บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
ThaiVersion PaliThai PaliRoman |
[425] Dvepi mayā bhikkhave vedanā vuttā pariyāyena tissopi mayā vedanā vuttā pariyāyena pañcapi mayā vedanā vuttā pariyāyena chapi mayā vedanā vuttā pariyāyena aṭṭhārasāpi mayā vedanā vuttā pariyāyena chattiṃsāpi mayā vedanā vuttā pariyāyena aṭṭhasataṃpi mayā vedanā vuttā pariyāyena . evaṃ pariyāyadesito bhikkhave mayā dhammo evaṃ pariyāyadesite kho bhikkhave mayā dhamme ye aññamaññassa subhāsitaṃ sulapitaṃ na samanumaññissanti na samanujānissanti na samanumodissanti . tesaṃ etaṃ pāṭikaṅkhaṃ bhaṇḍanajātā kalahajātā vivādāpannā aññamaññaṃ mukhasattīhi vitudantā viharissantīti . evaṃ pariyāyadesito bhikkhave mayā dhammo evaṃ pariyāyadesite kho bhikkhave mayā dhamme ye aññamaññassa subhāsitaṃ sulapitaṃ samanumaññissanti samanujānissanti samanumodissanti . tesaṃ etaṃ pāṭikaṅkhaṃ samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharissantīti. [426] Pañcime bhikkhave kāmaguṇā .pe. Ṭhānaṃ kho panetaṃ bhikkhave vijjati yaṃ aññatitthiyā paribbājakā evaṃ vadeyyuṃ saññāvedayitanirodhaṃ @Footnote: 1 Yu. yamhi sukhaṃ. evamuparipi. Samaṇo gotamo āha tañca sukhasmiṃ paññapeti tayidaṃ kiṃsu tayidaṃ kathaṃsūti . evaṃvādino bhikkhave aññatitthiyā paribbājakā evamassu vacanīyā na kho āvuso bhagavā sukhaññeva vedanaṃ sandhāya sukhasmiṃ paññapeti yattha yattha āvuso sukhaṃ upalabbhati yahiṃ yahiṃ taṃ taṃ tathāgato sukhasmiṃ paññapetīti. Dasamaṃ. Rahogatavaggo dutiyo. Tassuddānaṃ rahogatā 1- dve vātā ca nivāsā dve ānandakā sambahulā ca dve vuttā pañcakaṅgo ca bhikkhunāti. ----------- @Footnote: 1 Ma. rahogataṃ dve ākāsaṃ agāraṃ dve ca ānandā. @ sambahulā duve vuttā pañcakaṅgo ca bhikkhunāti. @ Yu. rahogataṃ dve ākāsaṃ agāraṃ dve ca santakaṃ. @ aṭṭhaṅgena ca dve vuttā pañcakaṅgo ca bhikkhunāti. Aṭṭhasatapariyāyavaggo tatiyo [427] Ekaṃ samayaṃ bhagavā rājagahe viharati veḷuvane kalandakanivāpe. Atha kho moḷiyasivako 1- paribbājako yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno kho moḷiyasivako paribbājako bhagavantaṃ etadavoca santi bho gotama eke samaṇabrāhmaṇā evaṃvādino evaṃdiṭṭhino yaṅkiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbantaṃ pubbekatahetūti. Idha pana 2- bhavaṃ gotamo kimāhāti. {427.1} Pittasamuṭṭhānānipi kho sivaka idhekaccāni vedayitāni uppajjanti . sāmaṃpi kho etaṃ sivaka evaṃ veditabbaṃ yathā pittasamuṭṭhānānipi idhekaccāni vedayitāni uppajjanti . Lokassapi kho etaṃ sivaka saccasammataṃ yathā pittasamuṭṭhānānipi idhekaccāni vedayitāni uppajjanti . tatra sivaka ye te samaṇabrāhmaṇā evaṃvādino evaṃdiṭṭhino yaṅkiñcāyaṃ purisapuggalo paṭisaṃvedayati 3- sukhaṃ vā dukkhaṃ vā adukkhamasukhaṃ vā sabbantaṃ pubbekatahetūti . yañca sāmaṃ ñātaṃ tañca atidhāvanti yaṃ 4- loke saccasammataṃ tañca atidhāvanti . Tasmā tesaṃ samaṇabrāhmaṇānaṃ micchāti vadāmi. {427.2} Semhasamuṭṭhānānipi kho sivaka .pe. Vātasamuṭṭhānānipi kho sivaka .pe. @Footnote: 1 Ma. moḷiyasīvako. Yu. moliyasīvako . 