พระไตรปิฎกเล่มที่ ๑ ภาษาบาลี อักษรไทย
พระวินัยปิฎกเล่มที่ ๑ วินย. มหาวิภงฺโค (๑)

     [๖๔๘]   โย   ปนาติ  โย  ยาทิโส  ฯเปฯ  ภิกฺขูติ  ฯเปฯ  อยํ
อิมสฺมึ   อตฺเถ   อธิปฺเปโต   ภิกฺขูติ  ฯ  ตถารูเป  อาสเนติ  เอวรูเป
อาสเน   ฯ   มาตุคาโม   นาม   มนุสฺสิตฺถี   น   ยกฺขี  น  เปตี  น
ติรจฺฉานคตา    วิญฺญู    ปฏิพลา    สุภาสิตทุพฺภาสิตํ    ทุฏฺฐุลฺลาทุฏฺฐุลฺลํ
อาชานิตุํ  ฯ  สทฺธินฺติ  เอกโต  ฯ  เอโก  เอกายาติ  ภิกฺขุ  เจว โหติ
มาตุคาโม   จ   ฯ   รโห   นาม   จกฺขุสฺส  รโห  โสตสฺส  รโห  ฯ
จกฺขุสฺส   รโห   นาม  น  สกฺกา  โหติ  อกฺขึ  วา  นิขนิยมาเน  ภมุกํ
วา   อุกฺขิปิยมาเน   สีสํ  วา  อุกฺขิปิยมาเน  ปสฺสิตุํ  ฯ  โสตสฺส  รโห
นาม   น   สกฺกา   โหติ   ปกติกถา   โสตุํ   ฯ  นิสชฺชํ  กปฺเปยฺยาติ
มาตุคาเม   นิสินฺเน   ภิกฺขุ   อุปนิสินฺโน   วา   โหติ  อุปนิปนฺโน  วา
ภิกฺขุ   นิสินฺเน   มาตุคาโม   อุปนิสินฺโน   วา   โหติ  อุปนิปนฺโน  วา
อุโภ วา นิสินฺนา โหนฺติ อุโภ วา นิปนฺนา ฯ
     [๖๔๙]   สทฺเธยฺยวจสา    นาม    อาคตผลา    อภิสเมตาวินี
วิญฺญาตสาสนา    ฯ    อุปาสิกา   นาม   พุทฺธํ   สรณํ   คตา   ธมฺมํ
สรณํ คตา สงฺฆํ สรณํ คตา ฯ ทิสฺวาติ ปสฺสิตฺวา ฯ
     [๖๕๐]   ทฺวินฺนํ  ธมฺมานํ  อญฺญตเรน  วเทยฺย  สงฺฆาทิเสเสน  วา
ปาจิตฺติเยน    วา    นิสชฺชํ   ภิกฺขุ   ปฏิชานมาโน   ทฺวินฺนํ   ธมฺมานํ
อญฺญตเรน   กาเรตพฺโพ   สงฺฆาทิเสเสน   วา  ปาจิตฺติเยน  วา  เยน
วา สา สทฺเธยฺยวจสา อุปาสิกา วเทยฺย เตน โส ภิกฺขุ กาเรตพฺโพ ฯ
     [๖๕๑]   สา  เจ  เอวํ  วเทยฺย  อยฺโย  มยา  ทิฏฺโฐ  นิสินฺโน
มาตุคาเมน   สทฺธึ   กายสํสคฺคํ   สมาปชฺชนฺโตติ   โส   เจ   ๑-  ตํ
ปฏิชานาติ  อาปตฺติยา  กาเรตพฺโพ  ฯ  สา  เจ  เอวํ  วเทยฺย  อยฺโย
มยา   ทิฏฺโฐ   นิสินฺโน   มาตุคาเมน  สทฺธึ  กายสํสคฺคํ  สมาปชฺชนฺโตติ
โส   เจ   เอวํ   วเทยฺย  สจฺจาหํ  นิสินฺโน  โน  จ  โข  กายสํสคฺคํ
สมาปชฺชินฺติ  นิสชฺชาย  กาเรตพฺโพ  ฯ  สา  เจ  เอวํ  วเทยฺย  อยฺโย
มยา   ทิฏฺโฐ   นิสินฺโน   มาตุคาเมน  สทฺธึ  กายสํสคฺคํ  สมาปชฺชนฺโตติ
โส  เจ  เอวํ  วเทยฺย  นาหํ  นิสินฺโน  อปิจ  โข  นิปนฺโนติ  นิปชฺชาย
กาเรตพฺโพ  ฯ  สา  เจ  เอวํ  วเทยฺย  อยฺโย  มยา  ทิฏฺโฐ  นิสินฺโน
มาตุคาเมน   สทฺธึ  กายสํสคฺคํ  สมาปชฺชนฺโตติ  โส  เจ  เอวํ  วเทยฺย
