พระไตรปิฎกเล่มที่ ๑๙ ภาษาบาลี อักษรไทย
พระสุตตันตปิฎกเล่มที่ ๑๑ สุตฺต. สํ. มหาวารวคฺโค

     [๑๗๕๖]   เสยฺยถาปิ   ภิกฺขเว   หิมวา   ปพฺพตราชา   ปริกฺขยํ
ปริยาทานํ   คจฺเฉยฺย  ฐเปตฺวา  สตฺต  สาสปมตฺติโย  ปาสาณสกฺขรา  ฯ
ตํ   กึ   มญฺญถ   ภิกฺขเว  กตมํ  นุ  โข  พหุตรํ  ฯ  ยํ  วา  หิมวโต
@เชิงอรรถ: ๑ ม. ยุ. ยทิทํ ฯ ๒ ม. ยานิ ฯ
ปพฺพตราชสฺส   ปริกฺขีณํ   ปริยาทินฺนํ   ยา   วา   สตฺต   สาสปมตฺติโย
ปาสาณสกฺขรา   อวสิฏฺฐาติ   ฯ   เอตเทว   ภนฺเต   พหุตรํ   หิมวโต
ปพฺพตราชสฺส    ยทิทํ    ปริกฺขีณํ    ปริยาทินฺนํ    อปฺปมตฺติกา    สตฺต
สาสปมตฺติโย    ปาสาณสกฺขรา    อวสิฏฺฐา    สงฺขมฺปิ    น   อุเปนฺติ
อุปนิธมฺปิ   น   อุเปนฺติ  กลภาคมฺปิ  น  อุเปนฺติ  หิมวโต  ปพฺพตราชสฺส
ปริกฺขีณํ   ปริยาทินฺนํ   อุปนิธาย   สตฺต   สาสปมตฺติโย   ปาสาณสกฺขรา
อวสิฏฺฐาติ ฯ
     {๑๗๕๖.๑}   เอวเมว  โข  ภิกฺขเว  อริยสาวกสฺส  ทิฏฺฐิสมฺปนฺนสฺส
ปุคฺคลสฺส     อภิสเมตาวิโน     เอตเทว     พหุตรํ    ทุกฺขํ    ยทิทํ
ปริกฺขีณํ    ปริยาทินฺนํ    อปฺปมตฺตกํ    อวสิฏฺฐํ   สงฺขมฺปิ   น   อุเปติ
อุปนิธมฺปิ    น   อุเปติ   กลภาคมฺปิ   น   อุเปติ   ปุริมํ   ทุกฺขกฺขนฺธํ
ปริกฺขีณํ    ปริยาทินฺนํ   อุปนิธาย   ยทิทํ   สตฺตกฺขตฺตุํปรมตา   ฯ   โย
อิทํ    ทุกฺขนฺติ    ยถาภูตํ   ปชานาติ   ฯเปฯ   อยํ   ทุกฺขนิโรธคามินี
ปฏิปทาติ   ยถาภูตํ   ปชานาติ   ฯ  ตสฺมา  ติห  ภิกฺขเว  อิทํ  ทุกฺขนฺติ
โยโค    กรณีโย   ฯเปฯ   อยํ   ทุกฺขนิโรธคามินี   ปฏิปทาติ   โยโค
กรณีโยติ ฯ
                    อภิสมยวคฺโค ฉฏฺโฐ ฯ
                        ตสฺสุทฺทานํ
         นขสิขาโปกฺขรณิโย        สมฺเภชฺช อปเร ทุเว
         ปฐวี เทฺวสมุทฺเทหิ          เทฺวมา จ ปพฺพตูปมาติ ฯ
                    --------------
             อามกธญฺญเปยฺยาเล ปฐมวคฺโค สตฺตโม
     [๑๗๕๗]   อถ  โข  ภควา  ปริตฺตํ  นขสิขายํ  ปํสุํ  อาโรเปตฺวา
ภิกฺขู   อามนฺเตสิ   ตํ   กึ  มญฺญถ  ภิกฺขเว  กตมํ  นุ  โข  พหุตรํ  ฯ
โย  วายํ  มยา  ปริตฺโต  นขสิขายํ  ปํสุ อาโรปิโต อยํ วา มหาปฐวีติ ฯ
เอตเทว   ภนฺเต   พหุตรํ   ยทิทํ   มหาปฐวี   อปฺปมตฺตกายํ   ภควตา
ปริตฺโต   นขสิขายํ   ปํสุ   อาโรปิโต   สงฺขมฺปิ   น  อุเปติ  อุปนิธมฺปิ
น   อุเปติ   กลภาคมฺปิ   น   อุเปติ   มหาปฐวึ   อุปนิธาย   ภควตา
ปริตฺโต   นขสิขายํ   ปํสุ   อาโรปิโตติ   ฯ   เอวเมว   โข  ภิกฺขเว
อปฺปมตฺตกา   ๑-   เต  สตฺตา  เย  มนุสฺเสสุ  ปจฺจาชายนฺติ  อถ  โข
เอเตว   พหุตรา   สตฺตา   เย   อญฺญตฺร  มนุสฺเสหิ  ปจฺจาชายนฺติ  ฯ
ตํ   กิสฺส   เหตุ   ฯ   อทิฏฺฐตฺตา   ภิกฺขเว   จตุนฺนํ  อริยสจฺจานํ  ฯ
กตเมสํ    จตุนฺนํ    ฯ   ทุกฺขสฺส   อริยสจฺจสฺส   ฯเปฯ   ทุกฺขนิโรธ-
