Cūḷaassapurasuttaṃ
[479] Evamme sutaṃ ekaṃ samayaṃ bhagavā aṅgesu viharati
assapuraṃ nāma aṅgānaṃ nigamo . tatra kho bhagavā bhikkhū āmantesi
bhikkhavoti . bhadanteti te bhikkhū bhagavato paccassosuṃ . bhagavā
etadavoca samaṇā samaṇāti vo bhikkhave jano sañjānāti tumhe
ca pana ke tumheti puṭṭhā samānā samaṇamhāti paṭijānātha tesaṃ
vo bhikkhave evaṃsamaññānaṃ sataṃ evaṃpaṭiññānaṃ sataṃ yā samaṇasāmīcipaṭipadā
taṃ paṭipadaṃ paṭipajjissāma evanno ayaṃ amhākaṃ samaññā ca saccā
bhavissati paṭiññā ca bhūtā yesañca mayaṃ patta cīvarapiṇḍapātasenāsana-
gilānapaccayabhesajjaparikkhāre 1- paribhuñjāma tesaṃ te kārā amhesu
mahapphalā bhavissanti mahānisaṃsā amhākañcevāyaṃ pabbajjā avañjhā
bhavissati saphalā saudrayāti evañhi vo bhikkhave sikkhitabbaṃ.
[480] Kathañca bhikkhave bhikkhu [2]- sāmīcipaṭipadaṃ paṭipanno hoti.
Yassa kassaci bhikkhave bhikkhuno abhijjhālussa abhijjhā appahīnā hoti
byāpannacittassa byāpādo appahīno hoti kodhanassa kodho
appahīno hoti upanāhissa upanāho appahīno hoti makkhissa
makkho appahīno hoti paḷāsissa paḷāso appahīno hoti
issukissa issā appahīnā hoti maccharissa macchariyaṃ appahīnaṃ
@Footnote: 1 Ma. cīvarapiṇḍapāta ... parikkhāraṃ. 2 Po. na. Ma. na samaṇasāmīcippaṭipadaṃ.
Hoti saṭhassa sāṭheyyaṃ appahīnaṃ hoti māyāvissa māyā appahīnā
hoti pāpicchassa pāpikā icchā appahīnā hoti micchādiṭṭhissa
micchādiṭṭhi appahīnā hoti . imesaṃ kho ahaṃ bhikkhave samaṇamalānaṃ
samaṇadosānaṃ samaṇakasāvānaṃ 1- āpāyikānaṃ ṭhānānaṃ duggativedanīyānaṃ
appahānā [2]- samaṇasāmīcipaṭipadaṃ paṭipannoti na vadāmi . Seyyathāpi
bhikkhave matajannāma āvudhajātaṃ ubhatodhāraṃ pītanissitaṃ tadassa
saṅghāṭiyā sampārutaṃ sampalivedhitaṃ tathūpamāhaṃ bhikkhave imassa
bhikkhuno pabbajjaṃ vadāmi.
[481] Nāhaṃ bhikkhave saṅghāṭikassa saṅghāṭidhāraṇamattena sāmaññaṃ
vadāmi . nāhaṃ bhikkhave acelakassa acelakamattena sāmaññaṃ vadāmi.
Nāhaṃ bhikkhave rajojallikassa rajojallikamattena sāmaññaṃ vadāmi .
Nāhaṃ bhikkhave udakorohakassa udakorohamattena 3- sāmaññaṃ vadāmi.
Nāhaṃ bhikkhave rukkhamūlikassa rukkhamūlikamattena sāmaññaṃ vadāmi . nāhaṃ
bhikkhave abbhokāsikassa abbhokāsikamattena sāmaññaṃ vadāmi.
{481.1} Nāhaṃ bhikkhave ubbhatthakassa ubbhatthakamattena sāmaññaṃ
vadāmi . nāhaṃ bhikkhave pariyāyabhattikassa pariyāyabhattikamattena
sāmaññaṃ vadāmi . nāhaṃ bhikkhave mantajjhāyikassa mantajjhāyikamattena
sāmaññaṃ vadāmi . nāhaṃ bhikkhave jaṭilakassa jaṭādhāraṇamattena
sāmaññaṃ vadāmi . saṅghāṭikassa ce bhikkhave saṅghāṭidhāraṇamattena
@Footnote: 1 Sī. Ma. Yu. samaṇakasaṭānaṃ. 2 Ma. na. 3 Po. Ma. udakorohaṇamattena.
Abhijjhālussa puggalassa abhijjhā pahīyetha byāpannacittassa
byāpādo pahīyetha kodhanassa kodho pahīyetha upanāhissa
upanāho pahīyetha makkhissa makkho pahīyetha paḷāsissa paḷāso
pahīyetha issukissa issā pahīyetha maccharissa macchariyaṃ pahīyetha
saṭhassa sāṭheyyaṃ pahīyetha māyāvissa māyā pahīyetha pāpicchassa
pāpikā icchā pahīyetha micchādiṭṭhissa micchādiṭṭhi pahīyetha
tamenaṃ mittāmaccā ñātisālohitā jātameva naṃ saṅghāṭikaṃ kareyyuṃ
saṅghāṭikattameva samādapeyyuṃ ehi tvaṃ bhadramukha saṅghāṭiko hohi
saṅghāṭikassa te sato saṅghāṭidhāraṇamattena abhijjhālussa abhijjhā
pahīyissati byāpannacittassa byāpādo pahīyissati
{481.2} kodhanassa kodho pahīyissati upanāhissa upanāho
pahīyissati makkhissa makkho pahīyissati paḷāsissa paḷāso pahīyissati
issukissa issā pahīyissati maccharissa macchariyaṃ pahīyissati saṭhassa
sāṭheyyaṃ pahīyissati māyāvissa māyā pahīyissati pāpicchassa pāpikā
icchā pahīyissati micchādiṭṭhissa micchādiṭṭhi pahīyissatīti . yasmā
ca kho ahaṃ bhikkhave saṅghāṭikampi idhekaccaṃ passāmi abhijjhāluṃ
bayāpannacittaṃ kodhanaṃ upanāhiṃ makkhiṃ paḷāsiṃ issukiṃ macchariṃ
saṭhaṃ māyāviṃ pāpicchaṃ micchādiṭṭhiṃ 1- tasmā na saṅghāṭikassa
saṅghāṭidhāraṇamattena sāmaññaṃ vadāmi . acelakassa ce bhikkhave .pe.
Rajojallikassa ce bhikkhave ... Udakorohakassa ce bhikkhave ... Rukkhamūlikassa
@Footnote: 1 Ma. micachādiṭaṭhikaṃ.
