[1888] Uppanno dhammo uppannassa dhammassa hetupaccayena
paccayo uppannā hetū sampayuttakānaṃ khandhānaṃ cittasamuṭṭhānānañca
rūpānaṃ hetupaccayena paccayo paṭisandhikkhaṇe uppannā hetū
sampayuttakānaṃ khandhānaṃ kaṭattā ca rūpānaṃ hetupaccayena paccayo.
[1889] Uppanno dhammo uppannassa dhammassa ārammaṇapaccayena
paccayo uppannaṃ cakkhuṃ aniccato dukkhato anattato vipassati
assādeti abhinandati taṃ ārabbha rāgo uppajjati diṭṭhi
uppajjati vicikicchā ... uddhaccaṃ ... Domanassaṃ ... Uppannaṃ sotaṃ ...
Ghānaṃ jivhaṃ kāyaṃ rūpe sadde gandhe rase phoṭṭhabbe vatthuṃ ... Uppanne
khandhe aniccato dukkhato anattato vipassati .pe. domanassaṃ
uppajjati dibbena cakkhunā rūpaṃ passati dibbāya sotadhātuyā
saddaṃ suṇāti uppannā khandhā iddhividhañāṇassa āvajjanāya
ārammaṇapaccayena paccayo.
[1890] Anuppanno dhammo uppannassa dhammassa ārammaṇapaccayena
paccayo anuppanne rūpe ... sadde gandhe rase phoṭṭhabbe ...
Anuppanne khandhe aniccato dukkhato anattato vipassati .pe.
Domanassaṃ uppajjati anuppannā khandhā iddhividhañāṇassa
cetopariyañāṇassa anāgataṃsañāṇassa āvajjanāya ārammaṇapaccayena
paccayo.
[1891] Uppādī dhammo uppannassa dhammassa ārammaṇapaccayena
paccayo uppādiṃ cakkhuṃ ... kāyaṃ rūpe sadde gandhe rase phoṭṭhabbe
vatthuṃ ... uppādī khandhe aniccato dukkhato anattato .pe. Domanassaṃ
uppajjati uppādī khandhā iddhividhañāṇassa ceto- .pe. āvajjanāya
ārammaṇapaccayena paccayo.
[1892] Uppanno dhammo uppannassa dhammassa adhipatipaccayena
paccayo ārammaṇādhipati sahajātādhipati . ārammaṇādhipati:
uppannaṃ cakkhuṃ garuṃ katvā assādeti abhinandati taṃ garuṃ katvā .pe.
Diṭṭhi uppajjati uppannaṃ sotaṃ ... ghānaṃ jivhaṃ kāyaṃ rūpe sadde
gandhe rase phoṭṭhabbe vatthuṃ ... uppanne khandhe garuṃ katvā
assādeti abhinandati taṃ garuṃ katvā rāgo uppajjati .pe.
Sahajātādhipati: uppannā adhipati sampayuttakānaṃ cittasamuṭṭhānānañca
rūpānaṃ adhipatipaccayena paccayo.
[1893] Anuppanno dhammo uppannassa dhammassa adhipatipaccayena
paccayo . ārammaṇādhipati: anuppanne rūpe ... sadde gandhe rase
phoṭṭhabbe ... anuppanne khandhe garuṃ katvā assādeti abhinandati
taṃ garuṃ katvā rāgo uppajjati diṭṭhi uppajjati.
[1894] Uppādī dhammo uppannassa dhammassa adhipatipaccayena
paccayo . ārammaṇādhipati: uppādiṃ cakkhuṃ ... Kāyaṃ rūpe ... Phoṭṭhabbe
vatthuṃ ... uppādī khandhe garuṃ katvā assādeti abhinandati taṃ garuṃ
katvā rāgo uppajjati diṭṭhi uppajjati.
[1895] Uppanno dhammo uppannassa dhammassa sahajātapaccayena
paccayo uppanno eko khandho tiṇṇannaṃ khandhānaṃ cittasamuṭṭhānānañca
rūpānaṃ sahajātapaccayena paccayo dve khandhā dvinnaṃ khandhānaṃ
cittasamuṭṭhānānañca rūpānaṃ sahajātapaccayena paccayo paṭisandhikkhaṇe
uppanno eko khandho tiṇṇannaṃ khandhānaṃ kaṭattā ca rūpānaṃ
sahajātapaccayena paccayo dve khandhā dvinnaṃ khandhānaṃ kaṭattā ca
rūpānaṃ sahajātapaccayena paccayo khandhā vatthussa sahajātapaccayena
paccayo vatthu khandhānaṃ sahajātapaccayena paccayo ekaṃ mahābhūtaṃ
tiṇṇannaṃ mahābhūtānaṃ sahajātapaccayena paccayo dve mahābhūtā ...
Mahābhūtā cittasamuṭṭhānānaṃ rūpānaṃ upādārūpānaṃ sahajātapaccayena
paccayo bāhiraṃ ... āhāra ... utu ... asaññasattānaṃ ekaṃ
mahābhūtaṃ ... dve mahābhūtā ... Mahābhūtā kaṭattārūpānaṃ upādārūpānaṃ
sahajātapaccayena paccayo.
[1896] Uppanno dhammo uppannassa dhammassa aññamañña-
paccayena paccayo uppanno eko khandho tiṇṇannaṃ khandhānaṃ
aññamaññapaccayena paccayo dve khandhā ... paṭisandhikkhaṇe
Uppanno eko khandho tiṇṇannaṃ khandhānaṃ vatthussa ca aññamañña-
paccayena paccayo dve khandhā ... khandhā vatthussa aññamaññapaccayena
paccayo vatthu khandhānaṃ aññamaññapaccayena paccayo ekaṃ mahābhūtaṃ
... bāhiraṃ ... āhāra ... utu ... Asaññasattānaṃ ekaṃ mahābhūtaṃ
tiṇṇannaṃ mahābhūtānaṃ aññamaññapaccayena paccayo dve mahābhūtā ....