คามินีปฏิปทาย    อริยสจฺจสฺส    ฯ    ตสฺมา    ติห   ภิกฺขเว   อิทํ
ทุกฺขนฺติ   โยโค   กรณีโย   ฯเปฯ   อยํ   ทุกฺขนิโรธคามินี   ปฏิปทาติ
โยโค กรณีโยติ ฯ
     [๑๗๕๘]   อถ  โข  ภควา  ปริตฺตํ  นขสิขายํ  ปํสุํ  อาโรเปตฺวา
ภิกฺขู   อามนฺเตสิ   ตํ   กึ  มญฺญถ  ภิกฺขเว  กตมํ  นุ  โข  พหุตรํ  ฯ
โย  วายํ  มยา  ปริตฺโต  นขสิขายํ  ปํสุ อาโรปิโต อยํ วา มหาปฐวีติ ฯ
เอตเทว     ภนฺเต     พหุตรํ     ยทิทํ    มหาปฐวี    อปฺปมตฺตกายํ
@เชิงอรรถ: ๑ ยุ. อปฺปกา ฯ เอวมุปริปิ ฯ
ภควตา   ปริตฺโต   นขสิขายํ   ปํสุ   อาโรปิโต   สงฺขมฺปิ   น  อุเปติ
อุปนิธมฺปิ   น   อุเปติ   กลภาคมฺปิ   น   อุเปติ   มหาปฐวึ  อุปนิธาย
ภควตา  ปริตฺโต  นขสิขายํ  ปํสุ  อาโรปิโตติ  ฯ  เอวเมว  โข ภิกฺขเว
อปฺปมตฺตกา   เต   สตฺตา   เย   มชฺฌิเมสุ   ชนปเทสุ   ปจฺจาชายนฺติ
อถ   โข   เอเตว   พหุตรา   สตฺตา   เย   ปจฺจนฺติเมสุ   ชนปเทสุ
ปจฺจาชายนฺติ ฯ อวิญฺญาตาเรสุ มิลกฺขูสุ ๑- ฯเปฯ
     [๑๗๕๙]   เอวเมว  โข  ภิกฺขเว  อปฺปมตฺตกา  เต  สตฺตา  เย
อริเยน    ปน    ปญฺญาจกฺขุนา    สมนฺนาคตา    อถ   โข   เอเตว
พหุตรา สตฺตา เย อวิชฺชาคตา สมฺมูฬฺหา ฯเปฯ
     [๑๗๖๐]   เอวเมว   โข   ภิกฺขเว   อปฺปกา  เต  สตฺตา  เย
สุราเมรยมชฺชปมาทฏฺฐานา    ปฏิวิรตา   อถ   โข   เอเตว   พหุตรา
สตฺตา เย สุราเมรยมชฺชปมาทฏฺฐานา อปฺปฏิวิรตา ฯเปฯ
     [๑๗๖๑]   เอวเมว  โข  ภิกฺขเว  อปฺปกา  เต  สตฺตา เย ถลชา
อถ   โข   เอเตว   พหุตรา   สตฺตา  เย  อุทกชา  ฯเปฯ  เอวเมว
โข   ภิกฺขเว  อปฺปกา  เต  สตฺตา  เย  มตฺเตยฺยา  อถ  โข  เอเตว
พหุตรา สตฺตา เย อมตฺเตยฺยา ฯเปฯ
     [๑๗๖๒]   เอวเมว  โข ภิกฺขเว อปฺปกา เต สตฺตา เย เปตฺเตยฺยา
อถ โข เอเตว พหุตรา สตฺตา เย อเปตฺเตยฺยา ฯเปฯ
     [๑๗๖๓]   เอวเมว  โข  ภิกฺขเว  อปฺปกา เต สตฺตา เย สามญฺญา
ฯเปฯ อถ โข เอเตว พหุตรา สตฺตา เย อสามญฺญา ฯเปฯ
@เชิงอรรถ: ๑ ม. ยุ. มิลกฺเขสุ ฯ
     [๑๗๖๔]   เอวเมว  โข ภิกฺขเว อปฺปกา เต สตฺตา เย พฺราหฺมญฺญา
อถ โข เอเตว พหุตรา สตฺตา เย อพฺราหฺมญฺญา ฯเปฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑๙ หน้าที่ ๕๗๖-๕๘๐.
https://84000.org/tipitaka/read/pali_item.php?book=19&item=1756&items=9
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=19&item=1756&items=9&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=19&item=1756&items=9
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=19&item=1756&items=9
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=19&i=1756
             สารบัญพระไตรปิฎกเล่มที่ ๑๙
https://84000.org/tipitaka/read/?index_19
https://84000.org/tipitaka/english/?index_19