[๓๙๔] มา ปณฺฑิจฺจยํ ๒- วิภาวย พาลมโต ภว สพฺพปาณินํ
สพฺโพ ตญฺชโน โอจินายตุ เอวํ ตว อตฺโถ ภวิสฺสติ ฯ
[๓๙๕] กโรมิ เต ตํ วจนํ ยํ มํ ภณสิ เทวเต
อตฺถกามาสิ เม อมฺม หิตกามาสิ เทวเต ฯ
[๓๙๖] กินฺนุ สนฺตรมาโนว กาสุํ ขณสิ สารถิ
ปุฏฺโฐ เม สมฺม อกฺขาหิ กึ กาสุยา กริสฺสสิ ฯ
[๓๙๗] รญฺโญ มูโค จ ปกฺโข จ ปุตฺโต ชาโต อเจตโส
โสมฺหิ รญฺญา สมชฺฌิตฺโถ ปุตฺตํ เม นิกฺขณํ วเน ฯ
[๓๙๘] |๓๙๘.๑| น พธิโร น มูโคสฺมิ น ปกฺโข น จ ปงฺคุโล
อธมฺมํ สารถิ กยิรา มญฺเจ ตฺวํ นิกฺขณํ วเน
|๓๙๘.๒| อุรู พาหู จ เม ปสฺส ภาสิตญฺจ สุโณหิ เม
อธมฺมํ สารถิ กยิรา มญฺเจ ตฺวํ นิกฺขณํ วเน ฯ
[๓๙๙] เทวตา นุสิ คนฺธพฺโพ อาทู สกฺโก ปุรินฺทโท
โก วา ตฺวํ กสฺส วา ปุตฺโต กถํ ชาเนมุ ตํ มยํ ฯ
[๔๐๐] |๔๐๐.๑| นมฺหิ เทโว น คนฺธพฺโพ นาปิ สกฺโก ปุรินฺทโท
กาสิรญฺโญ อหํ ปุตฺโต ยํ กาสุยา นิขญฺญสิ ๓-
@เชิงอรรถ: ๑ สี. ม. มูคปกฺขชาตกํ ฯ ๒ ยุ. ปณฺฑิจฺจิยํ ฯ ๓ สี. ยุ. นิฆญฺญสิ ฯ
@นิหญฺญสิ อิติปิ ฯ
|๔๐๐.๒| ตสฺส รญฺโญ อหํ ปุตฺโต ยํ ตฺวํ สมฺมูปชีวสิ
อธมฺมํ สารถิ กยิรา มญฺเจ ตฺวํ นิกฺขณํ วเน
|๔๐๐.๓| ยสฺส รุกฺขสฺส ฉายาย นิสีเทยฺย สเยยฺย วา
น ตสฺส สาขํ ภญฺเชยฺย มิตฺตทุพฺโภ ๑- หิ ปาปโก
|๔๐๐.๔| ยถา รุกฺโข ตถา ราชา ยถา สาขา ตถา อหํ
ยถา ฉายูปโค โปโส เอวํ ตฺวมสิ สารถิ
อธมฺมํ สารถิ กยิรา มญฺเจ ตฺวํ นิกฺขณํ วเน ฯ
[๔๐๑] |๔๐๑.๑| พหุตพฺภกฺโข ๒- ภวติ วิปฺปวุตฺโถ สกงฺฆรา
พหู นํ อุปชีวนฺติ โย มิตฺตานํ น ทุพฺภติ ฯ
|๔๐๑.๒| ยํ ยํ ชนปทํ ยาติ นิคเม ราชธานิโย
สพฺพตฺถ ปูชิโต โหติ โย มิตฺตานํ น ทุพฺภติ ฯ
|๔๐๑.๓| นาสฺส โจรา ปสหนฺติ ๓- นาติมญฺเญติ ขตฺติโย ๔-
สพฺเพ อมิตฺเต ตรติ โย มิตฺตานํ น ทุพฺภติ ฯ
|๔๐๑.๔| อกุทฺโธ สฆรํ เอติ สภาย ปฏินนฺทิโต
ญาตีนํ อุตฺตโม โหติ โย มิตฺตานํ น ทุพฺภติ ฯ
|๔๐๑.๕| สกฺกตฺวา สกฺกโต โหติ ครุ โหติ สคารโว
วณฺณกิตฺติภโต โหติ โย มิตฺตานํ น ทุพฺภติ ฯ
|๔๐๑.๖| ปูชโก ลภเต ปูชํ วนฺทโก ปฏิวนฺทนํ
ยโสกิตฺติญฺจ ปปฺโปติ โย มิตฺตานํ น ทุพฺภติ ฯ
|๔๐๑.๗| อคฺคิ ยถา ปชฺชลติ เทวตาว วิโรจติ
@เชิงอรรถ: ๑ สี. ยุ. มิตฺตทูโภ ฯ ๒ ม. ปหูตภกฺโข ฯ ๓ ม. ปสาหนฺติ ฯ ๔ ม. นาติพญฺญนฺติ
@ขตฺติยา ฯ
สิริยา อชฺชหิโต โหติ โย มิตฺตานํ น ทุพฺภติ ฯ
|๔๐๑.๘| คาโว ตสฺส ปชายนฺติ เขตฺเต วุตฺตํ วิรูหติ
วุตฺตานํ ผลมสฺนาติ โย มิตฺตานํ น ทุพฺภติ ฯ
|๔๐๑.๙| ทริโต ปพฺพตาโต วา รุกฺขโต ปติโต นโร
จุโต ปติฏฺฐํ ลภติ โย มิตฺตานํ น ทุพฺภติ ฯ
|๔๐๑.๑๐| วิรูฬฺหมูลสนฺตานํ นิโคฺรธมิว มาลุโต
อมิตฺตา นปฺปสหนฺติ โย มิตฺตานํ น ทุพฺภติ ฯ
[๔๐๒] เอหิ ตํ ปฏิเนสฺสามิ ราชปุตฺต สกํ ฆรํ
รชฺชํ กาเรหิ ภทฺทนฺเต กึ อรญฺเญ กริสฺสสิ ฯ
[๔๐๓] อลํ เม เตน รชฺเชน ญาตเกน ๑- ธเนน วา
ยํ เม อธมฺมจริยาย รชฺชํ ลพฺเภถ สารถิ ฯ
[๔๐๔] |๔๐๔.๑| ปุณฺณปตฺตํ มํ ลาเภหิ ๒- ราชปุตฺโต อิโต คโต
ปิตา มาตา จ เม ทชฺชุํ ราชปุตฺต ตยี คเต ฯ
|๔๐๔.๒| โอโรธา จ กุมารา จ เวสิยานา จ พฺราหฺมณา
เตปิ อตฺตมนา ทชฺชุํ ราชปุตฺต ตยี คเต ฯ
|๔๐๔.๓| หตฺถาโรหา อนีกฏฺฐา รถิกา ปตฺติการกา
เตปิ อตฺตมนา ทชฺชุํ ๓- ราชปุตฺต ตยี คเต ฯ
|๔๐๔.๔| พหุตฺตธญฺญา ชานปทา เนคมา จ สมาคตา
อุปยานานิ เม ทชฺชุํ ราชปุตฺต ตยี คเต ฯ
[๔๐๕] |๔๐๕.๑| ปิตุ มาตุ จหํ จตฺโต รฏฺฐสฺส นิคมสฺส จ
@เชิงอรรถ: ๑ ม. ญาตเกหิ ฯ ๒ สี. ยุ. ปลาเภหิ ฯ ๓ สี. ยุ. เตปิ ทชฺชุํ ปตีตา เม ฯ
อโถ สพฺพกุมารานํ นตฺถิ มยฺหํ สกํ ฆรํ ฯ
|๔๐๕.๒| อนุญฺญาโต อหํ มตฺยา สญฺจตฺโต ปิตรา อหํ
เอโก อรญฺเญ ปพฺพชิโต น กาเม อภิปตฺถเย ฯ
[๔๐๖] |๔๐๖.๑| อปิ อตรมานานํ ผลาสาว สมิชฺฌติ
วิปกฺกพฺรหฺมจริโยสฺมิ เอวํ ชานาหิ สารถิ ฯ
|๔๐๖.๒| อปิ อตรมานานํ สมฺมทตฺโถ วิปจฺจติ
วิปกฺกพฺรหฺมจริโยสฺมิ นิกฺขนฺโต อกุโตภโย ฯ
[๔๐๗] เอวํ วคฺคุกโถ สนฺโต วิสฺสฏฺฐวจโน จ โส ๑-
กสฺมา ปิตุ จ มาตุ จ สนฺติเก น ภณี ตทา ฯ
[๔๐๘] |๔๐๘.๑| นาหํ อสนฺธิตา ปกฺโข น พธิโร อโสตตา
นาหํ อชิวฺหตา มูโค มา มํ มูคมธารยิ ฯ
|๔๐๘.๒| ปุริมํ สรามหํ ชาตึ ยตฺถ รชฺชมการยึ
การยิตฺวา ตหึ รชฺชํ ปาปตฺถํ นิรยํ ภุสํ ฯ
|๔๐๘.๓| วีสติญฺเจว วสฺสานิ ตหึ รชฺชมการยึ
อสีติวสฺสสหสฺสานิ นิรยมฺหิ อปจฺจสึ ๒- ฯ
|๔๐๘.๔| ตสฺส รชฺชสฺสหํ ภีโต มา มํ รชฺเชภิเสจยุํ
ตสฺมา ปิตุ จ มาตุ จ สนฺติเก น ภณึ ตทา ฯ
|๔๐๘.๕| อุจฺจงฺเก มํ นิสีเทตฺวา ปิตา อตฺถานุสาสติ
เอกํ หนถ พนฺธถ เอกํ ขราปติจฺฉกํ ฯ
