บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
วณฺณาโรหวคฺควณฺณนา ----------- วณฺณาโรหชาตกํ วณฺณาโรเหนาติ อิทํ สตฺถา สาวตฺถิยํ อุปนิสฺสาย เชตวเน วิหรนฺโต เทฺว อคฺคสาวกตฺเถเร อารพฺภ กเถสิ ฯ เอกสฺมึ หิ สมเย อุโภปิ มหาเถรา อิมํ อนฺโตวสฺสํ อรญฺญวาสํ อนุพฺรูเหสฺสามาติ สตฺถารํ อาปุจฺฉิตฺวา คณํ โอหาย สยเมว ปตฺตจีวรมาทาย เชตวนา นิกฺขมิตฺวา เอกํ ปจฺจนฺตคามํ นิสฺสาย อรญฺเญ วิหรึสุ ฯ อญฺญตโรปิ วิฆาสาทปุริโส เถรานํ อุปฏฺฐานํ กโรนฺโต ตตฺเถว เอกมนฺเต วสิ ฯ โส เถรานํ สมคฺควาสํ ทิสฺวา อิเม อติวิย สมคฺคา วสนฺติ สกฺกา นุโข เอเต อญฺญมญฺญํ ภินฺทิตุนฺติ จินฺเตตฺวา สารีปุตฺตตฺเถรํ อุปสงฺกมิตฺวา กินฺนุโข ภนฺเต อยฺเยน มหาโมคฺคลฺลานตฺเถเรน สทฺธึ ตุมฺหากํ กิญฺจิ เวรํ อตฺถีติ ปุจฺฉิ ฯ กึ ปนาวุโสติ ฯ เอส ภนฺเต มมาคตกาเล สารีปุตฺโต นาม ชาติโคตฺตกุลปฺปเทเสหิ วา สุตฺตคนฺเถหิ ๑- วา ปฏิเวธอิทฺธีหิ วา มยา สทฺธึ กึ ปโหตีติ ตุมฺหากํ อคุณเมว กเถสีติ ฯ เถโร สิตํ กตฺวา คจฺฉ ตฺวํ อาวุโสติ อาห ฯ โส อปรสฺมิมฺปิ ทิวเส มหาโมคฺคลฺลานตฺเถรมฺปิ อุปสงฺกมิตฺวา ตเถว กเถสิ ฯ โสปิ นํ สิตํ กตฺวา คจฺฉ ตฺวํ @เชิงอรรถ: ๑ สุตคนฺเธหิ ฯ--------------------------------------------------------------------------------------------- หน้าที่ ๔๖๘.
อาวุโสติ วตฺวา สารีปุตฺตตฺเถรํ อุปสงฺกมิตฺวา อาวุโส เอส วิฆาสาโท ตุมฺหากํ สนฺติเก กิญฺจิ กเถสีติ ปุจฺฉิ ฯ อาวุโส มยาปิ สทฺธึ กเถสิ อิมํ นีหริตุํ วฏฺฏตีติ ฯ สาธุ อาวุโส นีหราติ วุตฺเต เถโร มา อิธ วสีติ อจฺฉรํ ปหริตฺวา ตํ นีหริ ฯ เต อุโภปิ สมคฺคสํวาสํ วสิตฺวา สตฺถุ สนฺติกํ คนฺตฺวา วนฺทิตฺวา นิสีทึสุ ฯ สตฺถา ปฏิสนฺถารํ กตฺวา สุเขน วสฺสํ วสิตฺถาติ ปุจฺฉิ ฯ ภนฺเต เอโก วิฆาสาโท อมฺเห ภินฺทิตุกาโม หุตฺวา ภินฺทิตุํ อสกฺโกนฺโต ปลายีติ วุตฺเต นโข โส สารีปุตฺต อิทาเนว ปุพฺเพเปส ตุมฺเห ภินฺทิสฺสามีติ ภินฺทิตุํ อสกฺโกนฺโต ปลายีติ วตฺวา เตหิ ยาจิโต อตีตํ อาหริ ฯ อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต อรญฺเญ รุกฺขเทวตา อโหสิ ฯ ตทา สีโห จ พฺยคฺโฆ จ อรญฺเญ ปพฺพตคุหายํ วสนฺติ ฯ เอโก สิคาโล เต อุปฏฺฐหนฺโต เตสํ วิฆาสํ ขาทิตฺวา มหากาโย หุตฺวา เอกทิวสํ จินฺเตสิ มยา สีหพฺยคฺฆานํ มํสํ น ขาทิตปุพฺพํ มยา อิเม เทฺว ชเน ภินฺทิตุํ วฏฺฏติ ตโต เตสํ กลหํ กตฺวา มตานํ มํสํ ขาทิสฺสามีติ ฯ โส สีหํ อุปสงฺกมิตฺวา กึ สามิ ตุมฺหากํ พฺยคฺเฆน สทฺธึ กิญฺจิ เวรํ อตฺถีติ ปุจฺฉิ ฯ กึ ปน สมฺมาติ ฯ เอส ภนฺเต มม อาคตกาเล สีโห นาม สรีรวณฺเณน วา อาโรหปริณาเหน วา ชาติพลวิริเยหิ วา มม กลภาคมฺปิ น ปาปุณาตีติ ตุมฺหากํ อคุณเมว กเถสีติ ฯ อถ นํ สีโห คจฺฉ ตฺวํ น โส เอวํ กเถสฺสตีติ อาห ฯ--------------------------------------------------------------------------------------------- หน้าที่ ๔๖๙.
