิ มาณว โย ตฺวํ ปตฺถยสิ อปตฺถยํ ^๖- มญฺญามิ ตุวํ มริสฺสสิ @เชิงอรรถ: ^๑ สี. ยุ. มาลภารี ฯ ^๒ ม. รูปิยามยํ ฯ ^๓ ม. ปฏิปาทยามิ ฯ ^๔ ม. โส ฯ @^๕ ม. จนฺทสูริยา อุภเยตฺถ ฯ ^๖ ม. ปตฺถยเส อปตฺถิยํ ฯ

--------------------------------------------------------------------------------------------- หน้าที่ ๒๙๓.

น หิ ตฺวํ ลจฺฉสิ จนฺทสุริเย ฯ [๑๔๓๘] คมนาคมนมฺปิ ทิสฺสติ วณฺณธาตุ อุภเยตฺถ วีถิโย เปโต ปน เนว ทิสฺสติ โก นุ โข กนฺทตํ พาลฺยตโร ฯ [๑๔๓๙] สจฺจํ โข วเทสิ มาณว อหเมว กนฺทตํ พาลฺยตโร จนฺทํ วิย ทารโก รุทํ เปตํ กาลกตํภิปตฺถเย ^๑- ฯ [๑๔๔๐] อาทิตฺตํ วต มํ สนฺตํ ฆตสิตฺตํว ปาวกํ วารินา วิย โอสิญฺจิ ^๒- สพฺพํ นิพฺพาปเย ทรํ ฯ [๑๔๔๑] อพฺพุหิ ^๓- วต เม สลฺลํ ยมาสิ หทยสฺสิตํ โย เม โสกปเรตสฺส ปุตฺตโสกํ อปานุทิ ฯ [๑๔๔๒] โสหํ อพฺพูฬฺหสลฺโลสฺมิ วีตโสโก อนาวิโล น โสจามิ น โรทามิ ตว สุตฺวาน มาณวาติ ฯ มฏฺฐกุณฺฑลิชาตกํ เอกาทสมํ ฯ ---------