|
| บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
สตฺติคุมฺพชาตกํ มิคลุทฺโท มหาราชาติ อิทํ สตฺถา มทฺทกุจฺฉิสฺมึ มิคทาเย วิหรนฺโต เทวทตฺตํ อารพฺภ กเถสิ ฯ เทวทตฺเตน หิ สิลาย ปวิทฺธาย ภควโต ปาเท สขลิกาย ฆเฏ พลวเวทนา อุปฺปชฺชึสุ ฯ ตถาคตสฺส ทสฺสนตฺถาย พหู ภิกฺขู สนฺนิปตึสุ ฯ อถ ภควา ปริสํ สนฺนิปติตํ ทิสฺวา ภิกฺขเว อิทํ เสนาสนํ อติสมฺพาธํ สนฺนิปาโต มหา ภวิสฺสติ มญฺจ สิวิกาย มทฺทกุจฺฉิยํ เนถาติ อาห ฯ ภิกฺขู ตถา กรึสุ ฯ ชีวโก ตถาคตสฺส ปาทํ ผาสุกํ อกาสิ ฯ ภิกฺขู สตฺถุ สนฺติเก นิสินฺนาว กถํ สมุฏฺาเปสุํ อาวุโส เทวทตฺโต สยํปิ ปาโป ปริสาปิสฺส ปาปา อิติ โส ปาโป ปาปปริวาโรว วิหรตีติ ฯ สตฺถา กึ กเถถ ภิกฺขเวติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว ปุพฺเพปิ เทวทตฺโต ปาโปว ปาปปริวาโรเยวาติ วตฺวา อตีตํ อาหริ ฯ อตีเต อุตฺตรปญฺจาลนคเร ปญฺจาโล นาม ราชา รชฺชํ กเรสิ ฯ ตทา มหาสตฺโต อรญฺายตเน เอกสฺมึ สานุปพฺพเต สิมฺพลิวเน เอกสฺส สุวรญฺโ ปุตฺโต หุตฺวา นิพฺพตฺติ เทฺว ภาตโร อเหสุํ ฯ ตสฺส ปน ปพฺพตสฺส อุปริวาเต โจรคามโก อโหสิ ปญฺจนฺนํ โจรสตานํ นิวาโส อโธวาเต อสฺสโม ปญฺจนฺนํ--------------------------------------------------------------------------------------------- หน้าที่ ๗๘.
อิสิสตานํ นิวาโส ฯ เตสํ สุวโปตกานํ ปกฺขนิกฺขมนกาเล วาต- มณฺฑลิกา อุทปาทิ ฯ ตาย ปหโต เอโก สุวโปตโก โจรคาเม โจรานํ อาวุธนฺตเร ปติโต ฯ ตสฺส ตตฺถ ปติตตฺตา สตฺติคุมฺโพ- เตฺววสฺส นามํ กรึสุ ฯ เอโก อสฺสเม พาลุกถเล ปุปฺผนฺตเร ปติโต ฯ ตสฺส ตตฺถ ปติตตฺตา ปุปฺผโกเตฺววสฺส นามํ กรึสุ ฯ สตฺติคุมฺโพ โจรานํ อนฺตเร วฑฺฒิโต ฯ ปุปฺผโก อิสีนํ อนฺตเร วฑฺฒิโต ฯ อเถกทิวสํ ราชา สพฺพาลงฺการปฏิมณฺฑิโต รถวรํ อภิรุหิตฺวา มหนฺเตน ปริวาเรน มิควธาย นครโต อวิทูเร สุปุปฺผิต- สุผลิตรมณียํ อุปวนํ คนฺตฺวา ยสฺส ปสฺเสน มิโค ปลาโต ตสฺเสว คีวาติ วตฺวา รถา โอรุยฺห ปฏิจฺฉาเทตฺวา ทินฺเน โกฏฺเก ธนุํ อาทาย อฏฺาสิ ฯ ปุริเสหิ มิคานํ อุฏฺาปนตฺถาย วนคุมฺเพสุ โปถิยมาเนสุ เอโก เอณิมิโค อุฏฺาย คมนมคฺคํ โอโลเกนฺโต รญฺา ิตฏฺานสฺเสว วิวิตฺตํ ทิสฺวา ตทภิมุโข ปกฺขนฺทิตฺวา ปลายิ ฯ อมจฺจา กสฺส ปสฺเสน มิโค ปลาโตติ ปุจฺฉนฺตา รญฺโ ปสฺเสนาติ ตฺวา รญฺา สทฺธึ เกฬึ กรึสุ ฯ ราชา อสฺมิมาเนน เตสํ เกฬึ อสหนฺโต อิทานิ ตํ มิคํ คณฺหิสฺสามีติ รถํ อภิรุยฺห สีฆํ เปเสหีติ สารถึ อาณาเปตฺวา มิเคน คตมคฺคํ ปฏิปชฺชิ ฯ รถํ เวเคน คจฺฉนฺตํ ปริสา อนุพนฺธิตุํ นาสกฺขึสุ ฯ ราชา สารถิทุติโย ยาว มชฺฌนฺติกา คนฺตฺวา มิคํ อทิสฺวา นิวตฺ- ตนฺโต ตสฺส โจรคามกสฺส สนฺติเก รมณียํ กนฺทรํ ทิสฺวา รถา โอรุยฺห นหาตฺวา จ ปิวิตฺวา จ ปจฺจุตฺตริ ฯ อถสฺส สารถี--------------------------------------------------------------------------------------------- หน้าที่ ๗๙.