|๔๐๘.๖| เอกํ สูลสฺมิ อุพฺเพถ อิจฺจสฺส อนุสาสติ
@เชิงอรรถ: ๑ ม. จสิ ฯ ๒ ม. อปจฺจิสํ ฯ ยุ. อปจฺจยึ ฯ
ตายาหํ ผรุสํ สุตฺวา วาจาโย สมุทีริตา ฯ
|๔๐๘.๗| อมูโค มูควณฺเณน อปกฺโข ปกฺขสมฺมโต
สเก มุตฺตกรีสสฺมึ อจฺฉาหํ สํปริปฺลุโต ฯ
|๔๐๘.๘| กสิรญฺจ ปริตฺตญฺจ ตญฺจ ทุกฺเขน สํยุตํ
โกมํ ชีวิตมาคมฺม เวรํ กยิราถ เกนจิ ฯ
|๔๐๘.๙| ปญฺญาย จ อลาเภน ธมฺมสฺส จ อทสฺสนา
โกมํ ชีวิตมาคมฺม เวรํ กยิราถ เกนจิ ฯ
|๔๐๘.๑๐| อปิ อตรมานานํ ผลาสาว สมิชฺฌติ
วิปกฺกพฺรหฺมจริโยสฺมิ เอวํ ชานาหิ สารถิ ฯ
|๔๐๘.๑๑| อปิ อตรมานานํ สมฺมทตฺโถ วิปจฺจติ
วิปกฺกพฺรหฺมจริโยสฺมิ นิกฺขนฺโต อกุโตภโย ฯ
[๔๐๙] อหมฺปิ ปพฺพชิสฺสามิ ราชปุตฺต ตวนฺติเก
อวฺหยสฺสุ มํ ภทฺทนฺเต ปพฺพชฺชา มม รุจฺจติ ฯ
[๔๑๐] รถํ นิยฺยาทยิตฺวาน อนโณ เอหิ สารถิ
อนณสฺส หิ ปพฺพชฺชา เอตํ อิสีภิ วณฺณิตํ ฯ
[๔๑๑] |๔๑๑.๑| ยเทว ตฺยาหํ วจนํ อกรํ ภทฺทมตฺถุ เต
ตเทว เม ตฺวํ วจนํ ยาจิโต กตฺตุมรหสิ ฯ
|๔๑๑.๒| อิเธว ตาว อจฺฉสฺสุ ยาว ราชานมานเย
อปฺเปว เต ปิตา ทิสฺวา ปตีโต สุมโน สิยา ฯ
[๔๑๒] |๔๑๒.๑| กโรมิ เต ตํ วจนํ ยํ มํ ภณสิ สารถิ
อหมฺปิ ทฏฺฐุกาโมสฺมิ ปิตรํ เม อิธาคตํ ฯ
|๔๑๒.๒| เอหิ สมฺม นิวตฺตสฺสุ กุสลํ วชฺชาสิ ญาตินํ
มาตรํ ปิตรํ มยฺหํ วุตฺโต วชฺชาสิ วนฺทนํ ฯ
[๔๑๓] ตสฺส ปาเท คเหตฺวาน กตฺวา จ นํ ปทกฺขิณํ
สารถิ รถมารุยฺห ราชทฺวารํ อุปาคมิ ฯ
[๔๑๔] |๔๑๔.๑| สุญฺญํ มาตา รถํ ทิสฺวา เอกํ สารถิมาคตํ
อสฺสุปุณฺเณหิ เนตฺเตหิ โรทนฺตี นํ อุทิกฺขติ
|๔๑๔.๒| อยํ โส สารถิ เอติ นิหนฺตฺวา มม อตฺรชํ ฯ
นิหโต นูน เม ปุตฺโต ปฐพฺยา ภูมิวฑฺฒโน
|๔๑๔.๓| อมิตฺตา นูน นนฺทนฺติ ปตีตา นูน เวริโน
อาคตํ สารถึ ทิสฺวา นิหนฺตฺวา มม อตฺรชํ ฯ
|๔๑๔.๔| สุญฺญํ มาตา รถํ ทิสฺวา เอกํ สารถิมาคตํ
อสฺสุปุณฺเณหิ เนตฺเตหิ โรทนฺตี นํ ปริปุจฺฉติ ๑- ฯ
|๔๑๔.๕| กินฺนุ มูโค กินฺนุ ปกฺโข กินฺนุ โส วิลปี ตทา
นิหญฺญมาโน ภูมิยา ตํ เม อกฺขาหิ สารถิ ฯ
|๔๑๔.๖| กถํ หตฺเถหิ ปาเทหิ มูโค ปกฺโข วิวชฺชยิ
นิหญฺญมาโน ภูมิยา ตํ เม อกฺขาหิ ปุจฺฉิโต ฯ
[๔๑๕] อกฺเขยฺยนฺเต อหํ อยฺเย ทชฺชาสิ อภยํ มม
ยํ เม สุตํ วา ทิฏฺฐํ วา ราชปุตฺตสฺส สนฺติเก ฯ
[๔๑๖] อภยํ สมฺม เต ทมฺมิ อภีโต ภณ สารถิ
@เชิงอรรถ: ๑ ม. โรทนฺตี ปริปุจฺฉิ นํ ฯ
ยนฺเต สุตํ วา ทิฏฺฐํ วา ราชปุตฺตสฺส สนฺติเก ฯ
[๔๑๗] |๔๑๗.๑| น โส มูโค น โส ปกฺโข วิสฏฺฐวจโน จ โส
รชฺชสฺส กิร โส ภีโต อกรา ๑- อาลเย พหู ฯ
|๔๑๗.๒| ปุริมํ สรติ โส ชาตึ ยตฺถ รชฺชมการยิ
การยิตฺวา ตหึ รชฺชํ ปาปตฺถํ นิรยํ ภุสํ ฯ
|๔๑๗.๓| วีสติ เจว วสฺสานิ ตหึ รชฺชมการยิ
อสีติวสฺสสหสฺสานิ นิรยมฺหิ อปจฺจิ โส ฯ
|๔๑๗.๔| ตสฺส รชฺชสฺส โส ภีโต มา มํ รชฺเชภิเสจยุํ
ตสฺมา ปิตุ จ มาตุ จ สนฺติเก น ภณี ตทา ฯ
|๔๑๗.๕| องฺคปจฺจงฺคสมฺปนฺโน อาโรหปริณาหวา
วิสฺสฏฺฐวจโน ปญฺโญ มคฺเค สคฺคสฺส ติฏฺฐติ ฯ
|๔๑๗.๖| สเจ ตฺวํ ทฏฺฐุกามาสิ ราชปุตฺตํ ตวตฺรชํ
เอหิ ตํ ปาปยิสฺสามิ ยตฺถ สมฺมติ เตมิโย ฯ
[๔๑๘] |๔๑๘.๑| โยชยนฺตุ รเถ อสฺเส กจฺฉํ นาคานิ ๒- พนฺธถ
อุทีรยนฺตุ สงฺขปณฺฑวา นทนฺตุ เอกโปกฺขรา ฯ
|๔๑๘.๒| นทนฺตุ เภรี สนฺนทฺธา วคฺคู นทนฺตุ ๓- ทุนฺทุภี
เนคมา จ มํ อเนฺวนฺตุ คจฺฉํ ปุตฺตนิวาทโก ๔- ฯ
|๔๑๘.๓| โอโรธา จ กุมารา จ เวสิยานา จ พฺราหฺมณา
ขิปฺปํ ยานานิ โยเชนฺตุ คจฺฉํ ปุตฺตนิวาทโก ฯ
|๔๑๘.๔| หตฺถาโรหา อนีกฏฺฐา รถิกา ปตฺติการกา
@เชิงอรรถ: ๑ สี. ยุ. อกรี ฯ ๒ ม. นาคาน ฯ ๓ ม. วาทนฺตุ ฯ ๔ ม. นิเวทโก ฯ อิโต ปรํ
@อีทิสเมว ฯ
ขิปฺปํ ยานานิ โยเชนฺตุ คจฺฉํ ปุตฺตนิวาทโก ฯ
|๔๑๘.๕| สมาคตา ชานปทา เนคมา จ สมาคตา
ขิปฺปํ ยานานิ โยเชนฺตุ คจฺฉํ ปุตฺตนิวาทโก ฯ
[๔๑๙] อสฺเส จ สารถี ยุตฺเต สินฺธเว สีฆวาหเน
ราชทฺวารํ อุปาคญฺฉุํ ยุตฺตา เทว อิเม หยา ฯ
[๔๒๐] ถูลา ชเวน หายนฺติ กีสา หายนฺติ ถามสา
กีเส ถูเล วิวชฺชิตฺวา ๑- สํสฏฺฐา โยชิตา หยา ฯ
[๔๒๑] |๔๒๑.๑| ตโต ราชา ตรมาโน ยุตฺตมารุยฺห สนฺทนํ
อิตฺถาคารํ อชฺฌภาสิ สพฺพาว อนุยาถ มํ ฯ
|๔๒๑.๒| วาลวีชนิมุณฺหีสํ ขคฺคํ ฉตฺตญฺจ ปณฺฑรํ
อุปาธี รถมารุยฺห สุวณฺเณหิ อลงฺกตา ฯ
|๔๒๑.๓| ตโต จ ราชา ปายาสิ ปุรกฺขิตฺวาน สารถึ
ขิปฺปเมว อุปาคญฺฉิ ยตฺถ สมฺมติ เตมิโย ฯ
[๔๒๒] |๔๒๒.๑| ตญฺจ ทิสฺวาน อายนฺตํ ชลนฺตมิว เตชสา
ขตฺตสงฺฆปริพฺยูฬฺหํ เตมิโย เอตทพฺรวิ ฯ
|๔๒๒.๒| กจฺจิ นุ ตาต กุสลํ กจฺจิ ตาต อนามยํ
สพฺพา จ ราชกญฺญาโย อโรคา มยฺห มาตโร ฯ
