Paribbājakavaggo
------
cūḷavacchagottasuttaṃ 1-
[240] Evamme sutaṃ ekaṃ samayaṃ bhagavā vesāliyaṃ viharati
mahāvane kūṭāgārasālāyaṃ . tena kho pana samayena vacchagotto
paribbājako ekapuṇḍarīke paribbājakārāme paṭivasati . atha
kho bhagavā pubbaṇhasamayaṃ nivāsetvā pattacīvaramādāya vesāliṃ 2-
piṇḍāya pāvisi . atha kho bhagavato etadahosi atippago kho
tāva vesāliyaṃ piṇḍāya carituṃ yannūnāhaṃ yena ekapuṇḍarīko
paribbājakārāmo yena vacchagotto paribbājako tenupasaṅkameyyanti .
Atha kho bhagavā yena ekapuṇḍarīko paribbājakārāmo yena vacchagotto
paribbājako tenupasaṅkami . addasā kho vacchagotto paribbājako
bhagavantaṃ [3]- dūrato āgacchantaṃ disvā bhagavantaṃ etadavoca
etu kho bhante bhagavā svāgataṃ bhante bhagavato 4- cirassaṃ kho
bhante bhagavā imaṃ pariyāyamakāsi yadidaṃ idhāgamanāya nisīdatu
bhante bhagavā idamāsanaṃ paññattanti . nisīdi bhagavā paññatte
āsane . vacchagottopi kho paribbājako aññataraṃ nīcaṃ āsanaṃ
gahetvā ekamantaṃ nisīdi.
@Footnote: 1 Ma. Yu. tevijjavacchagottasuttaṃ . 2 Po. vesāliyaṃ.
@3 Yu. etthantare vāsaddo atthi. 4 Po. bhagavā.
[241] Ekamantaṃ nisinno kho vacchagotto paribbājako
bhagavantaṃ etadavoca sutametaṃ bhante samaṇo gotamo sabbaññū
sabbadassāvī aparisesaṃ ñāṇadassanaṃ paṭijānāti carato ca me
tiṭṭhato ca suttassa ca jāgarassa ca satataṃ samitaṃ ñāṇadassanaṃ
paccupaṭṭhitanti ye te bhante evamāhaṃsu samaṇo gotamo
sabbaññū sabbadassāvī aparisesaṃ ñāṇadassanaṃ paṭijānāti carato
ca me tiṭṭhato ca suttassa ca jāgarassa ca satataṃ samitaṃ ñāṇadassanaṃ
paccupaṭṭhitanti kacci te bhante bhagavato vuttavādino na ca
bhagavantaṃ abhūtena abbhācikkhanti dhammassa cānudhammaṃ byākaronti
na ca koci sahadhammiko vādānuvādo gārayhaṃ ṭhānaṃ āgacchatīti .
Ye te vaccha evamāhaṃsu samaṇo gotamo sabbaññū sabbadassāvī
aparisesaṃ ñāṇadassanaṃ paṭijānāti carato ca me tiṭṭhato ca suttassa
ca jāgarassa ca satataṃ samitaṃ ñāṇadassanaṃ paccupaṭṭhitanti na me te
vuttavādino abbhācikkhanti ca pana mante 1- asatā abhūtenāti.
[242] Kathaṃ byākaramānā pana mayaṃ bhante vuttavādino ceva
bhagavato assāma na ca bhagavantaṃ abhūtena abbhācikkheyyāma dhammassa
cānudhammaṃ byākareyyāma na ca koci sahadhammiko vādānuvādo
gārayhaṃ ṭhānaṃ āgaccheyyāti . tevijjo samaṇo gotamoti
kho vaccha byākaramāno vuttavādī ceva me assa na ca
@Footnote: 1 Ma. maṃ.
Maṃ abhūtena abbhācikkheyya dhammassa cānudhammaṃ byākareyya na ca
koci sahadhammiko vādānuvādo gārayhaṃ ṭhānaṃ āgaccheyya . ahaṃ
hi vaccha yāvadeva ākaṅkhāmi anekavihitaṃ pubbenivāsaṃ anussarāmi
seyyathīdaṃ ekampi jātiṃ dvepi jātiyo .pe. iti sākāraṃ sauddesaṃ
anekavihitaṃ pubbenivāsaṃ anussarāmi . ahaṃ hi vaccha yāvadeva
ākaṅkhāmi dibbena cakkhunā visuddhena atikkantamānusakena satte
passāmi cavamāne upapajjamāne hīne paṇīte suvaṇṇe dubbaṇṇe
sugate duggate .pe. yathākammūpage satte pajānāmi . ahaṃ hi vaccha
āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme
sayaṃ abhiññā sacchikatvā upasampajja viharāmi.
{242.1} Tevijjo samaṇo gotamoti kho vaccha byākaramāno
vuttavādī ceva me assa na ca maṃ abhūtena abbhācikkheyya dhammassa
cānudhammaṃ byākareyya na ca koci sahadhammiko vādānuvādo
gārayhaṃ ṭhānaṃ āgaccheyyāti.
[243] Evaṃ vutte vacchagotto paribbājako bhagavantaṃ etadavoca
atthi nu kho bho gotama koci gihī gihisaññojanaṃ appahāya [1]-
kāyassa bhedā dukkhassantakaroti . natthi kho vaccha koci gihī
gihisaññojanaṃ appahāya kāyassa bhedā dukkhassantakaroti 2-.
{243.1} Atthi pana bho gotama koci gihī gihisaññojanaṃ appahāya
kāyassa bhedā [3]- saggūpagoti. Na 4- kho vaccha ekaṃyeva sataṃ na dve satāni
@Footnote: 1 Po. diṭṭheva dhamme . 2 katthaci dukkhassantaṃ karoti . 3 Po. parammaraṇā.
@4 Ma. na kho vaccha...saggūpagāti ime pāṭhā natthi. idha pana atthi kho vaccha
@koci gihi gihisaññojanaṃ appahāya kāyassa bhedā saggūpagotīti ime pāṭhā dissanti.
Na tīṇi satāni na cattāri satāni na pañca satāni atha kho bhiyyova
ye gihī gihisaññojanaṃ appahāya kāyassa bhedā saggūpagāti.
{243.2} Atthi nu kho bho gotama koci ājīvako kāyassa
bhedā dukkhassantakaroti . natthi kho vaccha koci ājīvako kāyassa
bhedā dukkhassantakaroti . atthi pana bho gotama koci ājīvako
kāyassa bhedā saggūpagoti . ito kho so 1- vaccha ekanavuto 2-
kappo yamahaṃ anussarāmi nābhijānāmi 3- kañci ājīvakaṃ saggūpagaṃ
aññatra ekena so cāpi 4- kammavādī kiriyavādīti . evaṃ sante
bho gotama suññaṃ aduṃ titthāyatanaṃ antamaso saggūpagenāti 5- .
Evaṃ [6]- vaccha suññaṃ aduṃ titthāyatanaṃ antamaso saggūpagenāpīti.
Idamavoca bhagavā attamano vacchagotto paribbājako bhagavato
bhāsitaṃ abhinandīti.
Cūḷavacchagottasuttaṃ niṭṭhitaṃ paṭhamaṃ.
------------
@Footnote: 1 Ma. soti pāṭho natki . 2 Po. ekūnanavutikappe . Ma. ekanavute kappe.
@3 Ma. abhijānāmi na kiñci . 4 Ma. so pāsiṃ. Yu. so pāsi . 5 Ma. saggūpagenapīti.
@Yu. saggūpagenāpīti. [6] Yu. etthantare santeti pāṭho dissati.
Aggivacchagottasuttaṃ
[244] Evamme sutaṃ ekaṃ samayaṃ bhagavā sāvatthiyaṃ viharati
jetavane anāthapiṇḍikassa ārāme . atha kho vacchagotto
paribbājako yena bhagavā tenupasaṅkami upasaṅkamitvā bhagavatā
saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ
nisīdi.
[245] Ekamantaṃ nisinno kho vacchagotto paribbājako
bhagavantaṃ etadavoca kinnu kho bho gotama sassato loko idameva
saccaṃ moghamaññanti evaṃdiṭṭhī 1- bhavaṃ gotamoti.
{245.1} Na kho ahaṃ vaccha evaṃdiṭṭhī sassato loko idameva saccaṃ
moghamaññanti . kiṃ 2- pana bho gotama asassato loko idameva saccaṃ
moghamaññanti evaṃdiṭṭhī bhavaṃ gotamoti . na kho ahaṃ vaccha evaṃdiṭṭhī
asassato loko idameva saccaṃ moghamaññanti . kinnu kho bho gotama
antavā loko idameva saccaṃ moghamaññanti evaṃdiṭṭhī bhavaṃ gotamoti.
{245.2} Na kho ahaṃ vaccha evaṃdiṭṭhī antavā loko
idameva saccaṃ moghamaññanti . kiṃ 3- pana bho gotama anantavā
loko idameva saccaṃ moghamaññanti evaṃdiṭṭhī bhavaṃ gotamoti .
Na kho ahaṃ vaccha evaṃdiṭṭhī anantavā loko idameva saccaṃ
moghamaññanti . kinnu kho bho gotama taṃ jīvaṃ taṃ sarīraṃ
@Footnote: 1 Yu. sabbattha evaṃdiṭṭhi iti dissati . 2-3 Po. kinnukho. Ma. kiṃ nu kho.
Idameva saccaṃ moghamaññanti evaṃdiṭṭhī bhavaṃ gotamoti . na kho
ahaṃ vaccha evaṃdiṭṭhī taṃ jīvaṃ taṃ sarīraṃ idameva saccaṃ moghamaññanti .