นาหํ นิสินฺโน อปิจ โข ฐิโตติ น กาเรตพฺโพ ฯ
     [๖๕๒]   สา  เจ  เอวํ  วเทยฺย  อยฺโย  มยา  ทิฏฺโฐ  นิปนฺโน
มาตุคาเมน   สทฺธึ  กายสํสคฺคํ  สมาปชฺชนฺโตติ  โส  เจ  ตํ  ปฏิชานาติ
อาปตฺติยา   กาเรตพฺโพ   ฯเปฯ   สจฺจาหํ   นิปนฺโน   โน   จ   โข
กายสํสคฺคํ    สมาปชฺชินฺติ    นิปชฺชาย    กาเรตพฺโพ    ฯเปฯ   นาหํ
นิปนฺโน   อปิจ   โข   นิสินฺโนติ   นิสชฺชาย  กาเรตพฺโพ  ฯเปฯ  นาหํ
นิสินฺโน อปิจ โข ฐิโตติ น กาเรตพฺโพ ฯ
     [๖๕๓]   สา  เจ  เอวํ  วเทยฺย  อยฺยสฺส  มยา  สุตํ  นิสินฺนสฺส
มาตุคามํ  ทุฏฺฐุลฺลาหิ  วาจาหิ  โอภาสนฺตสฺสาติ  โส  เจ  ตํ  ปฏิชานาติ
@เชิงอรรถ: ๑ ยุ. ม. จ ฯ
อาปตฺติยา   กาเรตพฺโพ   ฯ   สา  เจ  เอวํ  วเทยฺย  อยฺยสฺส  มยา
สุตํ   นิสินฺนสฺส   มาตุคามํ   ทุฏฺฐุลฺลาหิ   วาจาหิ  โอภาสนฺตสฺสาติ  โส
เจ  เอวํ  วเทยฺย  สจฺจาหํ  นิสินฺโน  โน  จ  โข  มาตุคามํ ทุฏฺฐุลฺลาหิ
วาจาหิ   โอภาสินฺติ   นิสชฺชาย   กาเรตพฺโพ   ฯเปฯ   นาหํ  นิสินฺโน
อปิจ   โข   นิปนฺโนติ   นิปชฺชาย   กาเรตพฺโพ  ฯเปฯ  นาหํ  นิสินฺโน
อปิจ โข ฐิโตติ น กาเรตพฺโพ ฯ
     [๖๕๔]   สา  เจ  เอวํ  วเทยฺย  อยฺยสฺส  มยา  สุตํ  นิปนฺนสฺส
มาตุคามํ  ทุฏฺฐุลฺลาหิ  วาจาหิ  โอภาสนฺตสฺสาติ  โส  เจ  ตํ  ปฏิชานาติ
อาปตฺติยา  กาเรตพฺโพ  ฯเปฯ  สจฺจาหํ  นิปนฺโน  โน  จ โข ทุฏฺฐุลฺลาหิ
วาจาหิ   โอภาสินฺติ   นิปชฺชาย   กาเรตพฺโพ   ฯเปฯ   นาหํ  นิปนฺโน
อปิจ   โข   นิสินฺโนติ   นิสชฺชาย   กาเรตพฺโพ  ฯเปฯ  นาหํ  นิปนฺโน
อปิจ โข ฐิโตติ น กาเรตพฺโพ ฯ
     [๖๕๕]   สา  เจ  เอวํ  วเทยฺย  อยฺโย  มยา ทิฏฺโฐ มาตุคาเมน
สทฺธึ   เอโก   เอกาย   รโห   นิสินฺโนติ   โส   เจ  ตํ  ปฏิชานาติ
นิสชฺชาย   กาเรตพฺโพ   ฯเปฯ   นาหํ   นิสินฺโน  อปิจ  โข  นิปนฺโนติ
นิปชฺชาย   กาเรตพฺโพ   ฯเปฯ   นาหํ   นิสินฺโน   อปิจ   โข  ฐิโตติ
น กาเรตพฺโพ ฯ
     [๖๕๖]   สา  เจ  เอวํ  วเทยฺย  อยฺโย  มยา ทิฏฺโฐ มาตุคาเมน
สทฺธึ   เอโก   เอกาย   รโห   นิปนฺโนติ   โส   เจ  ตํ  ปฏิชานาติ
นิปชฺชาย   กาเรตพฺโพ   ฯเปฯ   นาหํ   นิปนฺโน  อปิจ  โข  นิสินฺโนติ
นิสชฺชาย   กาเรตพฺโพ   ฯเปฯ   นาหํ  นิปนฺโน  อปิจ  โข  ฐิโตติ  น
กาเรตพฺโพ ฯ
     [๖๕๗]   อยมฺปีติ  ปุริมํ  อุปาทาย  วุจฺจติ  ฯ  อนิยโตติ  น นิยโต
สงฺฆาทิเสโส วา ปาจิตฺติยํ วา ฯ