[๔๒๓] กุสลญฺเจว เม ปุตฺต อโถ ปุตฺต อนามยํ
สพฺพา จ ราชกญฺญาโย อโรคา ตุยฺห มาตโร ฯ
[๔๒๔] กจฺจิ อมชฺชโป ๒- ตาต กจฺจิ เต สุรมปฺปิยํ
@เชิงอรรถ: ๑ ม. วิวชฺเชตฺวา ๒ สี. กจฺจิสฺสมชฺชโป ฯ
กจฺจิ สจฺเจ จ ธมฺเม จ ทาเน เต รมตี มโน ฯ
[๔๒๕] อมชฺชโป อหํ ปุตฺต อโถ เม สุรมปฺปิยํ
อโถ สจฺเจ จ ธมฺเม จ ทาเน เม รมตี มโน ฯ
[๔๒๖] กจฺจิ อโรคํ โยคฺคนฺเต กจฺจิ วหติ วาหนํ
กจฺจิ เต พฺยาธิโย ๑- นตฺถิ สรีรสฺสุปตาปิยา ฯ
[๔๒๗] อโถ อโรคํ โยคฺคํ เม อโถ วหติ วาหนํ
อโถ เม พฺยาธิโย ๑- นตฺถิ สรีรสฺสุปตาปิยา ฯ
[๔๒๘] กจฺจิ อนฺตา จ เต ผีตา มชฺเฌ จ พหลา ตว
โกฏฺฐาคารญฺจ โกสญฺจ กจฺจิ เต ปฏิสณฺฐิตํ ๒- ฯ
[๔๒๙] อโถ อนฺตา จ เม ผีตา มชฺเฌ จ พหลา มม
โกฏฺฐาคารญฺจ โกสญฺจ สพฺพํ เม ปฏิสณฺฐิตํ ๒- ฯ
[๔๓๐] สฺวาคตนฺเต มหาราช อโถ เต อทุราคตํ
ปติฏฺฐาเปนฺตุ ๓- ปลฺลงฺกํ ยตฺถ ราชา นิสกฺกติ ฯ
[๔๓๑] อิเธว เต นิสินฺนสฺส ๔- นิยเต ปณฺณสนฺถเร
เอตฺโต อุทกมาทาย ปาเท ปกฺขาลยสฺสุ เต ฯ
[๔๓๒] อิทมฺปิ ปณฺณกํ มยฺหํ รนฺธํ ราช อโลณกํ
ปริภุญฺช มหาราช ปาหุโน เมสิ อาคโต ๕- ฯ
[๔๓๓] น จาหํ ปณฺณกํ ภุญฺเช น เหตํ มยฺห โภชนํ
สาลีนํ โอทนํ ภุญฺเช สุจิมํสูปเสจนํ ฯ
[๔๓๔] อจฺเฉรกํ มํ ปฏิภาติ เอกกมฺปิ รโหคตํ
@เชิงอรรถ: ๑ ม. พฺยาธโย ฯ ๒ ม. ปฏิสนฺถตํ ฯ ๓ ม. ปติฏฺฐเปนฺตุ ฯ ๔ ม. นิสินฺทสฺสุ ฯ
@๕ ม. เมสิธาคโต ฯ
เอทิสํ ภุญฺชมานานํ เกน วณฺโณ ปสีทติ ฯ
[๔๓๕] |๔๓๕.๑| เอโก ราช นิปชฺชามิ นิยเต ปณฺณสนฺถเร
ตาย เม เอกเสยฺยาย ราช วณฺโณ ปสีทติ ฯ
|๔๓๕.๒| น จ เนตฺตึสพนฺธา เม ราชรกฺขา อุปฏฺฐิตา
ตาย เม เอกเสยฺยาย ราช วณฺโณ ปสีทติ ฯ
|๔๓๕.๓| อตีตํ นานุโสจามิ นปฺปชปฺปามนาคตํ
ปจฺจุปฺปนฺเนน ยาเปมิ เตน วณฺโณ ปสีทติ ฯ
|๔๓๕.๔| อนาคตปฺปชปฺปาย อตีตสฺสานุโสจนา
เอเตน พาลา สุสฺสนฺติ นโฬว หริโต ลุโต ฯ
[๔๓๖] |๔๓๖.๑| หตฺถานีกํ รถานีกํ อสฺเส ปตฺติญฺจ จมฺมิโน ๑-
นิเวสนานิ รมฺมานิ อหํ ปุตฺต ททามิ เต ฯ
|๔๓๖.๒| อิตฺถาคารญฺจ เต ทมฺมิ สพฺพาลงฺการภูสิตํ
ตา ปุตฺต ปฏิปชฺชสฺสุ ตฺวํ โน ราชา ภวิสฺสสิ ฯ
|๔๓๖.๓| กุสลา นจฺจคีตสฺส สิกฺขิตา จาตุริตฺถิโย
กาเม ตํ รมยิสฺสนฺติ กึ อรญฺเญ กริสฺสสิ ฯ
|๔๓๖.๔| ปฏิราชูหิ เต กญฺญา อานยิสฺสํ อลงฺกตา
ตาสุ ปุตฺเต ชเนตฺวาน อถ ปจฺฉา ปพฺพชิสฺสสิ ฯ
|๔๓๖.๕| ยุวา จ ทหโร จาปิ ๒- ปฐมุปฺปตฺติโต ๓- สุสู
รชฺชํ กาเรหิ ภทฺทนฺเต กึ อรญฺเญ กริสฺสสิ ฯ
[๔๓๗] |๔๓๗.๑| ยุวา จเร พฺรหฺมจริยํ พฺรหฺมจารี ยุวา สิยา
@เชิงอรรถ: ๑ ม. ปตฺตี จ วมฺมิโน ฯ อิโต ปรํ อีทิสเมว ฯ ๒ ม. จาสิ ฯ ๓ ม. ปฐมุปฺปตฺติโก ฯ
@อิโต ปรํ อีทิสเมว ฯ
ทหรสฺส หิ ปพฺพชฺชา เอตํ อิสีภิ วณฺณิตํ ฯ
|๔๓๗.๒| ยุวา จเร พฺรหฺมจริยํ พฺรหฺมจารี ยุวา สิยา
พฺรหฺมจริยํ จริสฺสามิ นาหํ รชฺเชนมตฺถิโก ฯ
|๔๓๗.๓| ปสฺสามิ โวหํ ทหรํ อมฺมตาต วทนฺนรํ
กิจฺฉาลทฺธํ ปิยํ ปุตฺตํ อปตฺวาว ชรํ มตํ ฯ
|๔๓๗.๔| ปสฺสามิ โวหํ ทหรึ กุมารึ จารุทสฺสนึ
นววํสกลีรํว ปลุตฺตํ ๑- ชีวิตกฺขยํ ๒- ฯ
|๔๓๗.๕| ทหราปิ หิ มียนฺติ นรา จ อถ นาริโย
ตตฺถ โก วิสฺสเส โปโส ทหโรมฺหีติ ชีวิเต ฯ
|๔๓๗.๖| ยสฺส รตฺยา วิวสาเน อายุ อปฺปตรํ สิยา
อปฺโปทเกว มจฺฉานํ กินฺนุ โกมารกํ ตหึ ฯ
|๔๓๗.๗| นิจฺจมพฺภาหโต โลโก นิจฺจญฺจ ปริวาริโต
อโมฆาสุ วชนฺตีสุ กึ มํ รชฺเชภิสิญฺจสิ ฯ
[๔๓๘] เกนมพฺภาหโต โลโก เกน จ ปริวาริโต
กาโย อโมฆา คจฺฉนฺติ ตํ เม อกฺขาหิ ปุจฺฉิโต ฯ
[๔๓๙] |๔๓๙.๑| มจฺจุนาพฺภาหโต โลโก ชราย ปริวาริโต
รโตฺย อโมฆา คจฺฉนฺติ เอวํ ชานาหิ ขตฺติย ฯ
|๔๓๙.๒| ยถาปิ ตนฺเต วีตนฺเต ๓- ยํ ยเทโวปวุยฺหติ ๔-
อปฺปกํ โหติ เวตพฺพํ เอวํ มจฺจาน ชีวิตํ ฯ
|๔๓๙.๓| ยถา วาริวโห ปูโร คจฺฉํ น ๕- ปริวตฺตติ
@เชิงอรรถ: ๑ ม. ปลุคฺคํ ฯ ๒ สี. ยุ. ชีวิตกฺขเย ฯ ๓ ม. วิตเต ฯ ๔ ม. ยํ ยเทวูปวิยฺยติ ฯ
@สี. ยุ. ยํ ยํ เทวูปวิยฺยติ ฯ ๕ ม. นุปนิวตฺตติ ฯ
เอวมายุ มนุสฺสานํ คจฺฉํ น ปริวตฺตติ ๑- ฯ
|๔๓๙.๔| ยถา วาริวโห ปูโร วเห รุกฺเขปกูลเช
เอวํ ชราย มรเณน วุยฺหนฺเต สพฺพปาณิโน ฯ
[๔๔๐] |๔๔๐.๑| หตฺถานีกํ รถานีกํ อสฺเส ปตฺติญฺจ จมฺมิโน
นิเวสนานิ รมฺมานิ อหํ ปุตฺต ททามิ เต ฯ
|๔๔๐.๒| อิตฺถาคารญฺจ เต ทมฺมิ สพฺพาลงฺการภูสิตํ
ตา ปุตฺต ปฏิปชฺชสฺสุ ตฺวํ โน ราชา ภวิสฺสสิ ฯ
|๔๔๐.๓| กุสลา นจฺจคีตสฺส สิกฺขิตา จาตุริตฺถิโย
กาเม ตํ รมยิสฺสนฺติ กึ อรญฺเญ กริสฺสสิ ฯ
|๔๔๐.๔| ปฏิราชูหิ เต กญฺญา อานยิสฺสํ อลงฺกตา