Kiṃ 1- pana bho gotama aññaṃ jīvaṃ aññaṃ sarīraṃ idameva saccaṃ
moghamaññanti evaṃdiṭṭhī bhavaṃ gotamoti . na kho ahaṃ vaccha
evaṃdiṭṭhī aññaṃ jīvaṃ aññaṃ sarīraṃ idameva saccaṃ moghamaññanti .
Kinnu kho bho gotama hoti tathāgato parammaraṇā idameva saccaṃ
moghamaññanti evaṃdiṭṭhī bhavaṃ gotamoti.
{245.3} Na kho ahaṃ vaccha evaṃdiṭṭhī hoti tathāgato parammaraṇā
idameva saccaṃ moghamaññanti . kiṃ 1- pana bho gotama na hoti
tathāgato parammaraṇā idameva saccaṃ moghamaññanti evaṃdiṭṭhī bhavaṃ
gotamoti . na kho ahaṃ vaccha evaṃdiṭṭhī na hoti tathāgato
parammaraṇā idameva saccaṃ moghamaññanti . kinnu kho bho
gotama hoti ca na ca hoti tathāgato parammaraṇā idameva
saccaṃ moghamaññanti evaṃdiṭṭhī bhavaṃ gotamoti.
{245.4} Na kho ahaṃ vaccha evaṃdiṭṭhī hoti ca na ca hoti tathāgato
parammaraṇā idameva saccaṃ moghamaññanti . kiṃ pana bho gotama neva
hoti na na hoti tathāgato parammaraṇā idameva saccaṃ moghamaññanti
evaṃdiṭṭhī bhavaṃ gotamoti . na kho ahaṃ vaccha evaṃdiṭṭhī neva hoti na na
hoti tathāgato parammaraṇā idameva saccaṃ moghamaññanti.
@Footnote: 1 Po. kinnu kho. ito paraṃ sabbattha īdisameva.
[246] Kinnu kho bho gotama sassato loko idameva saccaṃ
moghamaññanti evaṃdiṭṭhī bhavaṃ gotamoti iti puṭṭho samāno na
kho ahaṃ vaccha evaṃdiṭṭhī sassato loko idameva saccaṃ moghamaññanti
vadesi . kiṃ pana bho gotama asassato loko idameva saccaṃ
moghamaññanti evaṃdiṭṭhī bhavaṃ gotamoti iti puṭṭho samāno
na kho ahaṃ vaccha evaṃdiṭṭhī asassato loko idameva saccaṃ
moghamaññanti vadesi . kinnu kho bho gotama antavā loko
idameva saccaṃ moghamaññanti evaṃdiṭṭhī bhavaṃ gotamoti iti
puṭṭho samāno na kho ahaṃ vaccha evaṃdiṭṭhī antavā loko
idameva saccaṃ moghamaññanti vadesi.
{246.1} Kiṃ pana bho gotama anantavā loko idameva saccaṃ
moghamaññanti evaṃdiṭṭhī bhavaṃ gotamoti iti puṭṭho samāno na kho
ahaṃ vaccha evaṃdiṭṭhī anantavā loko idameva saccaṃ moghamaññanti
vadesi . kinnu kho bho gotama taṃ jīvaṃ taṃ sarīraṃ idameva saccaṃ moghamaññanti
evaṃdiṭṭhī bhavaṃ gotamoti iti puṭṭho samāno na kho ahaṃ vaccha
evaṃdiṭṭhī taṃ jīvaṃ taṃ sarīraṃ idameva saccaṃ moghamaññanti vadesi .
Kiṃ pana bho gotama aññaṃ jīvaṃ aññaṃ sarīraṃ idameva saccaṃ
moghamaññanti evaṃdiṭṭhī bhavaṃ gotamoti iti puṭṭho samāno na
kho ahaṃ vaccha evaṃdiṭṭhī aññaṃ jīvaṃ aññaṃ sarīraṃ idameva saccaṃ
moghamaññanti vadesi.
{246.2} Kinnu kho bho gotama hoti tathāgato
Parammaraṇā idameva saccaṃ moghamaññanti evaṃdiṭṭhī bhavaṃ gotamoti
iti puṭṭho samāno na kho ahaṃ vaccha evaṃdiṭṭhī hoti tathāgato
parammaraṇā idameva saccaṃ moghamaññanti vadesi . kiṃ pana bho gotama
na hoti tathāgato parammaraṇā idameva saccaṃ moghamaññanti
evaṃdiṭṭhī bhavaṃ gotamoti iti puṭṭho samāno na kho ahaṃ vaccha
evaṃdiṭṭhī na hoti tathāgato parammaraṇā idameva saccaṃ
moghamaññanti vadesi.