Ce bhikkhave ... abbhokāsikassa ce bhikkhave ... ubbhatthakassa ce
bhikkhave ... pariyāyabhattikassa ce bhikkhave ... mantajjhāyikassa ce
bhikkhave ... jaṭilakassa ce bhikkhave jaṭādhāraṇamattena abhijjhālussa
abhijjhā pahīyetha byāpannacittassa byāpādo pahīyetha kodhanassa
kodho pahīyetha upanāhissa upanāho pahīyetha makkhissa makkho
pahīyetha paḷāsissa paḷāso pahīyetha issukissa issā pahīyetha
maccharissa macchariyaṃ pahīyetha saṭhassa sāṭheyyaṃ pahīyetha
{481.3} māyāvissa māyā pahīyetha pāpicchassa pāpikā icchā
pahīyetha micchādiṭṭhissa micchādiṭṭhi pahīyetha tamenaṃ mittāmaccā
ñātisālohitā jātameva naṃ jaṭilakaṃ kareyyuṃ jaṭilakattameva
samādapeyyuṃ ehi tvaṃ bhadramukha jaṭilako hohi jaṭilakassa te sato
jaṭādhāraṇamattena abhijjhālussa abhijjhā pahīyissati byāpannacittassa
byāpādo pahīyissati kodhanassa kodho pahīyissati upanāhissa
upanāho pahīyissati makkhissa makkho pahīyissati paḷāsissa
paḷāso pahīyissati issukissa issā pahīyissati maccharissa
macchariyaṃ pahīyissati saṭhassa sāṭheyyaṃ pahīyissati māyāvissa
māyā pahīyissati pāpicchassa pāpikā icchā pahīyissati micchādiṭṭhissa
micchādiṭṭhi pahīyissatīti . yasmā ca kho ahaṃ bhikkhave jaṭilakampi
idhekaccaṃ passāmi abhijjhāluṃ byāpannacittaṃ kodhanaṃ upanāhiṃ
makkhiṃ paḷāsiṃ issukiṃ macchariṃ saṭhaṃ māyāviṃ pāpicchaṃ micchādiṭṭhiṃ
Tasmā na jaṭilakassa jaṭādhāraṇamattena sāmaññaṃ vadāmi.
[482] Kathañca bhikkhave bhikkhu samaṇasāmīcipaṭipadaṃ paṭipanno
hoti . yassakassaci bhikkhave bhikkhuno abhijjhālussa abhijjhā pahīnā
hoti byāpannacittassa byāpādo pahīno hoti kodhanassa
kodho pahīno hoti upanāhissa upanāho pahīno hoti makkhissa
makkho pahīno hoti paḷāsissa paḷāso pahīno hoti issukissa
issā pahīnā hoti maccharissa macchariyaṃ pahīnaṃ hoti saṭhassa
sāṭheyyaṃ pahīnaṃ hoti māyāvissa māyā pahīnā hoti pāpicchassa
pāpikā icchā pahīnā hoti micchādiṭṭhissa micchādiṭṭhi pahīnā
hoti . imesaṃ kho [1]- bhikkhave samaṇamalānaṃ samaṇadosānaṃ
samaṇakasāvānaṃ āpāyikānaṃ ṭhānānaṃ duggativedanīyānaṃ pahānā
samaṇasāmīcipaṭipadaṃ paṭipannoti vadāmi.
{482.1} So sabbehi imehi pāpakehi akusalehi dhammehi
visuddhamattānaṃ samanupassati vimuttamattānaṃ samanupassati 2- .
Tassa sabbehi imehi pāpakehi akusalehi dhammehi visuddhamattānaṃ
samanupassato vimuttamattānaṃ samanupassato pāmujjaṃ jāyati
pamuditassa pīti jāyati pītimanassa kāyo passambhati passaddhakāyo
sukhaṃ vedeti sukhino cittaṃ samādhiyati . so mettāsahagatena
cetasā ekaṃ disaṃ pharitvā viharati tathā dutiyaṃ tathā tatiyaṃ tathā
catutthaṃ iti uddhamadho tiriyaṃ sabbadhi sabbattatāya sabbāvantaṃ
lokaṃ mettāsahagatena cetasā vipulena mahaggatena
@Footnote: 1 Ma. ahaṃ. 2 Ma. ime pāṭhā natthi.
Appamāṇena averena abyāpajjhena pharitvā viharati . karuṇāsahagatena
cetasā ... muditāsahagatena cetasā ... upekkhāsahagatena cetasā
ekaṃ disaṃ pharitvā viharati tathā dutiyaṃ tathā tatiyaṃ tathā catutthaṃ iti
uddhamadho tiriyaṃ sabbadhi sabbattatāya sabbāvantaṃ lokaṃ
upekkhāsahagatena cetasā vipulena mahaggatena appamāṇena
averena abyāpajjhena pharitvā viharati . seyyathāpi bhikkhave
pokkharaṇī acchodakā sātodakā sītodakā setakā 1- supatitthā
ramaṇīyā . puratthimāya cepi disāya puriso āgaccheyya
ghammābhitatto ghammapareto kilanto tasito pipāsito.
{482.2} So taṃ pokkharaṇiṃ āgamma vineyya udakapipāsaṃ vineyya
ghammapariḷāhaṃ . pacchimāya cepi disāya puriso āgaccheyya ... Uttarāya
cepi disāya puriso āgaccheyya ... dukkhiṇāya cepi disāya puriso
āgaccheyya ... yatokuto cepi [2]- puriso āgaccheyya ghammābhitatto
ghammapareto kilanto tasito pipāsito. So taṃ pokkharaṇiṃ āgamma vineyya
udakapipāsaṃ vineyya ghammapariḷāhaṃ evameva kho bhikkhave khattiyakulā
cepi agārasmā anagāriyaṃ pabbajito hoti . so ca tathāgatappaveditaṃ
dhammavinayaṃ āgamma evaṃ mettaṃ karuṇaṃ muditaṃ upekkhaṃ bhāvetvā labhati
ajjhattaṃ vūpasamaṃ [3]- samaṇasāmīcipaṭipadaṃ paṭipannoti vadāmi .
Brāhmaṇakulā cepi ... vessakulā cepi ... suddakulā cepi ...
Yasmākasmā cepi kulā agārasmā anagāriyaṃ pabbajito
@Footnote: 1 Po. setodakā 2 Ma. naṃ. 3 Ma. ajjhattaṃ vūpasamā.
Hoti.
{482.3} So ca tathāgatappaveditaṃ dhammavinayaṃ āgamma evaṃ
mettaṃ karuṇaṃ muditaṃ upekkhaṃ bhāvetvā labhati ajjhattaṃ vūpasamaṃ [1]-
samaṇasāmīcipaṭipadaṃ paṭipannoti vadāmi . khattiyakulā cepi agārasmā
anagāriyaṃ pabbajito hoti . so ca āsavānaṃ khayā anāsavaṃ
cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā
upasampajja viharati āsavānaṃ khayā samaṇo hotīti vadāmi .
Brāhmaṇakulā cepi ... vessakulā cepi ... suddakulā cepi ...
Yasmākasmā cepi kulā agārasmā anagāriyaṃ pabbajito hoti .
So ca āsavānaṃ khayā anāsavaṃ cetovimuttiṃ paññāvimuttiṃ diṭṭheva
dhamme sayaṃ abhiññā sacchikatvā upasampajja viharati āsavānaṃ
khayā samaṇo hotīti vadāmīti.
{482.4} Idamavoca bhagavā attamanā te bhikkhū bhagavato bhāsitaṃ
abhinandunti.
Cūḷaassapurasuttaṃ niṭṭhitaṃ dasamaṃ.
Mahāyamakavaggo catuttho.
Tassuddānaṃ
giñjakasālavanaṃ 2- parihātuṃ paññavato
puna saccanisevo mukhavaṇṇapasīdattādi
tasito kevaṭṭassa purajaṭilenāti.
