อรรถกถาเล่มที่ ๓๖ ภาษาบาลีอักษรไทย
 ชา.อ.๒ เอกนิปาต(๒)

                     ๕. จนฺทาภชาตกํ
     จนฺทาภนฺติ อิทํ สตฺถา เชตวเน วิหรนฺโต สงฺกสฺสนครทฺวาเร
เถรสฺเสว ปญฺหสฺส พฺยากรณํ อารพฺภ กเถสิ ฯ
     อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต
อรญฺญายตเน กาลํ กโรนฺโต อนฺเตวาสิเกน ปุจฺฉิโต จนฺทาภํ
สุริยาภนฺติ วตฺวา อาภสฺสเรสุ นิพฺพตฺโต ฯ ตาปสา เชฏฺฐนฺเตวาสิกสฺส
น สทฺทหึสุ ฯ โพธิสตฺโต อาคนฺตฺวา อากาเส ฐิโต อิมํ คาถมาห
         จนฺทาภํ สุริยาภญฺจ    โยธ ปญฺญาย คาธติ
         อวิตกฺเกน ฌาเนน    โหติ อาภสฺสรูปโคติ ฯ
     ตตฺถ จนฺทาภนฺติ โอทาตกสิณํ ทสฺเสติ ฯ สุริยาภนฺติ
ปีตกสิณํ ฯ โยธ ปญฺญาย คาธตีติ โย ปุคฺคโล อิธ สตฺตโลเก
อิทํ กสิณทฺวยํ ปญฺญาย คาธติ อารมฺมณํ กตฺวา อนุปวิสติ
ตตฺถ วา ปติฏฺฐหติ ฯ อถวา ฯ จนฺทาภํ สุริยาภญฺจ โยธ
ปญฺญาย คาธตีติ ยตฺตกํ ฐานํ จนฺทาภา จ สุริยาภา จ ปฏฺฐฏา
ตตฺตเก ฐาเน ปฏิภาคกสิณํ วฑฺเฒตฺวา ตํ อารมฺมณํ กตฺวา
ฌานํ นิพฺพตฺเตติ อุภยมฺเปตํ อาภํ ปญฺญาย คาธติ นาม ฯ ตสฺมา
อยเมตฺถ อตฺโถเยว ฯ อวิตกฺเกน ฌาเนน โหติ อาภสฺสรูปโคติ
โส ปุคฺคโล ตถา กตฺวา ปฏิลทฺเธน ทุติเยน ฌาเนน
อาภสฺสรพฺรหฺมโลกูปโค โหตีติ ฯ
     เอวํ โพธิสตฺโต ตาปเส โพเธตฺวา เชฏฺฐนฺเตวาสิกสฺส คุณํ
กเถตฺวา พฺรหฺมโลกเมว คโต ฯ
     สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา
เชฏฺฐนฺเตวาสิโก สารีปุตฺโต มหาพฺรหฺมา ปน อหเมวาติ ฯ
                   จนฺทาภชาตกํ ปญฺจมํ ฯ
                       --------

             อรรถกถาภาษาบาลีอักษรไทย เล่มที่ ๓๖ หน้า ๓๕๙-๓๖๐.
http://84000.org/tipitaka/atthapali/read_th.php?B=36&A=7142&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=36&A=7142&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=27&i=135
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=27&A=896
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=27&A=889
             The Pali Tipitaka in Roman Character :-
http://84000.org/tipitaka/read/roman_read.php?B=27&A=889
             สารบัญพระไตรปิฎกเล่มที่ ๒๗
http://84000.org/tipitaka/read/?index_27