Chakkaniddeso
[147] Tatra yvāyaṃ puggalo pubbe ananussutesu dhammesu sāmaṃ
saccāni abhisambujjhati tattha ca sabbaññutaṃ pāpuṇāti balesu ca
vasībhāvaṃ sammāsambuddho tena daṭṭhabbo.
{147.1} Tatra yvāyaṃ puggalo pubbe ananussutesu dhammesu sāmaṃ
saccāni abhisambujjhati na ca tattha sabbaññutaṃ pāpuṇāti na balesu
ca vasībhāvaṃ paccekasambuddho tena daṭṭhabbo.
{147.2} Tatra yvāyaṃ puggalo pubbe ananussutesu dhammesu
sāmaṃ saccāni anabhisambujjhati diṭṭheva dhamme dukkhassantakaro hoti
sāvakapāramiñca pāpuṇāti sārīputtamoggallānā tena daṭṭhabbā.
{147.3} Tatra yvāyaṃ puggalo pubbe ananussutesu dhammesu sāmaṃ saccāni
Anabhisambujjhati diṭṭheva dhamme dukkhassantakaro hoti na ca sāvakapāramiṃ
pāpuṇāti avasesā arahanto tena daṭṭhabbā.
{147.4} Tatra yvāyaṃ puggalo pubbe ananussutesu dhammesu sāmaṃ
saccāni anabhisambujjhati na ca diṭṭheva dhamme dukkhassantakaro hoti
anāgāmī hoti anāgantvā itthattaṃ anāgāmī tena daṭṭhabbo.
{147.5} Tatra yvāyaṃ puggalo pubbe ananussutesu dhammesu sāmaṃ
saccāni anabhisambujjhati na ca diṭṭheva dhamme dukkhassantakaro hoti
āgantvā itthattaṃ sotāpannasakadāgāmino tena daṭṭhabbā.
Chakkaniddeso niṭṭhito.
---------
Sattakaniddeso
[148] Kathañca puggalo sakiṃ nimuggo nimuggova hoti idhekacco
puggalo samannāgato hoti ekantakāḷakehi akusalehi dhammehi evaṃ
puggalo sakiṃ nimuggo nimuggova hoti.
{148.1} Kathañca puggalo ummujjitvā nimujjati idhekacco puggalo
ummujjati sāhusaddhākusalesu dhammesu ummujjati sāhuhirikusalesu dhammesu
ummujjati sāhuottappakusalesu dhammesu ummujjati sāhuviriyakusalesu
dhammesu ummujjati sāhupaññākusalesu dhammesūti tassa sā saddhā neva
tiṭṭhati no vaḍḍhati hāyatiyeva tassa sā hiri neva tiṭṭhati no vaḍḍhati hāyatiyeva
Tassa taṃ ottappaṃ neva tiṭṭhati no vaḍḍhati hāyatiyeva tassa
taṃ viriyaṃ neva tiṭṭhati no vaḍḍhati hāyatiyeva tassa sā paññā
neva tiṭṭhati no vaḍḍhati hāyatiyeva evaṃ puggalo ummujjitvā
nimujjati.
{148.2} Kathañca puggalo ummujjitvā ṭhito hoti idhekacco
puggalo ummujjati sāhusaddhākusalesu dhammesu ... sāhuhirikusalesu
dhammesu sāhuottappakusalesu dhammesu sāhuviriyakusalesu dhammesu
sāhupaññākusalesu dhammesūti tassa sā saddhā neva hāyati no
vaḍḍhati ṭhitā hoti tassa sā hiri neva hāyati no vaḍḍhati ṭhitā
hoti tassa taṃ ottappaṃ neva hāyati no vaḍḍhati ṭhitaṃ hoti tassa
taṃ viriyaṃ neva hāyati no vaḍḍhati ṭhitaṃ hoti tassa sā paññā
neva hāyati no vaḍḍhati ṭhitā hoti evaṃ puggalo ummujjitvā
ṭhito hoti.
{148.3} Kathañca puggalo ummujjitvā vipassati viloketi
idhekacco puggalo ummujjati sāhusaddhākusalesu dhammesu ...
Sāhuhirikusalesu dhammesu sāhuottappakusalesu dhammesu sāhuviriyakusalesu
dhammesu sāhupaññākusalesu dhammesūti so tiṇṇaṃ saññojanānaṃ
parikkhayā sotāpanno hoti avinipātadhammo niyato sambodhiparāyano
evaṃ puggalo ummujjitvā vipassati viloketi.
{148.4} Kathañca puggalo ummujjitvā patarati idhekacco puggalo
ummujjati sāhusaddhākusalesu dhammesu ... sāhuhirikusalesu dhammesu
sāhuottappakusalesu dhammesu sāhuviriyakusalesu dhammesu
sāhupaññākusalesu dhammesūti so tiṇṇaṃ
Saññojanānaṃ parikkhayā rāgadosamohānaṃ tanuttā sakadāgāmī hoti
sakideva imaṃ lokaṃ āgantvā dukkhassantakaro hoti evaṃ puggalo
ummujjitvā patarati.
{148.5} Kathañca puggalo ummujjitvā paṭigādhappatto
hoti idhekacco puggalo ummujjati sāhusaddhākusalesu dhammesu ...
Sāhuhirikusalesu dhammesu sāhuottappakusalesu dhammesu sāhuviriyakusalesu
dhammesu sāhupaññākusalesu dhammesūti so pañcannaṃ orambhāgiyānaṃ
saññojanānaṃ parikkhayā opapātiko hoti tattha parinibbāyī anāvattidhammo
tasmā lokā evaṃ puggalo ummujjitvā paṭigādhappatto
hoti.
{148.6} Kathañca puggalo ummujjitvā tiṇṇo hoti pāragato
thale tiṭṭhati brāhmaṇo idhekacco puggalo ummujjati sāhusaddhākusalesu
dhammesu ummujjati sāhuhirikusalesu dhammesu ummujjati sāhuottappakusalesu
dhammesu ummujjati sāhuhirikusalesu dhammesu ummujjati sāhupaññākusalesu
dhammesūti so āsavānaṃ khayā anāsavaṃ cetovimuttiṃ paññāvimuttiṃ diṭṭheva
dhamme sayaṃ abhiññā sacchikatvā upasampajja viharati evaṃ puggalo
ummujjitvā tiṇṇo hoti pāragato thale tiṭṭhati brāhmaṇo.
The Pali Tipitaka in Roman Character Volume 36 page 229-232.
https://84000.org/tipitaka/read/roman_item.php?book=36.2&item=147&items=2
Classified by [Item Number] :-
http://84000.org/tipitaka/read/roman_item.php?book=36.2&item=147&items=2&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=36.2&item=147&items=2
Compare with The Royal Version of Thai Tipitaka :-
https://84000.org/tipitaka/read/byitem.php?book=36.2&item=147&items=2
Study Atthakatha :-
https://84000.org/tipitaka/attha/attha.php?b=36.2&i=147
Contents of The Tipitaka Volume 36
https://84000.org/tipitaka/read/?index_36
https://84000.org/tipitaka/english/?index_36
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