------------
@Footnote: 1 Ma. ajjhattaṃ vūpasamā. 2 Ma. giñjakasālavanaṃ pariharituṃ paññavato puna saccakanisedho
@mukhavaṇṇapasīdhanatāpindo kevaṭṭaassapurajaṭilena.
Cūḷayamakavaggo
------
sāleyyakasuttaṃ
[483] Evamme sutaṃ ekaṃ samayaṃ bhagavā kosalesu cārikañcaramāno
mahatā bhikkhusaṅghena saddhiṃ yena sālaṃ 1- nāma kosalānaṃ
brāhmaṇagāmo tadavasari . assosuṃ kho sāleyyakā
brāhmaṇagahapatikā samaṇo khalu bho gotamo sakyaputto sakyakulā
pabbajito kosalesu cārikañcaramāno mahatā bhikkhusaṅghena saddhiṃ
sālaṃ anuppatto . taṃ kho pana bhavantaṃ gotamaṃ evaṃ kalyāṇo
kittisaddo abbhuggato itipi so bhagavā arahaṃ sammāsambuddho
vijjācaraṇasampanno sugato lokavidū anuttaro purisadammasārathi
satthā devamanussānaṃ buddho bhagavā so imaṃ lokaṃ sadevakaṃ samārakaṃ
sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā
sacchikatvā pavedeti so dhammaṃ deseti ādikalyāṇaṃ majjhekalyāṇaṃ
pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ
brahmacariyaṃ pakāseti sādhu kho pana tathārūpānaṃ arahataṃ dassanaṃ
hotīti.
{483.1} Atha kho sāleyyakā brāhmaṇagahapatikā yena bhagavā
tenupasaṅkamiṃsu upasaṅkamitvā appekacce bhagavantaṃ abhivādetvā
ekamantaṃ nisidiṃsu appekacce bhagavatā saddhiṃ sammodiṃsu sammodanīyaṃ
@Footnote: 1 Ma. sālā nāma.
Kathaṃ sārāṇīyaṃ vītisāretvā ekamantaṃ nisīdiṃsu appekacce yena
bhagavā tenañjalimpaṇāmetvā ekamantaṃ nisīdiṃsu appekacce
bhagavato santike nāmagottaṃ sāvetvā ekamantaṃ nisīdiṃsu appekacce
tuṇhībhūtā ekamantaṃ nisīdiṃsu . ekamantaṃ nisinnā kho
sāleyyakā brāhmaṇagahapatikā bhagavantaṃ etadavocuṃ ko nu kho
bho gotama hetu ko paccayo yenamidhekacce sattā kāyassa
bhedā parammaraṇā apāyaṃ duggatiṃ vinipātaṃ nirayaṃ upapajjanti
ko pana bho gotama hetu ko paccayo yenamidhekacce sattā
kāyassa bhedā parammaraṇā sugatiṃ saggaṃ lokaṃ upapajjantīti.
{483.2} Adhammacariyāvisamacariyāhetu kho gahapatayo evamidhekacce
sattā kāyassa bhedā parammaraṇā apāyaṃ duggatiṃ vinipātaṃ nirayaṃ
upapajjanti dhammacariyāsamacariyāhetu kho gahapatayo evamidhekacce
sattā kāyassa bhedā parammaraṇā sugatiṃ saggaṃ lokaṃ upapajjantīti.
{483.3} Na kho mayaṃ imassa bhoto gotamassa saṅkhittena bhāsitassa
vitthārena atthaṃ avibhattassa vitthārena atthaṃ ājānāma sādhu no bhavaṃ
gotamo tathā dhammaṃ desetu yathā mayaṃ imassa bhoto gotamassa
saṅkhittena bhāsitassa vitthārena atthaṃ avibhattassa vitthārena atthaṃ
ājāneyyāmāti . tenahi gahapatayo suṇātha sādhukaṃ manasikarotha
bhāsissāmīti . evaṃ bhoti kho sāleyyakā brāhmaṇagahapatikā
bhagavato paccassosuṃ.
[484] Bhagavā etadavoca tividhaṃ kho gahapatayo kāyena
adhammacariyāvisamacariyā hoti catubbidhaṃ vācāya adhammacariyāvisamacariyā
hoti tividhaṃ manasā adhammacariyāvisamacariyā hoti.
{484.1} Kathañca gahapatayo tividhaṃ kāyena adhammacariyā visamacariyā
hoti . idha gahapatayo ekacco pāṇātipātī hoti luddo lohitapāṇī
hatapahate niviṭṭho alajjī 1- adayāpanno sabbapāṇabhūtesu 2- .
Adinnādāyī kho pana hoti yantaṃ parassa paravittūpakaraṇaṃ gāmagataṃ vā
araññagataṃ vā taṃ adinnaṃ theyyasaṅkhātaṃ ādātā hoti . kāmesu
micchācārī kho pana hoti yā tā māturakkhitā piturakkhitā mātāpiturakkhitā
bhāturakkhitā bhaginirakkhitā ñātirakkhitā [3]- sassāmikā saparidaṇḍā
antamaso mālāguḷaparikkhittāpi tathārūpāsu cārittaṃ āpajjitā hoti .
Evaṃ kho gahapatayo tividhaṃ kāyena adhammacariyā visamacariyā hoti.
{484.2} Kathañca gahapatayo catubbidhaṃ vācāya adhammacariyā
visamacariyā hoti . idha gahapatayo ekacco musāvādī hoti sabhaggato
vā parisaggato 4- vā ñātimajjhaggato vā pūgamajjhaggato vā
rājakulamajjhaggato vā abhinīto sakkhiṃ puṭṭho ehambho purisa yaṃ
jānāsi taṃ vadehīti . so ajānaṃ vā āha jānāmīti jānaṃ vā āha
na jānāmīti apassaṃ vā āha passāmīti passaṃ vā āha na passāmīti.
Iti attahetu vā parahetu vā āmisakiñcikkhahetu vā sampajānamusā
bhāsitā hoti . pisuṇavāco kho pana hoti ito sutvā amutra
@Footnote: 1 Po. Ma. ayaṃ pāṭho natthi. 2 Ma. pāṇabhūtesu. 3 Po. Ma. gottarakkhitā
@dhammarakkhitā. 4 Ma. sabhāgato vā parisāgato vā.
Akkhātā imesaṃ bhedāya amutra vā sutvā imesaṃ akkhātā amūsaṃ
bhedāya iti samaggānaṃ vā bhedetā 1- bhinnānaṃ vā anuppadātā
vaggārāmo vaggarato vagganandī vaggakaraṇiṃ vācaṃ bhāsitā hoti .
Pharusavāco kho pana hoti yā sā vācā aṇḍakā 2- kakkasā
parakaṭukā parābhisajjanī kodhasāmantā asamādhisaṃvattanikā tathārūpiṃ
vācaṃ bhāsitā hoti . samphappalāpī kho pana hoti akālavādī
abhūtavādī anatthavādī adhammavādī avinayavādī anidhānavatiṃ vācaṃ bhāsitā
hoti akālena anapadesaṃ apariyantavatiṃ anatthasañhitaṃ . evaṃ kho
gahapatayo catubbidhaṃ vācāya adhammacariyāvisamacariyā hoti.
