|
| บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
110. 13. Ubbaripetivatthuvannana 1-
ahu raja brahmadattoti idam ubbaripetivatthum sattha jetavane viharanto
annataram upasikam arabbha kathesi.
Savatthiyam kira annataraya upasikaya samiko kalam akasi, sa
pativiyogadukkhatura socanti alahanam gantva rodati. Bhagava tassa sotapattiphalassa
upanissayasampattim disva karunaya sancoditamanaso hutva tassa geham gantva
pannatte asane nisidi. Upasika sattharam upasankamitva vanditva ekamantam
nisidi. Atha nam sattha "kim upasike socasi"ti vatva "ama bhagava piyavippayogena
socami"ti vutte tassa sokam apanetukamo atitam ahari.
Atite pancalaratthe 2- kapilanagare culanibrahmadatto nama raja ahosi. So
agatigamanam pahaya attano vijite pajaya hitakarananirato dasa rajadhamme akopetva
rajjam anusasamano kadaci "attano rajje kim vadanti"ti sotukamo tunnavayavesam
gahetva eko adutiyo nagarato nikkhamitva gamato gamam janapadato janapadam
vicaritva sabbarajjam akantakam anupapilam manusse sammodamane aparutaghare manne
@Footnote: 1 cha.Ma. ubbaripeta..., evamuparipi 2 Ma. pancalaratthe uttarapancale
Viharante disva somanassajato nivattitva nagarabhimukho agacchanto annatarasmim
game ekissa vidhavaya duggatitthiya geham pavisi. Sa tam disva aha "ko
nu tvam ayyo, kuto va agatosi"ti. Aham tunnavayo bhadde, bhatiya tunnavayakammam
karonto vicarami, yadi tumhakam tunnavayakammam atthi, bhattanca 1- vetananca detha,
tumhakampi kammam karomiti. Natthi amhakam kammam bhattavetanam va, annesam karohi
ayyati. So tattha katipaham vasanto dhannapunnalakkhanasampannam tassa dhitaram
disva mataram aha "ayam darika kim kenaci katapariggaha, udahu akatapariggaha,
sace pana kenaci akatapariggaha, imam mayham detha, aham tumhakam sukhena jivanupayam
katum samattho"ti. "sadhu ayya"ti sa tassa tam adasi.
So taya saddhim katipaham vasitva tassa kahapanasahassam datva "aham
katipaheneva nivattissami, bhadde tvam ma ukkanthasi"ti vatva attano nagaram
gantva nagarassa ca tassa gamassa ca antare maggam samam karapetva 2-
alankarapetva mahata rajanubhavena tattha gantva tam darikam kahapanarasimhi
thapetva suvannarajatakalasehi nhapetva "ubbari"ti namam karapetva
aggamahesitthane thapetva tanca gamam tassa natinam datva mahata rajanubhavena
tam nagaram anetva taya saddhim abhiramamano yavajivam rajjasukham anubhavitva
ayupariyosane kalamakasi. Kalakate ca tasmim, kate ca sarirakicce ubbari pativiyogena
sokasallasamappitahadaya alahanam gantva bahu divase gandhapupphadihi pujetva
ranno gune kittetva ummadappatta viya kandanti paridevanti alahanam padakkhinam
karoti.
Tena ca samayena amhakam bhagava bodhisattabhuto isipabbajjam pabbajitva
adhigatajjhanabhinno himavantassa samanta annatarasmim arannayatane viharanto
sokasallasamappitam ubbarim dibbena cakkhuna disva akasena agantva
@Footnote: 1 Si. vatthanca 2 Ma. kanakarasimhi
Dissamanarupo akase thatva tattha thite manusse pucchi "kassidam alahanam,
kassatthaya cayam itthi `brahmadatta brahmadatta'ti kandanti paridevati"ti. Tam
sutva manussa "brahmadatto nama pancalanam raja, so ayupariyosane
kalam akasi, tassidam alahanam, tassa ayam aggamahesi ubbari nama `brahmadatta
brahmadatta'ti tassa namam gahetva kandanti paridevati"ti ahamsu. Tamattham dipenta
sangitikara:-
[368] "ahu raja brahmadatto pancalanam rathesabho
ahorattanamaccaya raja kalamakrubbatha. 1-
[369] Tassa alahanam gantva bhariya kandati ubbari
brahmadattam apassanti brahmadattati kandati.
[370] Isi ca tattha agacchi sampannacarano muni
so ca tattha apucchittha ye tattha su samagata.
[371] `kassa Idam alahanam nanagandhasameritam
kassayam kandati bhariya ito duragatam patim
brahmadattam apassanti brahmadattati kandati'.
[372] Te ca tattha viyakamsu ye tattha su samagata
brahmadattassa bhaddante brahmadattassa marisa.
[373] Tassa idam alahanam nanagandhasameritam
tassayam kandati bhariya ito duragatam patim
brahmadattam apassanti brahmadattati kandati"ti
cha gatha thapesum.