ตาสุ ปุตฺเต ชเนตฺวาน อถ ปจฺฉา ปพฺพชิสฺสสิ ฯ
|๔๔๐.๕| ยุวา จ ทหโร จาปิ ปฐมุปฺปตฺติโต สุสู
รชฺชํ กาเรหิ ภทฺทนฺเต กึ อรญฺเญ กริสฺสสิ ฯ
|๔๔๐.๖| โกฏฺฐาคารญฺจ โกสญฺจ วาหนานิ พลานิ จ
นิเวสนานิ รมฺมานิ อหํ ปุตฺต ททามิ เต ฯ
|๔๔๐.๗| โคมณฺฑลปริพฺยูโฬฺห ทาสีสงฺฆปุรกฺขิโต ๒-
รชฺชํ กาเรหิ ภทฺทนฺเต กึ อรญฺเญ กริสฺสสิ ฯ
[๔๔๑] |๔๔๑.๑| กึ มํ ธเนน ขิยฺเยถ ๓- กึ ภริยาย มริสฺสติ
กึ โยพฺพเนน ชิณฺเณน ๔- ยํ ชรายาภิภุยฺยติ ฯ
|๔๔๑.๒| ตตฺถ กา นนฺทิ กา ขิฑฺฑา กา รติ กา ธเนสนา
@เชิงอรรถ: ๑ ม. นุปนิวตฺตติ ฯ ๒ ม. ...ปุรกฺขโต ฯ อปรํปิ อีทิสเมว ฯ ๓ ม. กึ ธเนน
@ยํ ขีเยถ ฯ สี. กึ ธเนน ยํ ชีเยถ ฯ ๔ สี. ยุ. จิณฺเณน ฯ
กึ เม ปุตฺเตหิ ทาเรหิ ราช มุตฺโตสฺมิ พนฺธนา ฯ
|๔๔๑.๓| โยหํ ๑- เอวํ ปชานามิ มจฺจุ เม นปฺปมชฺชติ
อนฺตเกนาธิปนฺนสฺส กา รติ กา ธเนสนา ฯ
|๔๔๑.๔| ผลานมิว ปกฺกานํ นิจฺจํ ปตนโต ภยํ
เอวํ ชาตาน มจฺจานํ นิจฺจํ มรณโต ภยํ ฯ
|๔๔๑.๕| สายเมเก น ทิสฺสนฺติ ปาโต ทิฏฺฐา พหู ชนา
ปาโต เอเก น ทิสฺสนฺติ สายํ ทิฏฺฐา พหู ชนา ฯ
|๔๔๑.๖| อชฺเชว กิจฺจมาตปฺปํ โก ชญฺญา มรณํ สุเว
น หิ โน สงฺครนฺเตน มหาเสเนน มจฺจุนา ฯ
|๔๔๑.๗| โจรา ธนสฺส ปตฺเถนฺติ ราช มุตฺโตสฺมิ พนฺธนา
เอหิ ราช นิวตฺตสฺสุ นาหํ รชฺเชน มตฺถิโกติ ฯ
เตมิยชาตกํ ปฐมํ ฯ
---------
๒ มหาชนกชาตกํ
[๔๔๒] โกยํ มชฺเฌ สมุทฺทสฺมึ อปสฺสนฺตีรมายุเห
กึ ๒- ตฺวํ อตฺถวสํ ญตฺวา เอวํ วายามเส ภุสํ ฯ
[๔๔๓] นิสมฺม วตฺตํ โลกสฺส วายมสฺส จ เทวเต
ตสฺมา มชฺเฌ สมุทฺทสฺมึ อปสฺสนฺตีรมายุเห ฯ
[๔๔๔] คมฺภีเร อปฺปเมยฺยสฺมึ ตีรํ ยสฺส น ทิสฺสติ
โมโฆ เต ปุริสวายาโม อปฺปตฺวาว มริสฺสสิ ฯ
@เชิงอรรถ: ๑ สี. ยุ. โสหํ ฯ ๒ ม. กํ ฯ
[๔๔๕] อนโณ ญาตีนํ โหติ เทวานํ ปิตุนญฺจ โส
กรํ ปุริสกิจฺจานิ น จ ปจฺฉานุตปฺปติ ฯ
[๔๔๖] อปารเณยฺยํ ยํ กมฺมํ อผลํ กิลมถุทฺทยํ
ตตฺถ โก วายเมนตฺโถ มจฺจุ ยสฺสาภินิปฺผตํ ๑- ฯ
[๔๔๗] |๔๔๗.๑| อปารเณยฺยมจฺจนฺตํ โย วิทิตฺวาน เทวเต
น รกฺเข อตฺตโน ปาณํ ชญฺญา โส ยทิ หาปเย ฯ
|๔๔๗.๒| อธิปฺปายผลํ เอเก อสฺมึ โลกสฺมิ เทวเต
ปโยชยนฺติ กมฺมานิ ตานิ อิชฺฌนฺติ วา น วา ฯ
|๔๔๗.๓| สนฺทิฏฺฐิกํ กมฺมผลํ นนุ ปสฺสสิ เทวเต
สนฺนา อญฺเญ ตรามหํ ตญฺจ ปสฺสามิ สนฺติเก ฯ
|๔๔๗.๔| โส อหํ วายมิสฺสามิ ยถาสตฺติ ยถาพลํ
คจฺฉํ ปารํ สมุทฺทสฺส กสฺสํ ปุริสการิยํ ฯ
[๔๔๘] โย ตฺวํ เอวํ คเต โอเฆ อปฺปเมยฺเย มหณฺณเว
ธมฺมวายามสมฺปนฺโน กมฺมุนา นาวสีทติ
โส ตฺวํ ตตฺเถว คจฺฉาหิ ยตฺถ เต นิรโต มโน ฯ
[๔๔๙] สุริยุคฺคมเน นิธิ อโถ โอคฺคมเน นิธิ
อนฺโต นิธิ พหิ นิธิ น อนฺโต น พหิ นิธิ
อาโรหเน มหานิธิ อโถ โอโรหเน นิธิ
จตูสุ มหาสาเลสุ สมนฺตา โยชเน นิธิ
ทนฺตคฺเคสุ มหานิธิ พาลคฺเคสุ จ เกปุเก ๒-
@เชิงอรรถ: ๑ ม. ...นิปฺปตํ ฯ ๒ เกพุเกติปิ ฯ
รุกฺขคฺเคสุ มหานิธิ โสฬเสเต มหานิธี
สหสฺสถาโม ปลฺลงฺโก สีวลาราธเนน จ ฯ
[๔๕๐] |๔๕๐.๑| อาสึเสเถว ๑- ปุริโส น นิพฺพินฺเทยฺย ปณฺฑิโต
ปสฺสามิ โวหํ อตฺตานํ ยถา อิจฺฉึ ตถา อหุ ฯ
|๔๕๐.๒| อาสึเสเถว ๑- ปุริโส น นิพฺพินฺเทยฺย ปณฺฑิโต
ปสฺสามิ โวหํ อตฺตานํ อุทกา ถลมุพฺภตํ ฯ
|๔๕๐.๓| วายเมเถว ปุริโส น นิพฺพินฺเทยฺย ปณฺฑิโต
ปสฺสามิ โวหํ อตฺตานํ ยถา อิจฺฉึ ตถา อหุ ฯ
|๔๕๐.๔| วายเมเถว ปุริโส น นิพฺพินฺเทยฺย ปณฺฑิโต
ปสฺสามิ โวหํ อตฺตานํ อุทกา ถลมุพฺภตํ ฯ
|๔๕๐.๕| ทุกฺขูปนีโตปิ นโร สปญฺโญ
อาสํ น ฉินฺเทยฺย สุขาคมาย
พหู หิ ผสฺสา อหิตา หิตา จ
อวิตกฺกิตาโร มจฺจุมุปฺปชฺชนฺติ ๒- ฯ
|๔๕๐.๖| อจินฺติตมฺปิ ภวติ จินฺติตมฺปิ วินสฺสติ
น หิ จินฺตามยา โภคา อิตฺถิยา ปุริสสฺส วา ฯ
[๔๕๑] |๔๕๑.๑| อโปราณํ ๓- วต โภ ราชา สพฺพภุมฺโม ทิสํปติ
นาชฺช นจฺเจ นิสาเมติ น คีเต กุรุเต มโน ฯ
|๔๕๑.๒| น มิเค นปิ อุยฺยาเน นปิ หํเส อุทิกฺขติ
มูโคว ตุณฺหีมาสีโน น อตฺถมนุสาสติ ฯ
@เชิงอรรถ: ๑ ม. อาสีเสเถว ฯ ๒ ม. อวิตกฺกิตา มจฺจุมุปพฺพชนฺติ ฯ ๓ สี. ยุ. อปุราณํ ฯ
[๔๕๒] |๔๕๒.๑| สุขกามา รโหสีลา วคฺคพนฺธา อปารุตา ๑-
กสฺส ๒- นุ อชฺช อาราเม ทหรา วุฑฺฒา จ อจฺฉเร
|๔๕๒.๒| อติกฺกนฺตวนถา ธีรา นโม เตสํ มเหสินํ
เย อุสฺสุกฺกมฺหิ โลกมฺหิ วิหรนฺติ อนุสฺสุกา
|๔๕๒.๓| เต เฉตฺวา มจฺจุโน ชาลํ ตนฺตํ ๓- มายาวิโน ทฬฺหํ
สนฺทาลยนฺตา ๔- คจฺฉนฺติ โก เตสํ คติมาปเย ฯ
[๔๕๓] |๔๕๓.๑| กทาหํ มิถิลํ ผีตํ วิภตฺตํ ภาคโส มิตํ
ปหาย ปพฺพชิสฺสามิ ตํ กทา ๕- สุ ภวิสฺสติ ฯ