{484.3} Kathañca gahapatayo tividhaṃ manasā adhammacariyāvisamacariyā
hoti . idha gahapatayo ekacco abhijjhālu hoti yantaṃ parassa paravittūpakaraṇaṃ
taṃ abhijjhitā 3- hoti aho vata yaṃ parassa taṃ mama assāti .
Byāpannacitto kho pana hoti paduṭṭhamanasaṅkappo ime sattā
haññantu vā vajjhantu vā ucchijjantu vā [4]- mā vā ahesunti.
Micchādiṭṭhiko kho pana hoti viparītadassano natthi dinnaṃ natthi
yiṭṭhaṃ natthi hutaṃ natthi sukaṭadukkaṭānaṃ kammānaṃ phalaṃ vipāko
natthi ayaṃ loko natthi paro loko natthi mātā natthi pitā natthi
sattā opapātikā natthi loke samaṇabrāhmaṇā sammaggatā
sammāpaṭipannā ye imañca lokaṃ parañca lokaṃ sayaṃ abhiññā
sacchikatvā pavedentīti . evaṃ kho gahapatayo tividhaṃ manasā
@Footnote: 1 Po. Ma. bhettā. 2 Ma. kaṇṭakā. 3 Ma. abhijjhātā. 4 Po. Ma.
@vinassant vā .
Adhammacariyā visamacariyā hoti . evaṃ adhammacariyā visamacariyāhetu kho
gahapatayo evamidhekacce sattā kāyassa bhedā parammaraṇā apāyaṃ
duggatiṃ vinipātaṃ nirayaṃ upapajjanti.
[485] Tividhaṃ kho gahapatayo kāyena dhammacariyā samacariyā hoti.
Catubbidhaṃ vācāya dhammacariyāsamacariyā hoti . tividhaṃ manasā
dhammacariyāsamacariyā hoti.
{485.1} Kathañca gahapatayo tividhaṃ kāyena dhammacariyāsamacariyā
hoti . idha gahapatayo ekacco pāṇātipātaṃ pahāya pāṇātipātā
paṭivirato hoti nihitadaṇḍo nihitasattho lajjī dayāpanno
sabbapāṇabhūtahitānukampī viharati . adinnādānaṃ pahāya
adinnādānā paṭivirato hoti yantaṃ parassa paravittūpakaraṇaṃ
gāmagataṃ vā araññagataṃ vā na taṃ adinnaṃ theyyasaṅkhātaṃ ādātā
hoti . kāmesu micchācāraṃ pahāya kāmesu micchācārā paṭivirato
hoti yā tā māturakkhitā piturakkhitā mātāpiturakkhitā bhāturakkhitā
bhaginirakkhitā ñātirakkhitā [1]- sassāmikā saparidaṇḍā antamaso
mālāguḷaparikkhittāpi tathārūpāsu na cārittaṃ āpajjitā hoti. Evaṃ kho
gahapatayo tividhaṃ kāyena dhammacariyāsamacariyā hoti.
{485.2} Kathañca gahapatayo catubbidhaṃ vācāya dhammacariyā
samacariyā hoti . idha gahapatayo ekacco musāvādaṃ pahāya musāvādā
paṭivirato hoti sabhaggato vā parisaggato vā ñātimajjhaggato
vā pūgamajjhaggato vā rājakulamajjhaggato vā abhinīto
sakkhiṃ puṭṭho ehambho purisa yaṃ jānāsi taṃ vadehīti
@Footnote: 1 Ma. gottarakkhitā dhammarakkhitā.
So ajānaṃ vā āha na jānāmīti jānaṃ vā āha jānāmīti
apassaṃ vā āha na passāmīti passaṃ vā āha passāmīti .
Iti attahetu vā parahetu vā āmisakiñcikkhahetu vā na sampajānamusā
bhāsitā hoti . pisuṇaṃ vācaṃ pahāya pisuṇāya vācāya paṭivirato
hoti ito sutvā na amutra akkhātā imesaṃ bhedāya amutra
vā sutvā na imesaṃ akkhātā amūsaṃ bhedāya iti bhinnānaṃ
vā sandhātā sahitānaṃ vā anuppadātā samaggārāmo samaggarato
samagganandī samaggakaraṇiṃ vācaṃ bhāsitā hoti . pharusaṃ vācaṃ pahāya
pharusāya vācāya paṭivirato hoti yā sā vācā nelā kaṇṇasukhā
pemanīyā hadayaṅgamā porī bahujanakantā bahujanamanāpā tathārūpiṃ
vācaṃ bhāsitā hoti . samphappalāpaṃ pahāya samphappalāpā paṭivirato
hoti kālavādī bhūtavādī atthavādī dhammavādī vinayavādī nidhānavatiṃ
vācaṃ bhāsitā hoti kālena sāpadesaṃ pariyantavatiṃ atthasañhitaṃ .
Evaṃ kho gahapatayo catubbidhaṃ vācāya dhammacariyā samacariyā hoti.
{485.3} Kathañca gahapatayo tividhaṃ manasā dhammacariyā samacariyā
hoti . idha gahapatayo ekacco anabhijjhālu hoti yantaṃ parassa
paravittūpakaraṇaṃ taṃ nābhijjhitā hoti aho vata yaṃ parassa taṃ mama assāti.
Abyāpannacitto kho pana hoti appaduṭṭhamanasaṅkappo ime
sattā averā abyāpajjhā anīghā sukhī attānaṃ pariharantūti .
Sammādiṭṭhiko kho pana hoti aviparītadassano atthi dinnaṃ atthi
Yiṭṭhaṃ atthi hutaṃ atthi sukaṭadukkaṭānaṃ kammānaṃ phalaṃ vipāko
atthi ayaṃ loko atthi paro loko atthi mātā atthi pitā
atthi sattā opapātikā atthi loke samaṇabrāhmaṇā sammaggatā
sammāpaṭipannā ye imañca lokaṃ parañca lokaṃ sayaṃ abhiññā
sacchikatvā pavedentīti . evaṃ kho gahapatayo tividhaṃ manasā
dhammacariyāsamacariyā hoti . evaṃ dhammacariyāsamacariyāhetu kho
gahapatayo evamidhekacce sattā kāyassa bhedā parammaraṇā sugatiṃ
saggaṃ lokaṃ upapajjanti.
[486] Ākaṅkheyya ce gahapatayo dhammacārī samacārī aho
vatāhaṃ kāyassa bhedā parammaraṇā khattiyamahāsālānaṃ sahabyataṃ
upapajjeyyanti ṭhānaṃ kho panetaṃ vijjati yaṃ so kāyassa bhedā
parammaraṇā khattiyamahāsālānaṃ sahabyataṃ upapajjeyya taṃ kissa
hetu tathā hi so dhammacārī samacārī.
{486.1} Ākaṅkheyya ce gahapatayo dhammacārī samacārī aho
vatāhaṃ kāyassa bhedā parammaraṇā brāhmaṇamahāsālānaṃ .pe.
Gahapatimahāsālānaṃ sahabyataṃ upapajjeyyanti ṭhānaṃ kho panetaṃ
vijjati yaṃ so kāyassa bhedā parammaraṇā gahapatimahāsālānaṃ
sahabyataṃ upapajjeyya taṃ kissa hetu tathā hi so dhammacārī samacārī.