@Footnote: 1 Si.,i. raja kalankari tada
#[368-369] Tattha ahuti ahosi. Pancalananti pancalaratthavasinam,
pancalaratthasseva va. Ekopi hi janapado janapadikanam 1- rajakumaranam vasena rulhiya
"pancalanan"ti 2- bahuvacanena niddisiyati. Rathesabhoti rathesu usabhasadiso, maharathoti
attho. Tassa alahananti tassa ranno sarirassa daddhatthanam.
#[370] Isiti jhanadinam gunanam esanatthena isi. Tatthati tasmim ubbariya
thitatthane, susaneti attho. Agacchiti agamasi. Sampannacaranoti silasampada
indriyesu guttadvarata bhojane mattannuta jagariyanuyogo saddhadayo satta
saddhamma cattari rupavacarajhananiti imehi pannarasahi caranasankhatehi gunehi
sampanno samannagato, caranasampannoti attho. Muniti attahitanca parahitanca munati
janatiti muni. So ca tattha apucchitthati so tasmim thane thite jane patipucchi.
Ye tattha su samagatati ye manussa tattha susane samagata. Suti nipatamattam,
"ye tatthasum samagata"ti va patho. Asunti ahesunti attho.
#[371] Nanagandhasameritanti nanavidhehi gandhehi samantato eritam upavasitam 3-.
Itoti manussalokato. Duragatanti paralokam gatatta vadati. Brahmadattati kandatiti
brahmadattati evam namasamkittanam katva paridevanavasena avhayati.
#[372-373] Brahmadattassa bhaddante, brahmadattassa marisati marisa
niramayakayacittamahamuni brahmadattassa ranno idam alahanam, tasseva
brahmadattassa ranno ayam bhariya, bhaddam te tassa ca brahmadattassa bhaddam hotu,
tadisanam mahesinam hitanucintanena paraloke thitanampi hitasukham hotiyevati adhippayo.
Atha so tapaso tesam vacanam sutva anukampam upadaya ubbariya santikam
gantva tassa sokavinodanattham:-
@Footnote: 1 Si. janapadadhikatanam 2 Ma. pancalati 3 Ma. upavayitam
[374] "../../bdpicture/chalasitisahassani brahmadattassanamaka
imasmim alahane daddha tesam kamanusocasi"ti
gathamaha. Tattha chalasitisahassaniti chasahassadhikaasitisahassasankha. Brahmadattassanamakati
brahmadattoti evamnamaka. Tesam kamanusocasiti tesam chalasitisahassasankhatanam
brahmadattanam katamam brahmadattam tvam anusocasi, katamam paticca te
soko uppannoti pucchi.
Evam pana tena isina pucchita ubbari attana adhippetam brahmadattam
acikkhanti:-
[375] "yo raja culaniputto pancalanam rathesabho
tam bhante anusocami bhattaram sabbakamadan"ti
gathamaha. Tattha culaniputtoti evamnamassa ranno putto. Sabbakamadanti mayham
sabbassa icchiticchitassa dataram, sabbesam va sattanam icchitadayakam.
Evam ubbariya vutte puna tapaso:-
[376] "sabbevahesum rajano brahmadattassanamaka
sabbeva culaniputta pancalanam rathesabha.
[377] Sabbesam anupubbena mahesittamakarayi
kasma purimake hitva pacchimam anusocasi"ti
gathadvayamaha.
#[376] Tattha sabbevahesunti sabbeva te chalasitisahassasankha rajano
brahmadattassanamaka culaniputta pancalanam rathesabhava ahesum, ime rajabhavadayo
visesa tesu ekassapi nahesum.
#[377] Mahesittamakarayiti tvanca tesam sabbesampi anupubbena aggamahesibhavam
akasi, anuppattati attho. Kasmati gunato ca samikabhavato ca avisitthesu
ettakesu janesu purimake rajano pahaya pacchimam ekamyeva kasma kena karanena
anusocasiti pucchi.
Tam sutva ubbari samvegajata puna tapasam:-
[378] "atume itthibhutaya digharattaya marisa
yassa me itthibhutaya samsare bahubhasasi"ti
gathamaha. Tattha atumeti attani. Itthibhutayati itthibhavam upagataya. Digharattayati
digharattam. Ayam hettha adhippayo:- itthibhutaya attani sabbakalam itthiyeva hoti,
udahu purisabhavampi upagacchatiti. Yassa me itthibhutayati yassa mayham
itthibhutaya evam tava bahusamsare mahesibhavam mahamuni tvam bhasasi kathesiti attho.
"ahu me 1- itthibhutaya"ti va patho. Tattha ati anussaranatthe nipato. Ahu
meti 2- sayam anussaritam annatamidam maya, itthibhutaya itthibhavam upagataya evam
mayham ettakam kalam aparaparuppatti 3- ahosi, kasma? yasma 4- yassa me
itthibhutaya sabbesam anupubbena mahesittamakarayi, kim tvam mahamuni samsare bahum
bhasasiti yojana.