[1897] Uppanno dhammo uppannassa dhammassa nissayapaccayena
paccayo uppanno eko khandho tiṇṇannaṃ khandhānaṃ cittasamuṭṭhānānañca
rūpānaṃ nissayapaccayena paccayo dve khandhā ... paṭisandhikkhaṇe khandhā
vatthussa vatthu khandhānaṃ ekaṃ mahābhūtaṃ ... Bāhiraṃ ... Āhāra ... Utu ...
Asaññasattānaṃ ekaṃ mahābhūtaṃ ... mahābhūtā kaṭattārūpānaṃ upādārūpānaṃ
cakkhāyatanaṃ cakkhuviññāṇassa kāyāyatanaṃ kāyaviññāṇassa vatthu
uppannānaṃ khandhānaṃ nissayapaccayena paccayo.
[1898] Uppanno dhammo uppannassa dhammassa upanissayapaccayena
paccayo ārammaṇūpanissayo anantarūpanissayo pakatūpanissayo .
Pakatūpanissayo: uppannaṃ utuṃ upanissāya jhānaṃ uppādeti vipassanaṃ ...
Maggaṃ ... abhiññaṃ ... Samāpattiṃ ... Mānaṃ jappeti diṭṭhiṃ gaṇhāti uppannaṃ
bhojanaṃ ... senāsanaṃ upanissāya jhānaṃ uppādeti vipassanaṃ ... Maggaṃ ...
Abhiññaṃ ... samāpattiṃ ... mānaṃ jappeti diṭṭhiṃ gaṇhāti uppannaṃ
Utuṃ ... bhojanaṃ ... senāsanaṃ uppannāya saddhāya paññāya kāyikassa
sukhassa kāyikassa dukkhassa maggassa phalasamāpattiyā
upanissayapaccayena paccayo.
[1899] Anuppanno dhammo uppannassa dhammassa upanissayapaccayena
paccayo ārammaṇūpanissayo anantarūpanissayo pakatūpanissayo .
Pakatūpanissayo: anuppannaṃ vaṇṇasampadaṃ patthayamāno dānaṃ deti sīlaṃ
samādiyati uposathakammaṃ karoti anuppannaṃ saddasampadaṃ ... gandhasampadaṃ
rasasampadaṃ phoṭṭhabbasampadaṃ ... anuppanne khandhe patthayamāno dānaṃ
... sīlaṃ ... uposathakammaṃ ... Anuppannā vaṇṇasampadā ... Anuppannā
khandhā uppannāya saddhāya paññāya kāyikassa sukhassa kāyikassa
dukkhassa maggassa phalasamāpattiyā upanissayapaccayena paccayo.
[1900] Uppādī dhammo uppannassa dhammassa upanissayapaccayena
paccayo ārammaṇūpanissayo anantarūpanissayo pakatūpanissayo .
Pakatūpanissayo: uppādiṃ cakkhusampadaṃ patthayamāno dānaṃ ... sīlaṃ ...
Uposathakammaṃ ... Uppādiṃ sotasampadaṃ ... Kāyasampadaṃ vaṇṇasampadaṃ gandhasampadaṃ
... rasasampadaṃ ... phoṭṭhabbasampadaṃ ... uppādī khandhe patthayamāno
dānaṃ ... Sīlaṃ ... Uposathakammaṃ ... Uppādī cakkhusampadā ... Kāyasampadā
vaṇṇasampadā .pe. phoṭṭhabbasampadā ... uppādī khandhā uppannāya
saddhāya paññāya kāyikassa sukhassa kāyikassa dukkhassa maggassa
Phalasamāpattiyā upanissayapaccayena paccayo.
[1901] Uppanno dhammo uppannassa dhammassa purejātapaccayena
paccayo ārammaṇapurejātaṃ vatthupurejātaṃ . ārammaṇapurejātaṃ:
cakkhuṃ ... vatthuṃ aniccato dukkhato anattato vipassati assādeti
abhinandati taṃ ārabbha rāgo uppajjati domanassaṃ uppajjati
dibbena cakkhunā rūpaṃ ... dibbāya sotadhātuyā saddaṃ suṇāti
rūpāyatanaṃ cakkhuviññāṇassa phoṭṭhabbāyatanaṃ kāyaviññāṇassa
purejātapaccayena paccayo . vatthupurejātaṃ: cakkhāyatanaṃ cakkhuviññāṇassa
.pe. Vatthu uppannānaṃ khandhānaṃ purejātapaccayena paccayo.
[1902] Uppanno dhammo uppannassa dhammassa
pacchājātapaccayena paccayo . pacchājātā: uppannā khandhā
purejātassa imassa kāyassa pacchājātapaccayena paccayo.
[1903] Uppanno dhammo uppannassa dhammassa kammapaccayena
paccayo uppannā cetanā sampayuttakānaṃ khandhānaṃ cittasamuṭṭhānānañca
rūpānaṃ kammapaccayena paccayo paṭisandhikkhaṇe uppannā cetanā
sampayuttakānaṃ khandhānaṃ kaṭattā ca rūpānaṃ kammapaccayena
paccayo.
[1904] Uppanno dhammo uppannassa dhammassa vipākapaccayena
paccayo vipāko uppanno eko khandho tiṇṇannaṃ khandhānaṃ
cittasamuṭṭhānānañca rūpānaṃ vipākapaccayena paccayo dve khandhā ...
Paṭisandhikkhaṇe uppanno eko khandho tiṇṇannaṃ khandhānaṃ kaṭattā ca
rūpānaṃ dve khandhā ... Khandhā vatthussa vipākapaccayena paccayo.