|๔๕๓.๒| กทาหํ มิถิลํ ผีตํ วิสาลํ สพฺพโต ปภํ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๓| กทาหํ มิถิลํ ผีตํ พหุปาการโตรณํ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๔| กทาหํ มิถิลํ ผีตํ ทฬฺหมฏฺฏาลโกฏฺฐกํ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๕| กทาหํ มิถิลํ ผีตํ สุวิภตฺตํ มหาปถํ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๖| กทาหํ มิถิลํ ผีตํ สุวิภตฺตนฺตราปณํ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๗| กทาหํ มิถิลํ ผีตํ ควสฺสรถปีฬิตํ
ปหาย ปพฺพชิสฺสามิ ตํ กทา สุ ภวิสฺสติ ฯ
@เชิงอรรถ: ๑ ม. วธพนฺธา อปารตา ฯ ๒ สี. ยุ. เกสํ ฯ ๓ ม. ตตํ ฯ ๔ ม. ฉินฺนาลยตฺตา ฯ
@๕ ม. กุทาสฺสุ ฯ อิโต ปรํ อีทิสเมว ฯ
|๔๕๓.๘| กทาหํ มิถิลํ ผีตํ อารามวนมาลินึ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๙| กทาหํ มิถิลํ ผีตํ อุยฺยานวนมาลินึ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๑๐| กทาหํ มิถิลํ ผีตํ ปาสาทวรมาลินึ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๑๑| กทาหํ มิถิลํ ผีตํ ติปุรํ ราชพนฺธุนึ
มาปิตํ โสมนสฺเสน เวเทเหน ยสสฺสินา
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๑๒| กทาหํ วิเทเห ๑- ผีเต นิจิเต ธมฺมรกฺขิเต
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๑๓| กทาหํ วิเทเห ผีเต อเชยฺเย ธมฺมรกฺขิเต
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๑๔| กทาหํ อนฺเตปุรํ รมฺมํ วิภตฺตํ ภาคโส มิตํ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๑๕| กทาหํ อนฺเตปุรํ รมฺมํ สุธามตฺติกเลปนํ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๑๖| กทาหํ อนฺเตปุรํ รมฺมํ สุจิคนฺธํ มโนรมํ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๑๗| กทาหํ กูฏาคาเร จ วิภตฺเต ภาคโส มิเต
@เชิงอรรถ: ๑ ม. เวเทเห ฯ อิโต ปรํ อีทิสเมว ฯ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๑๘| กทาหํ กูฏาคาเร จ สุธามตฺติกเลปเน
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๑๙| กทาหํ กูฏาคาเร จ สุจิคนฺเธ มโนรเม
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๒๐| กทาหํ กูฏาคาเร จ ลิตฺเต จนฺทนโผสิเต
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๒๑| กทาหํ สุวณฺณปลฺลงฺเก โคณเก จิตฺตสนฺถเต
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๒๒| กทาหํ มณิปลฺลงฺเก โคณเก จิตฺตสนฺถเต
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๒๓| กทาหํ กปฺปาสโกเสยฺยํ โขมโกทุมฺพรานิ จ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๒๔| กทาหํ โปกฺขรณี รมฺมา จากวากปกูชิตา ๑-
มณฺฑาลเกหิ สญฺฉนฺนา ปทุมุปฺปลเกหิ จ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๒๕| กทาหํ หตฺถิคุมฺเพ จ สพฺพาลงฺการภูสิเต
สุวณฺณกจฺเฉ มาตงฺเค เหมกปฺปนิวาสเส
|๔๕๓.๒๖| อารุเฬฺห คามนีเยภิ โตมรงฺกุสปาณิภิ
ปหาย ปพฺพชิสฺสามิ ตํ กทา สุ ภวิสฺสติ ฯ
@เชิงอรรถ: ๑ ม. จกฺกวากปกูชิตา ฯ
|๔๕๓.๒๗| กทาหํ อสฺสคุมฺเพ จ สพฺพาลงฺการภูสิเต
อาชานีเยว ชาติยา สินฺธเว สีฆวาหเน
|๔๕๓.๒๘| อารุเฬฺห คามนีเยภิ อินฺทิยาจาปธาริภิ ๑-
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๒๙| กทาหํ รถเสนิโย สนฺนทฺเธ อุสฺสิตทฺธเช
ทีเป อโถปิ เวยฺยคฺเฆ สพฺพาลงฺการภูสิเต
|๔๕๓.๓๐| อารุเฬฺห คามนีเยภิ จาปหตฺเถหิ จมฺมิภิ ๒-
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๓๑| กทาหํ โสวณฺณรเถ สนฺนทฺเธ อุสฺสิตทฺธเช
ทีเป อโถปิ เวยฺยคฺเฆ สพฺพาลงฺการภูสิเต
|๔๕๓.๓๒| อารุเฬฺห คามนีเยภิ จาปหตฺเถหิ จมฺมิภิ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๓๓| กทาหํ สชฺฌุรเถ จ สนฺนทฺเธ อุสฺสิตทฺธเช
ทีเป อโถปิ เวยฺยคฺเฆ สพฺพาลงฺการภูสิเต
|๔๕๓.๓๔| อารุเฬฺห คามนีเยภิ จาปหตฺเถหิ จมฺมิภิ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๓๕| กทาหํ อสฺสรเถ จ สนฺนทฺเธ อุสฺสิตทฺธเช
ทีเป อโถปิ เวยฺยคฺเฆ สพฺพาลงฺการภูสิเต
|๔๕๓.๓๖| อารุเฬฺห คามนีเยภิ จาปหตฺเถหิ จมฺมิภิ
ปหาย ปพฺพชิสฺสามิ ตํ กทา สุ ภวิสฺสติ ฯ
@เชิงอรรถ: ๑ ม. อิลฺลิยาจาปธาริภิ ฯ ๒ ม. วมฺมิภิ ฯ อิโต ปรํ อีทิสเมว ฯ
|๔๕๓.๓๗| กทาหํ โอฏฺฐรเถ จ สนฺนทฺเธ อุสฺสิตทฺธเช
ทีเป อโถปิ เวยฺยคฺเฆ สพฺพาลงฺการภูสิเต