{246.3} Kinnu kho bho gotama hoti ca na ca hoti tathāgato
parammaraṇā idameva saccaṃ moghamaññanti evaṃdiṭṭhī bhavaṃ gotamoti
iti puṭṭho samāno na kho ahaṃ vaccha evaṃdiṭṭhī hoti ca na ca hoti
tathāgato parammaraṇā idameva saccaṃ moghamaññanti vadesi . kiṃ
pana bho gotama neva hoti na na hoti tathāgato parammaraṇā idameva
saccaṃ moghamaññanti evaṃdiṭṭhī bhavaṃ gotamoti iti puṭṭho samāno
na kho ahaṃ vaccha evaṃdiṭṭhī neva hoti na na hoti tathāgato parammaraṇā
idameva saccaṃ moghamaññanti vadesi . kiṃ pana bhavaṃ gotamo ādīnavaṃ
sampassamāno evaṃ imāni sabbaso diṭṭhigatāni anupagatoti.
[247] Sassato lokoti kho vaccha diṭṭhigatametaṃ diṭṭhigahaṇaṃ
diṭṭhikantāro 1- diṭṭhivisūkaṃ diṭṭhivipphanditaṃ diṭṭhisaññojanaṃ sadukkhaṃ
savighātaṃ saupāyāsaṃ sapariḷāhaṃ na nibbidāya na virāgāya na
nirodhāya na upasamāya na abhiññāya na sambodhāya na nibbānāya
@Footnote: 1 Yu. diṭṭhikantāraṃ.
Saṃvattati . asassato lokoti kho vaccha .pe. antavā
lokoti kho vaccha .pe. anantavā lokoti kho vaccha .pe.
Taṃ jīvaṃ taṃ sarīranti kho vaccha .pe. aññaṃ jīvaṃ aññaṃ sarīranti
kho vaccha .pe. hoti tathāgato parammaraṇāti kho vaccha .pe.
Na hoti tathāgato parammaraṇāti kho vaccha .pe. hoti ca na
ca hoti tathāgato parammaraṇāti kho vaccha .pe. neva hoti
na na hoti tathāgato parammaraṇāti kho vaccha diṭṭhigatametaṃ
diṭṭhigahaṇaṃ diṭṭhikantāro diṭṭhivisūkaṃ diṭṭhivipphanditaṃ diṭṭhisaññojanaṃ
sadukkhaṃ savighātaṃ saupāyāsaṃ sapariḷāhaṃ na nibbidāya na virāgāya
na nirodhāya na upasamāya na abhiññāya na sambodhāya na
nibbānāya saṃvattati . imaṃ kho ahaṃ vaccha ādīnavaṃ sampassamāno
evaṃ imāni sabbaso diṭṭhigatāni anupagatoti.
{247.1} Atthi pana bhoto gotamassa kiñci diṭṭhigatanti .
Diṭṭhigatanti kho vaccha apanītametaṃ tathāgatassa diṭṭhañhetaṃ vaccha
tathāgatena iti rūpaṃ iti rūpassa samudayo iti rūpassa atthaṅgamo iti
vedanā iti vedanāya samudayo iti vedanāya atthaṅgamo iti saññā
iti saññāya samudayo iti saññāya atthaṅgamo iti saṅkhārā iti
saṅkhārānaṃ samudayo iti saṅkhārānaṃ atthaṅgamo iti viññāṇaṃ iti
viññāṇassa samudayo iti viññāṇassa atthaṅgamoti tasmā tathāgato
sabbamaññitānaṃ sabbamatthitānaṃ sabbāhaṅkāramamaṅkāramānānusayānaṃ 1-
@Footnote: 1 Ma. ahaṅkāra....
Khayā virāgā nirodhā cāgā paṭinissaggā anupādā vimuttoti
vadāmīti.
[248] Evaṃ vimuttacitto pana bho gotama bhikkhu kuhiṃ uppajjatīti 1-.
Uppajjatīti kho vaccha na upeti . tenahi bho gotama na uppajjatīti.
Na uppajjatīti kho vaccha na upeti . tenahi bho gotama uppajjati
ca na ca uppajjatīti . uppajjati ca na ca uppajjatīti kho vaccha na
upeti . tenahi bho gotama neva uppajjati na na uppajjatīti .
Neva uppajjati na na uppajjatīti kho vaccha na upeti.
[249] Evaṃ vimuttacitto pana bho gotama bhikkhu kuhiṃ
uppajjatīti iti puṭṭho samāno uppajjatīti 2- vaccha na upetīti
vadesi . tenahi bho gotama na uppajjatīti iti puṭṭho samāno
na uppajjatīti kho vaccha na upetīti vadesi . tenahi bho gotama
uppajjati ca na ca uppajjatīti iti puṭṭho samāno uppajjati
ca na ca uppajjatīti kho vaccha na upetīti vadesi . tenahi bho
gotama neva uppajjati na na uppajjatīti iti puṭṭho samāno
neva uppajjati na na uppajjatīti kho vaccha na upetīti vadesi .