[1905] Uppanno dhammo uppannassa dhammassa āhārapaccayena
paccayo uppannā āhārā sampayuttakānaṃ khandhānaṃ cittasamuṭṭhānānañca
rūpānaṃ āhārapaccayena paccayo paṭisandhikkhaṇe kabaḷiṃkāro āhāro
imassa kāyassa āhārapaccayena paccayo.
[1906] Uppanno dhammo uppannassa dhammassa indriyapaccayena
paccayo uppannā indriyā sampayuttakānaṃ khandhānaṃ cittasamuṭṭhānānañca
rūpānaṃ indriyapaccayena paccayo paṭisandhikkhaṇe cakkhundriyaṃ
cakkhuviññāṇassa kāyindriyaṃ kāyaviññāṇassa rūpajīvitindriyaṃ
kaṭattārūpānaṃ indriyapaccayena paccayo.
[1907] Uppanno dhammo uppannassa dhammassa jhānapaccayena
paccayo maggapaccayena paccayo sampayuttapaccayena paccayo
vippayuttapaccayena paccayo sahajātaṃ purejātaṃ pacchājātaṃ .
Sahajātā: uppannā khandhā cittasamuṭṭhānānaṃ rūpānaṃ vippayuttapaccayena
paccayo paṭisandhikkhaṇe uppannā khandhā kaṭattārūpānaṃ vippayuttapaccayena
paccayo khandhā vatthussa vatthu khandhānaṃ vippayuttapaccayena
paccayo . purejātaṃ: cakkhāyatanaṃ cakkhuviññāṇassa kāyāyatanaṃ
... vatthu uppannānaṃ khandhānaṃ vippayuttapaccayena paccayo .
Pacchājātā: uppannā khandhā purejātassa imassa kāyassa
Vippayuttapaccayena paccayo.
[1908] Uppanno dhammo uppannassa dhammassa atthipaccayena
paccayo sahajātaṃ purejātaṃ pacchājātaṃ āhāraṃ indriyaṃ . sahajāto:
uppanno eko khandho tiṇṇannaṃ khandhānaṃ cittasamuṭṭhanānañca rūpānaṃ
atthipaccayena paccayo dve khandhā ... paṭisandhikkhaṇe . saṅkhittaṃ.
Ekaṃ mahābhūtaṃ ... Bāhiraṃ ... Āhāra ... Utu ... Asaññasattānaṃ ....
Purejātaṃ: cakkhuṃ aniccato dukkhato ... vatthuṃ aniccato ... Domanassaṃ
uppajjati dibbena cakkhunā ... dibbāya sotadhātuyā saddaṃ suṇāti
rūpāyatanaṃ cakkhuviññāṇassa phoṭṭhabbāyatanaṃ kāyaviññāṇassa
atthipaccayena paccayo cakkhāyatanaṃ cakkhuviññāṇassa kāyāyatanaṃ
kāyaviññāṇassa vatthu uppannānaṃ khandhānaṃ atthipaccayena paccayo .
Pacchājātā: uppannā khandhā purejātassa imassa kāyassa
atthipaccayena paccayo . kabaḷiṃkāro āhāro imassa kāyassa
rūpajīvitindriyaṃ kaṭattārūpānaṃ atthipaccayena paccayo.
[1909] Uppanno dhammo uppannassa dhammassa avigatapaccayena
paccayo.
[1910] Hetuyā ekaṃ ārammaṇe tīṇi adhipatiyā tīṇi
sahajāte ekaṃ aññamaññe ekaṃ nissaye ekaṃ upanissaye
tīṇi purejāte ekaṃ pacchājāte kamme vipāke āhāre indriye
jhāne magge sampayutte vippayutte atthiyā avigate ekaṃ .
Evaṃ gaṇetabbaṃ.
Anulomaṃ.
[1911] Uppanno dhammo uppannassa dhammassa ārammaṇapaccayena
paccayo sahajātapaccayena paccayo upanissayapaccayena paccayo
purejātapaccayena paccayo pacchājātapaccayena paccayo āhārapaccayena
paccayo indriyapaccayena paccayo.
[1912] Anuppanno dhammo uppannassa dhammassa ārammaṇapaccayena
paccayo upanissayapaccayena paccayo.
[1913] Uppādī dhammo uppannassa dhammassa ārammaṇapaccayena
paccayo upanissayapaccayena paccayo.
[1914] Nahetuyā tīṇi naārammaṇe tīṇi naadhipatiyā tīṇi .pe.
Navippayutte tīṇi noatthiyā dve nonatthiyā tīṇi novigate tīṇi
noavigate dve. Evaṃ gaṇetabbaṃ.
Paccanīyaṃ.
[1915] Hetupaccayā naārammaṇe ekaṃ . saṅkhittaṃ . ...
Nonatthiyā novigate ekaṃ.
Anulomapaccanīyaṃ.
[1916] Nahetupaccayā ārammaṇe tīṇi ... adhipatiyā tīṇi
sahajāte ekaṃ aññamaññe ekaṃ nissaye ekaṃ upanissaye tīṇi
purejāte ekaṃ pacchājāte ekaṃ kamme vipāke āhāre indriye
Jhāne magge sampayutte vippayutte atthiyā avigate ekaṃ.
Paccanīyānulomaṃ.
Pañhāvāro niṭṭhito.
Uppannattikaṃ sattarasamaṃ
niṭṭhitaṃ
--------
atītattikaṃ
pañhāvāro
[1917] Paccuppanno dhammo paccuppannassa dhammassa
hetupaccayena paccayo paccuppannā hetū sampayuttakānaṃ khandhānaṃ
cittasamuṭṭhānānañca rūpānaṃ hetupaccayena paccayo paṭisandhikkhaṇe ....