{486.2} Ākaṅkheyya ce gahapatayo dhammacārī samacārī
aho vatāhaṃ kāyassa bhedā parammaraṇā cātummahārājikānaṃ
devānaṃ sahabyataṃ upapajjeyyanti ṭhānaṃ kho
Panetaṃ vijjati yaṃ so kāyassa bhedā parammaraṇā cātummahārājikānaṃ
devānaṃ sahabyataṃ upapajjeyya taṃ kissa hetu tathā hi so
dhammacārī samacārī.
{486.3} Ākaṅkheyya ce gahapatayo dhammacārī samacārī
aho vatāhaṃ kāyassa bhedā parammaraṇā tāvatiṃsānaṃ devānaṃ
sahabyataṃ .pe. yāmānaṃ devānaṃ ... Tusitānaṃ devānaṃ ... Nimmānaratīnaṃ
devānaṃ ... paranimmitavasavattīnaṃ devānaṃ ... brahmakāyikānaṃ devānaṃ
sahabyataṃ upapajjeyyanti ṭhānaṃ kho panetaṃ vijjati yaṃ so kāyassa
bhedā parammaraṇā brahmakāyikānaṃ devānaṃ sahabyataṃ upapajjeyya taṃ
kissa hetu tathā hi so dhammacārī samacārī.
{486.4} Ākaṅkheyya ce gahapatayo dhammacārī samacārī aho
vatāhaṃ kāyassa bhedā parammaraṇā ābhānaṃ devānaṃ sahabyataṃ
upapajjeyyanti ṭhānaṃ kho panetaṃ vijjati yaṃ so kāyassa bhedā parammaraṇā
ābhānaṃ devānaṃ sahabyataṃ upapajjeyya taṃ kissa hetu tathā hi
so dhammacārī samacārī . ākaṅkheyya ce gahapatayo dhammacārī samacārī
aho vatāhaṃ kāyassa bhedā parammaraṇā parittābhānaṃ devānaṃ .pe.
Appamāṇābhānaṃ devānaṃ ... ābhassarānaṃ devānaṃ ... parittasubhānaṃ
devānaṃ ... appamāṇasubhānaṃ devānaṃ ... subhakiṇhakānaṃ devānaṃ ...
Vehapphalānaṃ devānaṃ ... avihānaṃ devānaṃ ... Atappānaṃ devānaṃ ...
Sudassānaṃ devānaṃ ... Sudassīnaṃ devānaṃ ... Akaniṭṭhakānaṃ 1- devānaṃ ...
Ākāsānañcāyatanūpagānaṃ devānaṃ ... viññāṇañcāyatanūpagānaṃ
@Footnote: 1 Po. Ma. akaniṭṭhānaṃ.
Devānaṃ ... ākiñcaññāyatanūpagānaṃ devānaṃ ... nevasaññā-
nāsaññāyatanūpagānaṃ devānaṃ sahabyataṃ upapajjeyyanti
ṭhānaṃ kho panetaṃ vijjati yaṃ so kāyassa bhedā parammaraṇā
nevasaññānāsaññāyatanūpagānaṃ devānaṃ sahabyataṃ upapajjeyya
taṃ kissa hetu tathā hi so dhammacārī samacārī.
{486.5} Ākaṅkheyya ce gahapatayo dhammacārī samacārī
aho vatāhaṃ āsavānaṃ khayā anāsavaṃ cetovimuttiṃ paññāvimuttiṃ
diṭṭheva dhamme sayaṃ abhiññā sacchikatvā upasampajja vihareyyanti
ṭhānaṃ kho panetaṃ vijjati yaṃ so āsavānaṃ khayā anāsavaṃ cetovimuttiṃ
paññāvimuttiṃ diṭṭheva dhamme sayaṃ abhiññā sacchikatvā upasampajja
vihareyya taṃ kissa hetu tathā hi so dhammacārī samacārīti.
[487] Evaṃ vutte sāseyyakā brāhmaṇagahapatikā bhagavantaṃ
etadavocuṃ abhikkantaṃ bho gotama abhikkantaṃ bho gotama seyyathāpi
bho gotama nikkujjitaṃ vā ukkujjeyya paṭicchannaṃ vā vivareyya
mūḷhassa vā maggaṃ ācikkheyya andhakāre vā telapajjotaṃ
dhāreyya cakkhumanto rūpāni dakkhantīti evameva bhotā gotamena
anekapariyāyena dhammo pakāsito ete mayaṃ bhavantaṃ gotamaṃ saraṇaṃ
gacchāma dhammañca bhikkhusaṅghañca upāsake no bhavaṃ gotamo
dhāretu ajjatagge pāṇupete 1- saraṇaṅgateti.
Sāleyyakasuttaṃ niṭṭhitaṃ paṭhamaṃ.
--------
@Footnote: 1 Ma. sabbattha pāṇupetaṃ.
Verañjakasuttaṃ
[488] Evamme sutaṃ ekaṃ samayaṃ bhagavā sāvatthiyaṃ viharati
jetavane anāthapiṇḍikassa ārāme . tena kho pana samayena
verañjakā brāhmaṇagahapatikā sāvatthiyaṃ paṭivasanti kenacideva
karaṇīyena . assosuṃ kho verañjakā brāhmaṇagahapatikā samaṇo
khalu bho gotamo sakyaputto sakyakulā pabbajito sāvatthiyaṃ viharati
jetavane anāthapiṇḍikassa ārāme . taṃ kho pana bhavantaṃ gotamaṃ
evaṃ kalyāṇo kittisaddo abbhuggato itipi so bhagavā arahaṃ
sammāsambuddho vijjācaraṇasampanno sugato lokavidū anuttaro
purisadammasārathi satthā devamanussānaṃ buddho bhagavā so imaṃ lokaṃ
sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ
sayaṃ abhiññā sacchikatvā pavedeti so dhammaṃ deseti ādikalyāṇaṃ
majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ
parisuddhaṃ brahmacariyaṃ pakāseti sādhu kho pana tathārūpānaṃ arahataṃ
dassanaṃ hotīti.
{488.1} Atha kho verañjakā brāhmaṇagahapatikā yena bhagavā
tenupasaṅkamiṃsu upasaṅkamitvā appekacce bhagavantaṃ abhivādetvā
ekamantaṃ nisīdiṃsu appekacce bhagavatā saddhiṃ sammodiṃsu sammodanīyaṃ
kathaṃ sārāṇīyaṃ vītisāretvā ekamantaṃ nisīdiṃsu appekacce yena bhagavā
tenañjalimpaṇāmetvā ekamantaṃ nisīdiṃsu appekacce bhagavato
Santike nāmagottaṃ sāvetvā ekamantaṃ nisīdiṃsu appekacce
tuṇhībhūtā ekamantaṃ nisīdiṃsu . ekamantaṃ nisinnā kho verañjakā
brāhmaṇagahapatikā bhagavantaṃ etadavocuṃ ko nu kho bho gotama
hetu ko paccayo yenamidhekacce sattā kāyassa bhedā parammaraṇā
apāyaṃ duggatiṃ vinipātaṃ nirayaṃ upapajjanti ko pana bho gotama
hetu ko paccayo yenamidhekacce sattā kāyassa bhedā parammaraṇā
sugatiṃ saggaṃ lokaṃ upapajjantīti.