Etthāhaṃ bho gotama aññāṇamāpādiṃ ettha sammohamāpādiṃ .
Yāpi me esā bhoto gotamassa purimena kathāsallāpena ahu
@Footnote: 1 upapajjatītipi pāṭho. Ma. sabbattha upapajjatīti dissati.
@2 Ma. upapajjatīti kho vaccha.
Pasādamattā sāpi me etarahi antarahitāti.
[250] Alañhi te vaccha aññāṇāya alaṃ sammohāya gambhīro
hayaṃ 1- vaccha dhammo duddaso duranubodho santo paṇīto atakkāvacaro
nipuṇo paṇḍitavedaniyo so tayā dujjāno aññadiṭṭhikena
aññakkhantikena aññarucikena aññatthayogena 2- aññatthācariyakena
{250.1} tenahi vaccha taṃyevettha paṭipucchissāmi yathā te
khameyya tathā taṃ 3- byākareyyāsi taṃ kiṃ maññasi vaccha sace
te purato aggi jaleyya jāneyyāsi tvaṃ ayaṃ me purato
aggi jalatīti . sace me bho gotama purato aggi jaleyya
jāneyyāhaṃ ayaṃ me purato aggi jalatīti . sace pana taṃ
vaccha evaṃ puccheyya yo te ayaṃ purato aggi jalati ayaṃ aggi
kiṃ paṭicca jalatīti evaṃ puṭṭho tvaṃ vaccha kinti byākareyyāsīti .
Sace maṃ bho gotama evaṃ puccheyya yo te ayaṃ purato aggi
jalati ayaṃ aggi kiṃ paṭicca jalatīti evaṃ puṭṭho ahaṃ bho
gotama evaṃ byākareyyaṃ yo me purato aggi jalati ayaṃ aggi
tiṇakaṭṭhupādānaṃ paṭicca jalatīti . sace 4- vaccha purato so aggi
nibbāyeyya jāneyyāsi tvaṃ ayaṃ me purato aggi nibbutoti .
Sace me bho gotama purato so aggi nibbāyeyya jāneyyāhaṃ
ayaṃ me purato aggi nibbutoti . sace pana taṃ vaccha evaṃ
puccheyya yo te ayaṃ purato aggi nibbuto so aggi ito
@Footnote: 1 Po. cāyaṃ. Ma. tathāyeva . 2 Ma. aññatrayogena aññatra ācariyakena.
@3 Ma. naṃ . 4 Yu. sace te vaccha.
Katamaṃ disaṃ gato puratthimaṃ 1- vā pacchimaṃ vā uttaraṃ vā dakkhiṇaṃ
vāti evaṃ puṭṭho tvaṃ vaccha kinti byākareyyāsīti . na upeti
bho gotama yañhi so bho gotama aggi tiṇakaṭṭhupādānaṃ paṭicca
jalati 2- tassa ca pariyādānā aññassa ca anupahārā 3-
anāhāro nibbutotveva saṅkhyaṃ gacchatīti.
[251] Evameva kho vaccha yena rūpena tathāgataṃ paññāpayamāno
paññāpeyya taṃ rūpaṃ tathāgatassa pahīnaṃ ucchinnamūlaṃ tālāvatthukataṃ
anabhāvaṅgataṃ 4- āyatiṃ anuppādadhammaṃ rūpasaṅkhāvimutto kho vaccha
tathāgato gambhīro appameyyo duppariyogāḷho . seyyathāpi
mahāsamuddo uppajjatīti 5- na upeti na uppajjatīti na upeti
uppajjati ca na ca uppajjatīti na upeti neva uppajjati na na
uppajjatīti na upeti.
{251.1} Yāya vedanāya tathāgataṃ paññāpayamāno
paññāpeyya sā vedanā tathāgatassa pahīnā ucchinnamūlā
tālāvatthukatā anabhāvaṅgatā 6- āyatiṃ anuppādadhammā
vedanāsaṅkhāvimutto 7- kho vaccha tathāgato gambhīro appameyyo
duppariyogāḷho . seyyathāpi mahāsamuddo uppajjatīti na
upeti na uppajjatīti na upeti uppajjati ca na ca uppajjatīti
na upeti neva uppajjati na na uppajjatīti na upeti.
{251.2} Yāya saññāya tathāgataṃ paññāpayamāno
paññāpeyya sā saññā tathāgatassa
@Footnote: 1 Ma. puratthimaṃ vā dakkhiṇaṃ vā pacchimaṃ vā uttaraṃ vāti . 2 Yu. ajalīti dissati.
@3 Po. anupādānā . 5 Po. upapajjatīti sabbattha dissati.
@4-6 Po. ...kataṃ ...katā. 7 Ma. vedanāsaṅkhyavimutto.