|๔๕๓.๓๘| อารุเฬฺห คามนีเยภิ จาปหตฺเถหิ จมฺมิภิ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๓๙| กทาหํ โคณรเถ จ สนฺนทฺเธ อุสฺสิตทฺธเช
ทีเป อโถปิ เวยฺยคฺเฆ สพฺพาลงฺการภูสิเต
|๔๕๓.๔๐| อารุเฬฺห คามนีเยภิ จาปหตฺเถหิ จมฺมิภิ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๔๑| กทาหํ อชรเถ จ สนฺนทฺเธ อุสฺสิตทฺธเช
ทีเป อโถปิ เวยฺยคฺเฆ สพฺพาลงฺการภูสิเต
|๔๕๓.๔๒| อารุเฬฺห คามนีเยภิ จาปหตฺเถหิ จมฺมิภิ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๔๓| กทาหํ เมณฺฑรเถ จ สนฺนทฺเธ อุสฺสิตทฺธเช
ทีเป อโถปิ เวยฺยคฺเฆ สพฺพาลงฺการภูสิเต
|๔๕๓.๔๔| อารุเฬฺห คามนีเยภิ จาปหตฺเถหิ จมฺมิภิ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๔๕| กทาหํ มิครเถ จ สนฺนทฺเธ อุสฺสิตทฺธเช
ทีเป อโถปิ เวยฺยคฺเฆ สพฺพาลงฺการภูสิเต
|๔๕๓.๔๖| อารุเฬฺห คามนีเยภิ จาปหตฺเถหิ จมฺมิภิ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๔๗| กทาหํ หตฺถาโรเห จ สพฺพาลงฺการภูสิเต
นีลจมฺมธเร สูเร โตมรงฺกุสปาณิโน
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๔๘| กทาหํ อสฺสาโรเห จ สพฺพาลงฺการภูสิเต
นีลจมฺมธเร สูเร อินฺทิยาจาปธาริโน ๑-
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๔๙| กทาหํ รถาโรเห จ สพฺพาลงฺการภูสิเต
นีลจมฺมธเร สูเร จาปหตฺเถ กลาปิโน ๒-
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๕๐| กทาหํ ธนุคฺคเห จ สพฺพาลงฺการภูสิเต
นีลจมฺมธเร สูเร จาปหตฺเถ กลาปิโน ๒-
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๕๑| กทาหํ ราชปุตฺเต จ สพฺพาลงฺการภูสิเต
จิตฺรจมฺมธเร ๓- สูเร กญฺจนาเวฬุธาริโน ๔-
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๕๒| กทาหํ อริยคเณ วตฺถวนฺเต ๕- อลงฺกเต
หริจนฺทนลิตฺตงฺเค กาสิกุตฺตมธาริโน ๖-
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๕๓| กทาหํ อมจฺจคเณ สพฺพาลงฺการภูสิเต
ปีตจมฺมธเร สูเร ปุรโต คจฺฉมาลิโน ๗-
@เชิงอรรถ: ๑ ม. อิลฺลิยาจาปธาริเน ฯ ๒ ม. กลาปิเน ฯ ๓ ม. จิตฺรวมฺมธเร ฯ ๔-๖ ม. ...
@ธาริเน ฯ ๕ ม. วตวนฺเต ฯ ๗ ม. คจฺฉมาลิเน ฯ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๕๔| กทาหํ สตฺตสตา ภริยา สพฺพาลงฺการภูสิตา
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๕๕| กทาหํ สตฺตสตา ภริยา สุสญฺญา ตนุมชฺฌิมา
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๕๖| กทาหํ สตฺตสตา ภริยา อสฺสวา ปิยภาณินี
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๕๗| กทาหํ สตปลกํสํ โสวณฺณํ สตราชิกํ
ปหาย ปพฺพชิสฺสามิ ตํ กทา สุ ภวิสฺสติ ฯ
|๔๕๓.๕๘| กทา สุ มํ หตฺถิคุมฺพา สพฺพาลงฺการภูสิตา
สุวณฺณกจฺฉา มาตงฺคา เหมกปฺปนิวาสสา
|๔๕๓.๕๙| อารุฬฺหา คามนีเยภิ โตมรงฺกุสปาณิภิ
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๖๐| กทา สุ มํ อสฺสคุมฺพา สพฺพาลงฺการภูสิตา
อาชานียาว ชาติยา สินฺธวา สีฆวาหนา
|๔๕๓.๖๑| อารุฬฺหา คามนีเยภิ อินฺทิยาจาปธาริภิ
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๖๒| กทา สุ มํ รถเสนิโย สนฺนทฺธา อุสฺสิตทฺธชา
ทีปา อโถปิ เวยฺยคฺฆา สพฺพาลงฺการภูสิตา
|๔๕๓.๖๓| อารุฬฺหา คามนีเยภิ จาปหตฺเถหิ จมฺมิภิ
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๖๔| กทา สุ มํ สุวณฺณรถา สนฺนทฺธา อุสฺสิตทฺธชา
ทีปา อโถปิ เวยฺยคฺฆา สพฺพาลงฺการภูสิตา
|๔๕๓.๖๕| อารุฬฺหา คามนีเยภิ จาปหตฺเถหิ จมฺมิภิ
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๖๖| กทา สุ มํ สชฺฌุรถา สนฺนทฺธา อุสฺสิตทฺธชา
ทีปา อโถปิ เวยฺยคฺฆา สพฺพาลงฺการภูสิตา
|๔๕๓.๖๗| อารุฬฺหา คามนีเยภิ จาปหตฺเถหิ จมฺมิภิ
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๖๘| กทา สุ มํ อสฺสรถา สนฺนทฺธา อุสฺสิตทฺธชา
ทีปา อโถปิ เวยฺยคฺฆา สพฺพาลงฺการภูสิตา
|๔๕๓.๖๙| อารุฬฺหา คามนีเยภิ จาปหตฺเถหิ จมฺมิภิ
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๗๐| กทา สุ มํ โอฏฺฐรถา สนฺนทฺธา อุสฺสิตทฺธชา
ทีปา อโถปิ เวยฺยคฺฆา สพฺพาลงฺการภูสิตา
|๔๕๓.๗๑| อารุฬฺหา คามนีเยภิ จาปหตฺเถหิ จมฺมิภิ
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๗๒| กทา สุ มํ โคณรถา สนฺนทฺธา อุสฺสิตทฺธชา
ทีปา อโถปิ เวยฺยคฺฆา สพฺพาลงฺการภูสิตา
