บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
ThaiVersion PaliThai PaliRoman |
[1189] Vipāko vipākadhammadhammoti . āmantā . vipāko ca vipākadhammadhammo ca vipākadhammadhammo ca vipāko ca sahagatā sahajātā saṃsaṭṭhā sampayuttā ekuppādā ekanirodhā ekavatthukā ekārammaṇāti. Na hevaṃ vattabbe .pe. [1190] Vipāko vipākadhammadhammoti . āmantā . taññeva akusalaṃ so akusalassa vipāko taññeva kusalaṃ so kusalassa vipākoti. Na hevaṃ vattabbe .pe. [1191] Vipāko vipākadhammadhammoti . āmantā . yeneva cittena pāṇaṃ hanati teneva cittena niraye paccati yeneva cittena dānaṃ deti teneva cittena sagge modatīti. Na hevaṃ vattabbe .pe. [1192] Na vattabbaṃ vipāko vipākadhammadhammoti . āmantā. Nanu vipākā cattāro khandhā arūpino aññamaññapaccayāti . Āmantā . hañci vipākā cattāro khandhā arūpino aññamaññapaccayā tena vata re vattabbe vipāko vipākadhammadhammoti. Vipāko vipākadhammadhammotikathā. Sattamo vaggo. Tassa uddānaṃ. Saṅgaho sampayogo cetasiko dhammo cetasikaṃ dānaṃ paribhogamayaṃ puññaṃ vaḍḍhati itodinnena tattha yāpenti paṭhavī kammavipāko jarāmaraṇaṃ vipāko natthi ariyadhammavipāko vipāko vipākadhammadhammoti. ------ Chagatikathā [1193] Cha gatiyoti . āmantā . nanu pañca gatiyo vuttā bhagavatā nirayo tiracchānayoni pittivisayo manussā devāti . Āmantā . hañci pañca gatiyo vuttā bhagavatā nirayo tiracchānayoni pittivisayo manussā devā no vata re vattabbe cha gatiyoti. [1194] Cha gatiyoti . āmantā . nanu kālakañjikā asurā petānaṃ samānavaṇṇā samānabhogā samānāhārā samānāyukā petehi Saha āvāhavivāhaṃ gacchantīti . āmantā . hañci kālakañjikā asurā petānaṃ samānavaṇṇā samānabhogā samānāhārā samānāyukā petehi saha āvāhavivāhaṃ gacchanti no vata re vattabbe cha gatiyoti. [1195] Cha gatiyoti. Āmantā. Nanu vepacittiparisā 1- devānaṃ samānavaṇṇā samānabhogā samānāhārā samānāyukā devehi saha āvāhavivāhaṃ gacchantīti . āmantā . hañci vepacittiparisā devānaṃ samānavaṇṇā samānabhogā samānāhārā samānāyukā devehi saha āvāhavivāhaṃ gacchanti no vata re vattabbe cha gatiyoti. [1196] Cha gatiyoti . āmantā . nanu vepacittiparisā pubbadevāti . āmantā . hañci vepacittiparisā pubbadevā no vata re vattabbe cha gatiyoti. [1197] Na vattabbaṃ cha gatiyoti . āmantā . nanu atthi asurakāyoti . āmantā . hañci atthi asurakāyo tena vata re vattabbe cha gatiyoti. Chagatikathā. -------- Antarābhavakathā [1198] Atthi antarābhavoti . āmantā . kāmabhavoti . Na hevaṃ vattabbe .pe. atthi antarābhavoti . āmantā . @Footnote: 1 Ma. vepacitti saparisā. (aññattha īdisameva.) Rūpabhavoti . na hevaṃ vattabbe .pe. atthi antarābhavoti . Āmantā. Arūpabhavoti. Na hevaṃ vattabbe .pe.The Pali Tipitaka in Roman Character Volume 37 page 387-390. https://84000.org/tipitaka/read/roman_item.php?book=37&item=1189&items=10&mode=bracket Classified by content :- https://84000.org/tipitaka/read/roman_item.php?book=37&item=1189&items=10 Compare with The Pali Tipitaka in Thai Character :- https://84000.org/tipitaka/read/pali_item.php?book=37&item=1189&items=10&mode=bracket Compare with The Royal Version of Thai Tipitaka :- https://84000.org/tipitaka/read/byitem.php?book=37&item=1189&items=10&mode=bracket Study Atthakatha :- https://84000.org/tipitaka/attha/attha.php?b=37&i=1189 Contents of The Tipitaka Volume 37 https://84000.org/tipitaka/read/?index_37 https://84000.org/tipitaka/english/?index_37
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]