Pahīnā ucchinnamūlā tālāvatthukatā anabhāvaṅgatā āyatiṃ
anuppādadhammā saññāsaṅkhāvimutto 1- kho vaccha tathāgato
gambhīro appameyyo duppariyogāḷho . seyyathāpi mahāsamuddo
uppajjatīti na upeti na uppajjatīti na upeti uppajjati ca na ca
uppajjatīti na upeti neva uppajjati na na uppajjatīti na upeti.
{251.3} Yehi saṅkhārehi tathāgataṃ paññāpayamāno paññāpeyya
te saṅkhārā tathāgatassa pahīnā ucchinnamūlā tālāvatthukatā
anabhāvaṅgatā āyatiṃ anuppādadhammā saṅkhārasaṅkhāvimutto kho
vaccha tathāgato gambhīro appameyyo duppariyogāḷho . seyyathāpi
mahāsamuddo uppajjatīti na upeti na uppajjatīti na upeti
uppajjatīti ca na ca uppajjatīti na upeti neva uppajjati na na
uppajjatīti na upeti.
{251.4} Yena viññāṇena tathāgataṃ paññāpayamāno paññāpeyya
taṃ viññāṇaṃ tathāgatassa pahīnaṃ ucchinnamūlaṃ tālāvatthukataṃ anabhāvaṅgataṃ
āyatiṃ anuppādadhammaṃ viññāṇasaṅkhāvimutto kho vaccha tathāgato
gambhīro appameyyo duppariyogāḷho . seyyathāpi mahāsamuddo
uppajjatīti na upeti na uppajjatīti na upeti uppajjati ca na ca
uppajjatīti na upeti neva uppajjati na na uppajjatīti na upetīti 2-.
[252] Evaṃ vutte vacchagotto paribbājako bhagavantaṃ
etadavoca seyyathāpi bho gotama gāmassa vā nigamassa vā
@Footnote: 1 Ma. ...saṅkhYu... . 2 Ma. itisaddo natthi.
Avidūre mahāsālarukkho tassa aniccatā sākhāpalāsaṃ 1- palujjeyya
tacapappaṭikā palujjeyyuṃ pheggu 2- palujjeyya so aparena samayena
apagatasākhāpalāso apagatatacapappaṭiko apagataphegguko suddhe 3- sāre
patiṭṭhito evameva bhoto gotamassa pāvacanaṃ apagatasākhāpalāsaṃ
apagatatacapappaṭikaṃ apagatapheggukaṃ suddhe 4- sāre patiṭṭhitaṃ abhikkantaṃ
bho gotama abhikkantaṃ bho gotama seyyathāpi bho gotama nikkujjitaṃ
vā ukkujjeyya paṭicchannaṃ vā vivareyya mūḷahassa vā maggaṃ
ācikkheyya andhakāre vā telapajjotaṃ dhāreyya cakkhumanto
rūpāni dakkhantīti evameva bhotā gotamena anekapariyāyena dhammo
pakāsito esāhaṃ bhavantaṃ gotamaṃ saraṇaṃ gacchāmi dhammañca
bhikkhusaṅghañca upāsakaṃ maṃ bhavaṃ gotamo dhāretu ajjatagge
pāṇupetaṃ saraṇaṅgatanti.
Aggivacchagottasuttaṃ niṭṭhitaṃ dutiyaṃ.
------------
@Footnote: 1 Ma. sākhāpalāsā palujjeyyuṃ. 2 Ma. pheggū palujjeyyuṃ. 3 Yu. suddho assa.
@4 Ma. Yu. suddhanti dissati.
Mahāvacchagottasuttaṃ
[253] Evamme sutaṃ ekaṃ samayaṃ bhagavā rājagahe viharati
veḷuvane kalandakanivāpe . atha kho vacchagotto paribbājako
yena bhagavā tenupasaṅkami upasaṅkamitvā bhagavatā saddhiṃ sammodi
sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ
nisinno kho vacchagotto paribbājako bhagavantaṃ etadavoca dīgharattāhaṃ
bhotā gotamena sahakathī sādhu me bhavaṃ gotamo saṅkhittena kusalākusalaṃ
desetūti . saṅkhittenapi kho te ahaṃ vaccha kusalākusalaṃ deseyyaṃ
vitthārenapi kho te ahaṃ vaccha kusalākusalaṃ deseyyaṃ apica te ahaṃ
vaccha saṅkhittena kusalākusalaṃ desessāmi 1- taṃ suṇāhi sādhukaṃ
manasikarohi bhāsissāmīti . evaṃ bhoti kho vacchagotto paribbājako
bhagavato paccassosi.
[254] Bhagavā etadavoca lobho 2- kho vaccha akusalaṃ alobho
kho vaccha 3- kusalaṃ doso kho vaccha akusalaṃ adoso kho vaccha kusalaṃ
moho kho vaccha akusalaṃ amoho kho vaccha kusalaṃ iti kho vaccha ime
tayo dhammā akusalā tayo dhammā kusalā.
