paliTIPITAKA Volume 19 - Sutta Pitaka 11

[955] Seyyathāpi bhikkhave dvinnaṃ kaṭṭhānaṃ saṅghaṭanasamodhānā ^1- usmā jāyati tejo abhinibbattati tesaṃyeva kaṭṭhānaṃ nānābhāvanikkhepā ^2- yā tajjā usmā sā nirujjhati sā vūpasamati . Evameva kho bhikkhave sukhavedaniyaṃ phassaṃ paṭicca uppajjati sukhindriyaṃ so sukhitova samāno sukhitosmīti pajānāti tasseva sukhavedaniyassa phassassa nirodhā yantajjaṃ vedayitaṃ sukhavedaniyaṃ phassaṃ paṭicca uppannaṃ sukhindriyaṃ taṃ nirujjhati taṃ vūpasamatīti pajānāti . dukkhavedaniyaṃ bhikkhave phassaṃ paṭicca .pe. somanassavedaniyaṃ bhikkhave phassaṃ paṭicca. Domanassavedaniyaṃ bhikkhave phassaṃ paṭicca . upekkhāvedaniyaṃ bhikkhave phassaṃ paṭicca uppajjati upekkhindriyaṃ so upekkhakova samāno upekkhakosmīti pajānāti tasseva upekkhāvedaniyassa phassassa nirodhā yantajjaṃ vedayitaṃ upekkhāvedaniyaṃ phassaṃ paṭicca uppannaṃ ^3- upekkhindriyaṃ taṃ nirujjhati taṃ vūpasamatīti pajānātīti. [956] Pañcimāni bhikkhave indriyāni. Katamāni pañca. Dukkhindriyaṃ @Footnote: ¹ Ma. saṅghaṭṭanasamodhānā. Yu. saṅghaṭṭanāsamodhānā. ² Ma. nānābhāvāvinikkhepā. @Yu. nānābhāvānikkhepā. ³ Ma. uppajjati. Domanassindriyaṃ sukhindriyaṃ somanassindriyaṃ upekkhindriyaṃ. [957] Idha bhikkhave bhikkhuno appamattassa ātāpino pahitattassa viharato uppajjati dukkhindriyaṃ . so evaṃ pajānāti uppannaṃ kho me idaṃ dukkhindriyaṃ tañca kho sanimittaṃ sanidānaṃ sasaṅkhāraṃ sappaccayaṃ tañca animittaṃ anidānaṃ asaṅkhāraṃ appaccayaṃ dukkhindriyaṃ uppajjissatīti netaṃ ṭhānaṃ vijjatīti . so dukkhindriyañca pajānāti dukkhindriyasamudayañca pajānāti dukkhindriyanirodhañca pajānāti yattha cuppannaṃ dukkhindriyaṃ aparisesaṃ nirujjhati tañca pajānāti . kattha cuppannaṃ dukkhindriyaṃ aparisesaṃ nirujjhati . Idha bhikkhave bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamajjhānaṃ upasampajja viharati . Ettha cuppannaṃ dukkhindriyaṃ aparisesaṃ nirujjhati . ayaṃ vuccati bhikkhave bhikkhu aññāsi dukkhindriyassa nirodhaṃ tathattāya cittaṃ upasaṃharati ^1-. [958] Idha pana bhikkhave bhikkhuno appamattassa ātāpino pahitattassa viharato uppajjati domanassindriyaṃ . so evaṃ pajānāti uppannaṃ kho me idaṃ domanassindriyaṃ tañca kho sanimittaṃ sanidānaṃ sasaṅkhāraṃ sappaccayaṃ tañca ^2- animittaṃ anidānaṃ asaṅkhāraṃ appaccayaṃ domanassindriyaṃ uppajjatīti netaṃ ṭhānaṃ @Footnote: ¹ Sī. sabbavāresu upasaṃhāsīti pāṭho dissati. ² Yu. taṃ vata. Vijjatīti ^1- . so domanassindriyañca pajānāti domanassindriyasamudayañca pajānāti domanassindriyanirodhañca pajānāti yattha cuppannaṃ domanassindriyaṃ aparisesaṃ nirujjhati tañca pajānāti. {958.1} Kattha cuppannaṃ domanassindriyaṃ aparisesaṃ nirujjhati . Idha