รถโต อุตฺตรตฺถรณํ โอตาเรตฺวา สยนํปิ รุกฺขจฺฉายาย ปญฺเปสิ ฯ โส ตตฺถ นิปชฺชิ ฯ สารถีปิ ตสฺส ปาเท สมฺพาหนฺโต นิสีทิ ฯ ราชา อนฺตรนฺตรา นิทฺทายติ เจว ปพุชฺฌติ จ ฯ โจรคามวาสิโน โจราปิ รญฺโ อารกฺขณตฺถาย อรญฺเมว ปวิสึสุ ฯ โจรคามเก สตฺติคุมฺโพ เจว ภตฺตรนฺธโก ปติโกลุมฺโพ นาเมโก ปุริโส จาติ เทฺวว โอหิยึสุ ฯ ตสฺมึ ขเณ สตฺติคุมฺโพ คามโต นิกฺขมิตฺวา ราชานํ ทิสฺวา อิมํ นิทฺทายมานํ มาเรตฺวา อาภรณานิ คเหสฺสามีติ จินฺเตตฺวา ปติโกลุมฺพกสฺส สนฺติกํ คนฺตฺวา ตํ การณํ อาโรเจสิ ฯ ตมตฺถํ ปกาเสนฺโต สตฺถา ปญฺจ คาถา อภาสิ มิคลุทฺโท มหาราชา ปญฺจาลานํ รเถสโภ นิกฺขนฺโต สห เสนาย โอคโณ วนมาคโต ฯ ตตฺถทฺทสา อรญฺสฺมึ ตกฺการานํ กุฏีกตํ ตสฺสา กุฏิยา นิกฺขมฺม สุโว ลุทฺทานิ ภาสติ ฯ สมฺปนฺนพาหโน โปโส ยุวา สมฺมฏฺกุณฺฑลี โสภติ โลหิตุณฺหีโส ทิวา สุริโยว ภาสติ ฯ มชฺฌนฺติเก สมฺปติเก สุตฺโต ราชา สสารถิ หนฺทสฺสาภรณํ สพฺพํ คณฺหาม สหสา มยํ ฯ นิสฺสิเวปิ รโหทานิ สุตฺโต ราชา สสารถิ อาทาย วตฺถํ มณิกุณฺฑลญฺจ หนฺตฺวาน สาขาหิ อวตฺถรามาติ ฯ ตตฺถ มิคลุทฺโทติ มิคลุทฺโท วิย มิคานํ คเวสนโต มิคลุทฺโทติ--------------------------------------------------------------------------------------------- หน้าที่ ๘๐.