{254.1} Pāṇātipāto kho vaccha akusalaṃ pāṇātipātā veramaṇī
kusalaṃ adinnādānaṃ kho vaccha akusalaṃ adinnādānā veramaṇī kusalaṃ
kāmesumicchācāro kho vaccha akusalaṃ kāmesumicchācārā veramaṇī kusalaṃ
@Footnote: 1 Po. deseyyāmi . 2 Po. lobho ... doso ... moho ... akusalaṃ alobho ...
@adoso ... amoho ... kusalaṃ . 3 Ma. Yu. kho vacchāti natthi.
Musāvādo kho vaccha akusalaṃ musāvādā veramaṇī kusalaṃ pisuṇā
vācā kho vaccha akusalaṃ pisuṇāya vācāya veramaṇī kusalaṃ pharusā
vācā kho vaccha akusalaṃ pharusāya vācāya veramaṇī kusalaṃ
samphappalāpo kho vaccha akusalaṃ samphappalāpā veramaṇī kusalaṃ
abhijjhā kho vaccha akusalaṃ anabhijjhā kusalaṃ byāpādo kho
vaccha akusalaṃ abyāpādo kusalaṃ micchādiṭṭhi kho vaccha akusalaṃ
sammādiṭṭhi kusalaṃ iti kho vaccha ime dasa dhammā akusalā
dasa dhammā kusalā.
{254.2} Yato kho vaccha bhikkhuno taṇhā pahīnā hoti
ucchinnamūlā tālāvatthukatā anabhāvaṅgatā āyatiṃ anuppādadhammā
hoti so bhikkhu arahaṃ khīṇāsavo vusitavā 1- katakaraṇīyo ohitabhāro
anuppattasadattho parikkhīṇabhavasaññojano sammadaññā vimuttoti.
[255] Tiṭṭhatu bhavaṃ gotamo atthi pana 2- bhoto gotamassa
ekabhikkhu 3- sāvako [4]- āsavānaṃ khayā anāsavaṃ cetovimuttiṃ
paññāvimuttiṃ diṭṭheva dhamme sayaṃ abhiññā sacchikatvā upasampajja
viharatīti . na kho vaccha ekaṃyeva sataṃ na dve satāni na tīṇi satāni na
cattāri satāni na pañca satāni atha kho vaccha 5- bhiyyova ye bhikkhū mama
sāvakā āsavānaṃ khayā anāsavaṃ cetovimuttiṃ paññāvimuttiṃ diṭṭheva
dhamme sayaṃ abhiññā sacchikatvā upasampajja 6- viharantīti.
{255.1} Tiṭṭhatu bhavaṃ gotamo tiṭṭhantu bhikkhū atthi pana bhoto
gotamassa ekabhikkhunīpi sāvikā āsavānaṃ khayā anāsavaṃ cetovimuttiṃ
paññāvimuttiṃ diṭṭheva dhamme sayaṃ abhiññā sacchikatvā
@Footnote: 1 Po. vusitabrahmacariyo . 2 Ma. pana te . 3 Ma. ekabhikkhupi . 4 Ma.
@etthantare yoti dissati . 5 Ma. Yu. ayaṃ pāṭho na dissati 6 Yu. ayaṃ
@pāṭho na dissati 6 Yu. ayaṃ pāṭho na dissati.
Upasampajja viharatīti . na kho vaccha ekaṃyeva sataṃ na dve satāni
na tīṇi satāni na cattāri satāni na pañca satāni atha kho bhiyyova
yā bhikkhuniyo mama sāvikā āsavānaṃ khayā anāsavaṃ cetovimuttiṃ
paññāvimuttiṃ diṭṭheva dhamme sayaṃ abhiññā sacchikatvā upasampajja
viharantīti.
[256] Tiṭṭhatu bhavaṃ gotamo tiṭṭhantu bhikkhū tiṭṭhantu bhikkhuniyo
atthi pana bhoto gotamassa ekupāsakopi sāvako gihī odātavasano
sabrahmacārī 1- pañcannaṃ orambhāgiyānaṃ saññojanānaṃ parikkhayā
opapātiko tattha parinibbāyī anāvattidhammo tasmā lokāti .
Na kho vaccha ekaṃyeva sataṃ na dve satāni na tīṇi satāni na cattāri
satāni na pañca satāni atha kho bhiyyova ye upāsakā mama sāvakā
gihī odātavasanā sabrahmacārino pañcannaṃ orambhāgiyānaṃ
saññojanānaṃ parikkhayā opapātikā tattha parinibbāyino
anāvattidhammā tasmā lokāti.
