paliTIPITAKA Volume 15 - Sutta Pitaka 7

Dutiyaṃ ayyikāsuttaṃ [399] Sāvatthīnidānaṃ . atha kho rājā pasenadikosalo divādivassa yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinnaṃ kho rājānaṃ pasenadikosalaṃ bhagavā etadavoca handa kuto nu tvaṃ mahārāja āgacchasi divādivassāti. {399.1} Ayyikā ^1- me bhante kālakatā jiṇṇā vuḍḍhā ^2- mahallikā addhagatā vayo anuppattā vīsavassasatikā jātiyā ayyikā kho pana ^[3]- bhante piyā ahosi manāpā hatthiratanena cepahaṃ ^4- bhante labheyyaṃ mā me ayyikā kālamakāsīti hatthiratanaṃpahaṃ dadeyyaṃ mā me ayyikā kālamakāsīti assaratanena cepahaṃ bhante labheyyaṃ mā me ayyikā kālamakāsīti assaratanaṃpahaṃ dadeyyaṃ mā me ayyikā kālamakāsīti gāmavarena cepahaṃ bhante labheyyaṃ mā me ayyikā kālamakāsīti gāmavaraṃpahaṃ dadeyyaṃ mā me ayyikā kālamakāsīti janapadena ^5- cepahaṃ bhante labheyyaṃ mā me ayyikā kālamakāsīti janapadaṃpahaṃ ^6- dadeyyaṃ mā me ayyikā kālamakāsīti ^[7]- acchariyaṃ bhante abbhūtaṃ bhante yāva subhāsitañcidaṃ bhante bhagavatā sabbe sattā maraṇadhammā maraṇapariyosānā maraṇaṃ anatītāti. [400] Evametaṃ mahārāja evametaṃ mahārāja sabbe sattā @Footnote: ¹ Sī. Yu. ayyakā. ² Sī. vuddhā. ³ Ma. Yu. etthantare mesaddo dissati. @⁴ Ma. Yu. pāhaṃ. ⁵ Sī. janapadapadesena. ⁶ Sī. Ma. janapadapadesaṃ. ⁷ Ma. Yu. @sabbe sattā .pe. maraṇaṃ anatītātīti. ime pāṭhā dissanti. Maraṇadhammā maraṇapariyosānā maraṇaṃ anatītā . seyyathāpi mahārāja yānikānici kumbhakārakabhājanāni āmakāni ceva pakkāni ca sabbāni tāni bhedanadhammāni bhedanapariyosānāni bhedanaṃ anatītāni evameva kho mahārāja sabbe sattā maraṇadhammā maraṇapariyosānā maraṇaṃ anatītāti. [401] Idamavoca .pe. Sabbe sattā marissanti maraṇantaṃ hi jīvitaṃ yathākammaṃ gamissanti puññapāpaphalūpagā nirayaṃ pāpakammantā puññakammā ca sugatiṃ tasmā kareyya kalyāṇaṃ nicayaṃ samparāyikaṃ puññāni paralokasmiṃ patiṭṭhā honti pāṇinanti. Tatiyaṃ lokasuttaṃ [402] Sāvatthiyaṃ ... Ekamantaṃ nisinno kho rājā pasenadikosalo bhagavantaṃ etadavoca kati nu kho bhante lokassa dhammā uppajjamānā uppajjanti ahitāya dukkhāya aphāsuvihārāyāti. [403] Tayo kho mahārāja lokassa dhammā uppajjamānā uppajjanti ahitāya dukkhāya aphāsuvihārāya . katame tayo . Lobho kho mahārāja lokassa dhammo uppajjamāno uppajjati ahitāya dukkhāya aphāsuvihārāya doso kho mahārāja lokassa dhammo uppajjamāno uppajjati ahitāya dukkhāya aphāsuvihārāya Moho kho mahārāja lokassa dhammo uppajjamāno uppajjati ahitāya dukkhāya aphāsuvihārāya . ime kho mahārāja tayo lokassa dhammā uppajjamānā uppajjanti ahitāya dukkhāya aphāsuvihārāyāti. [404] Idamavoca .pe. Lobho doso ca moho ca purisaṃ pāpacetasaṃ hiṃsanti attasambhūtā tacasāraṃva sapphalanti ^1-.

The Pali Tipitaka in Roman Character Volume 15 page 141-143. https://84000.org/tipitaka/read/roman_item.php?book=15&item=399&items=6 Classified by [Item Number] :- http://84000.org/tipitaka/read/roman_item.php?book=15&item=399&items=6&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=15&item=399&items=6 Compare with The Royal Version of Thai Tipitaka :- https://84000.org/tipitaka/read/byitem.php?book=15&item=399&items=6 Study Atthakatha :- https://84000.org/tipitaka/attha/attha.php?b=15&i=399 Contents of The Tipitaka Volume 15 https://84000.org/tipitaka/read/?index_15 https://84000.org/tipitaka/english/?index_15