ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
 PaliThai   PaliRoman 
First LinkPrevious Linkแสดงหมายเลขหน้า
ในกรณี :- 
   บรรทัดแรกของแต่ละหน้าNext LinkLast Link chage to ENGLISH letter
TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1)

                       Catutthaṃ kāḷudāyittherāpadānaṃ (34)
     [36] |36.48| Padumuttarassa buddhassa  lokajeṭṭhassa tādino
                    addhānaṃ paṭipannassa        carato cārikaṃ tadā.
      |36.49| Suphullaṃ padumaṃ gayha           uppalaṃ mallikañcahaṃ
                    paramannaṃ gahetvāna          adāsiṃ satthuno ahaṃ.
      |36.50| Paribhuñji mahāvīro            paramannaṃ subhojanaṃ
                    tañca pupphaṃ gahetvāna      jinassa 1- sampadassayi.
      |36.51| Iṭṭhaṃ kantayidaṃ 2- loke     jalajaṃ pupphamuttamaṃ
                    sudukkaraṃ kataṃ tena         yaṃ 3- me pupphaṃ adāsi 4- so.
      |36.52| Yo pupphaṃ abhiropesi      paramannañcadāsi me
                    tamahaṃ kittayissāmi      suṇātha mama bhāsato.
      |36.53| Dasamaṭṭhakkhattuñca 5-  so devarajjaṃ karissati
                    uppalaṃ padumañcāpi          mallikañca taduttari.
@Footnote: 1 Ma. Yu. janassa. 2 Ma. kantaṃ piyaṃ. Yu. kantaṃ ciraṃ. 3 Ma. Yu. yo me.
@4 Ma. Yu. adāsidaṃ. 5 Ma. dasaaṭṭhacakkhattuṃ so. Yu. dasa caṭṭhacakkhattuṃ so.
      |36.54| Assa puññavipākena        dibbagandhasamāyutaṃ
                    ākāse chadanaṃ katvā        dhārayissati tāvade.
      |36.55| Pañcavīsatikhattuñca           cakkavatti bhavissati
                    paṭhabyā rajjaṃ pañcasataṃ      vasudhaṃ āvasissati.
      |36.56| Kappasatasahassamhi           okkākakulasambhavo
                    gotamo nāma nāmena        satthā loke bhavissati.
      |36.57| Sakakammābhiraddho so         sukkamūlena codito
                    sakyānaṃ nandijanako 1-     ñātibandhu bhavissati.
      |36.58| So ca pacchā pabbajitvā    sukkamūlena codito
                    sabbāsave pariññāya       nibbāyissatyanāsavo.
      |36.59| Paṭisambhidamanuppattaṃ         katakiccaṃ anāsavaṃ
                    gotamo lokabandhu taṃ          etadagge ṭhapessati.
      |36.60| Padhānaṃ pahitatto so         upasanto nirūpadhi
                    udāyi nāma nāmena         hessati satthu sāvako.
      |36.61|  Rāgo doso ca moho 2- ca māno makkho ca dhaṃsito
                    sabbāsave pariññāya       viharāmi anāsavo.
      |36.62| Tosayiñcāpi sambuddhaṃ      ātāpī nipako ahaṃ
                    pasādito 3- ca sambuddho   etadagge ṭhapesi maṃ.
      |36.63| Paṭisambhidā catasso          vimokkhāpica aṭṭhime
                    chaḷabhiññā sacchikatā        kataṃ buddhassa sāsananti.
@Footnote: 1 Ma. Yu. nandijanano. 2 Yu. cittañca suvimuttaṃ me. 3 Yu. pamodito.
        Itthaṃ sudaṃ āyasmā kāḷudāyi thero imā gāthāyo
abhāsitthāti.
                            Kāḷudāyittherassa apadānaṃ samattaṃ.



             The Pali Tipitaka in Roman Character Volume 32 page 122-124. http://84000.org/tipitaka/read/roman_read.php?B=32&A=2530              Compare with The Pali Tipitaka in Thai Character :- http://84000.org/tipitaka/read/pali_read.php?B=32&A=2530&w=              Compare with The Royal Version of Thai Tipitaka :- http://84000.org/tipitaka/read/byitem.php?book=32&item=36&items=1              Compare with The MCU Version of Thai Tipitaka :- http://84000.org/tipitaka/pitaka_item/m_siri.php?B=32&siri=36              Study Atthakatha :- http://84000.org/tipitaka/attha/attha.php?b=32&i=36              Contents of The Tipitaka Volume 32 http://84000.org/tipitaka/read/?index_32

First LinkPrevious Linkแสดงหมายเลขหน้า
ในกรณี :- 
   บรรทัดแรกของแต่ละหน้าNext LinkLast Link chage to ENGLISH letter

บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ DhammaPerfect@yahoo.com