AtthaPali Vol.38

Visayhajatakam adasi dananiti idam sattha jetavane viharanto anathapindikam arabbha kathesi. Vatthu hettha khadirangarajatake vittharitameva. Idha pana sattha anathapindikam amantetva poranakapandita gahapati danam ma dadasiti akase thatva varentam sakkam devarajanam patibahitva danam dadimsuyevati vatva tena yacito atitam ahari. Atite baranasiyam brahmadatte rajjam karente bodhisatto asitikotivibhavo visayho nama setthi hutva pancasilehi samannagato danajjhasayo danabhirato ahosi. So catusu nagaradvaresu nagaramajjhe attano nivesanadvare cati chasu thanesu danasalayo karapetva danam pavattesi. Divase divase chasatasahassani visajjeti. Bodhisattassa ca yacakananca ekasadisameva bhattam hoti. Tassa jambudipam unnangalam katva danam dadato dananubhavena sakkassa bhavanam kampi. Devaranno pandukambalasilasanam unhakaram dassesi. Sakko ko nukho mam thana cavetukamoti upadharento mahasetthim disva ayam visayho ativiya pattharitva sakalajambudipam unnangalam karonto danam deti iminapi danena mam cavetva sayam sakko bhavissati manne dhanamassa nasetva etam daliddam katva yatha danam na deti tatha karissamiti cintetva sabbam pana dhanam Dhannatelamadhuphanitadini antamaso dasakammakaraporisampi antaradhapesi. Danabyavata agantva sami danaggam pacchinnam thapitatthane kinci na passamati arocayimsu. Ito paribbayam haratha ma danam pacchindathati bhariyam pakkosapetva bhadde danam pavattapehiti aha. Sa sakalageham vicinitva addhamasakamattampi adisva ayya amhakam nivatthavattham thapetva annam kinci na passami sakalageham tucchanti aha. Sattaratanagabbhesu dvaram vivarapetva na kinci addasa. Setthinca bhariyanca thapetva anne dasakammakarapi na pannayimsu. Puna mahasatto bhariyam amantetva bhadde na sakka danam pacchinditum sakalanivesanam vicinitva kinci upadharehiti aha. Tasmim khane eko tinaharako asitanceva kajanca tinabandhanarajjunca dvarantare chaddetva palayi. Setthibhariya tam disva sami imam thapetva annam na passamiti aharitva adasi. Mahasatto bhadde maya ettakam kalam tinam nama na layitapubbam ajja pana tinam layitva aharitva vikkinitva yathanucchavikam danam dassamiti danupacchedabhayena asitanceva kajanca rajjunca gahetva nagara nikkhamma tinavatthum gantva tinam layitva eko amhakam bhavissati ekena danam dassamiti dve tinakalape bandhitva kaje laggetva adaya gantva nagaradvare vikkinitva masake gahetva ekam kotthasam yacakanam adasi. Yacaka bahu. Tesam mayhampi dehiti vadantanam itarampi kotthasam puna datva tamdivasam saddhim Bhariyaya anaharo vitinamesi. Imina niyamena cha divasa vitivatta. Athassa sattame divase tinamaharamanassa sattaham niraharassa atisukhumalassa nalate suriyatapena pahatamatte akkhini bhamimsu. So satim paccupatthapetum asakkonto tinam avattharitva pati. Sakko tassa kiriyam upadharayamano vicarati. So tamkhanamyeva agantva akase thatva pathamam gathamaha adasi danani pure visayha dadato ca te khayadhammo ahosi ito parance na dadeyya danam tittheyyum te samyamantassa bhogati. Tassattho ambho visayha tvam ito pubbe tava gehe dhane vijjamane sakalajambudipam unnangalam katva danani adasi tassa ca te evam dadato bhoganam khayadhammo khayasabhavo ahosi sabbam sapateyyam khinam ito parancepi tvam danam na dadeyyasi kassaci kinci na dadeyyasi tava samyamantassa adadantassa bhoga tatheva tittheyyum ito patthaya na dassamiti mayham patinnam dehi ahante bhoge dassessanti. Mahasatto tassa vacanam sutva kosi tvanti aha. Sakkohamasmiti. Bodhisatto sakko nama sayam danam datva silam samadiyitva uposathakammam katva satta vattapadani puretva sakkattam patto tvam pana attano issariyakaranam danam varesi anariyavattam karositi vatva tisso gathayo abhasi Anariyamariyena sahassanetta suduggatenapi akiccamahu ma vo dhanam tam ahu va janinda yam bhogahetum vijahemu saddham yena eko ratho yati yati tena paro ratho poranam nihatam ^1- vattam vattatunneva ^2- vasava yadi hessati dassama asante kim dadamhase evam bhutapi dassama ma danam pamadamhaseti. Tattha anariyanti lamakam papakammam. Ariyenati parisuddhacarena ariyena. Suduggatenapiti sudaliddenapi. Akiccamahuti akattabbanti buddhadayo ariya vadanti. Tvam pana mam anariyamaggam arocesiti adhippayo. Voti nipatamattam. Yam bhogahetunti yassa dhanassa paribhunjanahetu mayam danasaddham vijahemu pariccajeyyama tam dhanameva ma ahu na no tena dhanena atthoti dipeti. Rathoti yam kinci yanam. Idam vuttam hoti yena maggena eko ratho yati annopi ratho rathassa gatamaggo esoti tena maggena yati. Poranam nihatam vattanti yam maya pubbeyeva nihatam vattam tam mayi dharante vattatuyeva ma titthatuti attho. Evam bhutapiti evam tinaharakabhutapi mayam yava jivama tava dassamayeva. Kimkarana. Ma danam pamadamhaseti adadanto @Footnote: ¹ nihitam vaddham . ² vaddhatanneva. Hi danam pamajjati nama na sarati na sallakkheti aham pana jivamano danam pammusitum na icchami tasma dassamiyevati dipeti. Sakko tam patibahitum asakkonto kimatthaya danam dadasiti pucchi. Neva sakkattam na brahmattam patthayamano sabbannutam patthento panaham dadamiti. Sakko tassa vacanam sutva tuttho hatthena pitthim parimajji. Bodhisattassa tamkhananneva parimajjitamattasseva ^1- sakalasariram paripuri. Sakkanubhavena cassa sabbo vibhavaparicchedo patipakatikova hoti. Sakko mahasetthi tvam ito patthaya divase divase dvadasa satasahassani visajjento danam dehiti tassa gehe aparimanadhanam datva tam uyyojetva sakatthanameva gato. Sattha imam dhammadesanam aharitva jatakam samodhanesi tada setthibhariya rahulamata ahosi visayho pana ahamevati. Visayhajatakam dasamam kokilavaggo catuttho @Footnote: ¹ paribhuttamattasseva.

The Pali Atthakatha in Roman Book 38 page 388-392. http://84000.org/tipitaka/atthapali/read_rm.php?B=38&A=8060&modeTY=2 อรรถกถาบาลีอักษรไทย :- http://84000.org/tipitaka/atthapali/read_th.php?B=38&A=8060&modeTY=2 อ่านอรรถกถาแปลไทย :- http://84000.org/tipitaka/attha/attha.php?b=27&i=658 เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=3160 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=3130 The Pali Tipitaka in Roman Character :- http://84000.org/tipitaka/read/roman_read.php?B=27&A=3130 Contents of The Tipitaka Volume 27 http://84000.org/tipitaka/read/?index_27