paliTIPITAKA Volume 1 - Vinaya Pitaka 1

Vinayapiṭake mahāvibhaṅgassa paṭhamo bhāgo --------- namo tassa bhagavato arahato sammāsambuddhassa. Verañjakaṇḍaṃ [1] Tena samayena buddho bhagavā verañjāyaṃ viharati naḷerupucimandamūle mahatā bhikkhusaṅghena saddhiṃ pañcamattehi bhikkhusatehi . assosi kho verañjo brāhmaṇo samaṇo khalu bho gotamo sakyaputto sakyakulā pabbajito verañjāyaṃ viharati naḷerupucimandamūle mahatā bhikkhusaṅghena saddhiṃ pañcamattehi bhikkhusatehi . taṃ kho pana bhavantaṃ gotamaṃ evaṃ kalyāṇo kittisaddo abbhuggato itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavāti so imaṃ lokaṃ sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā sacchikatvā pavedeti so dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāseti sādhu kho pana tathārūpānaṃ arahataṃ dassanaṃ hotīti. [2] Athakho verañjo brāhmaṇo yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno kho verañjo brāhmaṇo bhagavantaṃ etadavoca sutammetaṃ bho gotama na samaṇo gotamo brāhmaṇe jiṇṇe vuḍḍhe ^1- mahallake addhagate vayoanuppatte abhivādeti vā paccuṭṭheti vā āsanena vā nimantetīti tayidaṃ bho gotama tatheva na hi bhavaṃ gotamo brāhmaṇe jiṇṇe vuḍḍhe mahallake addhagate vayoanuppatte abhivādeti vā paccuṭṭheti vā āsanena vā nimanteti tayidaṃ bho gotama na sampannamevāti . Nāhantaṃ brāhmaṇa passāmi sadevake loke samārake sabrahmake sassamaṇabrāhmaṇiyā pajāya sadevamanussāya yamahaṃ abhivādeyyaṃ vā paccuṭṭheyyaṃ vā āsanena vā nimanteyyaṃ yaṃ hi brāhmaṇa tathāgato abhivādeyya vā paccuṭṭheyya vā āsanena vā nimanteyya muddhāpi tassa vipateyyāti. {2.1} Arasarūpo bhavaṃ gotamoti. Atthi khvesa brāhmaṇa pariyāyo yena maṃ pariyāyena sammā vadamāno vadeyya arasarūpo samaṇo gotamoti ye te brāhmaṇa rūparasā saddarasā gandharasā rasarasā phoṭṭhabbarasā te tathāgatassa pahīnā ucchinnamūlā tālāvatthukatā anabhāvaṃ katā ^2- āyatiṃ anuppādadhammā ayaṃ kho brāhmaṇa pariyāyo yena maṃ pariyāyena sammā vadamāno @Footnote: ¹ Ma. vuddhe. ² gatātipi pāṭho. Vadeyya arasarūpo samaṇo gotamoti no ca kho yaṃ tvaṃ sandhāya vadesīti. {2.2} Nibbhogo bhavaṃ gotamoti. Atthi khvesa brāhmaṇa pariyāyo yena maṃ pariyāyena sammā vadamāno vadeyya nibbhogo samaṇo gotamoti ye te brāhmaṇa rūpabhogā saddabhogā gandhabhogā rasabhogā phoṭṭhabbabhogā te tathāgatassa pahīnā ucchinnamūlā tālāvatthukatā anabhāvaṃ katā āyatiṃ anuppādadhammā ayaṃ kho brāhmaṇa pariyāyo yena maṃ pariyāyena sammā vadamāno vadeyya nibbhogo samaṇo gotamoti no ca kho yaṃ tvaṃ sandhāya vadesīti. {2.3} Akiriyavādo bhavaṃ gotamoti. Atthi khvesa brāhmaṇa pariyāyo yena maṃ pariyāyena sammā vadamāno vadeyya akiriyavādo samaṇo gotamoti ahañhi brāhmaṇa akiriyaṃ vadāmi kāyaduccaritassa vacīduccaritassa manoduccaritassa anekavihitānaṃ pāpakānaṃ akusalānaṃ dhammānaṃ akiriyaṃ vadāmi ayaṃ kho brāhmaṇa pariyāyo yena maṃ pariyāyena sammā vadamāno vadeyya akiriyavādo samaṇo gotamoti no ca kho yaṃ tvaṃ sandhāya vadesīti. {2.4} Ucchedavādo bhavaṃ gotamoti. Atthi khvesa brāhmaṇa pariyāyo yena maṃ pariyāyena sammā vadamāno vadeyya ucchedavādo samaṇo gotamoti ahañhi brāhmaṇa ucchedaṃ vadāmi rāgassa dosassa mohassa anekavihitānaṃ pāpakānaṃ akusalānaṃ dhammānaṃ ucchedaṃ vadāmi ayaṃ kho brāhmaṇa pariyāyo yena maṃ pariyāyena sammā Vadamāno vadeyya ucchedavādo samaṇo gotamoti no ca kho yaṃ tvaṃ sandhāya vadesīti. {2.5} Jegucchī bhavaṃ gotamoti. Atthi khvesa brāhmaṇa pariyāyo yena maṃ pariyāyena sammā vadamāno vadeyya jegucchī samaṇo gotamoti ahañhi brāhmaṇa jigucchāmi ^1- kāyaduccaritena vacīduccaritena manoduccaritena anekavihitānaṃ pāpakānaṃ akusalānaṃ dhammānaṃ samāpattiyā jigucchāmi ^2- ayaṃ kho brāhmaṇa pariyāyo yena maṃ pariyāyena sammā vadamāno vadeyya jegucchī samaṇo gotamoti no ca kho yaṃ tvaṃ sandhāya vadesīti. {2.6} Venayiko bhavaṃ gotamoti. Atthi khvesa brāhmaṇa pariyāyo yena maṃ pariyāyena sammā vadamāno vadeyya venayiko samaṇo gotamoti. Ahañhi brāhmaṇa vinayāya dhammaṃ desemi rāgassa dosassa mohassa anekavihitānaṃ pāpakānaṃ akusalānaṃ dhammānaṃ vinayāya dhammaṃ desemi ayaṃ kho brāhmaṇa pariyāyo yena maṃ pariyāyena sammā vadamāno vadeyya venayiko samaṇo gotamoti no ca kho yaṃ tvaṃ sandhāya vadesīti. {2.7} Tapassī bhavaṃ gotamoti . atthi khvesa brāhmaṇa pariyāyo yena maṃ pariyāyena sammā vadamāno vadeyya tapassī samaṇo gotamoti tapanīyāhaṃ brāhmaṇa pāpake akusale dhamme vadāmi kāyaduccaritaṃ vacīduccaritaṃ manoduccaritaṃ yassa kho brāhmaṇa tapanīyā pāpakā akusalā dhammā pahīnā ucchinnamūlā tālāvatthukatā @Footnote: ^1-2 imesu dvīsu ṭhānesu jegucchaṃ vadāmītipi pāṭho dissati. Anabhāvaṃ katā āyatiṃ anuppādadhammā tamahaṃ tapassīti vadāmi tathāgatassa kho brāhmaṇa tapanīyā pāpakā akusalā dhammā pahīnā ucchinnamūlā tālāvatthukatā anabhāvaṃ katā āyatiṃ anuppādadhammā ayaṃ kho brāhmaṇa pariyāyo yena maṃ pariyāyena sammā vadamāno vadeyya tapassī samaṇo gotamoti no ca kho yaṃ tvaṃ sandhāya vadesīti. {2.8} Apagabbho bhavaṃ gotamoti. Atthi khvesa brāhmaṇa pariyāyo yena maṃ pariyāyena sammā vadamāno vadeyya apagabbho samaṇo gotamoti yassa kho brāhmaṇa āyatiṃ gabbhaseyyā punabbhavābhinibbatti pahīnā ucchinnamūlā tālāvatthukatā anabhāvaṃ katā āyatiṃ anuppādadhammā tamahaṃ apagabbhoti vadāmi tathāgatassa kho brāhmaṇa āyatiṃ gabbhaseyyā punabbhavābhinibbatti pahīnā ucchinnamūlā tālāvatthukatā anabhāvaṃ katā āyatiṃ anuppādadhammā ayaṃ kho brāhmaṇa pariyāyo yena maṃ pariyāyena sammā vadamāno vadeyya apagabbho samaṇo gotamoti no ca kho yaṃ tvaṃ sandhāya vadesīti. [3] Seyyathāpi brāhmaṇa kukkuṭiyā aṇḍāni aṭṭha vā dasa vā dvādasa vā tānassu kukkuṭiyā sammā adhisayitāni sammā pariseditāni sammā paribhāvitāni yo nu kho tesaṃ kukkuṭacchāpakānaṃ paṭhamataraṃ pādanakhasikhāya vā mukhatuṇḍakena vā aṇḍakosaṃ padāletvā sotthinā abhinibbijjheyya kinti svāssa vacanīyo Jeṭṭho vā kaniṭṭho vāti . jeṭṭhotissa bho gotama vacanīyo so hi nesaṃ jeṭṭho hotīti . evameva kho ahaṃ brāhmaṇa avijjāgatāya pajāya aṇḍabhūtāya pariyonaddhāya avijjaṇḍakosaṃ padāletvā eko va loke anuttaraṃ sammāsambodhiṃ abhisambuddho sohaṃ brāhmaṇa jeṭṭho seṭṭho lokassa āraddhaṃ kho pana me brāhmaṇa viriyaṃ ahosi asallīnaṃ upaṭṭhitā sati appamuṭṭhā ^1- passaddho kāyo asāraddho samāhitaṃ cittaṃ ekaggaṃ so kho ahaṃ brāhmaṇa vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja vihāsiṃ vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja vihāsiṃ pītiyā ca virāgā upekkhako ca vihāsiṃ sato ca sampajāno sukhañca kāyena paṭisaṃvedesiṃ yantaṃ ariyā ācikkhanti upekkhako satimā sukhavihārīti tatiyaṃ jhānaṃ upasampajja vihāsiṃ sukhassa ca pahānā dukkhassa ca pahānā pubbe va somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja vihāsiṃ. {3.1} So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte ^2- pubbenivāsānussatiñāṇāya cittaṃ abhininnāmesiṃ so anekavihitaṃ pubbenivāsaṃ @Footnote: ¹ Yu. Ma. asammuṭṭhā. ² Yu. Ma. ānañjappatte. Anussarāmi seyyathīdaṃ ekaṃpi jātiṃ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsaṃpi jātiyo tiṃsaṃpi jātiyo cattāḷīsaṃpi jātiyo paññāsaṃpi jātiyo jātisataṃpi jātisahassaṃpi jātisatasahassaṃpi anekepi saṃvaṭṭakappe anekepi vivaṭṭakappe anekepi saṃvaṭṭavivaṭṭakappe amutrāsiṃ evaṃnāmo evaṃgotto evaṃvaṇṇo evamāhāro evaṃsukhadukkhapaṭisaṃvedī evamāyupariyanto so tato cuto amutra udapādiṃ tatrāpāsiṃ evaṃnāmo evaṃgotto evaṃvaṇṇo evamāhāro evaṃsukhadukkhapaṭisaṃvedī evamāyupariyanto so tato cuto idhūpapannoti . iti sākāraṃ sauddesaṃ anekavihitaṃ pubbenivāsaṃ anussarāmi . ayaṃ kho me brāhmaṇa rattiyā paṭhame yāme paṭhamā vijjā adhigatā avijjā vihatā vijjā uppannā tamo vihato āloko uppanno yathātaṃ appamattassa ātāpino pahitattassa viharato . Ayaṃ kho me brāhmaṇa paṭhamā abhinibbidhā ahosi kukkuṭacchāpakasseva aṇḍakosamhā. {3.2} So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte sattānaṃ cutūpapātañāṇāya cittaṃ abhininnāmesiṃ . so dibbena cakkhunā visuddhena atikkantamānusakena satte passāmi cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāmi ime vata bhonto sattā kāyaduccaritena Samannāgatā vacīduccaritena samannāgatā manoduccaritena samannāgatā ariyānaṃ upavādakā micchādiṭṭhikā micchādiṭṭhikammasamādānā te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṃ anupavādakā sammādiṭṭhikā sammādiṭṭhikammasamādānā te kāyassa bhedā paraṃ maraṇā sugatiṃ saggaṃ lokaṃ ^1- upapannāti. Iti dibbena cakkhunā visuddhena atikkantamānusakena satte passāmi cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāmi. Ayaṃ kho me brāhmaṇa rattiyā majjhime yāme dutiyā vijjā adhigatā avijjā vihatā vijjā uppannā tamo vihato āloko uppanno yathātaṃ appamattassa ātāpino pahitattassa viharato . Ayaṃ kho me brāhmaṇa dutiyā abhinibbidhā ahosi kukkuṭacchāpakasseva aṇḍakosamhā. {3.3} So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṃ khayañāṇāya cittaṃ abhininnāmesiṃ so idaṃ dukkhanti yathābhūtaṃ abbhaññāsiṃ ayaṃ dukkhasamudayoti yathābhūtaṃ abbhaññāsiṃ ayaṃ dukkhanirodhoti yathābhūtaṃ abbhaññāsiṃ ayaṃ dukkhanirodhagāminī paṭipadāti @Footnote: ¹ saggalokantipi pāṭho. Yathābhūtaṃ abbhaññāsiṃ ime āsavāti yathābhūtaṃ abbhaññāsiṃ ayaṃ āsavasamudayoti yathābhūtaṃ abbhaññāsiṃ ayaṃ āsavanirodhoti yathābhūtaṃ abbhaññāsiṃ ayaṃ āsavanirodhagāminī paṭipadāti yathābhūtaṃ abbhaññāsiṃ tassa me evaṃ jānato evaṃ passato kāmāsavāpi cittaṃ vimuccittha bhavāsavāpi cittaṃ vimuccittha ^1- avijjāsavāpi cittaṃ vimuccittha vimuttasmiṃ vimuttamiti ^2- ñāṇaṃ ahosi khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti abbhaññāsiṃ . ayaṃ kho me brāhmaṇa rattiyā pacchime yāme tatiyā vijjā adhigatā avijjā vihatā vijjā uppannā tamo vihato āloko uppanno yathātaṃ appamattassa ātāpino pahitattassa viharato . ayaṃ kho me brāhmaṇa tatiyā abhinibbidhā ahosi kukkuṭacchāpakasseva aṇḍakosamhāti. [4] Evaṃ vutte verañjo brāhmaṇo bhagavantaṃ etadavoca jeṭṭho bhavaṃ gotamo seṭṭho bhavaṃ gotamo abhikkantaṃ bho gotama abhikkantaṃ bho gotama seyyathāpi bho gotama nikkujjitaṃ vā ukkujjeyya paṭicchannaṃ vā vivareyya mūḷhassa vā maggaṃ ācikkheyya andhakāre vā telapajjotaṃ dhāreyya cakkhumanto rūpāni dakkhantīti evamevaṃ ^3- bhotā gotamena anekapariyāyena dhammo @Footnote: ¹ yebhuyyena ito paraṃ diṭṭhāsavāpīti atthi. ² vimuttamhītipi @pāṭho. ³ sabbattha evamevāti pāṭho dissati. Pakāsito esāhaṃ bhavantaṃ gotamaṃ saraṇaṃ gacchāmi dhammañca bhikkhusaṅghañca upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gataṃ adhivāsetu ca me bhavaṃ gotamo verañjāyaṃ vassāvāsaṃ saddhiṃ bhikkhusaṅghenāti. Adhivāsesi bhagavā tuṇhībhāvena . athakho verañjo brāhmaṇo bhagavato adhivāsanaṃ viditvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi. [5] Tena kho pana samayena verañjā dubbhikkhā hoti dvīhitikā setaṭṭhikā salākāvuttā na sukarā uñchena paggahena yāpetuṃ. Tena kho pana samayena uttarāpathakā assavāṇijā pañcamattehi assasatehi verañjāyaṃ vassāvāsaṃ upagatā honti . tehi assamaṇḍalikāsu bhikkhūnaṃ patthapatthapūlakaṃ ^1- paññattaṃ hoti . bhikkhū pubbaṇhasamayaṃ nivāsetvā pattacīvaramādāya verañjāyaṃ ^2- piṇḍāya pavisitvā piṇḍaṃ alabhamānā assamaṇḍalikāsu piṇḍāya caritvā patthapatthapūlakaṃ ārāmaṃ haritvā udukkhale koṭṭetvā koṭṭetvā paribhuñjanti . āyasmā panānando patthapūlakaṃ silāyaṃ piṃsitvā ^3- bhagavato upanāmeti. Taṃ bhagavā paribhuñjati. {5.1} Assosi kho bhagavā udukkhalasaddaṃ. Jānantāpi tathāgatā pucchanti jānantāpi na pucchanti kālaṃ viditvā pucchanti kālaṃ viditvā na pucchanti @Footnote: ¹ sabbattha patthapatthamūlakanti pāṭho dissati. ² Yu. Ma. verañjaṃ. @³ Yu. Ma. pisitvā. Atthasañhitaṃ tathāgatā pucchanti no anatthasañhitaṃ anatthasañhite setughāto tathāgatānaṃ . dvīhākārehi buddhā bhagavanto bhikkhū paṭipucchanti dhammaṃ vā desessāma sāvakānaṃ vā sikkhāpadaṃ paññāpessāmāti . Athakho bhagavā āyasmantaṃ ānandaṃ āmantesi kinnu kho so ānanda udukkhalasaddoti . athakho āyasmā ānando bhagavato etamatthaṃ ārocesi . sādhu sādhu ānanda tumhehi ānanda sappurisehi vijitaṃ pacchimā janatā sālimaṃsodanaṃ atimaññissatīti. [6] Athakho āyasmā mahāmoggallāno yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho āyasmā mahāmoggallāno bhagavantaṃ etadavoca etarahi bhante verañjā dubbhikkhā dvīhitikā setaṭṭhikā salākāvuttā na sukarā uñchena paggahena yāpetuṃ imissā bhante mahāpaṭhaviyā heṭṭhimatalaṃ sampannaṃ ^1- seyyathāpi khuddakamadhuṃ ^2- anīlakaṃ evamassādaṃ sādhāhaṃ bhante paṭhaviṃ parivatteyyaṃ bhikkhū pappaṭakojaṃ paribhuñjissantīti . ye pana te moggallāna paṭhavīnissitā pāṇā te kathaṃ karissasīti. Ekāhaṃ bhante pāṇiṃ abhinimminissāmi seyyathāpi mahāpaṭhavī ye paṭhavīnissitā pāṇā te tattha saṅkāmessāmi ekena hatthena paṭhaviṃ parivattessāmīti. Alaṃ moggallāna @Footnote: ¹ Ma. Rā. rasasampannaṃ. ² Yu. khuddamadhuṃ. Mā te rucci paṭhaviṃ parivattetuṃ vipallāsaṃpi sattā paṭilabheyyunti. Sādhu bhante sabbo bhikkhusaṅgho uttarakuruṃ piṇḍāya gaccheyyāti. Ye pana te moggallāna bhikkhū aniddhimanto te kathaṃ karissasīti . tathāhaṃ bhante karissāmi yathā sabbe bhikkhū gacchissantīti . alaṃ moggallāna mā te rucci sabbassa bhikkhusaṅghassa uttarakuruṃ piṇḍāya gamananti. [7] Athakho āyasmato sāriputtassa rahogatassa paṭisallīnassa evaṃ cetaso parivitakko udapādi katamesānaṃ kho buddhānaṃ bhagavantānaṃ brahmacariyaṃ na ciraṭṭhitikaṃ ahosi katamesānaṃ buddhānaṃ bhagavantānaṃ brahmacariyaṃ ciraṭṭhitikaṃ ahosīti . athakho āyasmā sāriputto sāyaṇhasamayaṃ paṭisallānā vuṭṭhito yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . Ekamantaṃ nisinno kho āyasmā sāriputto bhagavantaṃ etadavoca idha mayhaṃ bhante rahogatassa paṭisallīnassa evaṃ cetaso parivitakko udapādi katamesānaṃ kho buddhānaṃ bhagavantānaṃ brahmacariyaṃ na ciraṭṭhitikaṃ ahosi katamesānaṃ buddhānaṃ bhagavantānaṃ brahmacariyaṃ ciraṭṭhitikaṃ ahosīti . bhagavato ca sāriputta vipassissa bhagavato ca sikhissa bhagavato ca vessabhussa brahmacariyaṃ na ciraṭṭhitikaṃ ahosi bhagavato ca sāriputta kakusandhassa bhagavato ca konāgamanassa bhagavato ca kassapassa brahmacariyaṃ ciraṭṭhitikaṃ ahosīti . ko nu Kho bhante hetu ko paccayo yena bhagavato ca vipassissa bhagavato ca sikhissa bhagavato ca vessabhussa brahmacariyaṃ na ciraṭṭhitikaṃ ahosīti. {7.1} Bhagavā ca sāriputta vipassī bhagavā ca sikhī bhagavā ca vessabhū kilāsuno ahesuṃ sāvakānaṃ vitthārena dhammaṃ dassetuṃ appakañca nesaṃ ahosi suttaṃ geyyaṃ veyyākaraṇaṃ gāthā udānaṃ itivuttakaṃ jātakaṃ abbhūtadhammaṃ vedallaṃ appaññattaṃ sāvakānaṃ sikkhāpadaṃ anuddiṭṭhaṃ pātimokkhaṃ tesaṃ buddhānaṃ bhagavantānaṃ antaradhānena buddhānubuddhānaṃ sāvakānaṃ antaradhānena ye te pacchimā sāvakā nānānāmā nānāgottā nānājaccā nānākulā pabbajitā te taṃ brahmacariyaṃ khippaññeva antaradhāpesuṃ seyyathāpi sāriputta nānāpupphāni phalake nikkhittāni suttena asaṅgahitāni tāni vāto vikirati vidhamati viddhaṃseti taṃ kissa hetu yathātaṃ suttena asaṅgahitattā evameva kho sāriputta tesaṃ buddhānaṃ bhagavantānaṃ antaradhānena buddhānubuddhānaṃ sāvakānaṃ antaradhānena ye te pacchimā sāvakā nānānāmā nānāgottā nānājaccā nānākulā pabbajitā te taṃ brahmacariyaṃ khippaññeva antaradhāpesuṃ {7.2} kilāsuno ca te buddhā ^1- bhagavanto ahesuṃ sāvake ^2- cetasā ceto paricca ovadituṃ bhūtapubbaṃ sāriputta vessabhū bhagavā arahaṃ sammāsambuddho aññatarasmiṃ bhiṃsanake vanasaṇḍe sahassaṃ bhikkhusaṅghaṃ @Footnote: ¹ ayaṃ pāṭho katthaci na dissati. ² sāvakānantipi atthi. Cetasā ceto paricca ovadati anusāsati evaṃ vitakketha mā evaṃ vitakkayittha evaṃ manasikarotha mā evaṃ manasākattha idaṃ pajahatha idaṃ upasampajja viharathāti athakho sāriputta tesaṃ bhikkhusahassānaṃ ^1- vessabhunā bhagavatā arahatā sammāsambuddhena evaṃ ovadiyamānānaṃ evaṃ anusāsiyamānānaṃ anupādāya āsavehi cittāni vimucciṃsu tatra sudaṃ sāriputta bhiṃsanakassa vanasaṇḍassa bhiṃsanakatasmiṃ hoti yo koci avītarāgo taṃ vanasaṇḍaṃ pavisati yebhuyyena ^2- lomāni haṃsanti ayaṃ kho sāriputta hetu ayaṃ paccayo yena bhagavato ca vipassissa bhagavato ca sikhissa bhagavato ca vessabhussa brahmacariyaṃ na ciraṭṭhitikaṃ ahosīti . ko pana bhante hetu ko paccayo yena bhagavato ca kakusandhassa bhagavato ca konāgamanassa bhagavato ca kassapassa brahmacariyaṃ ciraṭṭhitikaṃ ahosīti. {7.3} Bhagavā ca sāriputta kakusandho bhagavā ca konāgamano bhagavā ca kassapo akilāsuno ahesuṃ sāvakānaṃ vitthārena dhammaṃ desetuṃ bahuñca nesaṃ ahosi suttaṃ geyyaṃ veyyākaraṇaṃ gāthā udānaṃ itivuttakaṃ jātakaṃ abbhūtadhammaṃ vedallaṃ paññattaṃ sāvakānaṃ sikkhāpadaṃ uddiṭṭhaṃ pātimokkhaṃ tesaṃ buddhānaṃ bhagavantānaṃ antaradhānena buddhānubuddhānaṃ sāvakānaṃ antaradhānena ye te pacchimā sāvakā nānānāmā nānāgottā nānājaccā nānākulā pabbajitā te taṃ brahmacariyaṃ @Footnote: ¹ tesaṃ bhikkhūnanti amhākaṃ khanti. ² Ma. yebhūyena. Ciraṃ dīghamaddhānaṃ ṭhapesuṃ seyyathāpi sāriputta nānāpupphāni phalake nikkhittāni suttena susaṅgahitāni tāni vāto na vikirati na vidhamati na viddhaṃseti taṃ kissa hetu yathātaṃ suttena susaṅgahitattā evameva kho sāriputta tesaṃ buddhānaṃ bhagavantānaṃ antaradhānena buddhānubuddhānaṃ sāvakānaṃ antaradhānena ye te pacchimā sāvakā nānānāmā nānāgottā nānājaccā nānākulā pabbajitā te taṃ brahmacariyaṃ ciraṃ dīghamaddhānaṃ ṭhapesuṃ ayaṃ kho sāriputta hetu ayaṃ paccayo yena bhagavato ca kakusandhassa bhagavato ca konāgamanassa bhagavato ca kassapassa brahmacariyaṃ ciraṭṭhitikaṃ ahosīti. [8] Athakho āyasmā sāriputto uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca etassa bhagavā kālo etassa sugata kālo yaṃ bhagavā sāvakānaṃ sikkhāpadaṃ paññāpeyya uddiseyya pātimokkhaṃ yathayidaṃ ^1- brahmacariyaṃ addhaniyaṃ assa ciraṭṭhitikanti. {8.1} Āgamehi tvaṃ sāriputta āgamehi tvaṃ sāriputta tathāgato va tattha kālaṃ jānissati na tāva sāriputta satthā sāvakānaṃ sikkhāpadaṃ paññāpeti uddisati pātimokkhaṃ yāva na idhekacce āsavaṭṭhāniyā dhammā saṅghe pātubhavanti yato ca kho sāriputta idhekacce āsavaṭṭhāniyā dhammā saṅghe pātubhavanti atha satthā sāvakānaṃ @Footnote: ¹ Ma. yathāyidaṃ. Sikkhāpadaṃ paññāpeti uddisati pātimokkhaṃ tesaññeva āsavaṭṭhāniyānaṃ dhammānaṃ paṭighātāya na tāva sāriputta idhekacce āsavaṭṭhāniyā dhammā saṅghe pātubhavanti yāva na saṅgho rattaññumahattaṃ patto hoti yato ca kho sāriputta saṅgho rattaññumahattaṃ patto hoti atha idhekacce āsavaṭṭhāniyā dhammā saṅghe pātubhavanti atha satthā sāvakānaṃ sikkhāpadaṃ paññāpeti uddisati pātimokkhaṃ tesaññeva āsavaṭṭhāniyānaṃ dhammānaṃ paṭighātāya na tāva sāriputta idhekacce āsavaṭṭhāniyā dhammā saṅghe pātubhavanti yāva na saṅgho vepullamahattaṃ patto hoti yato ca kho sāriputta saṅgho vepullamahattaṃ patto hoti atha idhekacce āsavaṭṭhāniyā dhammā saṅghe pātubhavanti atha satthā sāvakānaṃ sikkhāpadaṃ paññāpeti uddisati pātimokkhaṃ tesaññeva āsavaṭṭhāniyānaṃ dhammānaṃ paṭighātāya na tāva sāriputta idhekacce āsavaṭṭhāniyā dhammā saṅghe pātubhavanti yāva na saṅgho lābhaggamahattaṃ patto hoti yato ca kho sāriputta saṅgho lābhagga- mahattaṃ patto hoti atha idhekacce āsavaṭṭhāniyā dhammā saṅghe pātubhavanti atha satthā sāvakānaṃ sikkhāpadaṃ paññāpeti uddisati pātimokkhaṃ tesaññeva āsavaṭṭhāniyānaṃ dhammānaṃ paṭighātāya nirabbudo hi sāriputta bhikkhusaṅgho nirādīnavo apagatakāḷako suddho pariyodāto sāre patiṭṭhito imesaṃ hi sāriputta pañcannaṃ bhikkhusatānaṃ yo pacchimako Bhikkhu so sotāpanno avinipātadhammo niyato sambodhiparāyanoti. [9] Athakho bhagavā āyasmantaṃ ānandaṃ āmantesi āciṇṇaṃ kho panetaṃ ānanda tathāgatānaṃ yehi nimantitā vassaṃ vasanti na te anapaloketvā janapadacārikaṃ pakkamanti āyāmānanda verañjaṃ brāhmaṇaṃ apalokessāmāti . evaṃ bhanteti kho āyasmā ānando bhagavato paccassosi . athakho bhagavā nivāsetvā pattacīvaramādāya āyasmatā ānandena pacchāsamaṇena yena verañjassa brāhmaṇassa nivesanaṃ tenupasaṅkami upasaṅkamitvā paññatte āsane nisīdi . athakho verañjo brāhmaṇo yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi. {9.1} Ekamantaṃ nisinnaṃ kho verañjaṃ brāhmaṇaṃ bhagavā etadavoca nimantitamhā tayā brāhmaṇa vassaṃ vutthā apalokema ^1- taṃ icchāma mayaṃ janapadacārikaṃ pakkamitunti . saccaṃ bho gotama nimantitattha mayā vassaṃ vutthā apica yo deyyadhammo so na dinno tañca kho no asantaṃ nopi adātukamyatā taṃ kutettha labbhā bahukiccā gharāvāsā bahukaraṇīyā adhivāsetu me bhavaṃ gotamo svātanāya bhattaṃ saddhiṃ bhikkhusaṅghenāti. Adhivāsesi bhagavā tuṇhībhāvena . athakho bhagavā verañjaṃ brāhmaṇaṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā @Footnote: ¹ Yu. Ma. apalokāma. Pakkāmi . athakho verañjo brāhmaṇo tassā rattiyā accayena sake nivesane paṇītaṃ khādanīyaṃ bhojanīyaṃ paṭiyādāpetvā bhagavato kālaṃ ārocāpesi kālo bho gotama niṭṭhitaṃ bhattanti. {9.2} Athakho bhagavā pubbaṇhasamayaṃ nivāsetvā pattacīvaramādāya yena verañjassa brāhmaṇassa nivesanaṃ tenupasaṅkami upasaṅkamitvā paññatte āsane nisīdi saddhiṃ bhikkhusaṅghena . athakho verañjo brāhmaṇo buddhappamukhaṃ bhikkhusaṅghaṃ paṇītena khādanīyena bhojanīyena sahatthā santappetvā sampavāretvā bhagavantaṃ bhuttāviṃ onītapattapāṇiṃ ticīvarena acchādesi ekamekañca bhikkhuṃ ekamekena dussayugena acchādesi. {9.3} Athakho bhagavā verañjaṃ brāhmaṇaṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā pakkāmi. Athakho bhagavā verañjāyaṃ yathābhirantaṃ viharitvā anupagamma soreyyaṃ saṅkassaṃ kaṇṇakujjaṃ yena payāgapatiṭṭhānaṃ tenupasaṅkami upasaṅkamitvā payāgapatiṭṭhāne gaṅgaṃ nadiṃ uttaritvā yena bārāṇasī tadavasari. Athakho bhagavā bārāṇasiyaṃ yathābhirantaṃ viharitvā yena vesālī tena cārikaṃ pakkāmi anupubbena cārikaṃ caramāno yena vesālī tadavasari . Tatra sudaṃ bhagavā vesāliyaṃ viharati mahāvane kūṭāgārasālāyaṃ. Verañjabhāṇavāraṃ niṭṭhitaṃ. -------------- Paṭhamapārājikakaṇḍaṃ [10] Tena kho pana samayena vesāliyā avidūre kalandagāmo ^1- hoti. Tattha sudinno nāma kalandaputto ^2- seṭṭhiputto hoti. Athakho sudinno kalandaputto sambahulehi sahāyakehi saddhiṃ vesāliṃ agamāsi kenacideva karaṇīyena . tena kho pana samayena bhagavā mahatiyā parisāya parivuto dhammaṃ desento nisinno hoti . addasā kho sudinno kalandaputto bhagavantaṃ mahatiyā parisāya parivutaṃ dhammaṃ desentaṃ nisinnaṃ. Disvānassa etadahosi yannūnāhaṃpi dhammaṃ suṇeyyanti . athakho sudinno kalandaputto yena sā parisā tenupasaṅkami upasaṅkamitvā ekamantaṃ nisīdi. {10.1} Ekamantaṃ nisinnassa kho sudinnassa kalandaputtassa etadahosi yathā yathā kho ahaṃ bhagavatā dhammaṃ desitaṃ ājānāmi nayidaṃ sukaraṃ agāraṃ ajjhāvasatā ekantaparipuṇṇaṃ ekantaparisuddhaṃ saṅkhalikhitaṃ brahmacariyaṃ carituṃ yannūnāhaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyyanti . athakho sā parisā bhagavatā dhammiyā kathāya sandassitā samādapitā samuttejitā sampahaṃsitā uṭṭhāyāsanā bhagavantaṃ abhivādetvā padakkhiṇaṃ katvā pakkāmi. @Footnote: ¹ Yu. kalandakagāmo nāma. Ma. kalandagāmo nāma. ² Yu. @kalandakaputto. {10.2} Athakho sudinno kalandaputto aciravuṭṭhitāya parisāya yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . Ekamantaṃ nisinno kho sudinno kalandaputto bhagavantaṃ etadavoca yathā yathāhaṃ bhante bhagavatā dhammaṃ desitaṃ ājānāmi nayidaṃ sukaraṃ agāraṃ ajjhāvasatā ekantaparipuṇṇaṃ ekantaparisuddhaṃ saṅkhalikhitaṃ brahmacariyaṃ carituṃ icchāmahaṃ bhante kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajituṃ pabbājetu maṃ bhagavāti . anuññātosi pana tvaṃ sudinna mātāpitūhi agārasmā anagāriyaṃ pabbajjāyāti . na kho ahaṃ bhante anuññāto mātāpitūhi agārasmā anagāriyaṃ pabbajjāyāti . na kho sudinna tathāgatā ananuññātaṃ mātāpitūhi puttaṃ pabbājentīti . sohaṃ bhante tathā karissāmi yathā maṃ mātāpitaro anujānissanti agārasmā anagāriyaṃ pabbajjāyāti ^1-. [11] Athakho sudinno kalandaputto vesāliyaṃ taṃ karaṇīyaṃ tīretvā yena kalandagāmo yena mātāpitaro tenupasaṅkami upasaṅkamitvā mātāpitaro etadavoca amma tāta yathā yathāhaṃ bhagavatā dhammaṃ desitaṃ ājānāmi nayidaṃ sukaraṃ agāraṃ ajjhāvasatā ekantaparipuṇṇaṃ @Footnote: ¹ ito paraṃ katthaci athakho sudinno kalandaputto bhagavato bhāsitaṃ @abhinanditvā uṭṭhāyāsanā bhagavantaṃ abhivādetvā padakkhiṇaṃ katvā @pakkāmīti likhitaṃ. Ekantaparisuddhaṃ saṅkhalikhitaṃ brahmacariyaṃ carituṃ icchāmahaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajituṃ anujānātha maṃ agārasmā anagāriyaṃ pabbajjāyāti . Evaṃ vutte sudinnassa kalandaputtassa mātāpitaro sudinnaṃ kalandaputtaṃ etadavocuṃ tvaṃ khosi tāta sudinna amhākaṃ ekaputtako piyo manāpo sukhedhito sukhaparihato na tvaṃ tāta sudinna kiñci dukkhassa jānāsi maraṇenapi mayante akāmakā vinā bhavissāma kiṃ pana mayaṃ taṃ jīvantaṃ anujānissāma agārasmā anagāriyaṃ pabbajjāyāti . dutiyampi kho sudinno kalandaputto mātāpitaro etadavoca amma tāta yathā yathāhaṃ bhagavatā dhammaṃ desitaṃ ājānāmi nayidaṃ sukaraṃ agāraṃ ajjhāvasatā ekantaparipuṇṇaṃ ekantaparisuddhaṃ saṅkhalikhitaṃ brahmacariyaṃ carituṃ icchāmahaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajituṃ anujānātha maṃ agārasmā anagāriyaṃ pabbajjāyāti . Dutiyampi kho sudinnassa kalandaputtassa mātāpitaro sudinnaṃ kalandaputtaṃ etadavocuṃ tvaṃ khosi tāta sudinna amhākaṃ ekaputtako piyo manāpo sukhedhito sukhaparihato na tvaṃ tāta sudinna kiñci dukkhassa jānāsi maraṇenapi mayante akāmakā vinā bhavissāma kiṃ pana mayaṃ taṃ jīvantaṃ anujānissāma agārasmā anagāriyaṃ pabbajjāyāti. Tatiyampi kho sudinno kalandaputto mātāpitaro etadavoca Amma tāta yathā yathāhaṃ bhagavatā dhammaṃ desitaṃ ājānāmi nayidaṃ sukaraṃ agāraṃ ajjhāvasatā ekantaparipuṇṇaṃ ekantaparisuddhaṃ saṅkhalikhitaṃ brahmacariyaṃ carituṃ icchāmahaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajituṃ anujānātha maṃ agārasmā anagāriyaṃ pabbajjāyāti . tatiyampi kho sudinnassa kalandaputtassa mātāpitaro sudinnaṃ kalandaputtaṃ etadavocuṃ tvaṃ khosi tāta sudinna amhākaṃ ekaputtako piyo manāpo sukhedhito sukhaparihato na tvaṃ tāta sudinna kiñci dukkhassa jānāsi maraṇenapi mayante akāmakā vinā bhavissāma kiṃ pana mayaṃ taṃ jīvantaṃ anujānissāma agārasmā anagāriyaṃ pabbajjāyāti. {11.1} Athakho sudinno kalandaputto na maṃ mātāpitaro anujānanti agārasmā anagāriyaṃ pabbajjāyāti tattheva anantarahitāya bhūmiyā nipajji idheva me maraṇaṃ bhavissati pabbajjā vāti ^1-. Athakho sudinno kalandaputto ekaṃpi bhattaṃ na bhuñji dvepi bhattāni na bhuñji tīṇipi bhattāni na bhuñji cattāripi bhattāni na bhuñji pañcapi bhattāni na bhuñji chapi bhattāni na bhuñji sattapi bhattāni na bhuñji. [12] Athakho sudinnassa kalandaputtassa mātāpitaro sudinnaṃ kalandaputtaṃ etadavocuṃ tvaṃ khosi tāta sudinna amhākaṃ ekaputtako @Footnote: ¹ pabbajjāyātipi pāṭho. Piyo manāpo sukhedhito sukhaparihato na tvaṃ tāta sudinna kiñci dukkhassa jānāsi maraṇenapi mayante akāmakā vinā bhavissāma kiṃ pana mayaṃ taṃ jīvantaṃ anujānissāma agārasmā anagāriyaṃ pabbajjāya uṭṭhehi tāta sudinna bhuñja ca piva ca paricārehi ca bhuñjanto pivanto paricārento kāme paribhuñjanto puññāni karonto abhiramassu na taṃ mayaṃ anujānāma agārasmā anagāriyaṃ pabbajjāyāti. {12.1} Evaṃ vutte sudinno kalandaputto tuṇhī ahosi. Dutiyampi kho .pe. tatiyampi kho sudinnassa kalandaputtassa mātāpitaro sudinnaṃ kalandaputtaṃ etadavocuṃ tvaṃ khosi tāta sudinna amhākaṃ ekaputtako piyo manāpo sukhedhito sukhaparihato na tvaṃ tāta sudinna kiñci dukkhassa jānāsi maraṇenapi mayante akāmakā vinā bhavissāma kiṃ pana mayaṃ taṃ jīvantaṃ anujānissāma agārasmā anagāriyaṃ pabbajjāya uṭṭhehi tāta sudinna bhuñja ca piva ca paricārehi ca bhuñjanto pivanto paricārento kāme paribhuñjanto puññāni karonto abhiramassu na taṃ mayaṃ anujānāma agārasmā anagāriyaṃ pabbajjāyāti . Tatiyampi kho sudinno kalandaputto tuṇhī ahosi. [13] Athakho sudinnassa kalandaputtassa sahāyakā yena sudinno kalandaputto tenupasaṅkamiṃsu upasaṅkamitvā sudinnaṃ kalandaputtaṃ etadavocuṃ tvaṃ khosi samma sudinna mātāpitūnaṃ ekaputtako piyo Manāpo sukhedhito sukhaparihato na tvaṃ samma sudinna kiñci dukkhassa jānāsi maraṇenapi te mātāpitaro akāmakā vinā bhavissanti kiṃ pana taṃ jīvantaṃ anujānissanti agārasmā anagāriyaṃ pabbajjāya uṭṭhehi samma sudinna bhuñja ca piva ca paricārehi ca bhuñjanto pivanto paricārento kāme paribhuñjanto puññāni karonto abhiramassu na taṃ mātāpitaro anujānanti agārasmā anagāriyaṃ pabbajjāyāti. {13.1} Evaṃ vutte sudinno kalandaputto tuṇhī ahosi. Dutiyampi kho .pe. tatiyampi kho sudinnassa kalandaputtassa sahāyakā sudinnaṃ kalandaputtaṃ etadavocuṃ tvaṃ khosi samma sudinna .pe. tatiyampi kho sudinno kalandaputto tuṇhī ahosi . athakho sudinnassa kalandaputtassa sahāyakā yena sudinnassa kalandaputtassa mātāpitaro tenupasaṅkamiṃsu upasaṅkamitvā sudinnassa kalandaputtassa mātāpitaro etadavocuṃ amma tāta eso sudinno anantarahitāya bhūmiyā nipanno idheva me maraṇaṃ bhavissati pabbajjā vāti sace tumhe sudinnaṃ nānujānissatha agārasmā anagāriyaṃ pabbajjāya tattheva maraṇaṃ āgamissati sace pana tumhe sudinnaṃ anujānissatha agārasmā anagāriyaṃ pabbajjāya pabbajitaṃpi naṃ dakkhissatha sace sudinno nābhiramissati agārasmā anagāriyaṃ pabbajjāya kā tassa aññā gati bhavissati idheva paccāgamissati anujānātha sudinnaṃ agārasmā anagāriyaṃ pabbajjāyāti . Anujānāma tātā sudinnaṃ agārasmā anagāriyaṃ pabbajjāyāti. [14] Athakho sudinnassa kalandaputtassa sahāyakā yena sudinno kalandaputto tenupasaṅkamiṃsu upasaṅkamitvā sudinnaṃ kalandaputtaṃ etadavocuṃ uṭṭhehi samma sudinna anuññātosi mātāpitūhi agārasmā anagāriyaṃ pabbajjāyāti . athakho sudinno kalandaputto anuññātomhi kira mātāpitūhi agārasmā anagāriyaṃ pabbajjāyāti haṭṭho udaggo pāṇinā gattāni paripuñchanto vuṭṭhāsi . Athakho sudinno kalandaputto katipāhaṃ balaṃ gāhetvā ^1- yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho sudinno kalandaputto bhagavantaṃ etadavoca anuññātomhi ^2- ahaṃ bhante mātāpitūhi agārasmā anagāriyaṃ pabbajjāya pabbājetu maṃ bhante bhagavāti . alattha kho sudinno kalandaputto bhagavato santike pabbajjaṃ alattha upasampadaṃ . Acirupasampanno ca panāyasmā sudinno evarūpe dhūtaguṇe samādāya vattati āraññiko hoti piṇḍapātiko paṃsukūliko sapadānacāriko aññataraṃ vajjīgāmaṃ upanissāya viharati. [15] Tena kho pana samayena vajjī dubbhikkhā hoti dvīhitikā setaṭṭhikā salākāvuttā na sukarā uñchena paggahena yāpetuṃ . Athakho āyasmato sudinnassa etadahosi etarahi kho vajjī @Footnote: ¹ yebhuyyena gahetvāti pāṭho dissati. ² Yu. Ma. anuññāto. Dubbhikkhā dvīhitikā setaṭṭhikā salākāvuttā na sukarā uñchena paggahena yāpetuṃ bahū kho pana me vesāliyaṃ ñātakā ^1- aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā yannūnāhaṃ ñātakānaṃ ^2- upanissāya vihareyyaṃ ñātakāpi ^3- maṃ nissāya dānāni dassanti puññāni karissanti bhikkhū ca lābhaṃ lacchanti ahañca piṇḍakena na kilamissāmīti . athakho āyasmā sudinno senāsanaṃ saṃsāmetvā pattacīvaramādāya yena vesālī tena pakkāmi anupubbena cārikaṃ ^4- caramāno ^5- yena vesālī tadavasari. {15.1} Tatra sudaṃ āyasmā sudinno vesāliyaṃ viharati mahāvane kūṭāgārasālāyaṃ . assosuṃ kho āyasmato sudinnassa ñātakā sudinno kira kalandaputto vesāliṃ anuppattoti . te āyasmato sudinnassa saṭṭhimatte thālipāke bhattābhihāraṃ abhihariṃsu . athakho āyasmā sudinno te saṭṭhimatte thālipāke bhikkhūnaṃ vissajjetvā pubbaṇhasamayaṃ nivāsetvā pattacīvaramādāya kalandagāmaṃ piṇḍāya pāvisi kalandagāme sapadānaṃ piṇḍāya caramāno yena sakapitu nivesanaṃ tenupasaṅkami . tena kho pana samayena āyasmato sudinnassa ñātidāsī ābhidosikaṃ kummāsaṃ chaḍḍetukāmā hoti . Athakho āyasmā sudinno taṃ ñātidāsiṃ etadavoca sace taṃ bhagini @Footnote: ¹ Yu. Ma. ñātī. ^2-3 Yu. Ma. ñātī. 4-5 tīsupi potthakesu idaṃ @pāṭhadvayaṃ na dissati. Chaḍḍanīyadhammaṃ idha me patte ākirāti . athakho āyasmato sudinnassa ñātidāsī taṃ ābhidosikaṃ kummāsaṃ āyasmato sudinnassa patte ākirantī hatthānañca pādānañca sarassa ca nimittaṃ aggahesi . athakho āyasmato sudinnassa ñātidāsī yenāyasmato sudinnassa mātā tenupasaṅkami upasaṅkamitvā āyasmato sudinnassa mātaraṃ etadavoca yagghayye jāneyyāsi ayyaputto sudinno anuppattoti. Sace je saccaṃ bhaṇasi adāsiṃ taṃ karomīti. {15.2} Tena kho pana samayena āyasmā sudinno taṃ ābhidosikaṃ kummāsaṃ aññataraṃ kuḍḍamūlaṃ nissāya paribhuñjati . pitāpi kho āyasmato sudinnassa kammantā āgacchanto addasa āyasmantaṃ sudinnaṃ taṃ ābhidosikaṃ kummāsaṃ aññataraṃ kuḍḍamūlaṃ nissāya paribhuñjantaṃ disvāna yenāyasmā sudinno tenupasaṅkami upasaṅkamitvā āyasmantaṃ sudinnaṃ etadavoca atthi nāma tāta sudinna ābhidosikaṃ kummāsaṃ paribhuñjissasi nanu ^1- tāta sudinna sakagehaṃ ^2- gantabbanti. Agamamhā kho te gahapati gehaṃ tatāyaṃ ^3- ābhidosiko kummāso mayā laddhoti ^4-. Athakho āyasmato sudinnassa pitā āyasmato sudinnassa bāhāyaṃ gahetvā āyasmantaṃ sudinnaṃ etadavoca ehi tāta sudinna gharaṃ gamissāmāti . athakho āyasmā sudinno yena sakapitu nivesanaṃ @Footnote: ¹ Yu. Ma. nanu nāma. ² Yu. Ma. sakaṃ gehaṃ. ³ Yu. tatrāyaṃ. @⁴ mayā laddhoti pāṭhadvayaṃ yuropiyamarammapotthakesu na dissati. Tenupasaṅkami upasaṅkamitvā paññatte āsane nisīdi . athakho āyasmato sudinnassa pitā āyasmantaṃ sudinnaṃ etadavoca bhuñja tāta sudinnāti . alaṃ gahapati kataṃ me ajja bhattakiccanti . Adhivāsehi tāta sudinna svātanāya bhattanti . adhivāsesi kho āyasmā sudinno tuṇhībhāvena . athakho āyasmā sudinno uṭṭhāyāsanā pakkāmi. [16] Athakho āyasmato sudinnassa mātā tassā rattiyā accayena haritena gomayena paṭhaviṃ opuñchāpetvā dve puñje kārāpesi ekaṃ hiraññassa ekaṃ suvaṇṇassa tāva mahantā puñjā ahesuṃ orato ṭhito puriso pārato ṭhitaṃ purisaṃ na passati pārato ṭhito puriso orato ṭhitaṃ purisaṃ na passati te puñje kilañjehi paṭicchādāpetvā majjhe āsanaṃ paññāpetvā tirokaraṇīyaṃ parikkhipāpetvā ^1- āyasmato sudinnassa purāṇadutiyikaṃ āmantesi tenahi vadhu yena alaṅkārena alaṅkatā puttassa sudinnassa piyā ahosi manāpā tena alaṅkārena alaṅkarāti . evaṃ ayyeti kho āyasmato sudinnassa purāṇadutiyikā āyasmato sudinnassa mātuyā paccassosi. {16.1} Athakho āyasmā sudinno pubbaṇhasamayaṃ nivāsetvā pattacīvaramādāya yena sakapitu nivesanaṃ tenupasaṅkami upasaṅkamitvā paññatte āsane nisīdi . athakho āyasmato @Footnote: ¹ yebhuyyena parikkhipitvāti pāṭho dissati. Sudinnassa pitā yenāyasmā sudinno tenupasaṅkami upasaṅkamitvā te puñje vivarāpetvā āyasmantaṃ sudinnaṃ etadavoca idante tāta sudinna mātumattikaṃ itthikāya itthīdhanaṃ aññaṃ pettikaṃ aññaṃ pitāmahaṃ labbhā tāta sudinna hīnāyāvattitvā bhogā ca bhuñjituṃ puññāni ca kātuṃ ehi tvaṃ tāta sudinna hīnāyāvattitvā bhoge ca bhuñjassu puññāni ca karohīti . tāta na ussahāmi na visahāmi abhirato ahaṃ brahmacariyaṃ carāmīti . dutiyampi kho .pe. tatiyampi kho āyasmato sudinnassa pitā āyasmantaṃ sudinnaṃ etadavoca idante tāta sudinna mātumattikaṃ itthikāya itthīdhanaṃ aññaṃ pettikaṃ aññaṃ pitāmahaṃ labbhā tāta sudinna hīnāyāvattitvā bhogā ca bhuñjituṃ puññāni ca kātuṃ ehi tvaṃ tāta sudinna hīnāyāvattitvā bhoge ca bhuñjassu puññāni ca karohīti . vadeyyāma kho taṃ gahapati sace tvaṃ nātikaḍḍheyyāsīti . vadehi tāta sudinnāti . tenahi tvaṃ gahapati mahante mahante sāṇipasibbake kārāpetvā hiraññasuvaṇṇassa pūrāpetvā sakaṭehi nibbāhāpetvā majjhe gaṅgāya sote osādehi ^1- taṃ kissa hetu yaṃ hi te gahapati bhavissati tatonidānaṃ bhayaṃ vā chambhitattaṃ vā lomahaṃso vā ārakkho vā so te na bhavissatīti . evaṃ vutte āyasmato sudinnassa pitā @Footnote: ¹ Yu. otārehi. Ma. Rā. osārehi. Anattamano