Tam sutva tapaso ayam niyamo samsare natthi "itthi itthiyeva hoti, puriso
puriso eva"ti dassento:-
[379] "ahu itthi ahu puriso pasuyonimpi agama
evametam atitanam pariyanto na dissati"ti
gathamaha. Tattha ahu itthi ahu purisoti tvam kadaci itthipi ahosi, kadaci
@Footnote: 1 Ma. atumo 2 Si. atumeti, Ma. atumoti 3 Si. apara ca anuppatti
@4 Si. ahosi, tasma
Purisopi ahosi. Na kevalam itthipurisabhavameva, atha kho pasu yonimpi agamasi,
kadaci pasubhavampi agamasi, tiracchanayonimpi upagata ahosi. Evametam atitanam,
pariyanto na dissatiti evam yathavuttam etam itthibhavam purisabhavam tiracchanadi-
bhavanca upagatanam atitanam attabhavanam pariyanto nanacakkhuna mahata ussahena
passantanampi na dissati. Na kevalam taveva, atha kho sabbesampi samsare
paribbhamantanam sattanam attabhavassa pariyanto na dissateva na pannayateva.
Tenaha bhagava:-
"anamataggoyam bhikkhave samsaro, pubba koti na pannayati avijja-
nivarananam sattanam tanhasamyojananam sandhavatam samsaratan"ti 1-.
Evam tena tapasena samsarassa apariyantatam kammassakatanca vibhaventena desitam
dhammam sutva samsare samviggahadaya dhamme ca pasannamanasa vigatasokasalla hutva
attano pasadam sokavigamananca pakasenti:-
[380] "adittam vata mam santam ghatasittamva pavakam
varina viya osincam sabbam nibbapaye daram.
[381] Abbahi vata me sallam sokam hadayanissitam
yo me sokaparetaya patisokam apanudi.
[382] Saham abbulhasallasmi sitibhutasmi nibbuta
na socami na rodami tava sutva mahamuni"ti
tisso gatha abhasi. Tasam attho hettha vuttoyeva.
Idani samviggahadayaya ubbariya patipattim dassento sattha:-
@Footnote: 1 sam.ni. 16/124/172
[383] "tassa tam vacanam sutva samanassa subhasitam
pattacivaramadaya pabbaji anagariyam.
[384] Sa ca pabbajita santa agarasma anagariyam.
Mettacittam abhavesi brahmalokupapattiya.
[385] Gama gamam vicaranti nigame rajadhaniyo
uruvela nama so gamo yattha kalamakrubbatha.
[386] Mettacittam abhavetva brahmalokupapattiya
itthicittam virajetva brahmalokupaga ahu"ti
catasso gatha abhasi.
#[383-384] Tattha tassati tassa tapasassa. Subhasitanti sutthu bhasitam,
dhammanti attho. Pabbajita santati pabbajjam upagata samana, pabbajitva va
hutva santakayavaca. Mettacittanti mettasahagatam cittam. Cittasisena mettajjhanam
vadati. Brahmalokupapattiyati tanca sa mettacittam bhaventi brahmalokupapattiya
abhavesi, na vipassanapadakadiattham. Anuppanne hi buddhe brahmaviharadike
bhaventa tapasaparibbajaka yavadeva bhavasampattiatthameva bhavesum.
#[385-386] Gama gamanti gamato annam gamam. Abhavetvati vaddhetva
bruhetva. "abhavetva"ti keci pathanti, tesam akaro nipatamattam. Itthicittam
virajetvati itthibhave cittam ajjhasayam abhirucim virajetva 1- itthibhave
virattacitta hutva. Brahmalokupagati patisandhiggahanavasena brahmalokam upagamanaka
ahosi. Sesam hettha vuttanayatta uttanameva.
@Footnote: 1 Si.,i. vidhametva
Sattha imam dhammadesanam aharitva tassa upasikaya sokam vinodetva
upari catusaccadesanam akasi, saccapariyosane sa upasika sotapattiphale patitthahi,
sampattaparisaya ca desana satthika ahositi.
Ubbaripetivatthuvannana nitthita.
Iti khuddakatthakathaya petavatthusmim
terasavatthupatimanditassa
dutiyassa ubbarivaggassa atthasamvannana nitthita.
------------
The Pali Atthakatha in Roman Book 31 page 170-178.
http://84000.org/tipitaka/atthapali/read_rm.php?B=31&A=3786&modeTY=2
อรรถกถาบาลีอักษรไทย :-
http://84000.org/tipitaka/atthapali/read_th.php?B=31&A=3786&modeTY=2
อ่านอรรถกถาแปลไทย :-
http://84000.org/tipitaka/attha/attha.php?b=26&i=110
เนื้อความพระไตรปิฎกฉบับหลวง :-
http://84000.org/tipitaka/read/r.php?B=26&A=3931
พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=26&A=4103
The Pali Tipitaka in Roman Character :-
http://84000.org/tipitaka/read/roman_read.php?B=26&A=4103
Contents of The Tipitaka Volume 26
http://84000.org/tipitaka/read/?index_26
        |
|
บันทึก ๖ กุมภาพันธ์ พ.ศ. ๒๕๖๑. การแสดงผลนี้อ้างอิงข้อมูลจากอรรถกถาฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]