{256.1} Tiṭṭhatu bhavaṃ gotamo tiṭṭhantu bhikkhū tiṭṭhantu bhikkhuniyo
tiṭṭhantu upāsakā gihī odātavasanā sabrahmacārino 2- atthi pana
bhoto gotamassa ekupāsakopi sāvako gihī odātavasano kāmabhogī
sāsanakaro ovādapatikaro [3]- tiṇṇavicikiccho vigatakathaṃkatho
vesārajjappatto aparappaccayo satthu sāsane viharatīti . na kho vaccha
ekaṃyeva sataṃ na dve satāni na tīṇi satāni na cattāri satāni na pañca
@Footnote: 1 Ma. brahmacārī yo . 2 Ma. brahmacārino . 3 Ma. etthantare yoti dissati.
Satāni atha kho bhiyyova ye upāsakā mama sāvakā gihī odātavasanā
kāmabhogino sāsanakarā ovādapatikarā tiṇṇavicikicchā vigatakathaṃkathā
vesārajjappattā aparappaccayā satthu sāsane viharantīti.
{256.2} Tiṭṭhatu bhavaṃ gotamo tiṭṭhantu bhikkhū tiṭṭhantu bhikkhuniyo
tiṭṭhantu upāsakā gihī odātavasanā sabrahmacārino tiṭṭhantu
upāsakā gihī odātavasanā kāmabhogino atthi pana bhoto gotamassa
ekupāsikāpi sāvikā gihī odātavasanā sabrahmacārinī [1]- pañcannaṃ
orambhāgiyānaṃ saññojanānaṃ parikkhayā opapātikā tatthaparinibbāyinī
anāvattidhammā tasmā lokāti . na kho vaccha ekaṃyeva sataṃ na dve
satāni na tīṇi satāni na cattāri satāni na pañca satāni atha kho
bhiyyova yā upāsikā mama sāvikā gihī odātavasanā sabrahmacāriniyo
pañcannaṃ orambhāgiyānaṃ saññojanānaṃ parikkhayā opapātikā tattha
parinibbāyiniyo anāvattidhammā tasmā lokāti.
{256.3} Tiṭṭhatu bhavaṃ gotamo tiṭṭhantu bhikkhū tiṭṭhantu bhikkhuniyo
tiṭṭhantu upāsakā gihī odātavasanā sabrahmacārino tiṭṭhantu
upāsakā gihī odātavasanā kāmabhogino tiṭṭhantu upāsikā gihī
odātavasanā sabrahmacāriniyo atthi pana bhoto gotamassa
ekupāsikāpi sāvikā gihī odātavasanā kāmabhoginī sāsanakarā 2-
ovādapatikarā [3]- tiṇṇavicikicchā vigatakathaṃkathā vesārajjappattā
aparappaccayā satthu sāsane viharatīti . na kho vaccha ekaṃyeva sataṃ na
@Footnote: 1 Ma. etthantare yāti dissati. 2 Ma. sāsanakārī. 3 Ma. etthantare yāti dissati.
Dve satāni na tīṇi satāni na cattāri satāni na pañca satāni
atha kho bhiyyova yā upāsikā mama sāvikā gihī odātavasanā
kāmabhoginiyo sāsanakarā ovādapatikarā tiṇṇavicikicchā vigatakathaṃkathā
vesārajjappattā aparappaccayā satthu sāsane viharantīti.
[257] Sace hi bho gotama imaṃ dhammaṃ bhavaṃyeva gotamo
ārādhako abhavissa no ca kho bhikkhū ārādhakā abhaviṃsu 1- evamidaṃ
brahmacariyaṃ apparipūraṃ abhavissa tenaṅgena yasmā ca kho bho
gotama imaṃ dhammaṃ bhavañceva gotamo ārādhako bhikkhū ca ārādhakā
evamidaṃ brahmacariyaṃ paripūraṃ tenaṅgena . sace hi bho gotama imaṃ
dhammaṃ bhavañceva gotamo ārādhako abhavissa bhikkhū ca ārādhakā
abhavissaṃsu no ca kho bhikkhuniyo ārādhikā abhaviṃsu evamidaṃ
brahmacariyaṃ apparipūraṃ abhavissa tenaṅgena yasmā ca kho bho
gotama imaṃ dhammaṃ bhavañceva gotamo ārādhako bhikkhū ca ārādhakā
bhikkhuniyo ca ārādhikā evamidaṃ brahmacariyaṃ paripūraṃ tenaṅgena.
The Pali Tipitaka in Roman Character Volume 13 page 236-254.
https://84000.org/tipitaka/read/roman_item.php?book=13&item=240&items=18
Classified by [Item Number] :-
http://84000.org/tipitaka/read/roman_item.php?book=13&item=240&items=18&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=13&item=240&items=18
Compare with The Royal Version of Thai Tipitaka :-
https://84000.org/tipitaka/read/byitem.php?book=13&item=240&items=18
Study Atthakatha :-
https://84000.org/tipitaka/attha/attha.php?b=13&i=240
Contents of The Tipitaka Volume 13
https://84000.org/tipitaka/read/?index_13
https://84000.org/tipitaka/english/?index_13
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