{488.2} Adhammacariyā visamacariyāhetu kho gahapatayo evamidhekacce
sattā kāyassa bhedā parammaraṇā apāyaṃ duggatiṃ vinipātaṃ nirayaṃ
upapajjanti dhammacariyāsamacariyāhetu kho gahapatayo evamidhekacce
sattā kāyassa bhedā parammaraṇā sugatiṃ saggaṃ lokaṃ upapajjantīti.
{488.3} Na kho mayaṃ imassa bhoto gotamassa saṅkhittena
bhāsitassa vitthārena atthaṃ avibhattassa vitthārena atthaṃ
ājānāma sādhu kho pana bhavaṃ gotamo tathā dhammaṃ desetu yathā
mayaṃ imassa bhoto gotamassa saṅkhittena bhāsitassa vitthārena
atthaṃ avibhattassa vitthārena atthaṃ ājāneyyāmāti . tenahi
gahapatayo suṇātha sādhukaṃ manasikarotha bhāsissāmīti . evaṃ bhoti
kho verañjakā brāhmaṇagahapatikā bhagavato paccassosuṃ.
[489] Bhagavā etadavoca tividhaṃ kho gahapatayo kāyena
adhammacārī visamacārī hoti catubbidhaṃ vācāya adhammacārī
visamacārī hoti tividhaṃ manasā adhammacārī visamacārī hoti.
{489.1} Kathañca gahapatayo tividhaṃ kāyena adhammacārī visamacārī hoti.
Idha gahapatayo ekacco pāṇātipātī hoti luddo lohitapāṇī hatapahate
niviṭṭho alajjī adayāpanno sabbapāṇabhūtesu . adinnādāyī kho pana
hoti yantaṃ parassa paravittūpakaraṇaṃ taṃ adinnaṃ theyyasaṅkhātaṃ ādātā
hoti . kāmesu micchācārī kho pana hoti yā tā māturakkhitā .pe.
Tathārūpāsu cārittaṃ āpajjitā hoti . Evaṃ kho gahapatayo tividhaṃ kāyena
adhammacārī visamacārī hoti.
{489.2} Kathañca gahapatayo catubbidhaṃ vācāya adhammacārī
visamacārī hoti . idha gahapatayo ekacco musāvādī hoti .pe.
Sampajānamusā bhāsitā hoti . pisuṇavāco kho pana hoti ito
sutvā amutra akkhātā .pe. vaggakaraṇiṃ vācaṃ bhāsitā hoti .
Pharusavāco kho pana hoti yā sā vācā aṇḍakā kakkasā .pe.
Tathārūpiṃ vācaṃ bhāsitā hoti . samphappalāpī kho pana hoti
akālavādī abhūtavādī .pe. apariyantavatiṃ anatthasañhitaṃ .
Evaṃ kho gahapatayo catubbidhaṃ vācāya adhammacārī visamacārī hoti.
{489.3} Kathañca gahapatayo tividhaṃ manasā adhammacārī
visamacārī hoti . idha gahapatayo ekacco abhijjhālu hoti
.pe. taṃ mama assāti . byāpannacitto kho pana hoti
paduṭṭhamanasaṅkappo ime sattā haññantu vā .pe. mā vā
ahesunti . micchādiṭṭhiko kho pana hoti viparītadassano natthi
dinnaṃ natthi yiṭṭhaṃ natthi hutaṃ .pe. sacchikatvā pavedentīti .
Evaṃ kho gahapatayo tividhaṃ manasā adhammacārī visamacārī hoti .
Evaṃ adhammacariyāvisamacariyāhetu kho gahapatayo evamidhekacce
sattā kāyassa bhedā parammaraṇā apāyaṃ duggatiṃ vinipātaṃ nirayaṃ
upapajjanti.
[490] Tividhaṃ kho pana gahapatayo kāyena dhammacārī samacārī
hoti catubbidhaṃ vācāya dhammacārī samacārī hoti tividhaṃ manasā
dhammacārī samacārī hoti.
{490.1} Kathañca gahapatayo tividhaṃ kāyena dhammacārī samacārī
hoti . idha gahapatayo ekacco pāṇātipātaṃ pahāya pāṇātipātā
paṭivirato hoti nihitadaṇḍo nihitasattho .pe. sabbapāṇabhūtahitānukampī
viharati . adinnādānaṃ pahāya adinnādānā paṭivirato hoti yantaṃ
parassa paravittūpakaraṇaṃ na taṃ adinnaṃ theyyasaṅkhātaṃ ādātā hoti .
Kāmesu micchācāraṃ pahāya .pe. tathārūpāsu na cārittaṃ āpajjitā
hoti. Evaṃ kho gahapatayo tividhaṃ kāyena dhammacārī samacārī hoti.
{490.2} Kathañca gahapatayo catubbidhaṃ vācāya dhammacārī samacārī
hoti . idha gahapatayo ekacco musāvādaṃ pahāya musāvādā paṭivirato
hoti sabhaggato vā .pe. na sampajānamusā bhāsitā hoti . pisuṇaṃ
vācaṃ pahāya pisuṇāya vācāya paṭivirato .pe. Samaggakaraṇiṃ vācaṃ bhāsitā
hoti . pharusaṃ vācaṃ pahāya .pe. tathārūpiṃ 1- vācaṃ bhāsitā hoti.
Samphappalāpaṃ pahāya .pe. kālena sāpadesaṃ pariyantavatiṃ atthasañhitaṃ.
@Footnote: 1 Po. Ma. tathārūpaṃ.
Evaṃ kho gahapatayo catubbidhaṃ vācāya dhammacārī samacārī hoti.
{490.3} Kathañca gahapatayo tividhaṃ manasā dhammacārī samacārī
hoti . idha gahapatayo ekacco anabhijjhālu hoti yantaṃ parassa
paravittūpakaraṇaṃ taṃ nābhijjhitā hoti aho vata yaṃ parassa taṃ mama assāti.
Abyāpannacitto kho pana hoti appaduṭṭhamanasaṅkappo ime sattā
averā abyāpajjhā anīghā sukhī attānaṃ pariharantūti . sammādiṭṭhiko
kho pana hoti aviparītadassano atthi dannaṃ atthi yiṭṭhaṃ .pe. sayaṃ
abhiññā sacchikatvā pavedentīti . evaṃ kho gahapatayo tividhaṃ manasā
dhammacārī samacārī hoti.
{490.4} Evaṃ dhammacariyāsamacariyāhetu kho gahapatayo
evamidhekacce sattā kāyassa bhedā parammaraṇā sugatiṃ saggaṃ
lokaṃ upapajjanti.
[491] Ākaṅkheyya ce gahapatayo dhammacārī samacārī aho
vatāhaṃ kāyassa bhedā parammaraṇā khattiyamahāsālānaṃ sahabyataṃ
upapajjeyyanti ṭhānaṃ kho panetaṃ vijjati yaṃ so kāyassa bhedā
parammaraṇā khattiyamahāsālānaṃ sahabyataṃ upapajjeyya taṃ kissa
hetu tathā hi so dhammacārī samacārī.