     [๖๕๘]   คมนํ  ปฏิชานาติ  นิสชฺชํ  ปฏิชานาติ  อาปตฺตึ  ปฏิชานาติ
อาปตฺติยา   กาเรตพฺโพ   ฯ   คมนํ  ปฏิชานาติ  นิสชฺชํ  น  ปฏิชานาติ
อาปตฺตึ   ปฏิชานาติ   อาปตฺติยา   กาเรตพฺโพ   ฯ   คมนํ  ปฏิชานาติ
นิสชฺชํ   ปฏิชานาติ   อาปตฺตึ  น  ปฏิชานาติ  นิสชฺชาย  กาเรตพฺโพ  ฯ
คมนํ   ปฏิชานาติ   นิสชฺชํ   น  ปฏิชานาติ  อาปตฺตึ  น  ปฏิชานาติ  น
กาเรตพฺโพ   ฯ   คมนํ   น   ปฏิชานาติ   นิสชฺชํ  ปฏิชานาติ  อาปตฺตึ
ปฏิชานาติ  อาปตฺติยา  กาเรตพฺโพ  ฯ  คมนํ  น  ปฏิชานาติ  นิสชฺชํ  น
ปฏิชานาติ   อาปตฺตึ   ปฏิชานาติ  อาปตฺติยา  กาเรตพฺโพ  ฯ  คมนํ  น
ปฏิชานาติ   นิสชฺชํ   ปฏิชานาติ   อาปตฺตึ   น   ปฏิชานาติ   นิสชฺชาย
กาเรตพฺโพ   ฯ   คมนํ  น  ปฏิชานาติ  นิสชฺชํ  น  ปฏิชานาติ  อาปตฺตึ
น ปฏิชานาติ น กาเรตพฺโพติ ฯ
                           ทุติโย อนิยโต นิฏฺฐิโต ฯ
                                  --------------
     [๖๕๙]   อุทฺทิฏฺฐา   โข  อายสฺมนฺโต  เทฺว  อนิยตา  ธมฺมา  ฯ
ตตฺถายสฺมนฺเต    ปุจฺฉามิ    กจฺจิตฺถ    ปริสุทฺธา    ทุติยมฺปิ   ปุจฺฉามิ
กจฺจิตฺถ  ปริสุทฺธา  ตติยมฺปิ ปุจฺฉามิ กจฺจิตฺถ ปริสุทฺธา ปริสุทฺเธตฺถายสฺมนฺโต
ตสฺมา ตุณฺหี ฯ เอวเมตํ ธารยามีติ ฯ
                            อนิยตกณฺฑํ นิฏฺฐิตํ ฯ
                                  ------------
                                  ตสฺสุทฺทานํ
             อลงฺกมฺมนิยญฺเจว          ตเถว จ น เหว โข
             อนิยตา สุปญฺญตฺตา      พุทฺธเสฏฺเฐน ตาทินาติ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑ หน้าที่ ๔๔๐-๔๔๔.
https://84000.org/tipitaka/read/pali_item.php?book=1&item=648&items=13&mode=bracket
             อ่านโดยใช้เนื้อความเป็นเกณฑ์แบ่งข้อ :-
https://84000.org/tipitaka/read/pali_item.php?book=1&item=648&items=13
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=1&item=646&items=1&mode=bracket
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=1&item=646&items=1&mode=bracket
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=1&i=646
             สารบัญพระไตรปิฎกเล่มที่ ๑
https://84000.org/tipitaka/read/?index_1
https://84000.org/tipitaka/english/?index_1