[1918] Atīto dhammo paccuppannassa dhammassa ārammaṇapaccayena
paccayo dānaṃ datvā sīlaṃ ... uposathakammaṃ ... paccavekkhati
pubbe suciṇṇāni paccavekkhati jhānā vuṭṭhahitvā jhānaṃ paccavekkhati
ariyā maggā vuṭṭhahitvā maggaṃ paccavekkhanti phalaṃ paccavekkhanti
pahīne kilese paccavekkhanti vikkhambhite kilese paccavekkhanti
atītaṃ cakkhuṃ aniccato dukkhato anattato vipassanti .pe. domanassaṃ
uppajjati atītaṃ sotaṃ ... ghānaṃ jivhaṃ kāyaṃ rūpe sadde gandhe
rase phoṭṭhabbe vatthuṃ ... atīte khandhe aniccato dukkhato anattato
Vipassanti assādenti abhinandanti taṃ ārabbha rāgo uppajjati
diṭṭhi uppajjati vicikicchā ... uddhaccaṃ ... domanassaṃ uppajjati
ākāsānañcāyatanaṃ viññāṇañcāyatanassa ārammaṇapaccayena paccayo
ākiñcaññāyatanaṃ nevasaññānāsaññāyatanassa ārammaṇapaccayena
paccayo atītā khandhā iddhividhañāṇassa cetopariyañāṇassa
pubbenivāsānussatiñāṇassa yathākammūpagañāṇassa āvajjanāya
ārammaṇapaccayena paccayo.
[1919] Anāgato dhammo paccuppannassa dhammassa ārammaṇapaccayena
paccayo anāgataṃ cakkhuṃ ... Vatthuṃ ... Anāgate khandhe aniccato ... Domanassaṃ
uppajjati anāgatā khandhā iddhividhañāṇassa cetopariyañāṇassa
anāgataṃsañāṇassa āvajjanāya ārammaṇapaccayena paccayo.
[1920] Paccuppanno dhammo paccuppannassa dhammassa
ārammaṇapaccayena paccayo paccuppannaṃ cakkhuṃ ... kāyaṃ rūpe sadde
gandhe rase phoṭṭhabbe vatthuṃ ... paccuppanne khandhe aniccato ...
Domanassaṃ uppajjati dibbena cakkhunā ... dibbāya sotadhātuyā
saddaṃ suṇāti rūpāyatanaṃ cakkhuviññāṇassa phoṭṭhabbāyatanaṃ
kāyaviññāṇassa paccuppannā khandhā iddhividhañāṇassa āvajjanāya
ārammaṇapaccayena paccayo.
[1921] Atīto dhammo paccuppannassa dhammassa adhipatipaccayena
Paccayo . ārammaṇādhipati: dānaṃ datvā sīlaṃ .pe. pubbe
suciṇṇāni garuṃ katvā paccavekkhati jhānā vuṭṭhahitvā jhānaṃ garuṃ
katvā paccavekkhati ariyā maggā vuṭṭhahitvā maggaṃ garuṃ katvā
paccavekkhanti phalaṃ garuṃ katvā paccavekkhanti atītaṃ cakkhuṃ ... kāyaṃ
rūpe sadde gandhe rase phoṭṭhabbe vatthuṃ ... atīte khandhe garuṃ
katvā assādeti abhinandati taṃ garuṃ katvā rāgo uppajjati
diṭṭhi uppajjati.
[1922] Anāgato dhammo paccuppannassa dhammassa adhipatipaccayena
paccayo . ārammaṇādhipati: anāgataṃ cakkhuṃ ... Vatthuṃ ... Anāgate khandhe
garuṃ katvā assādeti abhinandati taṃ garuṃ katvā rāgo uppajjati diṭṭhi
uppajjati.
[1923] Paccuppanno dhammo paccuppannassa dhammassa adhipatipaccayena
paccayo ārammaṇādhipati sahajātādhipati . ārammaṇādhipati:
paccuppannaṃ cakkhuṃ ... vatthuṃ ... paccuppanne khandhe garuṃ katvā
assādeti abhinandati taṃ garuṃ katvā rāgo uppajjati diṭṭhi
uppajjati . sahajātādhipati: paccuppannādhipati sampayuttakānaṃ
khandhānaṃ cittasamuṭṭhānānañca rūpānaṃ adhipatipaccayena paccayo.
[1924] Atīto dhammo paccuppannassa dhammassa anantarapaccayena
paccayo purimā purimā atītā khandhā pacchimānaṃ pacchimānaṃ
paccuppannānaṃ khandhānaṃ anantarapaccayena paccayo anulomaṃ gotrabhussa
Anulomaṃ vodānassa gotrabhu maggassa vodānaṃ maggassa maggo
phalassa phalaṃ phalassa anulomaṃ phalasamāpattiyā nirodhā vuṭṭhahantassa
nevasaññānāsaññāyatanaṃ phalasamāpattiyā anantarapaccayena
paccayo.
[1925] Atīto dhammo paccuppannassa dhammassa samanantarapaccayena
paccayo anantarasadisaṃ.
[1926] Paccuppanno dhammo paccuppannassa dhammassa
sahajātapaccayena paccayo aññamaññapaccayena paccayo
nissayapaccayena paccayo. Saṅkhittaṃ.
[1927] Atīto dhammo paccuppannassa dhammassa upanissayapaccayena
paccayo ārammaṇūpanissayo anantarūpanissayo pakatūpanissayo .
Pakatūpanissayo: .pe. atītaṃ saddhaṃ upanissāya dānaṃ
deti sīlaṃ ... uposathakammaṃ karoti jhānaṃ .pe. Vipassanaṃ ... Maggaṃ ...