ahosi kathaṃ hi nāma putto sudinno evaṃ vakkhatīti. {16.2} Athakho āyasmato sudinnassa pitā āyasmato sudinnassa purāṇadutiyikaṃ āmantesi tenahi vadhu tvaṃ piyā ca manāpā ca appevanāma putto sudinno tuyhaṃpi vacanaṃ kareyyāti . athakho āyasmato sudinnassa purāṇadutiyikā āyasmato sudinnassa pādesu gahetvā āyasmantaṃ sudinnaṃ etadavoca kīdisā nāma tā ayyaputta accharāyo yāsaṃ tvaṃ hetu brahmacariyaṃ carasīti . na kho ahaṃ bhagini accharānaṃ hetu brahmacariyaṃ carāmīti . athakho āyasmato sudinnassa purāṇadutiyikā ajjatagge maṃ ayyaputto sudinno bhaginivādena samudācaratīti tattheva mucchitā papatā. {16.3} Athakho āyasmā sudinno pitaraṃ etadavoca sace gahapati bhojanaṃ dātabbaṃ detha mā no viheṭhayitthāti . Bhuñja tāta sudinnāti. Athakho āyasmato sudinnassa mātā ca pitā ca āyasmantaṃ sudinnaṃ paṇītena khādanīyena bhojanīyena sahatthā santappesuṃ sampavāresuṃ . Athakho āyasmato sudinnassa mātā āyasmantaṃ sudinnaṃ bhuttāviṃ onītapattapāṇiṃ etadavoca idaṃ tāta sudinna kulaṃ aḍḍhaṃ mahaddhanaṃ mahābhogaṃ pahūtajātarūparajataṃ pahūtavittūpakaraṇaṃ pahūtadhanadhaññaṃ labbhā tāta sudinna hīnāyāvattitvā bhogā ca bhuñjituṃ puññāni ca kātuṃ ehi tvaṃ tāta sudinna hīnāyāvattitvā bhoge ca bhuñjassu puññāni ca karohīti . amma na ussahāmi na visahāmi Abhirato ahaṃ brahmacariyaṃ carāmīti . dutiyampi kho .pe. tatiyampi kho āyasmato sudinnassa mātā āyasmantaṃ sudinnaṃ etadavoca idaṃ tāta sudinna kulaṃ aḍḍhaṃ mahaddhanaṃ mahābhogaṃ pahūtajātarūparajataṃ pahūtavittūpakaraṇaṃ pahūtadhanadhaññaṃ tenahi tāta sudinna bījakaṃpi dehi mā no aputtakaṃ sāpateyyaṃ licchavino ^1- atiharāpesunti . Etaṃ kho me amma sakkā kātunti . kahaṃ pana tāta sudinna etarahi viharasīti . mahāvane ammāti . athakho āyasmā sudinno uṭṭhāyāsanā pakkāmi. [17] Athakho āyasmato sudinnassa mātā āyasmato sudinnassa purāṇadutiyikaṃ āmantesi tenahi vadhu yadā utunī ahosi pupphaṃ te uppannaṃ hoti atha me āroceyyāsīti . Evaṃ ayyeti kho āyasmato sudinnassa purāṇadutiyikā āyasmato sudinnassa mātuyā paccassosi . athakho āyasmato sudinnassa purāṇadutiyikā na cirasseva utunī ahosi pupphaṃsā uppajji. {17.1} Athakho āyasmato sudinnassa purāṇadutiyikā āyasmato sudinnassa mātaraṃ etadavoca utunimhi ayye pupphaṃ me uppannanti. Tenahi vadhu yena alaṅkārena alaṅkatā puttassa sudinnassa piyā ahosi manāpā tena alaṅkārena alaṅkarāti . evaṃ ayyeti kho āyasmato sudinnassa purāṇadutiyikā āyasmato sudinnassa mātuyā paccassosi . athakho @Footnote: ¹ sabbattha potthakesu licchaviyoti pāṭho dissati. Āyasmato sudinnassa mātā āyasmato sudinnassa purāṇadutiyikaṃ ādāya yena mahāvanaṃ yenāyasmā sudinno tenupasaṅkami upasaṅkamitvā āyasmantaṃ sudinnaṃ etadavoca idaṃ tāta sudinna kulaṃ aḍḍhaṃ mahaddhanaṃ mahābhogaṃ pahūtajātarūparajataṃ pahūtavittūpakaraṇaṃ pahūtadhanadhaññaṃ labbhā tāta sudinna hīnāyāvattitvā bhogā ca bhuñjituṃ puññāni ca kātuṃ ehi tvaṃ tāta sudinna hīnāyāvattitvā bhoge ca bhuñjassu puññāni ca karohīti . amma na ussahāmi na visahāmi abhirato ahaṃ brahmacariyaṃ carāmīti . dutiyampi kho .pe. tatiyampi kho āyasmato sudinnassa mātā āyasmantaṃ sudinnaṃ etadavoca idaṃ tāta sudinna kulaṃ aḍḍhaṃ mahaddhanaṃ mahābhogaṃ pahūtajātarūparajataṃ pahūtavittūpakaraṇaṃ pahūtadhanadhaññaṃ tenahi tāta sudinna bījakaṃpi dehi mā no aputtakaṃ sāpateyyaṃ licchavino atiharāpesunti . etaṃ kho me amma sakkā kātunti purāṇadutiyikāya bāhāyaṃ gahetvā mahāvanaṃ ajjhogāhetvā appaññatte sikkhāpade anādīnavadasso purāṇadutiyikāya tikkhattuṃ methunaṃ dhammaṃ abhiviññāpesi. Sā tena gabbhaṃ gaṇhi. [18] Bhummā devā saddamanussāvesuṃ nirabbudo vata bho bhikkhusaṅgho nirādīnavo sudinnena kalandaputtena abbudaṃ uppāditaṃ ādīnavo uppāditoti . bhummānaṃ devānaṃ saddaṃ sutvā cātummahārājikā devā saddamanussāvesuṃ tāvatiṃsā devā yāmā Devā tusitā devā nimmānaratī devā paranimmitavasavattī devā brahmakāyikā devā saddamanussāvesuṃ nirabbudo vata bho bhikkhusaṅgho nirādīnavo sudinnena kalandaputtena abbudaṃ uppāditaṃ ādīnavo uppāditoti . itiha tena khaṇena tena muhuttena yāva brahmalokā saddo abbhuggañchi. {18.1} Athakho āyasmato sudinnassa purāṇadutiyikā tassa gabbhassa paripākamanvāya puttaṃ vijāyi . athakho āyasmato sudinnassa sahāyakā tassa dārakassa bījakoti nāmaṃ akaṃsu āyasmato sudinnassa purāṇadutiyikāya bījakamātāti nāmaṃ akaṃsu āyasmato sudinnassa bījakapitāti nāmaṃ akaṃsu. Te aparena samayena ubho agārasmā anagāriyaṃ pabbajitvā arahattaṃ sacchākaṃsu. [19] Athakho āyasmato sudinnassa ahudeva kukkuccaṃ ahu vippaṭisāro alābhā vata me na vata me lābhā dulladdhaṃ vata me na vata me suladdhaṃ yohaṃ evaṃ svākkhāte dhammavinaye pabbajitvā nāsakkhiṃ yāvajīvaṃ paripuṇṇaṃ parisuddhaṃ brahmacariyaṃ caritunti. So teneva kukkuccena tena vippaṭisārena kiso ahosi lūkho dubbaṇṇo uppaṇḍuppaṇḍukajāto dhamanisanthatagatto antomano līnamano dukkhī dummano vippaṭisārī pajjhāyi. {19.1} Athakho āyasmato sudinnassa sahāyakā bhikkhū āyasmantaṃ sudinnaṃ etadavocuṃ pubbe kho tvaṃ āvuso sudinna vaṇṇavā ahosi pīnindriyo pasannamukhavaṇṇo vippasannacchavivaṇṇo pariyodāto sodāni tvaṃ etarahi Kiso lūkho dubbaṇṇo uppaṇḍuppaṇḍukajāto dhamanisanthatagatto antomano līnamano dukkhī dummano vippaṭisārī pajjhāyasi kacci no tvaṃ āvuso sudinna anabhirato brahmacariyaṃ carasīti . na kho ahaṃ āvuso anabhirato brahmacariyaṃ carāmi atthi me pāpakammaṃ ^1- kataṃ purāṇadutiyikāya methuno dhammo paṭisevito tassa mayhaṃ āvuso ahudeva kukkuccaṃ ahu vippaṭisāro alābhā vata me na vata me lābhā dulladdhaṃ vata me na vata me suladdhaṃ yohaṃ evaṃ svākkhāte dhammavinaye pabbajitvā nāsakkhiṃ yāvajīvaṃ paripuṇṇaṃ parisuddhaṃ brahmacariyaṃ caritunti. {19.2} Alaṃ hi te āvuso sudinna kukkuccāya alaṃ vippaṭisārāya yaṃ tvaṃ evaṃ svākkhāte dhammavinaye pabbajitvā na sakkhissasi yāvajīvaṃ paripuṇṇaṃ parisuddhaṃ brahmacariyaṃ carituṃ nanu āvuso bhagavatā anekapariyāyena virāgāya dhammo desito no sarāgāya visaṃyogāya dhammo desito no saṃyogāya anupādānāya dhammo desito no saupādānāya tattha nāma tvaṃ āvuso bhagavatā virāgāya dhamme desite sarāgāya cetessasi visaṃyogāya dhamme desite saṃyogāya cetessasi anupādānāya dhamme desite saupādānāya cetessasi nanu āvuso bhagavatā anekapariyāyena rāgavirāgāya dhammo desito madanimmadanāya pipāsavinayāya ālayasamugghātāya vaṭṭūpacchedāya @Footnote: ¹ Yu. pāpaṃ kammaṃ. Ma. pāpakaṃ. Taṇhakkhayāya virāgāya nirodhāya nibbānāya dhammo desito nanu āvuso bhagavatā anekapariyāyena kāmānaṃ pahānaṃ akkhātaṃ kāmasaññānaṃ pariññā akkhātā kāmapipāsānaṃ paṭivinayo akkhāto kāmavitakkānaṃ samugghāto akkhāto kāmapariḷāhānaṃ vūpasamo akkhāto netaṃ āvuso appasannānaṃ vā pasādāya pasannānaṃ vā bhiyyobhāvāya athakhvetaṃ āvuso appasannānañceva appasādāya pasannānañca ekaccānaṃ aññathattāyāti . athakho te bhikkhū āyasmantaṃ sudinnaṃ anekapariyāyena vigarahitvā bhagavato etamatthaṃ ārocesuṃ. [20] Athakho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ sudinnaṃ paṭipucchi saccaṃ kira tvaṃ sudinna purāṇadutiyikāya methunaṃ dhammaṃ paṭisevasīti ^1- . saccaṃ bhagavāti. Vigarahi buddho bhagavā ananucchavikaṃ ^2- moghapurisa ananulomikaṃ appaṭirūpaṃ assāmaṇakaṃ akappiyaṃ akaraṇīyaṃ kathaṃ hi nāma tvaṃ moghapurisa evaṃ svākkhāte dhammavinaye pabbajitvā na sakkhissasi yāvajīvaṃ paripuṇṇaṃ parisuddhaṃ brahmacariyaṃ carituṃ {20.1} nanu mayā moghapurisa anekapariyāyena virāgāya dhammo desito no sarāgāya visaṃyogāya dhammo desito no saṃyogāya anupādānāya dhammo desito no saupādānāya tattha nāma tvaṃ moghapurisa mayā virāgāya dhamme desite sarāgāya @Footnote: ¹ Yu. paṭisevīti. ² yebhuyyena ananucchaviyanti pāṭho dissati. Cetessasi visaṃyogāya dhamme desite saṃyogāya cetessasi anupādānāya dhamme desite saupādānāya cetessasi nanu mayā moghapurisa anekapariyāyena rāgavirāgāya dhammo desito madanimmadanāya pipāsavinayāya ālayasamugghātāya vaṭṭūpacchedāya taṇhakkhayāya virāgāya nirodhāya nibbānāya dhammo desito nanu mayā moghapurisa anekapariyāyena kāmānaṃ pahānaṃ akkhātaṃ kāmasaññānaṃ pariññā akkhātā kāmapipāsānaṃ paṭivinayo akkhāto kāmavitakkānaṃ samugghāto akkhāto kāmapariḷāhānaṃ vūpasamo akkhāto {20.2} varante moghapurisa āsīvisassa ghoravisassa mukhe aṅgajātaṃ pakkhittaṃ na tveva mātugāmassa aṅgajāte aṅgajātaṃ pakkhittaṃ varante moghapurisa kaṇhasappassa mukhe aṅgajātaṃ pakkhittaṃ na tveva mātugāmassa aṅgajāte aṅgajātaṃ pakkhittaṃ varante moghapurisa aṅgārakāsuyā ādittāya sampajjalitāya sañjotibhūtāya ^1- aṅgajātaṃ pakkhittaṃ na tveva mātugāmassa aṅgajāte aṅgajātaṃ pakkhittaṃ taṃ kissa hetu tatonidānaṃ hi moghapurisa maraṇaṃ vā nigaccheyya maraṇamattaṃ vā dukkhaṃ na tveva tappaccayā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjeyya itonidānañca kho moghapurisa kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjeyya tattha nāma tvaṃ moghapurisa