อรรถกถาเล่มที่ ๓๐ ภาษาบาลีอักษรไทย
 วิมาน.อ. (ปรมตฺถที.)

                    ๗๐.  ๖. ภิกฺขาทายกวิมานวณฺณนา
     อุจฺจมิทํ มณิถูณํ วิมานนฺติ ภิกฺขาทายกวิมานํ. ตสฺส กา อุปฺปตฺติ? ภควา
ราชคเห วิหรติ เวฬุวเน. เตน สมเยน อญฺญตโร ภิกฺขุ อทฺธานมคฺคปฏิปนฺโน
อญฺญตรํ คามํ ปิณฺฑาย ปวิฏฺโฐ เอกสฺส ฆรทฺวาเร อฏฺฐาสิ. ตตฺถ อญฺญตโร ปุริโส
โธตหตฺถปาโท "ภุญฺชิสฺสามี"ติ นิสินฺโน โภชนํ อุปเนตฺวา ปาติยา ๑- ปกฺขิตฺเต
ตํ ภิกฺขุํ ทิสฺวา ปาติยา ภตฺตํ ตสฺส ภิกฺขุโน ปตฺเต อากิรนฺโต เตน "เอกเทสเมว
เทหี"ติ วุตฺโตปิ สพฺพเมว อากิริ, โส ภิกฺขุ อนุโมทนํ วตฺวา ปกฺกามิ. โส
@เชิงอรรถ: ๑ อิ. ภาชเน
ปุริโส "ฉาตชฺฌตฺตสฺส ภิกฺขุโน มยา อภุญฺชิตฺวา ภตฺตํ ทินฺนนฺ"ติ อนุสฺสรนฺโต
อุฬารํ ปีติโสมนสฺสํ ปฏิลภิ. โส อปรภาเค กาลํ กตฺวา ตาวตึเสสุ ทฺวาทสโยชนิเก
กนกวิมาเน นิพฺพตฺติ. ตํ อายสฺมา มหาโมคฺคลฺลานตฺเถโร เทวจาริกํ จรนฺโต มหติยา
เทวิทฺธิยา วิโรจมานํ ทิสฺวา อิมาหิ คาถาหิ ปฏิปุจฺฉิ:-
     [๑๐๘๑]         "อุจฺจมิทํ มณิถูณํ วิมานํ
                     สมนฺตโต ทฺวาทส โยชนานิ
                     กูฏาคารา สตฺตสตา อุฬารา
                     เวฬุริยถมฺภา รุจกตฺถตา สุภา.
     [๑๐๘๒]          เทวิทฺธิปตฺโตสิ มหานุภาโว ฯเปฯ
                     วณฺโณ จ เต สพฺพทิสา ปภาสตี"ติ.
โสปิ ตสฺส อิมาหิ คาถาหิ พฺยากาสิ:-
     [๑๐๘๓]  โส เทวปุตฺโต อตฺตมโน    โมคฺคลฺลาเนน ปุจฺฉิโต
             ปญฺหํ ปุฏฺโฐ วิยากาสิ      ยสฺส กมฺมสฺสิทํ ผลํ.
     [๑๐๘๔]         "อหํ มนุสฺเสสุ มนุสฺสภูโต
                     ทิสฺวาน ภิกฺขุํ ตสิตํ กิลนฺตํ
                     เอกาหํ ภิกฺขํ ปฏิปาทยิสฺสํ
                     สมงฺคิ ภตฺเตน ตทา อาสึ.
     [๑๐๘๕]          เตน เม'ตาทิโส วณฺโณ ฯเปฯ
                     วณฺโณ จ เม สพฺพทิสา ปภาสตี"ติ.
    #[๑๐๘๔]  ตตฺถ เอกาหํ ภิกฺขนฺติ เอกํ อหํ ภิกฺขามตฺตํ, เอกํ ภตฺต-
วฑฺฒิตกนฺติ อตฺโถ. ปฏิปาทยิสฺสนฺติ ปฏิปาเทสึ อทาสึ. สมงฺคิ ภตฺเตนาติ ภตฺเตน
สมงฺคีภูตํ, ลทฺธภิกฺขนฺติ อตฺโถ. เอวํ มหาเถโร เตน เทวปุตฺเตน อตฺตโน สุจริต-
กมฺเม ปกาสิเต สปริวารสฺส ตสฺส ธมฺมํ เทเสตฺวา มนุสฺสโลกมาคโต ตํ ปวตฺตึ สมฺมา-
สมฺพุทฺธสฺส กเถสิ, สตฺถา ตํ อฏฺฐุปฺปตฺตึ กตฺวา สมฺปตฺตมหาชนสฺส ธมฺมํ เทเสสิ,
สา เทสนา มหาชนสฺส สาตฺถิกา อโหสีติ.
                    ภิกฺขาทายกวิมานวณฺณนา  นิฏฺฐิตา.
                        -----------------

             อรรถกถาภาษาบาลีอักษรไทย เล่มที่ ๓๐ หน้า ๓๔๐-๓๔๒.
http://84000.org/tipitaka/atthapali/read_th.php?B=30&A=7185&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=30&A=7185&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=26&i=70
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=26&A=2416
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=26&A=2451
             The Pali Tipitaka in Roman Character :-
http://84000.org/tipitaka/read/roman_read.php?B=26&A=2451
             สารบัญพระไตรปิฎกเล่มที่ ๒๖
http://84000.org/tipitaka/read/?index_26