Abhiññaṃ ... samāpattiṃ uppādeti mānaṃ jappeti diṭṭhiṃ gaṇhāti
atītaṃ sīlaṃ ... paññaṃ rāgaṃ patthanaṃ kāyikaṃ sukhaṃ ... Kāyikaṃ dukkhaṃ upanissāya
dānaṃ deti sīlaṃ ... uposathakammaṃ .pe. samāpattiṃ uppādeti pāṇaṃ
hanati saṅghaṃ bhindati atītā saddhā ... paññā rāgo patthanā kāyikaṃ
sukhaṃ ... kāyikaṃ dukkhaṃ paccuppannāya saddhāya paññāya rāgassa patthanāya
.pe. Phalasamāpattiyā upanissayapaccayena paccayo.
[1928] Anāgato dhammo paccuppannassa dhammassa upanissayapaccayena
Paccayo ārammaṇūpanissayo anantarūpanissayo pakatūpanissayo .
Pakatūpanissayo: anāgataṃ cakkhusampadaṃ patthayamāno
sotasampadaṃ ... ghānasampadaṃ jivhāsampadaṃ kāyasampadaṃ vaṇṇasampadaṃ
saddasampadaṃ gandhasampadaṃ rasasampadaṃ ... phoṭṭhabbasampadaṃ patthayamāno
anāgate khandhe patthayamāno dānaṃ deti sīlaṃ ... uposathakammaṃ ...
Anāgatā cakkhusampadā ... Vaṇṇasampadā ... Phoṭṭhabbasampadā ... Anāgatā
khandhā paccuppannāya saddhāya paññāya kāyikassa sukhassa kāyikassa
dukkhassa maggassa phalasamāpattiyā upanissayapaccayena paccayo.
[1929] Paccuppanno dhammo paccuppannassa dhammassa
upanissayapaccayena paccayo ārammaṇūpanissayo anantarūpanissayo
pakatūpatissayo . pakatūpanissayo: paccuppannaṃ utuṃ upanissāya
jhānaṃ uppādeti vipassanaṃ .pe. paccuppannaṃ bhojanaṃ ... senāsanaṃ
upanissāya jhānaṃ uppādeti samāpattiṃ uppādeti paccuppannaṃ
utu ... bhojanaṃ ... senāsanaṃ paccuppannāya saddhāya paññāya
kāyikassa .pe. Phalasamāpattiyā upanissayapaccayena paccayo.
[1930] Paccuppanno dhammo paccuppannassa dhammassa
purejātapaccayena paccayo ārammaṇapurejātaṃ vatthupurejātaṃ .
Ārammaṇapurejātaṃ: cakkhuṃ ... vatthuṃ aniccato ... Domanassaṃ uppajjati
dibbena cakkhunā rūpaṃ passati dibbāya sotadhātuyā ... rūpāyatanaṃ
cakkhuviññāṇassa phoṭṭhabbāyatanaṃ kāyaviññāṇassa purejātapaccayena
Paccayo . vatthupurejātaṃ: cakkhāyatanaṃ cakkhuviññāṇassa
kāyāyatanaṃ kāyaviññāṇassa vatthu paccuppannānaṃ khandhānaṃ
purejātapaccayena paccayo.
[1931] Paccuppanno dhammo paccuppannassa dhammassa
pacchājātapaccayena paccayo . pacchājātā: paccuppannā khandhā
purejātassa imassa kāyassa pacchājātapaccayena paccayo.
[1932] Atīto dhammo paccuppannassa dhammassa āsevanapaccayena
paccayo purimā purimā atītā khandhā pacchimānaṃ pacchimānaṃ
paccuppannānaṃ khandhānaṃ āsevanapaccayena paccayo anulomaṃ gotarabhussa
anulomaṃ vodānassa gotrabhu maggassa vodānaṃ maggassa
āsevanapaccayena paccayo.
[1933] Atīto dhammo paccuppannassa dhammassa kammapaccayena
paccayo . nānākhaṇikā: atītā cetanā paccuppannānaṃ vipākānaṃ
khandhānaṃ kaṭattā ca rūpānaṃ kammapaccayena paccayo.
[1934] Paccuppanno dhammo paccuppannassa dhammassa
kammapaccayena paccayo paccuppannā cetanā sampayuttakānaṃ khandhānaṃ
cittasamuṭṭhānānañca rūpānaṃ kammapaccayena paccayo paṭisandhikkhaṇe
paccuppannā cetanā samupayuttakānaṃ khandhānaṃ kaṭattā ca rūpānaṃ
kammapaccayena paccayo.
[1935] Paccuppanno dhammo paccuppannassa dhammassa vipākapaccayena
Paccayo vipāko paccuppanno eko khandho tiṇṇannaṃ
khandhānaṃ cittasamuṭṭhānānañca rūpānaṃ vipākapaccayena paccayo dve
khandhā ... Paṭisandhikkhaṇe khandhā vatthussa vipākapaccayena paccayo.
[1936] Paccuppanno dhammo paccuppannassa dhammassa
āhārapaccayena paccayo indriyapaccayena paccayo jhānapaccayena
paccayo maggapaccayena paccayo sampayuttapaccayena paccayo
vippayuttapaccayena paccayo sahajātaṃ purejātaṃ pacchājātaṃ .
Sahajātā: paccuppannā khandhā cittasamuṭṭhānānaṃ rūpānaṃ
vippayuttapaccayena paccayo paṭisandhikkhaṇe paccuppannā khandhā
kaṭattārūpānaṃ vippayuttapaccayena paccayo khandhā vatthussa
vippayuttapaccayena paccayo vatthu khandhānaṃ vippayuttapaccayena
paccayo . purejātaṃ: cakkhāyatanaṃ cakkhuviññāṇassa kāyāyatanaṃ ...