bhikkhave bhikkhu vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyajjhānaṃ upasampajja viharati . ettha cuppannaṃ domanassindriyaṃ aparisesaṃ nirujjhati . ayaṃ vuccati bhikkhave bhikkhu aññāsi domanassindriyassa nirodhaṃ tathattāya cittaṃ upasaṃharati. [959] Idha pana bhikkhave bhikkhuno appamattassa ātāpino pahitattassa viharato uppajjati sukhindriyaṃ . so evaṃ pajānāti uppannaṃ kho me idaṃ sukhindriyaṃ tañca kho sanimittaṃ sanidānaṃ sasaṅkhāraṃ sappaccayaṃ tañca animittaṃ anidānaṃ asaṅkhāraṃ appaccayaṃ sukhindriyaṃ uppajjissatīti netaṃ ṭhānaṃ vijjatīti . so sukhindriyañca pajānāti sukhindriyasamudayañca pajānāti sukhindriyanirodhañca pajānāti yattha cuppannaṃ sukhindriyaṃ aparisesaṃ nirujjhati tañca pajānāti . kattha cuppannaṃ sukhindriyaṃ aparisesaṃ nirujjhati . idha bhikkhave bhikkhu pītiyā ca virāgā upekkhako ca viharati sato ca sampajāno sukhañca kāyena paṭisaṃvedeti yantaṃ ariyā ācikkhanti upekkhako satimā sukhavihārīti tatiyajjhānaṃ upasampajja viharati . @Footnote: ¹ Ma. itisaddo na dissati. evamuparipi. Ettha cuppannaṃ sukhindriyaṃ aparisesaṃ nirujjhati . ayaṃ vuccati bhikkhave bhikkhu aññāsi sukhindriyassa nirodhaṃ tathattāya cittaṃ upasaṃharati. [960] Idha pana bhikkhave bhikkhuno appamattassa ātāpino pahitattassa viharato uppajjati somanassindriyaṃ . so evaṃ pajānāti uppannaṃ kho me idaṃ somanassindriyaṃ tañca kho sanimittaṃ sanidānaṃ sasaṅkhāraṃ sappaccayaṃ tañca animittaṃ anidānaṃ asaṅkhāraṃ appaccayaṃ somanassindriyaṃ uppajjissatīti netaṃ ṭhānaṃ vijjatīti . so somanassindriyañca pajānāti somanassindriyasamudayañca pajānāti somanassindriyanirodhañca pajānāti yattha cuppannaṃ somanassindriyaṃ aparisesaṃ nirujjhati tañca pajānāti . kattha cuppannaṃ somanassindriyaṃ aparisesaṃ nirujjhati . idha bhikkhave bhikkhu sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthajjhānaṃ upasampajja viharati . ettha cuppannaṃ somanassindriyaṃ aparisesaṃ nirujjhati . ayaṃ vuccati bhikkhave bhikkhu aññāsi somanassindriyassa nirodhaṃ tathattāya cittaṃ upasaṃharati.

The Pali Tipitaka in Roman Character Volume 19 page 282-285. https://84000.org/tipitaka/read/roman_item.php?book=19&item=955&items=6 Classified by [Item Number] :- http://84000.org/tipitaka/read/roman_item.php?book=19&item=955&items=6&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=19&item=955&items=6 Compare with The Royal Version of Thai Tipitaka :- https://84000.org/tipitaka/read/byitem.php?book=19&item=955&items=6 Study Atthakatha :- https://84000.org/tipitaka/attha/attha.php?b=19&i=955 Contents of The Tipitaka Volume 19 https://84000.org/tipitaka/read/?index_19 https://84000.org/tipitaka/english/?index_19