พฺยคฺฆมฺปิ อุปสงฺกมิตฺวา เอเตเนว อุปาเยน กเถสิ ฯ ตํ สุตฺวา พฺยคฺโฆ สีหํ อุปสงฺกมิตฺวา สมฺม ตฺวํ กิร อิทญฺจิทญฺจ วเทสีติ ปุจฺฉนฺโต ปฐมํ คาถมาห วณฺณาโรเหน ชาติยา พลนิกฺกมเนน จ สุพาหุ น มยา เสยฺโย สุทาโฒ อิติ ภาสสีติ ฯ ตตฺถ พลนิกฺกมเนน จาติ กายพเลน เจว วิริยพเลน จ ฯ สุพาหุ น มยา เสยฺโยติ อยํ สุพาหุ นาม พฺยคฺโฆ เอเตหิ การเณหิ มยา เนว สทิโส น อุตฺตริตโรติ สจฺจํ กิร ตฺวํ โสภนาหิ ทาฒาหิ สมนฺนาคโต สุทาโฒ มิคราชา เอวํ วเทสีติ ฯ ตํ สุตฺวา สุทาโฒ เสสา จตสฺโส คาถา อภาสิ วณฺณาโรเหน ชาติยา พลนิกฺกมเนน จ สุทาโฒ น มยา เสยฺโย สุพาหุ อิติ ภาสสิ เอวญฺเจ มํ วิหรนฺตํ สุพาหุ สมฺม ทุพฺภสิ นทานาหํ ตยา สทฺธึ สํวาสมภิโรจเย โย ปเรสํ วจนานิ สทฺทเหถ ยถาตถํ ขิปฺปํ ภิชฺเชถ มิตฺตสฺมึ เวรญฺจ ปสเว พหุํ น โส มิตฺโต โย สทา อปฺปมตฺโต เภทาสงฺกี รนฺธเมวานุปสฺสี ยสฺมิญฺจ เสติ อุรสีว ปุตฺโต สเว มิตฺโต โย อเภชฺโช ปเรภีติ ฯ ตตฺถ สมฺมาติ วยสฺส ฯ ทุพฺภสีติ ยทิ เอวํ ตยา สทฺธึ--------------------------------------------------------------------------------------------- หน้าที่ ๔๗๐.
สมคฺควาสํ วสนฺตํ มํ สิคาลสฺส กถํ คเหตฺวา ตฺวํ ทุพฺภสิ หนิตุํ อิจฺฉสิ อิโตทานิ ปฏฺฐาย อหํ ตยา สทฺธึ วาสํ น อภิโรจเย ฯ ยถาตถนฺติ ตตฺตโต ยถาตถํ ยถาตจฺฉํ อวิสํวาทเกน อริเยน วุตฺตํ วจนํ สทฺธายิตพฺพํ ฯ เอวํ โย เยสญฺจ เตสญฺจ ปเรสํ วจนานิ สทฺทเหถาติ อตฺโถ ฯ โย สทา อปฺปมตฺโตติ โย นิจฺจํ อปฺปมตฺโต หุตฺวา มิตฺตสฺส วิสฺสาสํ น เทติ โส มิตฺโต นาม น โหตีติ อตฺโถ ฯ เภทาสงฺกีติ อชฺช ภิชฺชิสฺสติ เสฺว ภิชฺชิสฺสตีติ เอวํ มิตฺตสฺส เภทเมว อาสงฺกติ ฯ รนฺธเมวานุปสฺสีติ ฉิทฺทํ วิวรเมว ปสฺสนฺโต ฯ อุรสีว ปุตฺโตติ ยสฺมึ มิตฺเต มาตุ หทเย ปุตฺโต วิย นิราสงฺโก นิพฺภโย เสติ ฯ อิติ อิมาหิ จตูหิ คาถาหิ สีเหน มิตฺตคุเณ กถิเต พฺยคฺโฆ มยฺหํ โทโสติ สีหํ ขมาเปสิ ฯ เต ตเถว สมคฺควาสํ วสึสุ ฯ สิคาโล ปน ปลายิตฺวา อญฺญตฺถ คโตติ ฯ สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา สิคาโล วิฆาสาโท อโหสิ สีโห สารีปุตฺโต พฺยคฺโฆ โมคฺคลฺลาโน ตํ การณํ ปจฺจกฺขโต ทิสฺวา ตสฺมึ วเน นิวุฏฺฐรุกฺขเทวตา ปน อหเมวาติ ฯ วณฺณาโรหชาตกํ ปฐมํ --------อรรถกถาภาษาบาลีอักษรไทย เล่มที่ ๓๘ หน้า ๔๖๗-๔๗๐. http://84000.org/tipitaka/atthapali/read_th.php?B=38&A=9694&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=38&A=9694&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=27&i=753 เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=3553 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=3517 The Pali Tipitaka in Roman Character :- http://84000.org/tipitaka/read/roman_read.php?B=27&A=3517 สารบัญพระไตรปิฎกเล่มที่ ๒๗ http://84000.org/tipitaka/read/?index_27
|
บันทึก ๒๖ มกราคม พ.ศ. ๒๕๖๑.
การแสดงผลนี้อ้างอิงข้อมูลจากอรรถกถาภาษาบาลีอักษรไทย.
หากพบข้อผิดพลาด กรุณาแจ้งได้ที่ [email protected]