Atthakatha Book 6 : PALI ROMAN
Dī.A. (sumaṅgala.3)

Yena pana akusalaṃ bahuṃ kataṃ hoti, kusalaṃ mandaṃ, so taṃ kusalaṃ nissāya
khattiyakule vā brāhmaṇakule vā nibbatti. Atha naṃ akusalakammaṃ kāṇaṃpi karoti
khujjaṃpi pīṭhasappiṃpi karoti. 1- So rajjassa va anaraho hoti, abhisittakāle vā
evaṃbhūto bhoge paribhuñjituṃ na sakkoti. Aparassa maraṇakāle dve balavamallā viya
te dvepi kusalākusalakammāni upaṭṭhahanti. Tesu akusalañce balavataraṃ hoti.
Taṃ kusalaṃ paṭibāhitvā tiracchānayoniyaṃ nibbattāpeti. Kusalakammampi
pavattivedanīyaṃ hoti. Tamenaṃ maṅgalahatthiṃ vā karoti maṅgalassaṃ vā maṅgalaasubhaṃ vā.
So taṃ sampattiṃ anubhavati. Idaṃ sandhāya vuttaṃ "sukhadukkhapaṭisaṃvedī hotī"ti.
                      Bodhipakkhiyadhammabhāvanāvaṇṇanā
     [138] Sattannaṃ bodhipakkhiyānanti "cattāro satipaṭṭhānā"ti
ādikoṭṭhāsavasena sattannaṃ, paṭipāṭiyā pana sattatiṃsāya bodhipakkhiyadhammānaṃ.
Bhāvanamanvāyāti bhāvanaṃ anugantvā, paṭipajjitvāti attho. Parinibbāyatīti
kilesaparinibbānena parinibbāti. 2- Iti bhagavā cattāro vaṇṇe dassetvā
vinivattetvā paṭividdhacatusaccaṃ khīṇāsavameva devamanussesu seṭṭhaṃ katvā dasseti. 3-
     [140] Idāni tamevatthaṃ lokasammatassa brahmunopi vacanadassanānusārena
daḷhaṃ katvā dassento imesaṃ hi vāseṭṭha catunnaṃ vaṇṇānanti
ādimāha. "brahmunā cesā"ti 4- ādi ambaṭṭhasutte vitthāritaṃ. Iti bhagavā
ettakena iminā kathāmaggena seṭṭhacchedakavādameva dassetvā suttantaṃ
vinivattetvā arahattanikūṭena desanaṃ niṭṭhapesi. Attamanā vāseṭṭhabhāradvājāti
vāseṭṭhabhāradvājasāmaṇerāpi hi attamanā 5- tuṭṭhamanā "sādhu sādhū"ti bhagavato
bhāsitaṃ abhinandiṃsu. Idameva suttantaṃ āvajjantā anumajjantā saha
paṭisambhidāhi arahattaṃ pāpuṇiṃsūti.
                       Aggaññasuttavaṇṇanā niṭṭhitā
                           -----------
@Footnote: 1 cha.Ma., i. karotīti saddo na dissati        2 cha.Ma. parinibbāyati
@3 cha.Ma., i. dassesi   4 cha.Ma., i. brahmunāpesā  5 cha.Ma., i. sakamanā


             The Pali Atthakatha in Roman Book 6 page 58.
http://84000.org/tipitaka/atthapali/read_rm.php?B=6&A=1434
             อรรถกถาบาลีอักษรไทย :-
http://84000.org/tipitaka/atthapali/read_th.php?B=6&A=1434
             อ่านอรรถกถาแปลไทย :-
http://84000.org/tipitaka/attha/attha.php?b=11&i=51
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=11&A=1703
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=11&A=1803
             The Pali Tipitaka in Roman Character :-
http://84000.org/tipitaka/read/roman_read.php?B=11&A=1803
             Contents of The Tipitaka Volume 11
http://84000.org/tipitaka/read/?index_11