Vatthu paccuppannānaṃ khandhānaṃ vippayuttapaccayena paccayo .
Pacchājātā: paccuppannā khandhā purejātassa imassa kāyassa
vippayuttapaccayena paccayo.
[1937] Paccuppanno dhammo paccuppannassa dhammassa atthipaccayena
paccayo uppannattike atthisadisaṃ.
[1938] Atīto dhammo paccuppannassa dhammassa natthipaccayena
paccayo vigatapaccayena paccayo.
[1939] Paccuppanno dhammo paccuppannassa dhammassa avigatapaccayena
Paccayo .pe.
[1940] Hetuyā ekaṃ ārammaṇe tīṇi adhipatiyā tīṇi anantare ekaṃ
samanantare ekaṃ sahājāte aññamaññe nissaye ekaṃ upanissaye
tīṇi purejāte pacchājāte āsevane ekaṃ kamme dve vipāke āhāre
ekaṃ. Saṅkhittaṃ. Avigate ekaṃ. Evaṃ gaṇetabbaṃ.
Anulomaṃ.
[1941] Atīto dhammo paccuppannassa dhammassa ārammaṇapaccayena
paccayo upanissayapaccayena paccayo kammapaccayena paccayo.
[1942] Anāgato dhammo paccuppannassa dhammassa ārammaṇapaccayena
paccayo upanissayapaccayena paccayo.
[1943] Paccuppanno dhammo paccuppannassa dhammassa
ārammaṇapaccayena paccayo sahajātapaccayena paccayo upanissayapaccayena
paccayo purejātapaccayena paccayo pacchājātapaccayena
paccayo āhārapaccayena paccayo indriyapaccayena paccayo.
[1944] Nahetuyā tīṇi naārammaṇe tīṇi naadhipatiyā
tīṇi naanantare tīṇi . saṅkhittaṃ . nasampayutte tīṇi navippayutte
tīṇi noatthiyā dve nonatthiyā tīṇi novigate
tīṇi noavigate dve. Evaṃ gaṇetabbaṃ.
Paccanīyaṃ.
[1945] Hetupaccayā naārammaṇe ekaṃ ... naadhipatiyā
naanantare nasamanantare naaññamaññe naupanissaye . saṅkhittaṃ .
Nasampayutte navippayutte nonatthiyā novigate ekaṃ . evaṃ
gaṇetabbaṃ.
Anulomapaccanīyaṃ.
[1946] Nahetupaccayā ārammaṇe tīṇi ... adhipatiyā tīṇi
anantare samanantare sahajāte aññamaññe nissaye ekaṃ upanissaye
tīṇi purejāte ekaṃ pacchājāte āsevane ekaṃ. Saṅkhittaṃ. Kamme
dve vipāke ekaṃ imesu padesu ekaṃyeva avigate ekaṃ .
Evaṃ gaṇetabbaṃ.
Paccanīyānulomaṃ.
Pañhāvāro niṭṭhito.
Atītattikaṃ aṭṭhārasamaṃ
niṭṭhitaṃ
--------
Atītārammaṇattikaṃ
paṭiccavāro
[1947] Atītārammaṇaṃ dhammaṃ paṭicca atītārammaṇo dhammo
uppajjati hetupaccayā atītārammaṇaṃ ekaṃ khandhaṃ paṭicca tayo khandhā
dve khandhe paṭicca dve khandhā paṭisandhikkhaṇe atītārammaṇaṃ
ekaṃ khandhaṃ paṭicca tayo khandhā dve khandhe paṭicca dve khandhā.
[1948] Anāgatārammaṇaṃ dhammaṃ paṭicca anāgatārammaṇo
dhammo uppajjati hetupaccayā anāgatārammaṇaṃ ekaṃ khandhaṃ
paṭicca tayo khandhā dve khandhe ....
[1949] Paccuppannārammaṇaṃ dhammaṃ paṭicca paccuppannārammaṇo
dhammo uppajjati hetupaccayā paccuppannārammaṇaṃ ekaṃ khandhaṃ paṭicca
tayo khandhā dve khandhe ... paṭisandhikkhaṇe paccuppannārammaṇaṃ ekaṃ
khandhaṃ paṭicca tayo khandhā dve khandhe ....
[1950] Atītārammaṇaṃ dhammaṃ paṭicca atītārammaṇo dhammo
uppajjati ārammaṇapaccayā adhipatipaccayā adhipatiyā paṭisandhi
natthi . anantarapaccayā samanantarapaccayā sahajātapaccayā
aññamaññapaccayā nissayapaccayā upanissayapaccayā purejātapaccayā
āsevanapaccayā purejātepi āsevanepi paṭisandhi natthi . Kammapaccayā
Vipākapaccayā vipākaṃ atītārammaṇaṃ ekaṃ khandhaṃ ... . tissopi pañhā
paripuṇṇā pavatti paṭisandhi kātabbā . āhārapaccayā indriyapaccayā
jhānapaccayā maggapaccayā sampayuttapaccayā vippayuttapaccayā atthipaccayā
natthipaccayā vigatapaccayā avigatapaccayā.
[1951] Hetuyā tīṇi ārammaṇe tīṇi adhipatiyā tīṇi. Saṅkhittaṃ.
Sabbattha tīṇi vigate tīṇi avigate tīṇi. Evaṃ gaṇetabbaṃ.
Anulomaṃ.
[1952] Atītārammaṇaṃ dhammaṃ paṭicca atītārammaṇo dhammo
uppajjati nahetupaccayā ahetukaṃ atītārammaṇaṃ ekaṃ khandhaṃ paṭicca
tayo khandhā dve khandhe ... ahetukapaṭisandhikkhaṇe vicikicchāsahagate
uddhaccasahagate khandhe paṭicca vicikicchāsahagato uddhaccasahagato
moho.
