Atthakatha Book 50 : PALI ROMAN
Apa.A.2 (visuddha.2)

                  129. 7. Phaladāyakattherāpadānavaṇṇanā
     ajjhāyako mantadharotiādikaṃ āyasmato phaladāyakattherassa apadānaṃ.
Ayampi purimabuddhesu katādhikāro anekesu bhavesu vivaṭṭūpanissayāni puññāni
upacinanto padumuttarassa bhagavato kāle brāhmaṇakule nibbatto viññutaṃ
patvā vedattayādisakasippesu pārappatto anekesaṃ brāhmaṇasahassānaṃ
pāmokkho ācariyo sakasippānaṃ pariyosānaṃ adisvā tattha ca sāraṃ apassanto
gharāvāsaṃ pahāya isipabbajjaṃ pabbajitvā himavantassa avidūre assamaṃ kāretvā
saha sissehi vāsaṃ kappesi, tasmiṃ samaye padumuttaro bhagavā bhikkhāya caramāno
tassānukampāya taṃ padesaṃ sampāpuṇi. Tāpaso bhagavantaṃ disvā pasannamānaso
attano atthāya puṭake nikkhipitvā rukkhagge laggitāni madhurāni padumaphalāni
madhunā saha adāsi. Bhagavā tassa somanassuppādanatthaṃ passantasseva paribhuñjitvā
ākāse ṭhito phaladānānisaṃsaṃ kathetvā pakkāmi.
     [75] So tena puññena devamanussesu saṃsaranto ubhayasampattiyo
anubhavitvā imasmiṃ buddhuppāde vibhavasampanne ekasmiṃ kulagehe nibbatto
---------------------------------------------------------------------------------------------
page172.
Sattavassikoyeva arahattaṃ patvā pubbe katakusalakammaṃ saritvā somanassajāto
pubbacaritāpadānaṃ pakāsento ajjhāyako mantadharotiādimāha. Tattha ajjheti
cintetīti ajjhāyi, ajjhāyiyeva ajjhāyako. Ettha hi akāro "paṭisedhe
vuddhitabbhāve .pe. Akāro virahappake"ti evaṃ vuttesu dasasu atthesu
tabbhāve vattati. Sissānaṃ savanadhāraṇādivasena hitaṃ ajjheti cinteti ajjhāyaṃ
karotīti ajjhāyako, cintakoti attho. Ācariyassa santike uggahitaṃ sabbaṃ
mantaṃ manena dhāreti pavattetīti mantadharo. Tiṇṇaṃ vedāna pāragūti vedaṃ
vuccati ñāṇaṃ, vedena veditabbā bujjhitabbāti vedā, iruvedayajuvedasāmaveda-
saṅkhātā tayo ganthā, tesaṃ vedānaṃ pāraṃ pariyosānaṃ koṭiṃ gato pattoti pāragū.
Sesaṃ pākaṭamevāti.
                   Phaladāyakattherāpadānavaṇṇanā niṭṭhitā.
                        -----------------


             The Pali Atthakatha in Roman Book 50 page 171-172.
http://84000.org/tipitaka/atthapali/read_rm.php?B=50&A=3714&pagebreak=1
             อรรถกถาบาลีอักษรไทย :-
http://84000.org/tipitaka/atthapali/read_th.php?B=50&A=3714&pagebreak=1
             อ่านอรรถกถาแปลไทย :-
http://84000.org/tipitaka/attha/attha.php?b=32&i=129
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=32&A=3832
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=32&A=4685
             The Pali Tipitaka in Roman Character :-
http://84000.org/tipitaka/read/roman_read.php?B=32&A=4685
             Contents of The Tipitaka Volume 32
http://84000.org/tipitaka/read/?index_32