|๔๕๓.๗๓| อารุฬฺหา คามนีเยภิ จาปหตฺเถหิ จมฺมิภิ
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๗๔| กทา สุ มํ อชรถา สนฺนทฺธา อุสฺสิตทฺธชา
ทีปา อโถปิ เวยฺยคฺฆา สพฺพาลงฺการภูสิตา
|๔๕๓.๗๕| อารุฬฺหา คามนีเยภิ จาปหตฺเถหิ จมฺมิภิ
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๗๖| กทา สุ มํ เมณฺฑรถา สนฺนทฺธา อุสฺสิตทฺธชา
ทีปา อโถปิ เวยฺยคฺฆา สพฺพาลงฺการภูสิตา
|๔๕๓.๗๗| อารุฬฺหา คามนีเยภิ จาปหตฺเถหิ จมฺมิภิ
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๗๘| กทา สุ มํ มิครถา สนฺนทฺธา อุสฺสิตทฺธชา
ทีปา อโถปิ เวยฺยคฺฆา สพฺพาลงฺการภูสิตา
|๔๕๓.๗๙| อารุฬฺหา คามนีเยภิ จาปหตฺเถหิ จมฺมิภิ
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๘๐| กทา สุ มํ หตฺถาโรหา สพฺพาลงฺการภูสิตา
นีลจมฺมธรา สูรา โตมรงฺกุสปาณิโน
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๘๑| กทา สุ มํ อสฺสาโรหา สพฺพาลงฺการภูสิตา
นีลจมฺมธรา สูรา อินฺทิยาจาปธาริโน
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๘๒| กทา สุ มํ รถาโรหา สพฺพาลงฺการภูสิตา
นีลจมฺมธรา สูรา จาปหตฺถา กลาปิโน
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๘๓| กทา สุ มํ ธนุคฺคหา สพฺพาลงฺการภูสิตา
นีลจมฺมธรา สูรา จาปหตฺถา กลาปิโน
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๘๔| กทา สุ มํ ราชปุตฺตา สพฺพาลงฺการภูสิตา
จิตฺรจมฺมธรา สูรา กญฺจนาเวฬธาริโน
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๘๕| กทา สุ มํ อริยคณา วตฺถวนฺตา ๑- อลงฺกตา
หริจนฺทนลิตฺตงฺคา กาสิกุตฺตมธาริโน
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๘๖| กทา สุ มํ อมจฺจคณา สพฺพาลงฺการภูสิตา
ปีตจมฺมธรา สูรา ปุรโต คจฺฉมาลินี ๒-
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๘๗| กทา สุ มํ สตฺตสตา ภริยา สพฺพาลงฺการภูสิตา
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๘๘| กทา สุ มํ สตฺตสตา ภริยา สุสญฺญา ตนุมชฺฌิมา
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
|๔๕๓.๘๙| กทา สุ มํ สตฺตสตา ภริยา อสฺสวา ปิยภาณินี
ยนฺตํ มํ นานุยิสฺสนฺติ ตํ กทา สุ ภวิสฺสติ ฯ
@เชิงอรรถ: ๑ ม. วตวนฺตา ฯ ๒ ม. คจฺฉมาลิโน ฯ
|๔๕๓.๙๐| กทาหํ ปตฺตํ คเหตฺวาน มุณฺโฑ สงฺฆาฏิปารุโต
ปิณฺฑิกาย จริสฺสามิ ตํ กทา สุ ภวิสฺสติ ฯ
|๔๕๓.๙๑| กทาหํ ปํสุกูลานํ อุชฺฌิตานํ มหาปเถ
สงฺฆาฏึ ธารยิสฺสามิ ตํ กทา สุ ภวิสฺสติ ฯ
|๔๕๓.๙๒| กทาหํ สตฺตาหํ เมเฆ ๑- โอวุฏฺเฐ อลฺลจีวโร
ปิณฺฑิกาย จริสฺสามิ ตํ กทา สุ ภวิสฺสติ ฯ
|๔๕๓.๙๓| กทาหํ สพฺพณฺหํ ๒- คนฺตฺวา รุกฺขา รุกฺขํ วนา วนํ
อนเปกฺโข จริสฺสามิ ๓- ตํ กทา สุ ภวิสฺสติ ฯ
|๔๕๓.๙๔| กทาหํ คิริทุคฺเคสุ ปหีนภยเภรโว
อทุติโย คมิสฺสามิ ๔- ตํ กทา สุ ภวิสฺสติ ฯ
|๔๕๓.๙๕| กทาหํ วีณรุชฺชโกว ๕- สตฺตตนฺตึ มโนรมํ
จิตฺตํ อุชุํ กริสฺสามิ ตํ กทา สุ ภวิสฺสติ ฯ
|๔๕๓.๙๖| กทาหํ รถกาโรว ปริกนฺตํ อุปาหนํ
กามสํโยชเน เฉจฺฉํ เย ทิพฺเพ เย จ มานุเส ฯ
[๔๕๔] |๔๕๔.๑| ตา จ สตฺตสตา ภริยา สพฺพาลงฺการภูสิตา
พาหา ปคฺคยฺห ปกฺกนฺทุํ กสฺมา โน วิชหิสฺสสิ ฯ
|๔๕๔.๒| ตา จ สตฺตสตา ภริยา สุสญฺญา ตนุมชฺฌิมา
พาหา ปคฺคยฺห ปกฺกนฺทุํ กสฺมา โน วิชหิสฺสสิ ฯ
|๔๕๔.๓| ตา จ สตฺตสตา ภริยา อสฺสวา ปิยภาณินี
พาหา ปคฺคยฺห ปกฺกนฺทุํ กสฺมา โน วิชหิสฺสสิ ฯ
@เชิงอรรถ: ๑ ม. สตฺตาหสมฺเมเฆ ฯ ๒ สี. ม. สพฺพหํ ฐานํ ฯ ยุ. สพฺพาหํ ฐานํ ฯ
@๓ ม. คมิสฺสามิ ฯ สี. ยุ. วิหริสฺสามิ ฯ ๔ สี. ยุ. วิหริสฺสามิ ฯ
@๕ ม. วีณํว รุชฺชโก ฯ
|๔๕๔.๔| ตา จ สตฺตสตา ภริยา สพฺพาลงฺการภูสิตา
หิตฺวา สมฺปทวี ๑- ราชา ปพฺพชฺชาย ปุรกฺขิโต ฯ
|๔๕๔.๕| ตา จ สตฺตสตา ภริยา สุสญฺญา ตนุมชฺฌิมา
หิตฺวา สมฺปทวี ๑- ราชา ปพฺพชฺชาย ปุรกฺขิโต ฯ
|๔๕๔.๖| ตา จ สตฺตสตา ภริยา อสฺสวา ปิยภาณินี
หิตฺวา สมฺปทวี ๑- ราชา ปพฺพชฺชาย ปุรกฺขิโต ฯ
|๔๕๔.๗| หิตฺวา สตปลฺลกํสํ โสวณฺณํ สตราชิกํ
อคฺคหิ มตฺติกาปตฺตํ ตํ ทุติยาภิเสจนํ ฯ
[๔๕๕] |๔๕๕.๑| เภสฺมา อคฺคิสมา ชาลา โกสา ฑยฺหนฺติ ภาคโส
รชตํ ชาตรูปญฺจ มุตฺตา เวฬุริยา พหู
|๔๕๕.๒| มณโย สงฺขมุตฺตา จ วตฺถกํ ๒- หริจนฺทนํ
อชินํ ทนฺตภณฺฑญฺจ โลหํ กาฬายสํ พหุํ
เอหิ ราช นิวตฺตสฺสุ มา เต ตํ วินสฺสา ๓- ธนํ ฯ
[๔๕๖] สุสุขํ วต ชีวาม เยสนฺโน นตฺถิ กิญฺจนํ
มิถิลาย ฑยฺหมานาย น เม กิญฺจิ อฑยฺหถ ฯ