{491.1} Ākaṅkheyya ce gahapatayo dhammacārī samacārī aho
vatāhaṃ kāyassa bhedā parammaraṇā brāhmaṇamahāsālānaṃ .pe.
Gahapatimahāsālānaṃ sahabyataṃ upapajjeyyanti ṭhānaṃ kho panetaṃ vijjati
yaṃ so kāyassa bhedā parammaraṇā gahapatimahāsālānaṃ sahabyataṃ
upapajjeyya taṃ kissa hetu tathā hi so dhammacārī samacārī.
{491.2} Ākaṅkheyya ce gahapatayo dhammacārī samacārī aho
vatāhaṃ kāyassa bhedā parammaraṇā cātummahārājikānaṃ devānaṃ
sahabyataṃ upapajjeyyanti ṭhānaṃ kho panetaṃ vijjati yaṃ so kāyassa
bhedā parammaraṇā cātummahārājikānaṃ devānaṃ sahabyataṃ upapajjeyya
taṃ kissa hetu tathā hi so dhammacārī samacārī.
{491.3} Ākaṅkheyya ce gahapatayo dhammacārī samacārī aho
vatāhaṃ kāyassa bhedā parammaraṇā tāvatiṃsānaṃ devānaṃ .pe.
Yāmānaṃ devānaṃ ... tusitānaṃ devānaṃ ... nimmānaratīnaṃ
devānaṃ ... paranimmitavasavattīnaṃ devānaṃ ... brahmakāyikānaṃ
devānaṃ sahabyataṃ upapajjeyyanti ṭhānaṃ kho panetaṃ vijjati yaṃ so
kāyassa bhedā parammaraṇā brahmakāyikānaṃ devānaṃ sahabyataṃ
upapajjeyya taṃ kissa hetu tathā hi so dhammacārī samacārī.
{491.4} Ākaṅkheyya ce gahapatayo dhammacārī samacārī aho
vatāhaṃ kāyassa bhedā parammaraṇā ābhānaṃ devānaṃ sahabyataṃ
upapajjeyyanti ṭhānaṃ kho panetaṃ vijjati yaṃ so kāyassa bhedā
parammaraṇā ābhānaṃ devānaṃ sahabyataṃ upapajjeyya taṃ kissa
hetu tathā hi so dhammacārī samacārī.
{491.5} Ākaṅkheyya ce gahapatayo dhammacārī samacārī aho
vatāhaṃ kāyassa bhedā parammaraṇā parittābhānaṃ devānaṃ .pe.
Appamāṇābhānaṃ devānaṃ ... ābhassarānaṃ devānaṃ ... parittasubhānaṃ
devānaṃ ... appamāṇasubhānaṃ devānaṃ ... subhakiṇhakānaṃ
Devānaṃ ... vehapphalānaṃ devānaṃ ... Avihānaṃ devānaṃ ... Atappānaṃ
devānaṃ ... sudassānaṃ devānaṃ ... Sudassīnaṃ devānaṃ ... Akaniṭṭhakānaṃ
devānaṃ ... ākāsānañcāyatanūpagānaṃ devānaṃ ...
Viññāṇañcāyatanūpagānaṃ devānaṃ ... ākiñcaññāyatanūpagānaṃ
devānaṃ ... nevasaññānāsaññāyatanūpagānaṃ devānaṃ sahabyataṃ
upapajjeyyanti ṭhānaṃ kho panetaṃ vijjati yaṃ so kāyassa bhedā
parammaraṇā nevasaññānāsaññāyatanūpagānaṃ devānaṃ sahabyataṃ
upapajjeyya taṃ kissa hetu tathā hi so dhammacārī samacārī.
{491.6} Ākaṅkheyya ce gahapatayo dhammacārī samacārī aho
vatāhaṃ āsavānaṃ khayā anāsavaṃ cetovimuttiṃ paññāvimuttiṃ diṭṭheva
dhamme sayaṃ abhiññā sacchikatvā upasampajja vihareyyanti ṭhānaṃ kho
panetaṃ vijjati yaṃ so āsavānaṃ khayā anāsavaṃ cetovimuttiṃ paññāvimuttiṃ
diṭṭheva dhamme sayaṃ abhiññā sacchikatvā upasampajja vihareyya taṃ
kissa hetu tathā hi so dhammacārī samacārīti.
[492] Evaṃ vutte verañjakā brāhmaṇagahapatikā bhagavantaṃ
etadavocuṃ abhikkantaṃ bho gotama abhikkantaṃ bho gotama seyyathāpi
bho gotama nikkujjitaṃ vā ukkujjeyya paṭicchannaṃ vā vivareyya
mūḷhassa vā maggaṃ ācikkheyya andhakāre vā telapajjotaṃ
dhāreyya cakkhumanto rūpāni dakkhantīti evameva bhotā gotamena
anekapariyāyena dhammo pakāsito ete mayaṃ bhavantaṃ gotamaṃ saraṇaṃ
Gacchāma dhammañca bhikkhusaṅghañca upāsake no bhavaṃ gotamo dhāretu
ajjatagge pāṇupete saraṇaṅgateti.
Verañjakasuttaṃ niṭṭhitaṃ dutiyaṃ.
----------
Mahāvedallasuttaṃ
[493] Evamme sutaṃ ekaṃ samayaṃ bhagavā sāvatthiyaṃ viharati
jetavane anāthapiṇḍikassa ārāme . atha kho āyasmā mahākoṭṭhiko
sāyaṇhasamayaṃ paṭisallānā vuṭṭhito yenāyasmā sārīputto
tenupasaṅkami upasaṅkamitvā āyasmatā sārīputtena saddhiṃ sammodi
sammodanīyaṃ kathaṃ sārāṇīyaṃ vītisāretvā ekamantaṃ nisīdi.
[494] Ekamantaṃ nisinno kho āyasmā mahākoṭṭhiko
āyasmantaṃ sārīputtaṃ etadavoca duppañño duppaññoti āvuso
vuccati kittāvatā nu kho āvuso duppaññoti vuccatīti . Nappajānāti
nappajānātīti kho āvuso tasmā duppaññoti vuccati kiñca
nappajānāti idaṃ dukkhanti nappajānāti ayaṃ dukkhasamudayoti
nappajānāti ayaṃ dukkhanirodhoti nappajānāti ayaṃ dukkhanirodhagāminī
paṭipadāti nappajānāti nappajānāti nappajānātīti kho āvuso
tasmā duppaññoti vuccatīti.
{494.1} Sādhāvusoti kho āyasmā mahākoṭṭhiko āyasmato
sārīputtassa bhāsitaṃ abhinanditvā anumoditvā āyasmantaṃ
sārīputtaṃ uttariṃ pañhaṃ apucchi paññavā paññavāti āvuso
vuccati kittāvatā nu kho āvuso paññavāti vuccatīti . pajānāti
pajānātīti kho āvuso tasmā paññavāti vuccati kiñca pajānāti
idaṃ dukkhanti pajānāti ayaṃ dukkhasamudayoti pajānāti ayaṃ
Dukkhanirodhoti pajānāti ayaṃ dukkhanirodhagāminī paṭipadāti pajānāti
pajānāti pajānātīti kho āvuso tasmā paññavāti vuccatīti .
