Atthakatha Book 55 : PALI ROMAN
Pañca.A. (paramatthadī.)

                          13. Terasamavagga
                        1. Kappaṭṭhakathāvaṇṇanā
     [654-657] Idāni kappaṭṭhakathā nāma hoti. Tattha yesaṃ "saṃghaṃ samaggaṃ
bhetvāna, kappaṃ nirayamhi paccatī"ti "sakalampi kappaṃ saṃghabhedako niraye tiṭṭhatī"ti
laddhi seyyathāpi rājagirikānaṃ, te sandhāya kappaṭṭhoti pucchā sakavādissa,
paṭiññā itarassa. Buddho ca loketi idaṃ vinā buddhuppādena saṃghabhedassa
abhāvadassanatthaṃ vuttaṃ. Kappo ca saṇṭhāti saṃgho ca bhijjatītiādi "yadi so
sakalakappaṃ tiṭṭhati, saṇṭhahanato paṭṭhāya taṃ kammaṃ katvā tattha uppajjitvā
tiṭṭheyyā"ti dassetuṃ vuttaṃ. Atītantiādi heṭṭhā vuttādhippāyameva. Kappaṭṭho
iddhimāti pañhe bhāvanāmayaṃ sandhāya paṭikkhipati, parasamaye panassa jātimayaṃ iddhiṃ
icchanti, taṃ sandhāya paṭijānāti. Chandiddhipādotiādi "jātimayāya iddhiyā
iddhimāti laddhimattametaṃ, kintena, yadi panassa iddhi atthi, ime 2- tena 3-
iddhipādā bhāvitā bhaveyyun"ti codanatthaṃ vuttaṃ. Āpāyiko nerayikoti suttaṃ
yaṃ so ekaṃ kappaṃ asītibhāge katvā tato ekabhāgamattaṃ kālaṃ tiṭṭheyya, taṃ
āyukappaṃ sandhāya vuttaṃ, tasmā asādhakanti.
                      Kappaṭṭhakathāvaṇṇanā niṭṭhitā.
                           ----------
@Footnote: 1 cha.Ma. sattamabhavikakathāyapi   2 cha.Ma. iminā   3 cha.Ma. nayena


             The Pali Atthakatha in Roman Book 55 page 266.
http://84000.org/tipitaka/atthapali/rm_line.php?B=55&A=5996
             อรรถกถาบาลีอักษรไทย :-
http://84000.org/tipitaka/atthapali/read_th.php?B=55&A=5996
             อ่านอรรถกถาแปลไทย :-
http://84000.org/tipitaka/attha/attha.php?b=37&i=1513
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=37&A=15443
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=37&A=10053
             The Pali Tipitaka in Roman Character :-
http://84000.org/tipitaka/read/roman_read.php?B=37&A=10053
             Contents of The Tipitaka Volume 36
http://84000.org/tipitaka/read/?index_37