วุตฺโต ฯ โอคโณติ คณา โอหีโน ปริหีโน หุตฺวา ฯ ตกฺการานํ กุฏีกตนฺติ โส ราชา ตตฺถ อรญฺเ โจรานํ วสนตฺถาย กตํ คามกํ อทฺทส ฯ ตสฺสาติ ตโต โจรกุฏิโต ฯ ลุทฺทานิ ภาสตีติ ปติโกลุมฺเพน สทฺธึ ทารุณานิ วจนานิ กเถสิ ฯ สมฺปนฺนพาหโนติ สมฺปนฺนอสฺสพาหโน ฯ โลหิตุณฺหีโสติ รตฺเตน อุณฺหีสปเฏน สมนฺนา- คโต ฯ สมฺปติเกติ สมฺปติ อิทานิ เอวรูเป ิตมชฺฌนฺติเก กาเลติ อตฺโถ ฯ สหสาติ สหเสน ปสยฺหาการํ กตฺวา คณฺหามาติ วทติ ฯ นิสฺสิเวปิ รโหทานีติ นิสฺสิเวปิ อิทานิ รโห อิทํ วทติ ยถา นิสฺสิเว อฑฺฒรตฺติกสมเย มนุสฺสา กีฬนฺตา สยนฺติ รโห โหติ อิทานิ เอวรูเป ิตมชฺฌนฺติเกปิ กาเล ตเถวาติ ฯ หนฺตฺวา- นาติ ราชานํ มาเรตฺวา วตฺถาภรณานิสฺส คเหตฺวา อถ นํ ปาเท คเหตฺวา กฑฺฒิตฺวา เอกมนฺเต สาขาหิ ปฏิจฺฉาเทมาติ ฯ อิติ โส เวเคน สกึ นิกฺขมิตฺวา สกึ ปติโกลุมฺพสฺส สนฺติกํ คจฺฉติ ฯ โส ตสฺส วจนํ สุตฺวา นิกฺขมิตฺวา โอโลเกนฺโต ราชภาวํ ตฺวา ภีโต คาถมาห กินฺนุ อุมฺมตฺตรูโปว สตฺติคุมฺพ ปภาสสิ ทุราสทา หิ ราชาโน อคฺคิ ปชฺชลิโต ยถาติ ฯ อถ นํ สุโว คาถาย อชฺฌภาสิ อถ ตฺวํ ปติโกลุมฺพ มตฺโต ถูลานิ คชฺชสิ มาตรา มยฺห นคฺคาย กึ นุ ตฺวํ วิชิคุจฺฉเสติ ฯ ตตฺถ อถ ตฺวนฺติ นนุ ตฺวํ ฯ มตฺโตติ โจรานํ อุจฺฉิฏฺสุรํ--------------------------------------------------------------------------------------------- หน้าที่ ๘๑.
ลภิตฺวา ตาย มตฺโต หุตฺวา ปุพฺเพ มหาคชฺชิตานิ ตชฺชสิ ฯ มาตราติ โจรเชฏฺกสฺส ภริยํ สนฺธายาห ฯ สา กิร ตทา สาขาภงฺคํ นิวาเสตฺวา จรติ ฯ วิชิคุจฺฉเสติ มม มาตริ นคฺคาย กึ นุ ตฺวํ อิทานิ โจรกมฺมํ ชิคุจฺฉสิ กาตุํ น อิจฺฉสีติ ฯ ราชา ปพุชฺฌิตฺวา ตสฺส เตน สทฺธึ มนุสฺสภาสาย กเถนฺตสฺส วจนํ สุตฺวา สปฺปฏิภยํ อิทํ านนฺติ สารถึ อุฏฺาเปนฺโต คาถมาห อุฏฺเหิ สมฺม ตรมาโน รถํ โยเชหิ สารถิ สกุโณ เม น รุจฺจติ อญฺ คจฺฉาม อสฺสมนฺติ ฯ โสปิ สีฆํ อุฏฺหิตฺวา รถํ โยเชตฺวา คาถมาห ยุตฺโต รโถ มหาราช ยุตฺโต จ พลวาหโน อธิติฏฺ มหาราช อญฺ คจฺฉาม อสฺสมนฺติ ฯ ตตฺถ พลวาหโนติ พลววาหโน มหาถามอสฺสสมฺปนฺโนติ อตฺโถ ฯ อธิติฏฺาติ อภิรุห ฯ อภิรุฬฺหมตฺเตเยว ตสฺมึ สินฺธวา วาตเวเคน ปกฺขนฺทึสุ ฯ สตฺติคุมฺโพ รถํ คจฺฉนฺตํ ทิสฺวา สมฺภมปฺปตฺโต เทฺว คาถา อภาสิ โกนุเมว คตา สพฺเพ เย อสฺมึ ปริจารกา เอส คจฺฉติ ปญฺจาโล มุตฺโต เตสํ อทสฺสนา ฯ โกทณฺฑกานิ คณฺหถ สตฺติโย โตมรานิ จ เอส คจฺฉติ ปญฺจาโล มา โว มุญฺจิตฺถ ชีวิตนฺติ ฯ ตตฺถ โกนุเมติ กุหึ นุ อิเม ฯ อสฺมินฺติ อิมสฺมึ อสฺสเม ฯ--------------------------------------------------------------------------------------------- หน้าที่ ๘๒.