yaṃ tvaṃ asaddhammaṃ @Footnote: ¹ yebhuyyena sajjotibhūtāyāti pāṭho dissati. Gāmadhammaṃ vasaladhammaṃ duṭṭhullaṃ odakantikaṃ rahassaṃ dvayaṃ dvayasamāpattiṃ samāpajjissasi bahunnaṃ kho tvaṃ moghapurisa akusalānaṃ dhammānaṃ ādikattā pubbaṅgamo netaṃ moghapurisa appasannānaṃ vā pasādāya pasannānaṃ vā bhiyyobhāvāya athakhvetaṃ moghapurisa appasannānañceva appasādāya pasannānañca ekaccānaṃ aññathattāyāti. {20.3} Athakho bhagavā āyasmantaṃ sudinnaṃ anekapariyāyena vigarahitvā dubbharatāya dupposatāya mahicchatāya asantuṭṭhatāya saṅgaṇikāya kosajjassa avaṇṇaṃ bhāsitvā anekapariyāyena subharatāya suposatāya appicchassa santuṭṭhassa sallekhassa dhūtassa pāsādikassa appaccayassa viriyārambhassa vaṇṇaṃ bhāsitvā bhikkhūnaṃ tadanucchavikaṃ tadanulomikaṃ dhammiṃ kathaṃ katvā bhikkhū āmantesi tenahi bhikkhave bhikkhūnaṃ sikkhāpadaṃ paññāpessāmi dasa atthavase paṭicca saṅghasuṭṭhutāya saṅghaphāsutāya dummaṅkūnaṃ puggalānaṃ niggahāya pesalānaṃ bhikkhūnaṃ phāsuvihārāya diṭṭhadhammikānaṃ āsavānaṃ saṃvarāya samparāyikānaṃ āsavānaṃ paṭighātāya appasannānaṃ pasādāya pasannānaṃ bhiyyobhāvāya saddhammaṭṭhitiyā vinayānuggahāya evañca pana bhikkhave imaṃ sikkhāpadaṃ uddiseyyātha {20.4} yo pana bhikkhu methunaṃ dhammaṃ paṭiseveyya pārājiko hoti asaṃvāsoti. {20.5} Evañcidaṃ bhagavatā bhikkhūnaṃ sikkhāpadaṃ paññattaṃ hoti. Sudinnabhāṇavāraṃ niṭṭhitaṃ. [21] Tena kho pana samayena aññataro bhikkhu vesāliyaṃ mahāvane makkaṭiṃ āmisena upalāpetvā tassā methunaṃ dhammaṃ paṭisevati . Athakho so bhikkhu pubbaṇhasamayaṃ nivāsetvā pattacīvaramādāya vesāliṃ piṇḍāya pāvisi . tena kho pana samayena sambahulā bhikkhū senāsanacārikaṃ āhiṇḍantā yena tassa bhikkhuno vihāro tenupasaṅkamiṃsu . addasā kho sā makkaṭī te bhikkhū dūrato va āgacchante disvāna yena te bhikkhū tenupasaṅkami upasaṅkamitvā tesaṃ bhikkhūnaṃ purato kaṭiṃpi cālesi cheppaṃpi cālesi kaṭiṃpi oḍḍi nimittaṃpi akāsi . athakho tesaṃ bhikkhūnaṃ etadahosi nissaṃsayaṃ kho so bhikkhu imissā makkaṭiyā methunaṃ dhammaṃ paṭisevatīti ekamantaṃ nilīyiṃsu . Athakho so bhikkhu vesāliyaṃ piṇḍāya caritvā piṇḍapātaṃ ādāya paṭikkami. {21.1} Athakho sā makkaṭī yena so bhikkhu tenupasaṅkami. Athakho so bhikkhu taṃ piṇḍapātaṃ ekadesaṃ bhuñjitvā ekadesaṃ tassā makkaṭiyā adāsi . athakho sā makkaṭī taṃ piṇḍapātaṃ ^1- bhuñjitvā tassa bhikkhuno kaṭiṃ oḍḍi . athakho so bhikkhu tassā makkaṭiyā methunaṃ dhammaṃ paṭisevati. Athakho te bhikkhū taṃ bhikkhuṃ etadavocuṃ nanu āvuso bhagavatā sikkhāpadaṃ paññattaṃ kissa tvaṃ āvuso imissā ^2- makkaṭiyā methunaṃ dhammaṃ paṭisevasīti . saccaṃ āvuso bhagavatā sikkhāpadaṃ paññattaṃ tañca @Footnote: ¹ Yu. taṃ piṇḍaṃ. ² pāyatoyaṃ pāṭho natthi. Kho manussitthiyā no tiracchānagatāyāti . nanu āvuso tatheva taṃ hoti ananucchavikaṃ āvuso ananulomikaṃ appaṭirūpaṃ assāmaṇakaṃ akappiyaṃ akaraṇīyaṃ kathaṃ hi nāma tvaṃ āvuso evaṃ svākkhāte dhammavinaye pabbajitvā na sakkhissasi yāvajīvaṃ paripuṇṇaṃ parisuddhaṃ brahmacariyaṃ carituṃ nanu āvuso bhagavatā anekapariyāyena virāgāya dhammo desito no sarāgāya .pe. kāmapariḷāhānaṃ vūpasamo akkhāto netaṃ āvuso appasannānaṃ vā pasādāya pasannānaṃ vā bhiyyobhāvāya athakhvetaṃ āvuso appasannānañceva appasādāya pasannānañca ekaccānaṃ aññathattāyāti . athakho te bhikkhū taṃ bhikkhuṃ anekapariyāyena vigarahitvā bhagavato etamatthaṃ ārocesuṃ. [22] Athakho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā taṃ bhikkhuṃ paṭipucchi saccaṃ kira tvaṃ bhikkhu makkaṭiyā methunaṃ dhammaṃ paṭisevasīti . saccaṃ bhagavāti . vigarahi buddho bhagavā ananucchavikaṃ moghapurisa ananulomikaṃ appaṭirūpaṃ assāmaṇakaṃ akappiyaṃ akaraṇīyaṃ kathaṃ hi nāma tvaṃ moghapurisa evaṃ svākkhāte dhammavinaye pabbajitvā na sakkhissasi yāvajīvaṃ paripuṇṇaṃ parisuddhaṃ brahmacariyaṃ carituṃ nanu mayā moghapurisa anekapariyāyena virāgāya dhammo desito no sarāgāya .pe. kāmapariḷāhānaṃ vūpasamo akkhāto varante moghapurisa āsīvisassa ghoravisassa mukhe aṅgajātaṃ pakkhittaṃ na tveva makkaṭiyā aṅgajāte aṅgajātaṃ pakkhittaṃ Varante moghapurisa kaṇhasappassa mukhe aṅgajātaṃ pakkhittaṃ na tveva makkaṭiyā aṅgajāte aṅgajātaṃ pakkhittaṃ varante moghapurisa aṅgārakāsuyā ādittāya sampajjalitāya sañjotibhūtāya aṅgajātaṃ pakkhittaṃ na tveva makkaṭiyā aṅgajāte aṅgajātaṃ pakkhittaṃ taṃ kissa hetu tatonidānaṃ hi moghapurisa maraṇaṃ vā nigaccheyya maraṇamattaṃ vā dukkhaṃ na tveva tappaccayā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjeyya itonidānañca kho moghapurisa kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjeyya tattha nāma tvaṃ moghapurisa yaṃ tvaṃ asaddhammaṃ gāmadhammaṃ vasaladhammaṃ duṭṭhullaṃ odakantikaṃ rahassaṃ dvayaṃ dvayasamāpattiṃ samāpajjissasi netaṃ moghapurisa appasannānaṃ vā pasādāya .pe. Evañca pana bhikkhave imaṃ sikkhāpadaṃ uddiseyyātha {22.1} yo pana bhikkhu methunaṃ dhammaṃ paṭiseveyya antamaso tiracchānagatāyapi pārājiko hoti asaṃvāsoti. {22.2} Evañcidaṃ bhagavatā bhikkhūnaṃ sikkhāpadaṃ paññattaṃ hoti. Makkaṭīvatthu ^1- niṭṭhitaṃ. [23] Tena kho pana samayena sambahulā vesālikā vajjīputtakā bhikkhū yāvadatthaṃ bhuñjiṃsu yāvadatthaṃ supiṃsu yāvadatthaṃ nahāyiṃsu yāvadatthaṃ bhuñjitvā yāvadatthaṃ supitvā yāvadatthaṃ nahāyitvā ayoniso manasikaritvā sikkhaṃ appaccakkhāya dubbalyaṃ anāvikatvā @Footnote: ¹ pāyato makkaṭīsikkhāpadanti dissati. Methunaṃ dhammaṃ paṭiseviṃsu . te aparena samayena ñātibyasanenapi phuṭṭhā bhogabyasanenapi phuṭṭhā rogabyasanenapi phuṭṭhā āyasmantaṃ ānandaṃ upasaṅkamitvā evaṃ vadenti na mayaṃ bhante ānanda buddhagarahino na dhammagarahino na saṅghagarahino attagarahino mayaṃ bhante ānanda anaññagarahino mayamevamhā alakkhikā mayaṃ appapuññā ye mayaṃ evaṃ svākkhāte dhammavinaye pabbajitvā nāsakkhimhā yāvajīvaṃ paripuṇṇaṃ parisuddhaṃ brahmacariyaṃ carituṃ idānipi ce ^1- mayaṃ bhante ānanda labheyyāma bhagavato santike pabbajjaṃ labheyyāma upasampadaṃ idānipi mayaṃ vipassakā kusalānaṃ dhammānaṃ pubbarattāpararattaṃ bodhipakkhikānaṃ dhammānaṃ bhāvanānuyogamanuyuttā vihareyyāma sādhu bhante ānanda bhagavato etamatthaṃ ārocehīti . Evamāvusoti kho āyasmā ānando vesālikānaṃ vajjīputtakānaṃ paṭissuṇitvā yena bhagavā tenupasaṅkami upasaṅkamitvā bhagavato etamatthaṃ ārocesi. {23.1} Aṭṭhānametaṃ ānanda anavakāso yaṃ tathāgato vajjīnaṃ vā vajjīputtakānaṃ vā kāraṇā sāvakānaṃ pārājikaṃ sikkhāpadaṃ paññattaṃ samūhaneyyāti. [24] Athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi yo kho ^2- bhikkhave bhikkhu sikkhaṃ appaccakkhāya dubbalyaṃ anāvikatvā methunaṃ dhammaṃ paṭisevati so āgato na @Footnote: ¹ Yu. Ma. idāni cepi. ² Yu. pana. Upasampādetabbo yo ca kho bhikkhave bhikkhu ^1- sikkhaṃ paccakkhāya dubbalyaṃ āvikatvā methunaṃ dhammaṃ paṭisevati so āgato upasampādetabbo evañca pana bhikkhave imaṃ sikkhāpadaṃ uddiseyyātha yo pana bhikkhu bhikkhūnaṃ sikkhāsājīva- samāpanno sikkhaṃ appaccakkhāya dubbalyaṃ anāvikatvā methunaṃ dhammaṃ paṭiseveyya antamaso tiracchānagatāyapi pārājiko hoti asaṃvāsoti. [25] Yo panāti yo yādiso yathāyutto yathājacco yathānāmo yathāgotto yathāsīlo yathāvihārī yathāgocaro thero vā navo vā majjhimo vā eso vuccati yo panāti. [26] Bhikkhūti bhikkhakoti bhikkhu . bhikkhācariyaṃ ajjhūpagatoti bhikkhu. Bhinnapaṭadharoti bhikkhu . sāmaññāya bhikkhu . paṭiññāya bhikkhu . Ehibhikkhūti bhikkhu . tīhi saraṇagamanehi upasampannoti bhikkhu. Bhadroti ^2- bhikkhu. Sāroti bhikkhu. Sekhoti bhikkhu. Asekhoti bhikkhu. Samaggena saṅghena ñatticatutthena kammena akuppena ṭhānārahena upasampannoti bhikkhu . Tatra yvāyaṃ bhikkhu samaggena saṅghena ñatticatutthena kammena akuppena ṭhānārahena upasampanno ayaṃ imasmiṃ atthe adhippeto bhikkhūti. [27] Sikkhāti tisso sikkhā adhisīlasikkhā adhicittasikkhā @Footnote: ¹ sabbatthāyaṃ pāṭho natthi. ² anupubbena bhadrotyādīsu catūsu @pāṭhesu itisaddā sabbattha na dissanti. Adhipaññāsikkhā tatra yāyaṃ adhisīlasikkhā ayaṃ imasmiṃ atthe adhippetā sikkhāti. [28] Sājīvaṃ nāma yaṃ bhagavatā paññattaṃ sikkhāpadaṃ etaṃ sājīvaṃ nāma tasmiṃ sikkhati tena vuccati sājīvasamāpannoti. [29] Sikkhaṃ appaccakkhāya dubbalyaṃ anāvikatvāti atthi bhikkhave dubbalyāvikammañceva hoti sikkhā ca appaccakkhātā . atthi bhikkhave dubbalyāvikammañceva hoti sikkhā ca paccakkhātā. [30] Kathañca bhikkhave dubbalyāvikammañceva hoti sikkhā ca appaccakkhātā . idha bhikkhave bhikkhu ukkaṇṭhito anabhirato sāmaññā cavitukāmo bhikkhubhāvaṃ aṭṭiyamāno harāyamāno jigucchamāno gihibhāvaṃ patthayamāno upāsakabhāvaṃ patthayamāno ārāmikabhāvaṃ patthayamāno sāmaṇerabhāvaṃ patthayamāno titthiyabhāvaṃ patthayamāno titthiyasāvakabhāvaṃ patthayamāno assamaṇabhāvaṃ patthayamāno asakyaputtiyabhāvaṃ patthayamāno yannūnāhaṃ buddhaṃ paccakkheyyanti vadati viññāpeti . evaṃpi bhikkhave dubbalyāvikammañceva hoti sikkhā ca