2 Ma. panasaddo natthi. @3 Ma. Yu. paṭisaṃvedeti. 4 Ma. yañca. Yu. yaṃ ca. Sannipātasamuṭṭhānānipi 1- kho sivaka .pe. utupariṇāmajānipi kho sivaka . visamaparihārajānipi kho sivaka . opakkamikānipi kho sivaka .pe. kammavipākajānipi kho sivaka idhekaccāni vedayitāni uppajjanti . sāmaṃpi kho etaṃ sivaka evaṃ veditabbaṃ yathā kammavipākajānipi idhekaccāni vedayitāni uppajjanti lokassapi kho etaṃ sivaka saccasammataṃ yathā kammavipākajānipi idhekaccāni vedayitāni uppajjanti . tattha sivaka ye te samaṇabrāhmaṇā evaṃvādino evaṃdiṭṭhino yaṅkiñcāyaṃ purisapuggalo paṭisaṃvedayati sukhaṃ vā dukkhaṃ vā adukkhamasukhaṃ vā sabbantaṃ pubbekatahetūti . Yañca sāmaṃ ñātaṃ tañca atidhāvanti yaṃ loke saccasammataṃ tañca atidhāvanti tasmā tesaṃ samaṇabrāhmaṇānaṃ micchāti vadāmīti. [428] Evaṃ vutte moḷiyasivako paribbājako bhagavantaṃ etadavoca abhikkantaṃ bho gotama abhikkantaṃ bho gotama upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṅgatanti. [429] Pittaṃ semhañca vāto ca sannipātā utūni ca visamaṃ opakkamikañca 2- kammavipākena aṭṭhamīti. Paṭhamaṃ. [430] Aṭṭhasatapariyāyaṃ vo bhikkhave dhammapariyāyaṃ desissāmi taṃ suṇātha . katamo ca bhikkhave aṭṭhasatapariyāyo dhammapariyāyo . Dvepi mayā bhikkhave vedanā vuttā pariyāyena tissopi mayā vedanā vuttā pariyāyena pañcapi mayā vedanā vuttā pariyāyena @Footnote: 1 Ma. Yu. sannipātikānipi. 2 Ma. Yu. casaddo natthi. Chapi mayā vedanā vuttā pariyāyena aṭṭhārasāpi mayā vedanā vuttā pariyāyena chattiṃsāpi mayā vedanā vuttā pariyāyena aṭṭhasataṃpi mayā vedanā vuttā pariyāyena. [431] Katamā ca bhikkhave dve vedanā kāyikā ca cetasikā ca. Imā vuccanti bhikkhave dve vedanā. [432] Katamā ca bhikkhave tisso vedanā sukhā vedanā dukkhā vedanā adukkhamasukhā vedanā . imā vuccanti bhikkhave tisso vedanā. [433] Katamā ca bhikkhave pañca vedanā sukhindriyaṃ dukkhindriyaṃ somanassindriyaṃ domanassindriyaṃ upekkhindriyaṃ . imā vuccanti bhikkhave pañca vedanā. [434] Katamā ca bhikkhave cha vedanā cakkhusamphassajā vedanā .pe. manosamphassajā vedanā . imā vuccanti bhikkhave cha vedanā. [435] Katamā ca bhikkhave aṭṭhārasa vedanā cha somanassūpavicārā cha domanassūpavicārā cha upekkhūpavicārā . imā vuccanti bhikkhave aṭṭhārasa vedanā. [436] Katamā ca bhikkhave chattiṃsa vedanā cha gehasitāni somanassāni cha nekkhammasitāni somanassāni cha gehasitāni domanassāni cha nekkhammasitāni domanassāni cha gehasitā Upekkhā cha nekkhammasitā upekkhā . imā vuccanti bhikkhave chattiṃsa vedanā. [437] Katamā ca bhikkhave aṭṭhasataṃ vedanā atītā chattiṃsa vedanā anāgatā chattiṃsa vedanā paccuppannā chattiṃsa vedanā . Imā vuccanti bhikkhave aṭṭhasataṃ vedanā . ayaṃpi kho bhikkhave aṭṭhasatapariyāyo dhammapariyāyoti. Dutiyaṃ. [438] Atha kho aññataro bhikkhu yena bhagavā tenupasaṅkami .pe. ekamantaṃ nisinno kho so bhikkhu bhagavantaṃ etadavoca katamā nu kho bhante vedanā katamo vedanāsamudayo katamā vedanāsamudayagāminī paṭipadā katamo vedanānirodho katamā vedanānirodhagāminī paṭipadā ko vedanāya assādo ko ādīnavo kiṃ nissaraṇanti . Tisso imā bhikkhu vedanā sukhā vedanā dukkhā vedanā adukkhamasukhā vedanā . imā vuccanti bhikkhu vedanā . phassasamudayā vedanāsamudayo taṇhā vedanāsamudayagāminī paṭipadā phassanirodhā vedanānirodho ayameva ariyo aṭṭhaṅgiko maggo vedanānirodhagāminī paṭipadā . seyyathīdaṃ . sammādiṭṭhi .pe. sammāsamādhi . yaṃ vedanaṃ paṭicca uppajjati sukhaṃ somanassaṃ ayaṃ vedanāya assādo . Yā vedanā aniccā dukkhā vipariṇāmadhammā ayaṃ vedanāya ādīnavo. Yo vedanāya chandarāgavinayo chandarāgappahānaṃ idaṃ vedanāya nissaraṇanti. Tatiyaṃ. [439] Pubbe me bhikkhave sambodhā anabhisambuddhassa bodhisattasseva sato etadahosi katamā nu kho vedanā katamo vedanāsamudayo katamā vedanāsamudayagāminī paṭipadā katamo vedanānirodho katamā vedanānirodhagāminī paṭipadā ko vedanāya assādo ko ādīnavo kiṃ nissaraṇanti . tassa mayhaṃ bhikkhave etadahosi tisso imā vedanā sukhā vedanā dukkhā vedanā adukkhamasukhā vedanā . imā vuccanti vedanā . phassasamudayā vedanāsamudayo taṇhāvedanāsamudayagāminī paṭipadā .pe. yo vedanāya chandarāgavinayo chandarāgappahānaṃ idaṃ vedanāya nissaraṇanti. Catutthaṃ. [440] Imā vedanāti me bhikkhave pubbe ananussutesu dhammesu cakkhuṃ udapādi ñāṇaṃ udapādi paññā udapādi vijjā udapādi āloko udapādi . ayaṃ vedanāsamudayoti me bhikkhave pubbe ananussutesu dhammesu cakkhuṃ udapādi ñāṇaṃ udapādi paññā udapādi vijjā udapādi āloko udapādi . ayaṃ vedanāsamudayagāminī paṭipadāti me bhikkhave pubbe ananussutesu dhammesu cakkhuṃ udapādi .pe. āloko udapādi . ayaṃ vedanānirodhoti me bhikkhave pubbe ananussutesu dhammesu cakkhuṃ udapādi .pe. Āloko udapādi . ayaṃ vedanānirodhagāminī paṭipadāti me bhikkhave pubbe ananussutesu dhammesu cakkhuṃ udapādi .pe. āloko udapādi . ayaṃ vedanāya assādoti me bhikkhave pubbe ananussutesu Dhammesu .pe. ayaṃ vedanāya ādīnavoti me bhikkhave pubbe ananussutesu dhammesu .pe. idaṃ vedanāya nissaraṇanti me bhikkhave pubbe ananussutesu dhammesu cakkhuṃ udapādi ñāṇaṃ udapādi paññā udapādi vijjā udapādi āloko udapādīti. Pañcamaṃ.The Pali Tipitaka in Roman Character Volume 18 page 283-290. https://84000.org/tipitaka/read/roman_item.php?book=18&item=425&items=16 Classified by [Item Number] :- http://84000.org/tipitaka/read/roman_item.php?book=18&item=425&items=16&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=18&item=425&items=16 Compare with The Royal Version of Thai Tipitaka :- https://84000.org/tipitaka/read/byitem.php?book=18&item=425&items=16 Study Atthakatha :- https://84000.org/tipitaka/attha/attha.php?b=18&i=425 Contents of The Tipitaka Volume 18 https://84000.org/tipitaka/read/?index_18 https://84000.org/tipitaka/english/?index_18
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]