[1953] Anāgatārammaṇaṃ dhammaṃ paṭicca anāgatārammaṇo dhammo
uppajjati nahetupaccayā ahetukaṃ anāgatārammaṇaṃ ekaṃ khandhaṃ
paṭicca tayo khandhā dve khandhe ... vicikicchāsahagate uddhaccasahagate
khandhe paṭicca vicikicchāsahagato uddhaccasahagato moho.
[1954] Paccuppannārammaṇaṃ dhammaṃ paṭicca paccuppannārammaṇo
dhammo uppajjati nahetupaccayā ahetukaṃ paccuppannārammaṇaṃ ekaṃ
Khandhaṃ paṭicca tayo khandhā dve khandhe ... ahetukapaṭisandhikkhaṇe
paccuppannārammaṇe vicikicchāsahagate uddhaccasahagate khandhe paṭicca
vicikicchāsahagato uddhaccasahagato moho.
[1955] Atītārammaṇaṃ dhammaṃ paṭicca atītārammaṇo dhammo
uppajjati naadhipatipaccayā anulomasahajātasadisaṃ.
[1956] Atītārammaṇaṃ dhammaṃ paṭicca atītārammaṇo dhammo
uppajjati napurejātapaccayā arūpe atītārammaṇaṃ ekaṃ khandhaṃ
paṭicca dve khandhe ... Paṭisandhikkhaṇe ....
[1957] Anāgatārammaṇaṃ dhammaṃ paṭicca anāgatārammaṇo
dhammo uppajjati napurejātapaccayā arūpe anāgatārammaṇaṃ ekaṃ
khandhaṃ paṭicca tayo khandhā ... Dve khandhe ....
[1958] Paccuppannārammaṇaṃ dhammaṃ paṭicca paccuppannārammaṇo
dhammo uppajjati napurejātapaccayā paṭisandhikkhaṇe paccuppannārammaṇaṃ
ekaṃ khandhaṃ paṭicca dve khandhe ....
[1959] Atītārammaṇaṃ dhammaṃ paṭicca atītārammaṇo dhammo
uppajjati napacchājātapaccayā naāsevanapaccayā naadhipatisadisā .
Nakammapaccayā atītārammaṇe khandhe paṭicca atītārammaṇā
cetanā.
[1960] Anāgatārammaṇaṃ dhammaṃ paṭicca anāgatārammaṇo
dhammo uppajjati nakammapaccayā anāgatārammaṇe khandhe paṭicca
Anāgatārammaṇā cetanā.
[1961] Paccuppannārammaṇaṃ dhammaṃ paṭicca paccuppannārammaṇo
dhammo uppajjati nakammapaccayā paccuppannārammaṇe khandhe
paṭicca paccuppannārammaṇā cetanā.
[1962] Atītārammaṇaṃ dhammaṃ paṭicca atītārammaṇo dhammo
uppajjati navipākapaccayā navipāke paṭisandhi natthi.
[1963] Paccuppannārammaṇaṃ dhammaṃ paṭicca paccuppannārammaṇo
dhammo uppajjati najhānapaccayā pañcaviññāṇasahagataṃ ekaṃ khandhaṃ
paṭicca tayo khandhā dve khandhe ....
[1964] Atītārammaṇaṃ dhammaṃ paṭicca atītārammaṇo dhammo
uppajjati namaggapaccayā ahetukaṃ atītārammaṇaṃ ekaṃ khandhaṃ
paṭicca nahetusadisā tisso pañhā moho natthi.
[1965] Atītārammaṇaṃ dhammaṃ paṭicca atītārammaṇo dhammo
uppajjati navippayuttapaccayā arūpe atītārammaṇaṃ ekaṃ khandhaṃ
paṭicca dve khandhe ....
[1966] Anāgatārammaṇaṃ dhammaṃ paṭicca anāgatārammaṇo dhammo
uppajjati navippayuttapaccayā arūpe anāgatārammaṇaṃ ekaṃ khandhaṃ
paṭicca dve khandhe ....
[1967] Nahetuyā tīṇi naadhipatiyā napurejāte napacchājāte
naāsevane nakamme navipāke tīṇi najhāne ekaṃ namagge tīṇi
Navippayutte dve. Evaṃ gaṇetabbaṃ.
Paccanīyaṃ.
[1968] Hetupaccayā naadhipatiyā tīṇi ... Napurejāte napacchājāte
naāsevane nakamme navipāke tīṇi navippayutte dve . evaṃ
gaṇetabbaṃ.
Anulomapaccanīyaṃ.
[1969] Nahetupaccayā ārammaṇe tīṇi . saṅkhittaṃ . sabbattha
tīṇi. Avigate tīṇi. Evaṃ gaṇetabbaṃ.
Paccanīyānulomaṃ.
Paṭiccavāro niṭṭhito.
Sahajātavāropi paccayavāropi nissayavāropi
saṃsaṭṭhavāropi sampayuttavāropi paṭiccavārasadisā.
Pañhāvāro.
[1970] Atītārammaṇo dhammo atītārammaṇassa dhammassa hetupaccayena
paccayo atītārammaṇā hetū sampayuttakānaṃ khandhānaṃ
hetupaccayena paccayo paṭisandhikkhaṇe atītārammaṇā hetū sampayuttakānaṃ
khandhānaṃ.
[1971] Anāgatārammaṇo dhammo anāgatārammaṇassa dhammassa
hetupaccayena paccayo anāgatārammaṇā hetū sampayuttakānaṃ khandhānaṃ
hetupaccayena paccayo.