Viññāṇaṃ viññāṇanti āvuso vuccati kittāvatā nu kho āvuso
viññāṇanti vuccatīti . vijānāti vijānātīti kho āvuso tasmā
viññāṇanti vuccati kiñca vijānāti sukhantipi vijānāti dukkhantipi
vijānāti adukkhamasukhantipi vijānāti vijānāti vijānātīti
kho āvuso tasmā viññāṇanti vuccatīti.
{494.2} Yā cāvuso paññā yañca viññāṇaṃ ime dhammā
saṃsaṭṭhā udāhu visaṃsaṭṭhā labbhā ca panimesaṃ dhammānaṃ vinibbhujitvā
vinibbhujitvā nānākaraṇaṃ paññāpetunti.
{494.3} Yā cāvuso paññā yañca viññāṇaṃ ime dhammā
saṃsaṭṭhā no visaṃsaṭṭhā na ca labbhā imesaṃ dhammānaṃ vinibbhujitvā
vinibbhujitvā nānākaraṇaṃ paññāpetuṃ yañca āvuso pajānāti
taṃ vijānāti yaṃ vijānāti taṃ pajānāti tasmā ime dhammā saṃsaṭṭhā
no visaṃsaṭṭhā na ca labbhā imesaṃ dhammānaṃ vinibbhujitvā
vinibbhujitvā nānākaraṇaṃ paññāpetunti.
{494.4} Yā cāvuso paññā yañca viññāṇaṃ imesaṃ dhammānaṃ
saṃsaṭṭhānaṃ no visaṃsaṭṭhānaṃ kiṃ nānākaraṇanti . yā cāvuso paññā
yañca viññāṇaṃ imesaṃ dhammānaṃ saṃsaṭṭhānaṃ no visaṃsaṭṭhānaṃ paññā
bhāvetabbā viññāṇaṃ pariññeyyaṃ idaṃ nesaṃ nānākaraṇanti.
[495] Vedanā vedanāti āvuso vuccati kittāvatā nu kho
Āvuso vedanāti vuccatīti . vedeti vedetīti kho āvuso tasmā
vedanāti vuccati kiñca vedeti sukhampi vedeti dukkhampi vedeti
adukkhamasukhampi vedeti vedeti vedetīti kho āvuso tasmā
vedanāti vuccatīti . saññā saññāti āvuso vuccati kittāvatā
nu kho āvuso saññāti vuccatīti . sañjānāti sañjānātīti kho
āvuso tasmā saññāti vuccati kiñca sañjānāti nīlakampi
sañjānāti pītakampi sañjānāti lohitakampi sañjānāti odātampi
sañjānāti sañjānāti sañjānātīti kho āvuso tasmā saññāti
vuccatīti.
{495.1} Yā cāvuso vedanā yā ca saññā yañca viññāṇaṃ
ime dhammā saṃsaṭṭhā udāhu visaṃsaṭṭhā labbhā ca panimesaṃ
dhammānaṃ vinibbhujitvā vinibbhujitvā nānākaraṇaṃ paññāpetunti .
Yā cāvuso vedanā yā ca saññā yañca viññāṇaṃ ime
dhammā saṃsaṭṭhā no visaṃsaṭṭhā na ca labbhā imesaṃ dhammānaṃ
vinibbhujitvā vinibbhujitvā nānākaraṇaṃ paññāpetuṃ yaṃ cāvuso
vedeti taṃ sañjānāti yaṃ vijānāti taṃ vijānāti tasmā ime
dhammā saṃsaṭṭhā no visaṃsaṭṭhā na ca labbhā imesaṃ dhammānaṃ
vinibbhujitvā vinibbhujitvā nānākaraṇaṃ paññāpetunti.
[496] Nissaṭṭhena hāvuso pañcahi indriyehi parisuddhena
manoviññāṇena kiṃ neyyanti . nissaṭṭhena ca āvuso pañcahi
indriyehi parisuddhena manoviññāṇena ananto ākāsoti
Ākāsānañcāyatanaṃ neyyaṃ anantaṃ viññāṇanti viññāṇañcāyatanaṃ
neyyaṃ natthi kiñcīti ākiñcaññāyatanaṃ neyyanti . neyyaṃ panāvuso
dhammaṃ kena jānātīti 1- . neyyaṃ kho āvuso dhammaṃ paññācakkhunā
jānātīti 2- . paññā panāvuso kimatthiyāti . paññā kho āvuso
abhiññatthā pariññatthā pahānatthāti.
[497] Katī panāvuso paccayā sammādiṭṭhiyā uppādāyāti .
Dve kho āvuso paccayā sammādiṭṭhiyā uppādāya parato ca
ghoso yoniso ca manasikāro ime kho āvuso dve paccayā
sammādiṭṭhiyā uppādāyāti . katīhi panāvuso aṅgehi anuggahitā
sammādiṭṭhi cetovimuttiphalā ca hoti cetovimuttiphalānisaṃsā ca
paññāvimuttiphalā ca hoti paññāvimuttiphalānisaṃsā cāti.
{497.1} Pañcahi kho āvuso aṅgehi anuggahitā sammādiṭṭhi
cetovimuttiphalā ca hoti cetovimuttiphalānisaṃsā ca paññāvimuttiphalā
ca hoti paññāvimuttiphalānisaṃsā ca idhāvuso sammādiṭṭhi sīlānuggahitā
ca hoti sutānuggahitā ca hoti sākacchānuggahitā ca hoti
samathānuggahitā ca hoti vipassanānuggahitā ca hoti imehi kho
āvuso pañcahaṅgehi anuggahitā sammādiṭṭhi cetovimuttiphalā ca
hoti cetovimuttiphalānisaṃsā ca paññāvimuttiphalā ca hoti
paññāvimuttiphalānisaṃsā cāti.
[498] Katī panāvuso bhavāti . tayome āvuso bhavā
@Footnote: 1-2 Ma. pajānātīti.
Kāmabhavo rūpabhavo arūpabhavo cāti . kathaṃ panāvuso āyatiṃ
punabbhavābhinibbatti hotīti . avijjānīvaraṇānaṃ kho āvuso
sattānaṃ taṇhāsaññojanānaṃ tatratatrābhinandanā evaṃ
āyatiṃ punabbhavābhinibbatti hotīti . kathaṃ panāvuso āyatiṃ
punabbhavābhinibbatti na hotīti . avijjāvirāgā kho āvuso
vijjuppādā taṇhānirodhā evaṃ āyatiṃ punabbhavābhinibbatti
na hotīti.
The Pali Tipitaka in Roman Character Volume 12 page 512-540.
https://84000.org/tipitaka/read/roman_item.php?book=12&item=479&items=20
Classified by [Item Number] :-
http://84000.org/tipitaka/read/roman_item.php?book=12&item=479&items=20&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=12&item=479&items=20
Compare with The Royal Version of Thai Tipitaka :-
https://84000.org/tipitaka/read/byitem.php?book=12&item=479&items=20
Study Atthakatha :-
https://84000.org/tipitaka/attha/attha.php?b=12&i=479
Contents of The Tipitaka Volume 12
https://84000.org/tipitaka/read/?index_12
https://84000.org/tipitaka/english/?index_12
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
