บาลีพระไตรปิฎกเล่มที่ ๒๗ - พระสุตตันตปิฎกเล่มที่ ๑๙

หน้าที่ ๓๕๐.

๕ ทูตชาตกํ [๑๗๗๗] ทูเต เต พฺรเหฺม ปาเหสึ คงฺคาตีรสฺมิ ฌายโต เตสํ ปุฏฺโฐ น พฺยากาสิ ทุกฺขํ ตุยฺหํ มตํ ^๑- นุ เต ฯ [๑๗๗๘] สเจ เต ทุกฺขมุปฺปชฺเช กาสีนํ รฏฺฐวฑฺฒน มา โข นํ ตสฺส อกฺขาหิ โย ตํ ทุกฺขา น โมจเย ฯ [๑๗๗๙] โย ตสฺส ^๒- ทุกฺขชาตสฺส เอกงฺคมปิ ภาคโส ^๓- วิปฺปโมเจยฺย ธมฺเมน กามํ ตสฺส ปเวทย ^๔- ฯ [๑๗๘๐] สุวิชานํ สิคาลานํ สกุนฺตานญฺจ ^๕- วสฺสิตํ ฯ มนุสฺสวสฺสิตํ ราช ทุพฺพิชานตรํ ตโต ฯ [๑๗๘๑] อปิ เจ มญฺญตี โปโส ญาติ มิตฺโต สขาติ วา โย ปุพฺเพ สุมโน หุตฺวา ปจฺฉา สมฺปชฺชเต ทิโส ฯ [๑๗๘๒] โย อตฺตโน ทุกฺขมนานุปุฏฺโฐ ปเวทเย ชนฺตุ อกาลรูเป อนนฺทิโน ^๖- ตสฺส ภวนฺติ มิตฺตา ^๗- หิเตสิโน ตสฺส ทุกฺขี ภวนฺติ ฯ [๑๗๘๓] กาลญฺจ ญตฺวาน ตถาวิธสฺส เมธาวินํ เอกมนํ วิทิตฺวา อกฺเขยฺย ติปฺปานิ ^๘- ปรสฺส ธีโร สณฺหํ คิรํ อตฺถวตึ ปมุญฺเจ ฯ @เชิงอรรถ: ^๑ ม. คุยฺหมตํ ฯ สี. คุยฺหํ มตํ ฯ ^๒ ยุ. โย จ ตถา ฯ ^๓ สี. ยุ. เอกนฺตมปิ @ภาสโต ฯ ^๔ สี. ปเวทเย ฯ ^๕ ม. สกุณานญฺจ ฯ ^๖ ม. อานนฺทิโน ฯ ^๗ สี. ยุ. @ภวนฺตมิตฺตา ฯ ^๘ ม. ติพฺพานิ ฯ

--------------------------------------------------------------------------------------------- หน้าที่ ๓๕๑.

[๑๗๘๔] สเจ จ ชญฺญา อวิสยฺหมตฺตโน น เตหิ มยฺหํ สุขาคมาย ^๑- เอโกว ติปฺปานิ สเหยฺย ธีโร สจฺจํ หิโรตฺตปฺปมเปกฺขมาโน ฯ [๑๗๘๕] อหํ รฏฺฐานิ วิจรนฺโต นิคเม ราชธานิโย ภิกฺขมาโน มหาราช อาจริยสฺส ธนตฺถิโก ฯ [๑๗๘๖] คหปตี ราชปุริเส มหาสาเล จ พฺราหฺมเณ อลตฺถํ สตฺต นิกฺขานิ สุวณฺณสฺส ชนาธิป เต เม นฏฺฐา มหาราช ตสฺมา โสจามหํ ภุสํ ฯ [๑๗๘๗] ปุริสา เต มหาราช มนสานุวิจินฺติตา นาลํ ทุกฺขา ปโมเจตุํ ตสฺมา เตสํ น พฺยาหรึ ฯ [๑๗๘๘] ตฺวญฺจ โข เม มหาราช มนสานุวิจินฺติโต อลํ ทุกฺขา ปโมเจตุํ ตสฺมา ตุยฺหํ ปเวทยึ ฯ [๑๗๘๙] ตสฺสาทาสิ ปสนฺนจิตฺโต กาสีนํ รฏฺฐวฑฺฒโน ชาตรูปมเย นิกฺเข สุวณฺณสฺส จตุทฺทสาติ ฯ ทูตชาตกํ ปญฺจมํ ฯ --------- @เชิงอรรถ: ^๑ สี. ยุ. นายํ นีติ มยฺห สุขาคมาย ฯ

เนื้อความพระไตรปิฎกฉบับภาษาบาลี อักษรไทย เล่มที่ ๒๗ หน้าที่ ๓๕๐-๓๕๑. https://84000.org/tipitaka/read/pali_read.php?B=27&A=7166&w=&modeTY=2&pagebreak=1 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=27&A=7166&modeTY=2&pagebreak=1 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=27&item=1777&items=13 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=27&siri=478 ศึกษาอรรถกถาชาดกนี้ได้ที่ :- https://84000.org/tipitaka/attha/attha.php?b=27&i=1777 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=40&A=3644 The Pali Atthakatha in Roman :- https://84000.org/tipitaka/atthapali/read_rm.php?B=40&A=3644 สารบัญพระไตรปิฎกเล่มที่ ๒๗ https://84000.org/tipitaka/read/?index_27 https://84000.org/tipitaka/english/?index_27