[๔๕๗] อฏวิโย สมุปฺปนฺนา รฏฺฐํ วิทฺธํสยนฺติ เต
เอหิ ราช นิวตฺตสฺสุ มา รฏฺฐํ วินสฺสา ๓- อิทํ ฯ
[๔๕๘] |๔๕๘.๑| สุสุขํ วต ชีวาม เยสนฺโน นตฺถิ กิญฺจนํ
รฏฺเฐ วิลุมฺปมานมฺหิ น เม กิญฺจิ อหารถ
@เชิงอรรถ: ๑ สี. สมฺปทฺทยี ฯ ม. สมฺปทฺทวี ฯ ๒ ม. วตฺถิกํ ฯ ๓ ม. วินสา ฯ
|๔๕๘.๒| สุสุขํ วต ชีวาม เยสนฺโน นตฺถิ กิญฺจนํ
ปีติภกฺขา ภวิสฺสาม เทวา อาภสฺสรา ยถา ฯ
[๔๕๙] กิเมฺหโส มหโต โฆโส กา นุ คาเมว กีฬิยา
สมณ เตฺวว ปุจฺฉามิ กตฺเถโสภิสโฏ ชโน ฯ
[๔๖๐] มมํ โอหาย คจฺฉนฺตํ เอตฺเถโสภิสโฏ ชโน
สีมาติกฺกมนํ ยนฺตํ มุนิโมนสฺส ปตฺติยา
มิสฺสํ นนฺทีหิ คจฺฉนฺตํ กึ ชานมนุปุจฺฉสิ ฯ
[๔๖๑] มาสฺสุ ติณฺโณ อมญฺญิตฺโถ ๑- สรีรํ ธารยํ อิมํ
อตีรเณยฺยมิทํ กมฺมํ พหู หิ ปริปนฺถโย ฯ
[๔๖๒] โก นุ เม ปริปนฺถสฺส มม เอวํวิหาริโน
โย เนว ทิฏฺเฐ นาทิฏฺเฐ กามานมภิปตฺถเย ฯ
[๔๖๓] นิทฺทา ตนฺทิ วิชมฺภิตา อรติ ภตฺตสมฺมโท
อาวสนฺติ สรีรฏฺฐา พหู หิ ปริปนฺถโย ฯ
[๔๖๔] กลฺยาณํ วต มํ ภวํ พฺราหฺมณ อนุสาสสิ
พฺราหฺมณ เตฺวว ปุจฺฉามิ โก นุ ตฺวมสิ มาริส ฯ
[๔๖๕] |๔๖๕.๑| นารโท อิติ นาเมน กสฺสโป อิติ มํ วิทู
โภโต สงฺกาเส อาคจฺฉึ สาธุ สพฺภิ สมาคโม ฯ
|๔๖๕.๒| ตสฺส เต สพฺโพ อานนฺโท วิหาโร อุปวตฺตตุ
ยทูนํ ตํ ปริปูเรหิ ขนฺติยา อุปสเมน จ ฯ
|๔๖๕.๓| ปสารย สนฺนตญฺจ อุนฺนตญฺจ ปหารย ๒-
@เชิงอรรถ: ๑ ม. อมญฺญิตฺถ ฯ ๒ ม. ปสารยุ ฯ
กมฺมํ วิชฺชญฺจ ธมฺมญฺจ สกฺกตฺวาน ปริพฺพช ฯ
[๔๖๖] |๔๖๖.๑| พหู หตฺถี จ อสฺเส จ นคเร ชนปทานิ จ
หิตฺวา ชนก ปพฺพชิโต กปาเล ๑- รติมชฺฌคา
|๔๖๖.๒| กจฺจิ นุ เต ชานปทา มิตฺตามจฺจา จ ญาตกา
ทูภึ อกํสุ ชนก กสฺมา เต ตํ อรุจฺจถ ฯ
[๔๖๗] น มิคาชิน ชาตุจฺเฉ อหํ กิญฺจิ กุทาจนํ
อธมฺเมน ชิเน ญาตึ น จาปิ ญาตโย มมํ ฯ
[๔๖๘] ทิสฺวาน โลกวตฺตนฺตํ ขชฺชนฺตํ กทฺทมีกตํ
หญฺญเร วชฺฌเร เจตฺถ ยตฺถ สนฺโน ๒- ปุถุชฺชโน
เอตาหํ อุปมํ กตฺวา ภิกฺขโกสฺมิ มิคาชิน ฯ
[๔๖๙] โก นุ เต ภควา สตฺถา กสฺเสตํ วจนํ สุจึ ๓-
น หิ กปฺปํ วา วิชฺชํ วา ปจฺจกฺขาย รเถสภ
สมณมาหุ วตฺตนฺตํ ยถา ทุกฺขสฺสติกฺกโม ฯ
[๔๗๐] |๔๗๐.๑| น มิคาชน ชาตุจฺเฉ อหํ กิญฺจิ กุทาจนํ
สมณํ พฺราหฺมณํ วาปิ สกฺกตฺวา อนุปาวิสึ ฯ
|๔๗๐.๒| มหตา จานุภาเวน คจฺฉนฺโต สิริยา ชลํ
คียมาเนสุ คีเตสุ วชฺชมาเนสุ วคฺคุสุ
|๔๗๐.๓| ตูริยตาลิตสงฺฆุฏฺเฐ ๔- สมฺมตาลสมาหิเต
ส มิคาชิน มทฺทกฺขึ ผลึ อมฺพํ ติโรจฺฉทํ
ตุทมานํ ๕- มนุสฺเสหิ ผลกาเมหิ ชนฺตุภิ
@เชิงอรรถ: ๑ สี. ยุ. กปลฺเล ฯ ๒ สี. สตฺโต ฯ ๓ ม. สุจิ ฯ ๔ ม. ตูริยตาฬสงฺฆุฏฺเฐ ฯ
@๕ สี. ตุชฺชมานํ ฯ ม. หญฺญมานํ ฯ ยุ. ตทฺทมานํ ฯ
|๔๗๐.๔| โส โขหตํ สิรึ หิตฺวา โอโรหิตฺวา มิคาชิน
มูลํ อมฺพสฺสุปาคญฺฉึ ผลิโน นิปฺผลสฺส จ
|๔๗๐.๕| ผลึ อมฺพํ หตํ ทิสฺวา วิทฺธสฺตํ วินลีกตํ ๑-
อเถกํ อิตรํ อมฺพํ นีโลภาสํ มโนรมํ
|๔๗๐.๖| เอวเมว นูนเมฺหปิ อิสฺสเร พหุกณฺฏเก
อมิตฺตา โน วธิสฺสนฺติ ยถา อมฺโพ ผลี หโต
|๔๗๐.๗| อชินมฺหิ หญฺญเต ทีปิ นาโค ทนฺเตหิ หญฺญติ
ธนมฺหิ ธนิโน หนฺติ อนิเกตมสนฺถวํ
ผลี อมฺโพ อผโล จ เต สตฺถาโร อุโภ มม ฯ
[๔๗๑] |๔๗๑.๑| สพฺโพ ชโน สพฺยาธิโต ๒- ราชา ปพฺพชิโต อิติ
หตฺถาโรหา อนีกฏฺฐา รถิกา ปตฺติการกา
|๔๗๑.๒| อสฺสาสยิตฺวา ชนตํ ฐปยิตฺวา ปฏิจฺฉทํ
ปุตฺตํ รชฺเช ฐเปตฺวาน อถ ปจฺฉา ปพฺพชิสฺสสิ ฯ
[๔๗๒] จตฺตา มยา ชานปทา มิตฺตามจฺจา จ ญาตกา
สนฺติ ปุตฺตา วิเทหานํ ทีฆาวุ รฏฺฐวฑฺฒโน
เต รชฺชํ การยิสฺสนฺติ มิถิลายํ ปชาปติ ฯ
เนื้อความพระไตรปิฎกฉบับภาษาบาลีอักษรไทย เล่มที่ ๒๘ หน้าที่ ๑๕๓-๑๘๒.
https://84000.org/tipitaka/read/pali_item.php?book=28&item=394&items=79&mode=bracket
อ่านโดยใช้เนื้อความเป็นเกณฑ์แบ่งข้อ :-
https://84000.org/tipitaka/read/pali_item.php?book=28&item=394&items=79
อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=28&item=394&items=79&mode=bracket
อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=28&item=394&items=79&mode=bracket
ศึกษาอรรถกถาชาดกนี้ได้ที่ :-
https://84000.org/tipitaka/attha/attha.php?b=28&i=394
สารบัญพระไตรปิฎกเล่มที่ ๒๘
https://84000.org/tipitaka/read/?index_28
https://84000.org/tipitaka/english/?index_28
บันทึก ๒ ธันวาคม พ.ศ. ๒๕๕๙.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย.
หากพบข้อผิดพลาด กรุณาแจ้งได้ที่ [email protected]
