อรรถกถาเล่มที่ ๓ ภาษาบาลีอักษรไทย
 วินย.อ. (สมนฺต.๓)

     เอกํ วรเสยฺยนฺติ เอตฺถ นวกมฺมทานฏฺฐาเน วา วสฺสคฺเคน
ปตฺตฏฺฐาเน วา ยํ อิจฺฉติ ลภติ ตํ เอกํ วรเสยฺยํ อนุชานามีติ
อตฺโถ ฯ
     ปริโยสิเต ปกฺกมติ ตสฺเสว ตนฺติ ปุน อาคนฺตฺวา วสฺสํ
วสนฺตสฺส อนฺโตวสฺสํ ตสฺเสว ตํ ฯ อนาคจฺฉนฺตสฺส ปน
สทฺธิวิหาริกาทโย คเหตุํ น ลภนฺติ ฯ
     {๓๒๔} นาภิหรนฺตีติ อญฺญตฺร หริตฺวา น ปริภุญฺชนฺติ ฯ คุตฺตตฺถายาติ
ยํ ตตฺถ มญฺจปีฐาทิกํ ตสฺส คุตฺตตฺถาย ตํ อญฺญตฺถ หริตุํ
อนุชานามีติ อตฺโถ ฯ ตสฺมา อญฺญตฺถ หริตฺวา สงฺฆิกปริโภเคน
ปริภุญฺชนฺตสฺส นฏฺฐํ สุนฏฺฐํ ชิณฺณํ สุชิณฺณํ สเจ อโรคํ
ตสฺมึ วิหาเร ปฏิสงฺขเต ปุน ปากติกํ กาตพฺพํ ฯ ปุคฺคลิกปริโภเคน
ปริภุญฺชโต นฏฺฐํ วา ชิณฺณํ วา คีวา โหติ ตสฺมึ ปฏิสงฺขเต
ทาตพฺพเมว ฯ สเจ ตโต โคปานสิอาทีนิ คเหตฺวา อญฺญสฺมึ
สงฺฆิกาวาเส โยเชนฺติ โยชิตานิ สุโยชิตานิ ฯ ปุคฺคลิกาวาเส
โยเชนฺเตหิ ปน มูลํ วา ทาตพฺพํ ปากติกํ วา กาตพฺพํ ฯ
ฉฑฺฑิตวิหารโต มญฺจปีฐาทีนิ เถยฺยจิตฺเตน คณฺหนฺโต อุทฺธาเรเยว
ภณฺฑคฺเฆน กาเรตพฺโพ ฯ ปุน อาวาสิกกาเล ทสฺสามีติ คเหตฺวา
สงฺฆิกปริโภเคน ปริภุญฺชนฺตสฺส นฏฺฐํ สุนฏฺฐํ ชิณฺณํ สุชิณฺณํ
อโรคํ เจ ปากติกํ กาตพฺพํ ฯ ปุคฺคลิกปริโภเคน ปริภุญฺชนฺตสฺส
นฏฺฐํ คีวา โหติ ฯ ตโต ทฺวารวาตปานาทีนิ สงฺฆิกาวาเส วา
ปุคฺคลิกาวาเส วา โยชิตานิ ปฏิทาตพฺพานิเยว ฯ
     ผาติกมฺมตฺถายาติ วุฑฺฒิกมฺมตฺถาย ฯ ผาติกมฺมํ เจตฺถ
สมกํ วา อติเรกํ วา อคฺฆนกํ มญฺจปีฐาทิเสนาสนเมว วฏฺฏติ ฯ

             อรรถกถาภาษาบาลีอักษรไทย เล่มที่ ๓ หน้า ๓๙๓-๓๙๔.
http://84000.org/tipitaka/atthapali/read_th.php?B=3&A=8079&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=3&A=8079&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=7&i=296
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=7&A=2699
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=7&A=2783
             The Pali Tipitaka in Roman Character :-
http://84000.org/tipitaka/read/roman_read.php?B=7&A=2783
             สารบัญพระไตรปิฎกเล่มที่ ๔
http://84000.org/tipitaka/read/?index_7