appaccakkhātā. {30.1} Athavā pana ukkaṇṭhito anabhirato sāmaññā cavitukāmo bhikkhubhāvaṃ aṭṭiyamāno harāyamāno jigucchamāno gihibhāvaṃ patthayamāno .pe. asakyaputtiyabhāvaṃ patthayamāno yannūnāhaṃ dhammaṃ paccakkheyyanti vadati viññāpeti .pe. yannūnāhaṃ saṅghaṃ paccakkheyyanti vadati viññāpeti . yannūnāhaṃ sikkhaṃ paccakkheyyanti vadati viññāpeti . Yannūnāhaṃ vinayaṃ paccakkheyyanti vadati viññāpeti . yannūnāhaṃ pātimokkhaṃ paccakkheyyanti vadati viññāpeti . yannūnāhaṃ uddesaṃ paccakkheyyanti vadati viññāpeti . yannūnāhaṃ upajjhāyaṃ paccakkheyyanti vadati viññāpeti . yannūnāhaṃ ācariyaṃ paccakkheyyanti vadati viññāpeti . yannūnāhaṃ saddhivihārikaṃ paccakkheyyanti vadati viññāpeti. Yannūnāhaṃ antevāsikaṃ paccakkheyyanti vadati viññāpeti . yannūnāhaṃ samānupajjhāyakaṃ paccakkheyyanti vadati viññāpeti . yannūnāhaṃ samānācariyakaṃ paccakkheyyanti vadati viññāpeti. {30.2} Yannūnāhaṃ sabrahmacāriṃ paccakkheyyanti vadati viññāpeti. Yannūnāhaṃ gihī assanti vadati viññāpeti . yannūnāhaṃ upāsako assanti vadati viññāpeti . yannūnāhaṃ ārāmiko assanti vadati viññāpeti. Yannūnāhaṃ sāmaṇero assanti vadati viññāpeti . yannūnāhaṃ titthiyo assanti vadati viññāpeti . yannūnāhaṃ titthiyasāvako assanti vadati viññāpeti . yannūnāhaṃ assamaṇo assanti vadati viññāpeti . Yannūnāhaṃ asakyaputtiyo assanti vadati viññāpeti . evaṃpi bhikkhave dubbalyāvikammañceva hoti sikkhā ca appaccakkhātā. {30.3} Athavā pana ukkaṇṭhito anabhirato sāmaññā cavitukāmo bhikkhubhāvaṃ aṭṭiyamāno harāyamāno jigucchamāno gihibhāvaṃ patthayamāno .pe. asakyaputtiyabhāvaṃ patthayamāno yadi panāhaṃ buddhaṃ paccakkheyyanti vadati viññāpeti .pe. yadi panāhaṃ asakyaputtiyo Assanti vadati viññāpeti .pe. athāhaṃ ^1- buddhaṃ paccakkheyyanti vadati viññāpeti .pe. athāhaṃ asakyaputtiyo assanti vadati viññāpeti .pe. handāhaṃ buddhaṃ paccakkheyyanti vadati viññāpeti .pe. handāhaṃ asakyaputtiyo assanti vadati viññāpeti .pe. Hotu me buddhaṃ paccakkheyyanti vadati viññāpeti .pe. hotu me asakyaputtiyo assanti vadati viññāpeti . evaṃpi bhikkhave dubbalyāvikammañceva hoti sikkhā ca appaccakkhātā. {30.4} Athavā pana ukkaṇṭhito anabhirato sāmaññā cavitukāmo bhikkhubhāvaṃ aṭṭiyamāno harāyamāno jigucchamāno gihibhāvaṃ patthayamāno .pe. asakyaputtiyabhāvaṃ patthayamāno mātaraṃ sarāmīti vadati viññāpeti. Pitaraṃ sarāmīti vadati viññāpeti . bhātaraṃ sarāmīti vadati viññāpeti. Bhaginiṃ sarāmīti vadati viññāpeti . puttaṃ sarāmīti vadati viññāpeti. Dhītaraṃ sarāmīti vadati viññāpeti . pajāpatiṃ sarāmīti vadati viññāpeti. Ñātake sarāmīti vadati viññāpeti . mitte sarāmīti vadati viññāpeti. Gāmaṃ sarāmīti vadati viññāpeti. Nigamaṃ sarāmīti vadati viññāpeti. Khettaṃ sarāmīti vadati viññāpeti . vatthuṃ sarāmīti vadati viññāpeti. Hiraññaṃ sarāmīti vadati viññāpeti . suvaṇṇaṃ sarāmīti vadati viññāpeti. Sippaṃ sarāmīti vadati viññāpeti . pubbe hasitaṃ lapitaṃ kīḷitaṃ samanussarāmīti @Footnote: ¹ Yu. Ma. apāhaṃ. Vadati viññāpeti . evaṃpi bhikkhave dubbalyāvikammañceva hoti sikkhā ca appaccakkhātā. {30.5} Athavā pana ukkaṇṭhito anabhirato sāmaññā cavitukāmo bhikkhubhāvaṃ aṭṭiyamāno harāyamāno jigucchamāno gihibhāvaṃ patthayamāno .pe. asakyaputtiyabhāvaṃ patthayamāno mātā me atthi sā mayā posetabbāti vadati viññāpeti . pitā me atthi so mayā posetabboti vadati viññāpeti . bhātā me atthi so mayā posetabboti vadati viññāpeti . bhaginī me atthi sā mayā posetabbāti vadati viññāpeti. Putto me atthi so mayā posetabboti vadati viññāpeti. Dhītā me atthi sā mayā posetabbāti vadati viññāpeti . pajāpatī me atthi sā mayā posetabbāti vadati viññāpeti . Ñātakā me atthi te mayā posetabbāti vadati viññāpeti . Mittā me atthi te mayā posetabbāti vadati viññāpeti . evaṃpi bhikkhave dubbalyāvikammañceva hoti sikkhā ca appaccakkhātā. {30.6} Athavā pana ukkaṇṭhiko anabhirato sāmaññā cavitukāmo bhikkhubhāvaṃ aṭṭiyamāno harāyamāno jigucchamāno gihibhāvaṃ patthayamāno .pe. asakyaputtiyabhāvaṃ patthayamāno mātā me atthi sā maṃ posessatīti vadati viññāpeti . pitā me atthi so maṃ posessatīti vadati viññāpeti . bhātā me atthi so maṃ posessatīti vadati viññāpeti . bhaginī me atthi sā maṃ posessatīti Vadati viññāpeti . putto me atthi so maṃ posessatīti vadati viññāpeti . dhītā me atthi sā maṃ posessatīti vadati viññāpeti . pajāpatī me atthi sā maṃ posessatīti vadati viññāpeti . ñātakā me atthi te maṃ posessantīti vadati viññāpeti . mittā me atthi te maṃ posessantīti vadati viññāpeti . gāmo me atthi tenapāhaṃ ^1- jīvissāmīti vadati viññāpeti . nigamo me atthi tenapāhaṃ jīvissāmīti vadati viññāpeti . khettaṃ me atthi tenapāhaṃ jīvissāmīti vadati viññāpeti . vatthuṃ me atthi tenapāhaṃ jīvissāmīti vadati viññāpeti . hiraññaṃ me atthi tenapāhaṃ jīvissāmīti vadati viññāpeti . suvaṇṇaṃ me atthi tenapāhaṃ jīvissāmīti vadati viññāpeti . sippaṃ me atthi tenapāhaṃ jīvissāmīti vadati viññāpeti . evaṃpi bhikkhave dubbalyāvikammañceva hoti sikkhā ca appaccakkhātā. {30.7} Athavā pana ukkaṇṭhito anabhirato sāmaññā cavitukāmo bhikkhubhāvaṃ aṭṭiyamāno harāyamāno jigucchamāno gihibhāvaṃ patthayamāno .pe. asakyaputtiyabhāvaṃ patthayamāno dukkaranti vadati viññāpeti . na sukaranti vadati viññāpeti . duccaranti vadati viññāpeti . na sucaranti vadati viññāpeti . na ussahāmīti vadati viññāpeti . na visahāmīti vadati viññāpeti . na ramāmīti @Footnote: ¹ tena cāhantipi pāṭho. Vadati viññāpeti . nābhiramāmīti vadati viññāpeti . evaṃpi kho bhikkhave dubbalyāvikammañceva hoti sikkhā ca appaccakkhātā. [31] Kathañca bhikkhave dubbalyāvikammañceva hoti sikkhā ca paccakkhātā . idha bhikkhave bhikkhu ukkaṇṭhito anabhirato sāmaññā cavitukāmo bhikkhubhāvaṃ aṭṭiyamāno harāyamāno jigucchamāno gihibhāvaṃ patthayamāno .pe. asakyaputtiyabhāvaṃ patthayamāno buddhaṃ paccakkhāmīti vadati viññāpeti . evaṃpi bhikkhave dubbalyāvikammañceva hoti sikkhā ca paccakkhātā. {31.1} Athavā pana ukkaṇṭhito anabhirato sāmaññā cavitukāmo bhikkhubhāvaṃ aṭṭiyamāno harāyamāno jigucchamāno gihibhāvaṃ patthayamāno .pe. asakyaputtiyabhāvaṃ patthayamāno dhammaṃ paccakkhāmīti vadati viññāpeti. Saṅghaṃ paccakkhāmīti vadati viññāpeti. Sikkhaṃ paccakkhāmīti vadati viññāpeti. Vinayaṃ paccakkhāmīti vadati viññāpeti . pātimokkhaṃ paccakkhāmīti vadati viññāpeti . uddesaṃ paccakkhāmīti vadati viññāpeti . upajjhāyaṃ paccakkhāmīti vadati viññāpeti . ācariyaṃ paccakkhāmīti vadati viññāpeti . saddhivihārikaṃ paccakkhāmīti vadati viññāpeti . Antevāsikaṃ paccakkhāmīti vadati viññāpeti . samānupajjhāyakaṃ paccakkhāmīti vadati viññāpeti . samānācariyakaṃ paccakkhāmīti vadati viññāpeti . sabrahmacāriṃ paccakkhāmīti vadati viññāpeti .pe. gihīti maṃ dhārehīti vadati viññāpeti . upāsakoti maṃ Dhārehīti vadati viññāpeti . ārāmikoti maṃ dhārehīti vadati viññāpeti . sāmaṇeroti maṃ dhārehīti vadati viññāpeti . Titthiyoti maṃ dhārehīti vadati viññāpeti . titthiyasāvakoti maṃ dhārehīti vadati viññāpeti . assamaṇoti maṃ dhārehīti vadati viññāpeti . asakyaputtiyoti maṃ dhārehīti vadati viññāpeti . Evaṃpi bhikkhave dubbalyāvikammañceva hoti sikkhā ca paccakkhātā. {31.2} Athavā pana ukkaṇṭhito anabhirato sāmaññā cavitukāmo bhikkhubhāvaṃ aṭṭiyamāno harāyamāno jigucchamāno gihibhāvaṃ patthayamāno .pe. Asakyaputtiyabhāvaṃ patthayamāno alaṃ me buddhenāti vadati viññāpeti .pe. alaṃ me sabrahmacārīhīti vadati viññāpeti . evaṃpi bhikkhave .pe. athavā pana .pe. kinnu me buddhenāti vadati viññāpeti .pe. kinnu me sabrahmacārīhīti vadati viññāpeti . Evaṃpi .pe. athavā pana .pe. na mamattho buddhenāti vadati viññāpeti .pe. na mamattho sabrahmacārīhīti vadati viññāpeti . Evaṃpi .pe. athavā pana .pe. sumuttāhaṃ buddhenāti vadati viññāpeti .pe. sumuttāhaṃ sabrahmacārīhīti vadati viññāpeti . Evaṃpi bhikkhave dubbalyāvikammañceva hoti sikkhā ca paccakkhātā. {31.3} Yāni vā panaññānipi atthi buddhavevacanāni vā dhammavevacanāni vā saṅghavevacanāni vā sikkhāvevacanāni vā vinayavevacanāni vā pātimokkhavevacanāni vā uddesavevacanāni vā upajjhāyavevacanāni Vā ācariyavevacanāni vā saddhivihārikavevacanāni vā antevāsikavevacanāni vā samānupajjhāyakavevacanāni vā samānācariyakavevacanāni vā sabrahmacārivevacanāni vā gihivevacanāni vā upāsakavevacanāni vā ārāmikavevacanāni vā sāmaṇeravevacanāni vā titthiyavevacanāni vā titthiyasāvakavevacanāni vā assamaṇavevacanāni vā asakyaputtiyavevacanāni vā tehi ākārehi tehi liṅgehi tehi nimittehi vadati viññāpeti. Evaṃpi kho bhikkhave dubbalyāvikammañceva hoti sikkhā ca paccakkhātā. [32] Kathañca bhikkhave appaccakkhātā hoti sikkhā. Idha bhikkhave bhikkhunā ^1- yehi ākārehi yehi liṅgehi yehi nimittehi sikkhā paccakkhātā hoti tehi ākārehi tehi liṅgehi tehi nimittehi ummattako sikkhaṃ paccakkhāti . appaccakkhātā hoti sikkhā . Ummattakassa santike sikkhaṃ paccakkhāti . appaccakkhātā hoti sikkhā . khittacitto sikkhaṃ paccakkhāti . appaccakkhātā hoti sikkhā . khittacittassa santike sikkhaṃ paccakkhāti . appaccakkhātā hoti sikkhā . vedanaṭṭo sikkhaṃ paccakkhāti . appaccakkhātā hoti sikkhā . vedanaṭṭassa santike sikkhaṃ paccakkhāti . appaccakkhātā hoti sikkhā . devatāya santike sikkhaṃ paccakkhāti . Appaccakkhātā hoti sikkhā . tiracchānagatassa santike sikkhaṃ paccakkhāti . @Footnote: ¹ yuropiyamarammapotthakesvāyaṃ pāṭho na dissati. Appaccakkhātā hoti sikkhā . ariyakena milakkhakassa santike sikkhaṃ paccakkhāti . so ce ^1- na paṭivijānāti appaccakkhātā hoti sikkhā. Milakkhakena ariyakassa santike sikkhaṃ paccakkhāti . so ce na paṭivijānāti appaccakkhātā hoti sikkhā . ariyakena ariyakassa santike sikkhaṃ paccakkhāti . so ce na paṭivijānāti appaccakkhātā hoti sikkhā . milakkhakena milakkhakassa santike sikkhaṃ paccakkhāti . So ce na paṭivijānāti appaccakkhātā hoti sikkhā . davāya sikkhaṃ paccakkhāti . appaccakkhātā hoti sikkhā . ravāya sikkhaṃ paccakkhāti . appaccakkhātā hoti sikkhā . Asāvetukāmo sāveti. Appaccakkhātā hoti sikkhā . Sāvetukāmo na sāveti. Appaccakkhātā hoti sikkhā . aviññussa sāveti . appaccakkhātā hoti sikkhā. Viññussa na sāveti . appaccakkhātā hoti sikkhā. Sabbaso vā pana na sāveti. Appaccakkhātā hoti sikkhā. Evaṃ kho bhikkhave appaccakkhātā hoti sikkhā. [33] Methunadhammo nāma yo so asaddhammo gāmadhammo vasaladhammo duṭṭhullaṃ odakantikaṃ rahassaṃ dvayaṃ dvayasamāpatti eso methunadhammo nāma. [34] Paṭisevati nāma yo nimittena nimittaṃ aṅgajātena aṅgajātaṃ antamaso tilaphalamattaṃpi paveseti eso paṭisevati nāma. @Footnote: ¹ pāyato so cāti likhitaṃ. [35] Antamaso tiracchānagatāyapīti tiracchānagatitthiyāpi methunaṃ dhammaṃ paṭisevitvā assamaṇo hoti asakyaputtiyo pageva manussitthiyā tena vuccati antamaso tiracchānagatāyapīti. [36] Pārājiko hotīti seyyathāpi nāma puriso sīsacchinno abhabbo tena sarīrabandhanena jīvituṃ evameva bhikkhu methunaṃ dhammaṃ paṭisevitvā assamaṇo hoti asakyaputtiyo tena vuccati pārājiko hotīti. [37] Asaṃvāsoti saṃvāso nāma ekakammaṃ ekuddeso samasikkhātā eso saṃvāso nāma so tena saddhiṃ natthi tena vuccati asaṃvāsoti. [38] Tisso itthiyo manussitthī amanussitthī tiracchānagatitthī . Tayo ubhatobyañjanakā manussaubhatobyañjanako amanussaubhatobyañjanako tiracchānagataubhatobyañjanako . tayo paṇḍakā manussapaṇḍako amanussapaṇḍako tiracchānagatapaṇḍako . tayo purisā manussapuriso amanussapuriso tiracchānagatapuriso. {38.1} Manussitthiyā tayo magge methunaṃ dhammaṃ paṭisevantassa āpatti pārājikassa vaccamagge passāvamagge mukhe . amanussitthiyā .pe. tiracchānagatitthiyā tayo magge methunaṃ dhammaṃ paṭisevantassa āpatti pārājikassa vaccamagge passāvamagge mukhe . manussaubhatobyañjanakassa .pe. amanussaubhatobyañjanakassa .pe. tiracchānagataubhatobyañjanakassa Tayo magge methunaṃ dhammaṃ paṭisevantassa āpatti pārājikassa vaccamagge passāvamagge mukhe . manussapaṇḍakassa dve magge methunaṃ dhammaṃ paṭisevantassa āpatti pārājikassa vaccamagge mukhe . Amanussapaṇḍakassa .pe. tiracchānagatapaṇḍakassa .pe. amanussapurisassa .pe. tiracchānagatapurisassa dve magge methunaṃ dhammaṃ paṭisevantassa āpatti pārājikassa vaccamagge mukhe. [39] Bhikkhussa sevanacittaṃ upaṭṭhite manussitthiyā vaccamaggaṃ aṅgajātaṃ pavesentassa āpatti pārājikassa . bhikkhussa sevanacittaṃ upaṭṭhite manussitthiyā passāvamaggaṃ aṅgajātaṃ pavesentassa āpatti pārājikassa . bhikkhussa sevanacittaṃ upaṭṭhite manussitthiyā mukhaṃ aṅgajātaṃ pavesentassa āpatti pārājikassa . bhikkhussa sevanacittaṃ upaṭṭhite amanussitthiyā .pe. tiracchānagatitthiyā manussaubhatobyañjanakassa amanussaubhatobyañjanakassa tiracchānagataubhatobyañjanakassa vaccamaggaṃ passāvamaggaṃ mukhaṃ aṅgajātaṃ pavesentassa āpatti pārājikassa. Bhikkhussa sevanacittaṃ upaṭṭhite manussapaṇḍakassa vaccamaggaṃ .pe. mukhaṃ aṅgajātaṃ pavesentassa āpatti pārājikassa . bhikkhussa sevanacittaṃ upaṭṭhite amanussapaṇḍakassa .pe. tiracchānagatapaṇḍakassa manussapurisassa amanussapurisassa tiracchānagatapurisassa vaccamaggaṃ mukhaṃ aṅgajātaṃ pavesentassa āpatti pārājikassa. [40] Bhikkhupaccatthikā manussitthiṃ bhikkhussa santike ānetvā Vaccamaggena aṅgajātaṃ abhinisīdenti . so ce pavesanaṃ sādiyati paviṭṭhaṃ sādiyati ṭhitaṃ sādiyati uddharaṇaṃ sādiyati āpatti pārājikassa . Bhikkhupaccatthikā manussitthiṃ bhikkhussa santike ānetvā vaccamaggena aṅgajātaṃ abhinisīdenti . so ce pavesanaṃ na sādiyati paviṭṭhaṃ sādiyati ṭhitaṃ sādiyati uddharaṇaṃ sādiyati āpatti pārājikassa . Bhikkhupaccatthikā manussitthiṃ bhikkhussa santike ānetvā vaccamaggena aṅgajātaṃ abhinisīdenti . so ce pavesanaṃ na sādiyati paviṭṭhaṃ na sādiyati ṭhitaṃ sādiyati uddharaṇaṃ sādiyati āpatti pārājikassa . Bhikkhupaccatthikā manussitthiṃ bhikkhussa santike ānetvā vaccamaggena aṅgajātaṃ abhinisīdenti . so ce pavesanaṃ na sādiyati paviṭṭhaṃ na sādiyati ṭhitaṃ na sādiyati uddharaṇaṃ sādiyati āpatti pārājikassa . Bhikkhupaccatthikā manussitthiṃ bhikkhussa santike ānetvā vaccamaggena aṅgajātaṃ abhinisīdenti . so ce pavesanaṃ na sādiyati paviṭṭhaṃ na sādiyati ṭhitaṃ na sādiyati uddharaṇaṃ na sādiyati anāpatti. {40.1} Bhikkhupaccatthikā manussitthiṃ bhikkhussa santike ānetvā passāvamaggena .pe. mukhena aṅgajātaṃ abhinisīdenti . So ce pavesanaṃ sādiyati paviṭṭhaṃ sādiyati ṭhitaṃ sādiyati uddharaṇaṃ sādiyati āpatti pārājikassa .pe. Na sādiyati anāpatti. {40.2} Bhikkhupaccatthikā manussitthiṃ jāgarantiṃ suttaṃ mattaṃ ummattaṃ pamattaṃ mataṃ akkhāyitaṃ mataṃ yebhuyyena akkhāyitaṃ .pe. āpatti pārājikassa . mataṃ yebhuyyena khāyitaṃ bhikkhussa Santike ānetvā vaccamaggena passāvamaggena mukhena aṅgajātaṃ abhinisīdenti . so ce pavesanaṃ sādiyati paviṭṭhaṃ sādiyati ṭhitaṃ sādiyati uddharaṇaṃ sādiyati āpatti thullaccayassa .pe. Na sādiyati anāpatti. {40.3} Bhikkhupaccatthikā amanussitthiṃ .pe. Tiracchānagatitthiṃ manussa- ubhatobyañjanakaṃ amanussaubhatobyañjanakaṃ tiracchānagataubhatobyañjanakaṃ bhikkhussa santike ānetvā vaccamaggena passāvamaggena mukhena aṅgajātaṃ abhinisīdenti . So ce pavesanaṃ sādiyati paviṭṭhaṃ sādiyati ṭhitaṃ sādiyati uddharaṇaṃ sādiyati āpatti pārājikassa .pe. Na sādiyati anāpatti. {40.4} Bhikkhupaccatthikā tiracchānagataubhatobyañjanakaṃ jāgarantaṃ suttaṃ mattaṃ ummattaṃ pamattaṃ mataṃ akkhāyitaṃ mataṃ yebhuyyena akkhāyitaṃ .pe. Āpatti pārājikassa .pe. Mataṃ yebhuyyena khāyitaṃ bhikkhussa santike ānetvā vaccamaggena passāvamaggena mukhena aṅgajātaṃ abhinisīdenti. So ce pavesanaṃ sādiyati paviṭṭhaṃ sādiyati ṭhitaṃ sādiyati uddharaṇaṃ sādiyati āpatti thullaccayassa .pe. Na sādiyati anāpatti. {40.5} Bhikkhupaccatthikā manussapaṇḍakaṃ .pe. amanussapaṇḍakaṃ tiracchānagatapaṇḍakaṃ bhikkhussa santike ānetvā vaccamaggena .pe. Mukhena aṅgajātaṃ abhinisīdenti. So ce pavesanaṃ sādiyati paviṭṭhaṃ sādiyati ṭhitaṃ sādiyati uddharaṇaṃ sādiyati āpatti pārājikassa .pe. na sādiyati anāpatti. Bhikkhupaccatthikā tiracchānagatapaṇḍakaṃ jāgarantaṃ suttaṃ mattaṃ pamattaṃ ummattaṃ mataṃ Akkhāyitaṃ mataṃ yebhuyyena akkhāyitaṃ .pe. āpatti pārājikassa .pe. Mataṃ yebhuyyena khāyitaṃ bhikkhussa santike ānetvā vaccamaggena .pe. Mukhena aṅgajātaṃ abhinisīdenti . so ce pavesanaṃ sādiyati paviṭṭhaṃ sādiyati ṭhitaṃ sādiyati uddharaṇaṃ sādiyati āpatti thullaccayassa .pe. Na sādiyati anāpatti. {40.6} Bhikkhupaccatthikā manussapurisaṃ .pe. amanussapurisaṃ .pe. Tiracchānagatapurisaṃ bhikkhussa santike ānetvā vaccamaggena .pe. Mukhena aṅgajātaṃ abhinisīdenti. So ce pavesanaṃ sādiyati paviṭṭhaṃ sādiyati ṭhitaṃ sādiyati uddharaṇaṃ sādiyati āpatti pārājikassa .pe. Na sādiyati anāpatti. {40.7} Bhikkhupaccatthikā tiracchānagatapurisaṃ jāgarantaṃ suttaṃ mattaṃ ummattaṃ pamattaṃ mataṃ akkhāyitaṃ mataṃ yebhuyyena akkhāyitaṃ .pe. Āpatti pārājikassa .pe. mataṃ yebhuyyena khāyitaṃ bhikkhussa santike ānetvā vaccamaggena .pe. Mukhena aṅgajātaṃ abhinisīdenti. So ce pavesanaṃ sādiyati paviṭṭhaṃ sādiyati ṭhitaṃ sādiyati uddharaṇaṃ sādiyati āpatti thullaccayassa .pe. Na sādiyati anāpatti.

The Pali Tipitaka in Roman Character Volume 1 page 1-56. http://84000.org/tipitaka/read/roman_item_s.php?book=1&item=1&items=40 Classified by [Item Number] :- http://84000.org/tipitaka/read/roman_item_s.php?book=1&item=1&items=40&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=1&item=1&items=40 Compare with The Royal Version of Thai Tipitaka :- http://84000.org/tipitaka/read/byitem_s.php?book=1&item=1&items=40 Study Atthakatha :- http://84000.org/tipitaka/attha/attha.php?b=1&i=1 The Pali Atthakatha in Thai :- http://84000.org/tipitaka/atthapali/read_th.php?B=1&A=1 The Pali Atthakatha in Roman :- http://84000.org/tipitaka/atthapali/read_rm.php?B=1&A=1 Contents of The Tipitaka Volume 1 http://84000.org/tipitaka/read/?index_1