[1972] Paccuppannārammaṇo dhammo paccuppannārammaṇassa
dhammassa hetupaccayena paccayo paccuppannārammaṇā hetū sampayuttakānaṃ
khandhānaṃ hetupaccayena paccayo paṭisandhikkhaṇe paccuppannārammaṇā
hetū sampayuttakānaṃ khandhānaṃ hetupaccayena paccayo.
[1973] Atītārammaṇo dhammo atītārammaṇassa dhammassa
ārammaṇapaccayena paccayo atītaṃ viññāṇañcāyatanaṃ paccavekkhati
nevasaññānāsaññāyatanaṃ paccavekkhati atītārammaṇaṃ atītaṃ iddhividhañāṇaṃ
paccavekkhati cetopariyañāṇaṃ ... pubbenivāsānussatiñāṇaṃ ...
Yathākammūpagañāṇaṃ paccavekkhati ariyā atītārammaṇe pahīne kilese
paccavekkhanti vikkhambhite kilese ... pubbe samudāciṇṇe ...
Atītārammaṇe atīte khandhe aniccato dukkhato anattato vipassanti
assādenti abhinandanti taṃ ārabbha atītārammaṇo rāgo uppajjati
diṭṭhi ... vicikicchā ... uddhaccaṃ domanassaṃ uppajjati atītārammaṇā
atītā khandhā cetopariyañāṇassa pubbenivāsānussatiñāṇassa
yathākammūpagañāṇassa āvajjanāya ārammaṇapaccayena paccayo.
[1974] Atītārammaṇo dhammo anāgatārammaṇassa dhammassa
ārammaṇapaccayena paccayo anāgataṃ viññāṇañcāyatanaṃ paccavekkhati
nevasaññānāsaññāyatanaṃ paccavekkhati atītārammaṇaṃ anāgataṃ
iddhividhañāṇaṃ paccavekkhati cetopariyañāṇaṃ ... Pubbenivāsānussatiñāṇaṃ ...
Yathākammūpagañāṇaṃ ... atītārammaṇe anāgate khandhe
Aniccato ... vipassati assādeti abhinandati taṃ ārabbha anāgatārammaṇo
rāgo uppajjati domanassaṃ uppajjati atītārammaṇā anāgatā khandhā
cetopariyañāṇassa anāgataṃsañāṇassa āvajjanāya ārammaṇapaccayena
paccayo.
[1975] Atītārammaṇo dhammo paccuppannārammaṇassa dhammassa
ārammaṇapaccayena paccayo cetopariyañāṇena atītārammaṇa-
paccuppannacittasamaṅgissa cittaṃ jānāti atītārammaṇā paccuppannā
khandhā cetopariyañāṇassa āvajjanāya ārammaṇapaccayena paccayo.
[1976] Anāgatārammaṇo dhammo anāgatārammaṇassa dhammassa
ārammaṇapaccayena paccayo anāgatārammaṇaṃ anāgataṃ iddhividhañāṇaṃ
paccavekkhati cetopariyañāṇaṃ ... anāgataṃsañāṇaṃ ... anāgatārammaṇe
anāgate khandhe aniccato ... vipassati assādeti abhinandati taṃ
ārabbha anāgatārammaṇo rāgo ... domanassaṃ uppajjati
anāgatārammaṇā anāgatā khandhā cetopariyañāṇassa anāgataṃsañāṇassa
āvajjanāya ārammaṇapaccayena paccayo.
[1977] Anāgatārammaṇo dhammo atītārammaṇassa dhammassa
ārammaṇapaccayena paccayo anāgatārammaṇaṃ atītaṃ iddhividhañāṇaṃ
paccavekkhati cetopariyañāṇaṃ ... anāgataṃsañāṇaṃ ariyā anāgatārammaṇe
pahīne kilese paccavekkhanti vikkhambhite kilese paccavekkhanti
pubbe samudāciṇṇe ... anāgatārammaṇe atīte khandhe aniccato ...
Vipassanti assādenti abhinnadanti taṃ ārabbha atītārammaṇo rāgo
uppajjati domanassaṃ uppajjati anāgatārammaṇā atītā khandhā
cetopariyañāṇassa pubbenivāsānussatiñāṇassa yathākammūpagañāṇassa
āvajjanāya ārammaṇapaccayena paccayo.
[1978] Anāgatārammaṇo dhammo paccuppannārammaṇassa dhammassa
ārammaṇapaccayena paccayo cetopariyañāṇena anāgatārammaṇapaccuppanna-
cittasamaṅgissa cittaṃ jānāti anāgatārammaṇā paccuppannā khandhā
cetopariyañāṇassa āvajjanāya ārammaṇapaccayena paccayo.
[1979] Paccuppannārammaṇo dhammo paccuppannārammaṇassa
dhammassa ārammaṇapaccayena paccayo cetopariyañāṇena
paccuppannārammaṇapaccuppannacittasamaṅgissa cittaṃ jānāti
paccuppannārammaṇā paccuppannā khandhā cetopariyañāṇassa
āvajjanāya ārammaṇapaccayena paccayo.
The Pali Tipitaka in Roman Character Volume 41 page 532-557.
https://84000.org/tipitaka/read/roman_item.php?book=41&item=1888&items=92&mode=bracket
Classified by content :-
https://84000.org/tipitaka/read/roman_item.php?book=41&item=1888&items=92
Compare with The Pali Tipitaka in Thai Character :-
https://84000.org/tipitaka/read/pali_item.php?book=41&item=1888&items=92&mode=bracket
Compare with The Royal Version of Thai Tipitaka :-
https://84000.org/tipitaka/read/byitem.php?book=41&item=1888&items=92&mode=bracket
Study Atthakatha :-
https://84000.org/tipitaka/attha/attha.php?b=41&i=1888
Contents of The Tipitaka Volume 41
https://84000.org/tipitaka/read/?index_41
https://84000.org/tipitaka/english/?index_41
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