ปริจารกาติ โจรา ฯ อทสฺสนาติ เอเตสํ โจรานํ อทสฺสเนน มุตฺโต ฯ เอส คจฺฉตีติ เอเตสํ หตฺถโต มุตฺโต หุตฺวา เอส อทสฺสนํ คจฺฉตีติ อตฺโถ ฯ โกทณฺฑกานีติ ธนู ฯ ชีวิตนฺติ ตุมฺหากํ ชีวนฺตานํ มา มุญฺจิตฺถ อาวุธหตฺถา ธาวิตฺวา คณฺหถ นนฺติ ฯ เอวํ ตสฺส วิรวิตฺวา อปราปรํ วิธาวนฺตสฺเสว ราชา อิสีนํ อสฺสมํ ปตฺโต ฯ ตสฺมึ ขเณ อิสโย ผลาผลตฺถาย คตา ฯ เอโก ปุปฺผกสุโวว อสฺสมปเท โหติ ฯ โส ราชานํ ทิสฺวา ปจฺจุคฺคมนํ กตฺวา ปฏิสนฺถารมกาสิ ฯ ตมตฺถํ ปกาเสนฺโต สตฺถา จตสฺโส คาถา อภาสิ อถาปโร ปฏินนฺทิตฺถ สุโว โลหิตตุณฺฑโก สฺวาคตนฺเต มหาราช อโถ เต อทุราคตํ อิสฺสโรสิ อนุปฺปตฺโต ยํ อิธตฺถิ ปเวทย ฯ ติณฺฑุกานิ ปิยาลานิ มธุเก กาสมาริโย ผลานิ ขุทฺทกปฺปานิ ภุญฺช ราช วรํ วรํ ฯ อิทํปิ ปานิยํ สีตํ อาภตํ คิริคพฺภรา ตโต ปิว มหาราช สเจ ตฺวํ อภิกงฺขสิ ฯ อรญฺ อุญฺฉาย คตา เย อสฺมึ ปริจารกา สยํ อุฏฺาย คณฺหโวฺห หตฺถา เม นตฺถิ ทาตเวติ ฯ ตตฺถ ปฏินนฺทิตฺถาติ ราชานํ ทิสฺวาว ตุสฺสิ ฯ โลหิตตุณฺฑโกติ รตฺตตุณฺฑโก โสภคฺคปฺปตฺโต ฯ มธุเกติ มธุกผลานิ ฯ กาสมาริโยติ เอวํนามกานิ ผลานิ การผลานิ วา ฯ ตโต ปิวาติ--------------------------------------------------------------------------------------------- หน้าที่ ๘๓.
ตโต ปานียมาฬกโต คเหตฺวา ปานียํ ปิว ฯ เย อสฺมึ ปริจารกาติ มหาราช เย อิมสฺมึ อสฺสเม วิจรณกา อิสโย เต อรญฺ อุญฺฉาย คตา ฯ คณฺหโวฺหติ ผลาผลานิ คณฺหถ ฯ ทาตเวติ ทาตุํ ฯ ราชา ตสฺส ปฏิสนฺถาเร ปสีทิตฺวา ถุตึ กโรนฺโต คาถาทฺวยมาห ภทฺทโก วตายํ ปกฺขี ทิโช ปรมธมฺมิโก อเถโส อิตโร ปกฺขี สุโว ลุทฺทานิ ภาสติ ฯ เอตํ หนถ พนฺธถ มา โว มุญฺจิตฺถ ชีวิตํ อิจฺเจวํ วิลปนฺตสฺส โสตฺถี ปตฺโตสฺมิ อสฺสมนฺติ ฯ ตตฺถ อิตโรติ โจรกุฏิยํ สุวโก ฯ อิจฺเจวนฺติ อหํ ปน ตสฺส เอวํ วิลปนฺตสฺส อิมํ อสฺสมํ โสตฺถินา ปตฺโตติ ฯ รญฺโ กถํ สุตฺวา ปุปฺผโก เทฺว คาถา อภาสิ ภาตโรสฺมา มหาราช โสทริยา เอกมาตุกา เอกรุกฺขสฺมึ สํวฑฺฒา นานาเขตฺตํ คตา อุโภ ฯ สตฺติคุมฺโพ จ โจรานํ อหญฺจ อิสินํ อิธ อสตํ โส สตํ อหํ เตน ธมฺเมน โน วินาติ ฯ ตตฺถ ภาตโรสฺมาติ มหาราช โส จาหญฺจ อุโภ ภาตโร โหม ฯ โจรานนฺติ โส โจรานํ สนฺติเก สํวฑฺโฒ อหํ อิสีนํ สนฺติเก ฯ อสตํ โส สตํ อหนฺติ โส อสาธูนํ ทุสฺสีลานํ สนฺติกํ อุปคโต อหํ สาธูนํ สีลวนฺตานํ เตน ธมฺเมน โน วินาติ มหาราช ตญฺจ สตฺติคุมฺพํ โจรา โจรธมฺเมน เจว โจรกิริยาย จ วิเนสุํ มํ อิสโย อิสิธมฺเมน อิสิสีลาจาเรน ตสฺมา โสปิ เตน--------------------------------------------------------------------------------------------- หน้าที่ ๘๔.
โจรธมฺเมน โน วินา โหติ อหํ หิ อิสิธมฺเมน โน วินา โหมีติ ฯ อิทานิ ตํ ธมฺมํ วิภเชนฺโต คาถาทฺวยมาห ยตฺถ วโธ จ พนฺโธ จ นิกตี วญฺจนานิ จ อาโลปา สหสาการา ตานิ โส ตตฺถ สิกฺขติ ฯ อิธ สจฺจญฺจ ธมฺโม จ อหึสา สํยโม ทโม อาสนูทกทายีนํ องฺเก วฑฺโฒสฺมิ ภารตาติ ฯ ตตฺถ นิกตีติ ปฏิรูปเกน วญฺจนานิ ฯ วญฺจนานีติ อุชุกวญฺจนาเนว ฯ อาโลปาติ ทิวา คามฆาตา ฯ สหสาการาติ เคหํ ปวิสิตฺวา มรเณน ตชฺเชตฺวา สาหสิกกมฺมกรณานิ จ ฯ สจฺจนฺติ สภาโว ฯ ธมฺโมติ สุจริตธมฺโม ฯ อหึสาติ เมตฺตาปุพฺพภาโค ฯ สํยโมติ สีลสํยโม ฯ ทโมติ อินฺทฺริยทมนํ ฯ อาสนูทกทายีนนฺติ อพฺภาคตานํ ชนานํ อาสนญฺจ อุทกทานญฺจ ทานสีลานํ ฯ ภารตาติ ราชานํ อาลปติ ฯ อิทานิ รญฺโ ธมฺมํ เทเสนฺโต อิมา คาถา อภาสิ ยํ ยํ หิ ราช ภชติ สนฺตํ วา ยทิ วา อสํ สีลวนฺตํ วิสีลํ วา วสํ ตสฺเสว คจฺฉติ ฯ ยาทิสํ กุรุเต มิตฺตํ ยาทิสญฺจูปเสวติ โสปิ ตาทิสโก โหติ สหวาโส หิ ตาทิโส ฯ เสวมาโน เสวมานํ สมฺผุฏฺโ สมฺผุสํ ปรํ สโร ทุฏฺโ กลาปํว อลิตฺตมุปลิมฺปติ ฯ อุปลิมฺปภยา ธีโร เนว ปาปสขา สิยา--------------------------------------------------------------------------------------------- หน้าที่ ๘๕.
ปูติมจฺฉํ กุสคฺเคน โย นโร อุปนยฺหติ กุสาปิ ปูตี วายนฺติ เอวํ พาลูปเสวนา ฯ ตครญฺจ ปลาเสน โย นโร อุปนยฺหติ ปตฺตาปิ สุรภี วายนฺติ เอวํ ธีรูปเสวนา ฯ ตสฺมา ปตฺตปูฏสฺเสว ตฺวา สมฺปากมตฺตโน อสนฺเตนูปเสเวยฺย สนฺเต เสเวยฺย ปณฺฑิโต อสนฺโต นิรยํ เนนฺติ สนฺโต ปาเปนฺติ สุคฺคตินฺติ ฯ ตตฺถ สนฺตํ วา ยทิ วา อสนฺติ สปฺปุริสํ วา อสปฺปุริสํ วา ฯ เสวมาโน เสวมานนฺติ เสวมาโน อาจริโย เสวมานํ อนฺเตวาสิกํ ฯ สมฺผุฏฺโติ อนฺเตวาสินา สมฺผุฏฺโ อาจริโย ฯ สมฺผุสํ ปรนฺติ ปรํ อาจริยํ ผุสนฺโต อนฺเตวาสี ฯ อลิตฺตนฺติ ตํ อนฺเตวาสิกํ ปาปธมฺเมน อลิตฺตํ โส อาจริโย วิสทุฏฺโ สโร เสสํ สรกลาปํ วิย ลิมฺปติ ฯ เอวํ พาลูปเสวนาติ พาลูปเสวี หิ ปูติมจฺฉํ อุปนยฺหนกุสคฺคํ วิย โหติ ปาปกมฺมํ อกโรนฺโตปิ อวณฺณํ อกิตฺตึ ลภติ ฯ ธีรูปเสวนาติ ธีรูปเสวี ปุคฺคโล ตคราทิคนฺธชาติปลิเวนปตฺตํ วิย โหติ ปณฺฑิโต ภวิตุํ อสกฺโกนฺโตปิ กลฺยาณมิตฺตเสวีติ คุณกิตฺตึ ลภติ ฯ ปตฺตปูฏสฺเสวาติ ทุคฺคนฺธสุคนฺธปลิเวนปณฺณสฺเสว ฯ สมฺปากมตฺตโนติ กลฺยาณมิตฺตสํสคฺควเสน อตฺตโน ปริปากํ ปริปากาณภาวํ ตฺวาติ อตฺโถ ฯ ปาเปนฺติ สุคฺคตินฺติ สนฺโต สมฺมาทิฏฺิกา อตฺตานํ นิสฺสิเต สตฺเต สคฺคเมว ปาเปนฺตีติ เทสนํ ยถานุสนฺธิเมว ปาเปสิ ฯ--------------------------------------------------------------------------------------------- หน้าที่ ๘๖.
ราชา ตสฺส ธมฺมกถาย ปสีทติ ฯ อิสิคโณปิ อาคโต ฯ ราชา อิสโย วนฺทิตฺวา ภนฺเต มํ อนุกมฺปมานา มม วสนฏฺาเน วสถาติ วตฺวา เตสํ ปฏิญฺ คเหตฺวา นครํ คนฺตฺวา สุวานํ อภยํ อทาสิ ฯ อิสโยปิ ตตฺถ อคมํสุ ฯ ราชา อิสิคณํ อุยฺยาเน วสาเปนฺโต ยาวชีวํ อุปฏฺหิตฺวา สคฺคปูรํ ปูเรสิ ฯ อถสฺส ปุตฺโตปิ ฉตฺตํ อุสฺสาเปตฺวา อิสิคณํ ปฏิชคฺคิเยว ฯ ตสฺมึ กุลปริวตฺเต สตฺต ราชาโน อิสิคณสฺส ทานํ ปวตฺตยึสุ ฯ มหาสตฺโต อรญฺเเยว วสนฺโต ยถากมฺมํ คโต ฯ สตฺถา อิมํ ธมฺมเทสนํ อาหริตฺวา เอวํ ภิกฺขเว ปุพฺเพปิ เทวทตฺโต ปาโป ปาปปริวาโรเยวาติ วตฺวา ชาตกํ สโมธาเนสิ ตทา สตฺติคุมฺโพ เทวทตฺโต อโหสิ โจรา เทวทตฺตปริสา ราชา อานนฺโท อิสิคณา พุทฺธปริสา ปุปฺผกสุโว ปน อหเมวาติ ฯ สตฺติคุมฺพชาตกํ นิฏฺิตํ ฯ สตฺตมํ ฯ ----------อรรถกถาภาษาบาลีอักษรไทย เล่มที่ ๔๑ หน้า ๗๗-๘๖. http://84000.org/tipitaka/atthapali/read_th.php?B=41&A=1568&modeTY=1&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=41&A=1568&modeTY=1&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=27&i=2142 เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=8466 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=8936 The Pali Tipitaka in Roman Character :- http://84000.org/tipitaka/read/roman_read.php?B=27&A=8936 สารบัญพระไตรปิฎกเล่มที่ ๒๗ http://84000.org/tipitaka/read/?index_27
![อ่านหน้า[ต่าง] แรก](go1.gif) ![อ่านหน้า[ต่าง] ที่แล้ว](go2.gif)   ![อ่านหน้า[ต่าง] ถัดไป](go3.gif) ![อ่านหน้า[ต่าง] สุดท้าย](go4.gif)   |
|
บันทึก ๒๖ มกราคม พ.ศ. ๒๕๖๑.
การแสดงผลนี้อ้างอิงข้อมูลจากอรรถกถาภาษาบาลีอักษรไทย.
หากพบข้อผิดพลาด กรุณาแจ้งได้ที่ [email protected]